A Chedaol Ruoll Lolsobel a Meskid a Mengasireng el Llomes
Sel doruul chedaol ruoll e doltirakl a telbiil lobengkel e ked emo metik er a llomes me a ucheliu er a tial milkolk el beluulechad.
Rodam me a rodos, Ak kuldeu er a renguk lobengkemiu el ngara ebangkelio, malechub eng osisecheklel a Kristo.
A sechelik a mle tal loker er a Elder Neil L. Andersen, sel taem el chedal a Rokeuid, el kmo ngerang omelchesuar sel longedecheduch er a mederir a re 21,000 el chad el ngara Conference Center. A Elder Andersen a ulenger, “Ng diak el tirkel 21,000 el rechad a rulak el mo omritel a uluk; bai tirkel teruich me a teim el Rodam el dengchokl er a rulek.” Sel taem eak kulcherechur, engdi chelchang eak kumelchesuar el uaisei. Ng kmal betik a renguk e oldubech er tirkal teruich me a teim el chad el profet, chad er a ues, me a ulaoch.
A Rubak a dilu er a Abraham el kmo ngokiu er a rengelkel me a priesthoood, ea rokui el telungalek er a beluulechad a mo mukngeltengat loba klengeltengat er a Ebangkelio, me a diak a ulebengelel klengar (Abraham 2:11; dirrek el mesa bades 2–10).
Aikal klengeltengat el yaksok a ebangkelio me a priesthood a liluut el mei er a beluulechad, e ser a 1842, ea Profet Josehp Smith a milsterir a endowment el mo er a telkael lochur er a sechal me a redil. A Mercy Fielding Thompson a mle tar tir. A Profet a dilu er ngii el kmo, “Tial [klengeltengat] a mo otebedau er a ilkolk el mor a mengasireng el llomes.”1
Chelecha el sils eng soak el mo mesaod el kirel a olsobel chedaol ruoll—el ngii a mo meskau e meskak a mengaisreng el llomes.
Chedaol Ruoll me a Telbiil
Chelsel sel True to the Faith e kede chiuii el uasei: “A chedaol ruoll a chedaol, el teletael el loruul er ngii lokiu ngkel loba priesthood. [A] chedaol ruoll [el] ngii a klou a ulsbechelel el kirel a osebeled … a lomekedong el olsobel chedaol ruoll. Aikang a uldimukl er a techolbechelid, omlterekokl, mora Melchizedek Priesthood (mora rsechal) klengeltengat er a templo, me a rengedel a chelebechiil.”2
A Elder David A. Bednar a ulisechakl, “A chedaol ruoll er a olsobel a mlo er ngii sera oltel a Ikelesia er a Rubak … el ngii a ngar ngii a rolel maikel klengeltengat me a klisichel a babeluades a sebechel mera klengar er a dertal chad.”3
Di uai a bitang me a bitang er a udoud el chimong, a rokui el olosbel chedaol ruoll a ngar ngii a telbiil lobengkel a Dios lobengkel. A Dios a yaksok er kid a klengeltengat alsekum kid a oltirakl e meruul aikel telbiil.
A profet Amulek a dilu, “Le tia ikid … a belsechel… el mengedmokl el mo omes er a Dios” (Alma 34:32). Ng mekerang a dongedmokl er kid? Ngsel de klikiid el melai a chedaol ruoll. Kid a dirrek el kired, uai sel tekingel a President Russell M. Nelson, “molemolm el meruul a telbiil lobengkel a Chedam er a Babeluades.” A President Nelson a milemolm el kmul uase, “Sel mleia er a rengum el mo oltirakl er a Osobel lokiu a omeruul telbiil Lobengkel e oltirakl aikel telbiil a mo mekengii a techall el mora rokui el chedaol klengeltengat me a omeruul el sebechel mo er a resechal, redil, me a rengalek el ngara ngidil ker.”4
A John me a Bonnie Newman, el di uai a betok er kemiu, a ngilai a chedaol klengeltengat el President Nelson a mle yaksok. Tal Sandei, uriul e ra ikelsia e ngii me a tedei el mekekerei el rengekel, ea Bonnie dula er a John el kmo, “Ngak a diak el sebechek el dingak el tang lobtiterir tirkal rengalk el mora ikelesia. Ng kirem el tibir el kmo ke obengkek el mo er a ikelesia er ngak malechub em sikii a ikelesia el sebeched el dmak rokui el mo er ngii, ele tirkal ngalek a kirir mo medengei el kmo a demerir a betik a rengul er a Dios el dirrek.” Sel mei Sandei me a bek el Sandei, ea John a mlo er a ikelesia; ngii a ulngeseu, ousekool a piano el mora betok el ward, branch, me a Primary el melai a rak. Ng mla er ngii a techellek el mesang a John er sera April 2015, e sel ongdibel, ea ki milsaod el kmo a ungil rolel e ngii a ochotii a beltkil a rengul el mo er a Bonnie a se lenguu el mo er a templo, engdi tiang a diak el sebechel duubech alsekum ngdiak el metecholb.
Uriul er a lomais el ngera Ikelesia er a Jesus Kristo er a Uriul-klebesei el Santo el okedei me a etiu el rak, ea John a miltecholb sera 2015. A John me a Bonni a mlo merenged a chelebechilir er sel Memphis Tennessee Temple, el uriul er a lluich el rak e a Bonnie nguu a klengeltengat er ngii. Ngkel 47 a rekil ngelekir sechal, el Robert, a dilu el kirel a demal uase, “A chedam a kmal meral, meral mla mukeroul sera lenguu a priesthood.” A Bonnie dilchelii el uase, “A John a mle blehcoel lungil a rengul chad, engdi sera loruul a chedaol ruoll e oltirakl a telbilel a kmal mengal mla rulii el mo medemedemk el chad.”
Tngakireng er a Kristo me a Okesiul
Betok el rak er a mla memong, ea President Boyd K. Packer a milngelechel el uase, “Ungil omeruul el diak el ngar ngii a chedaol ruoll er a ebangkelio a diak losebelii a chad.”5 Meng merang, kid a diak dil kired lousbech er a chedaol ruoll me a telbiil el lemuut el mo er a Chedam, ngdirrek el kired lousbech er a Ngelekel Sechal, el Jesus Kristo, me a Tngakireng er Ngii.
King Benjamin a ulisechakl el kmo ngokiu a dital ngklel a Kristo ea rechad a mo suobel (mesa Mosiah 3:17; dirrek el mesa Articles of Faith 1:3).
Ngokiu a Tngakireng er Ngii, ea Jesus Kriso a osebelid er a kekka er sel Rebetel a Adam e rirelii meng sebeched el mo ouchel a rengud er a kengtid e mo suobel. Ngokiu a klengar er Ngii, Ngii a ulechotii a okesiu el merkid el mo ngmai a olsobel chedaol ruoll, el sel klisichel a keldios a mo chemolt (mesa D&C 84:20).
Uriul er a Osobel a lenguu sel chedaol ruoll er a techolbechelid el “moltirakl a llemalt” (mesa 2 Nephi 31:5–6), a Diablong a milngesuseu er Ngii. Osisiu, ea omengesuseu a diak el bol lak sel demetecholb malechub e demerenged, engdi sel dengai a chedaol ruoll e oltirakl aikel telbiil eng meskid a mengasireng el llomes e meskid a klisiched el mo oltngakl a olasm el mengesuseu.
Uleklatk
A Isaiah a ulemlaoch el kmo sel uriul klebesei, “a rechad a kikingelii a beluulechad … eleng te… uleiit a telbiil” (Isaiah 24:5; dirrek el mesa D&C 1:15).
A osisiu el uleklatk a, mlucholt el mo er a Profet Joseph Smith, a rebebil a mo kmeed el mo er a Dios el lousbeche a ngor, te olisechakl a tekingel me a llechul a chad, el uai a teletelel a chedal a chelid, engdi diak loumerang malechub el kengei er sel meral klisichel a Dios” (Joseph Smith—History 1:19).
A Paulus a dirrek el ulemeklatk el kmo te betok a ngara “teletelel a chedal a chelid, e diak er omerellir: mongeroid er kau er a reuaisei el chad”(2 Timothy 3:5). A klmuut, mongeroid er kau er a re ua isei el chad.
Ng betok el cheliseksikt me a olasm er a klengar a uai a “tebelik el lbolb” (Mateus 7:15). Ngkel merang el mengkerengel a sib a mo mengedmokl, mengeluolu, e mengelechel er a sib me a rechad er a ikelesia el sel aikal lbolb lolkedang(mesa Johanes 10:11–12). Sel molngeseu el mengkerengel a sib el melasm el mo ngar ngii a cherungel el klengar el uaia Ungil Mengkerengel a Sib, e kid ngdiak de mengkerengel a klengar er kid me a rebebil? Lolab a osisecheklir a reprofet, chad er a ues, me a rouchais, e oba sel klisichel a sengk er a Chedoal Reng, eng sebeched el mesang a lbolb sel lorael mei alsekum kid a kerekikl lomes e keldmokl. Sel ngodech er tiang, sel diak el blak a rengud el mengkerengel a sib er a klengar er kid me a rebebil, ete ngar ngii a mo mad. Sel lak el blak a rengud er a ureled a sebechel rulid ma rebebil el mo er a kerior. Ak siotai er a bek el chad el mo klemerang el mengkerengel a charm.
Mla Duubech me a Klaumerang
A sakrament a chedaol ruoll el ngosukid el meruul a llemalt, mesel klikiid el melai er ngii a olechotel a kmo kid a oltirkal a telbiil el ngii a obengkel a rokui el chedaol ruoll. Sesei el rak er a mla memong, el bechik. er a Anita, me a ngak a mle mesiou er sel Arkansas Little Rock Mission, eak mlo olisechakl lobengterir a terung el ngeasek el missionari. Temel tial olisechakl, e ngikal lungil odam el ki molisechakl er ngii a kmul uase, “Ngak a mla mo er a ikelesia er kemiu; ngera uchul meko menga er a blauang e melim a ralm er a bek el Sandei? A ikelesia er ngak, ea ki di meruul er tiang el erul taem er a chelsel a tal rak, sel Baskua me a Kurismas, meng kmal ngar ngii a belkul.”
Aki uluchais er ngii el kmo kid a mla mellach el “blechoel mo kldibel el mo melai er a blauang me a bino” (Moroni 6:6; dirrek el mesa D&C 20:75). Aki milenguiu er a Mateus 26 me a 3 Nephi 18. Ngii a ulenger el kmo ngdirk diak lodengei el kmo ngera uchul meng klou a ututelel.
Maki mocha ouchais er a omengaisisiu el teletael: “Ka momdasu el kmo ke mle accident el ngara mlai. Meke telemall e diak louedikl a bedengem. A tara chad a remurt lekong, el mesekau el diak mongitengtik a bedengem, meng oudengua el mora, 911. Ma ngeseu a merkau meke mocha ungil lomtab me a bedengem a mengitengtik.”
Maki oker ngikal odam, “Sel kau a mocha sebechem lomtab er a meliuekl er kau, e ngera mo kerim?”
Ng dilu, “Ng soak el mo medengei el kmo ak milkerang e mo er sei e techang a miltik er ngak. Ng soak el mo oureng a sulel er a bek el sils eleng ngulsebelii a klengar er ngak.”
Aki uluchais er ngikal lungil odam el kmo milkerang ea Osobel a ulsobel a klengar er kid e mekerang kid a kired loureng a Sulel er a bek el sils, bek el sils, bek el sils!
Aki uleker, “Kede medengei el kmo Ngii a mlad el kirem me a kemam, ngdiak el soam el blechoel el menga er sel blauang e melim er sel ralm el lolechotel a Bedengel me a Rsechel?”
Ng dilu, “Ak medengei, Ak medengei, engdi ngar ngii a chimol tekoi. Ng seselk a renguk er ikelesia er kemiu.”
Aki ulenger, “Ka dobult el bedul tial tungelem. Ke me mekerang alsekum ngkel kmal soam el kohosia er kau a soisb er a tuangel er a blim?”
Ng dilu, “Ak kmal di mereched, el mo outubaruach.”
Aki uleker, “Tiang diak el sel molchesiu er ngii sel msoisb er a ikelesia er a Uriul-klebesei el Santo—omenguul el mo er a Osobel?”
Ng dilu, “Ak medengei, Ak medengei, Ak medengei!”
Ng mlei er a ikelesia er sel Sandei er a Baskua e millemolm lomais el mei er a ikelesia.
Ak siotai er a ta me a ta er kid el mo oker er kid, “Ngeral chedaol ruoll, luldimukl er a sakrament, a kirek el mo nguu, e ngeral telbiil a kirek el mo meruul, oltirakl, e mengull?” Ak yaksok el kmo sel moruul a chedaol ruoll e monguul aikel telbiil lobengkel a mo meskau a mengasireng el llomes. Loba ngklel a Jesus Kristo, amen.