Ngkel Loutekangel el mora Ulebongel, a mo Suobel

Rodom me a rodos, ak mereng a saul er a techall el locholt lekor kemiu a bebil ra tekoi el kumelechesiu.

Kesai el rak e ra memong, e a bechik me ngak a mlara omengedaol lolecholt a urerir a rengalek er sel Church History Museum ra Salt Lake City. Ma bocha el merek tial lomengedaol, e a President Thomas S. Monson a mirael el bedul kemam, e ulereked a chimomam, e dilu el kmo, “Moutekangel, me bom mesisiich”—ng dmolech e losisechakl el tara klemerang, leng ngultebechel, el de rokui el dodengelii.

A Jesus Kristo a ulterkeklii er kid el kmo “ngkel loutekangel el mora ulebongel, a mo suobel.”¹

A dou tekangel a belkul “ sel dolemolem el lultebechel el diak kede mesim ra klemerang el kirel a llechul a Dios el molmuut ra le ngarngii ongarm, uldikel, me a ringel.”²

Molmuut er tirkel mla melchesuar a mesisiich el blekerdelel a reng e mla mesisiich el mesiou a sebechel el tara klebesei el mo remiid malechub e temo mechitechut alsekum eng diak el loutekangel el mora ulebongel. A kureng me de blechoel e dil mesisiich a uldesued me a rengud loba sel tekoi el kmo “Tiang a diak el bol dubech el me rengak.”

Sera Jesus Kristo ra lolsisechakl e ra Capernaum, “e te betok e ra re mesiungel a ulebult, e dimlak el luut e lobengkel.

“E a Jesus a diluu el mora tirkel teruich ma terung, kom dirrek elmo merael?”³

A kumerang er chelechang el taem, el Jesus Kristo a oker er kid el rokui a re mla kutmokl a chedaol el telbiil el lobengkel, “Kom dirrek el mo merael?”

Ak meluluuch mede bek el chad, bo louedikel a rengud e lomes el kirel a ikel ngar medad el merael mei, donger el uai e a Simon Petrus: “Rubak, mak mora techang? kau e a olab a tekoi ra diak a ulebengelel klengar.”⁴

Bo doltirakl a ikel dou merang e medengei. Alsekum eng diak kede kiei loltirakl a ikel klemedengei er kid, e bo doloched er kid. A re ngara klengit e melemolem el meruul a mekngit, e diak e louchel, a di merael el mengai el mo mekikiongel, molmuut e ra Satan a le ngetiterir, el tomall a techelir el mo ouchel a kengterir, nguu a klausubes, e mo mukngeltengat e ra ikel rokui el klengeltengat el diak a ulebengelel.

Ak mla remenges a betok el lungil luchul er tirkel mla mo diak el mesisiich el mesiou ra Ikelesia a mla ridii sel beiusech el klaumodengei ra moktek er a omeroled er tial beluulechad. A kurimel er tir me lomtab e luut el mei, le kumerang el diak a chad el sebechel lochebir ra medal a Rubak er kid, el Jesus Kristo.

Sera de metecholb, e kede mle yaksok—ra diak el ngidil chad engdi lobengkel a Osobel, el kongei el “nguu a ngklel a Jesus Kristo e mo mesiou er Ngii el mora ulebongel.”⁵

Sel de ngara miting ra sakrament a tara kot el klou el rolel e kede mesmechokl er a rengud el mo mesiou er ngii, ma klisichel a rengud, ma ukurulel a klaumerang er kid e ra Jesus Kristo.

A dolai er a sakrament sel kot el klou el tekoi el doruul er ngii ra Chedaol sils. A Rubak a silodii tiang el mora re Apostol er Ngii ruchei ra le mad. Ngii a kiltmeklii osisiu el tekoi el mora beluu er a Merikel. Ngii ouchais er kid el kmo alsekum e kede mengetmokl er tial llach, eng mo olechotel el mora Demad el kmo kede blechoel el melatk er Ngii, e Ngii a yaksok el kmo, e ultebechel, el bo doba Reng er Ngii el lobengked.⁶

Ngokiu osisecheklel a Alma el Kekerei el mora ngelekel sechal ra Shiblon, e kede mesang a bedochel el llach ma uleklatk el mo ngosukid el di melemolem e loltirakl a telbiled:

Mesang me lak ke bol mekididai a rengmiu; choi, mesang me lak ke dil kemiu el chemat a lemsiu, malechub eng klisichiu.

Bo bekeu, engdi lak ke bom engelakl; e dirrek el momes me bo lulsecharakl a rengum, me bo mui ra beltik el reng; em cheridau e ra saik el reng.⁷

Kesai el rak e ra memong, me kulenguul, eng mle soak el mo melikes e mle ketengek. Mak lilengir a kayak, e mui ra klemeriar reng, e ak toredes el mora daob.

Engdi mle telkib el taem, e a iuul a meltii tial kayak. Mak meringel el melasem, e loreked e ra oius ra bital chimak ma kayak el ngara bitang, meng mocha sebechek el ngosechang.

Mak lemuut el mocha meius er a kayak, ngdi mle telkib eng lemuut ngil kayak el lobitech. Mak koididiur a renguk e melemolem el melasem, e diak el bo lungil, e a chad el lungil medengei a kayak a subedak el kmo ng locha ngarngii a chemars e ra cheungel me tial kayak a locha mui ra daob, me nguchul meng ngomtebitech e meringel a domtebechel er ngii. Mak kilersii ngii el kayak el mora ungelel a chelechol e nguu a tingetel, e meral uaisei, tilobed a klou el ralm.

A kumdasu e sel bebil ra taem e kede merael er tial klengar lurekodel a klengit el, di ua sel chemars el ngara kayak, meng tomer ra ulekerulel a reng.

Alsekum e kede melemolem a kengtid, e kede obes a ikel telbiled el de kiltmokl el lobengkel a Rubak, meke di omtebitech leng sel diak el tabesul leng ikel klengit el doruul ra chelsel a klengar er kid.

Meng di ua ikel chemars ra kayak, a ikal klengit ra chelsel a klengar er kid a kired el sumechokl. A bebil ra klengit a meringel a ureor el kirel ra kuk bebil el kired el douchel.

Ng kired el di kid e loker: Kede ngar ker sel domtab er a omilkinged el bedul Osobel ma urelel? Kede seluk e ra teletael el bla rengii a Petrus sera le lolekngakl ra Jesus Kristo? Malechub e kede mla ngoriakl el morsel terebel el dobang e ua sel lomilkingel ma blak el reng er ngii ra uriul er sel “klou lureor” el ngiluu ra Osobel?⁸

Ng kired el blak a rengud e loltirakl a ikel rokui el llach e moungil lomtab el kirel a ikel llach el kot el meringel er kid e loltirakl. A Rubak a mo melkakl er kid, lolngeseu er kid e ra taem er a usebeched me a chelitechetud, e alsekum e kede otii el meral ngara rengud e ouedikel el ngarsel rolel, Ngii a mo kutmokl a mechitechut el tekoi el mo mesisiich.⁹

Sel doltirakl a meskid a klisiich el mo mesisiich e ra klengit. Ng dirrek el kired el mo medengei el kmo sel longitikaik er a klaumerang er kid a rullid meng kired el mo oltirakl, e loumesind el diak ke dodengei a mo dubech.

Ak modars a rael el mo ngosukid el loutekangel el mora ulebongel:

1. Bek el sils, moluluuch e monguiu a chedaol llechukl.

2. Bek el sandei, molai e ra sakrament el loba medemdemk me a ngariou el reng.

3. Dolenget e ra teruich el basent e dodars a ngeseu ra bek el buil.

4. A bek el leru el rak—bekl el rak e ra re ngeasek—do mekbeches a babilnged er a templo.

5. Molmuut er a klengar er kid el rokir, e dosiou er a urelel a Rubak.

A kureng ma ikel meklou el klemerang er a ebangkelio lomtebechel a uldesued, e kid el sebeched el mimokl a klengar er kid er a ikel chemars el mo ngmodech ra ungil lomeroled er tial debel a klengar.

A de ngeriakl er a rolel a Rubak a ngarngii a ngkedel, e a dital rolel el de nguu a mouedikel el kirel sel nguked.

Ak mereng a saul el kmo a Osobeled a ultekangel el mora ulebongel, e rirekir sel klou lomelnget el tngakireng er Ngii.

Ngii a chilarm el kirel a kengtid, rengelel a btelud, ringel, chelitechetud, ma dekted, me Ngii a medengei el mekerang a lolngeseu er kid, mekerang a lomekrael er kid, mekerang a longelaod er kid, e mekerang a lolisiich er kid me bol sebeched el loutekangel e denguu sel korona el medechel el kirir tirkel el diak el blo le mechitechut.

A klengar a ngodech el mora rokui el chad. Kede rokui el ngarngii a temed el mora ringel, a taem el doldeu a rengud, a taem el doruul a telbiled, a taem el dolisiich er kid e ra metacherbesul, me a taem el douedikel el kirel a techall.

Meng kora ngera el tekoi a mulsiseb er ngii, e ak sioning el kmo a Demad ra Babeluades a blechoel melekoi, “Ak betik a renguk er kau. A kudersau. A kubengkem. Lak kem toched. Mouchel e moutekangel el ngara rael el bla kuchotii er kau. E ak yaksok er kau el kmo kede lemuut el mo kaseues er sel blid ra ngarbab el renged.” Loba ngklel a Jesus Kristo, amen.