Ulekrael Losisechakl

Rodam er ngak, a kureng a saul er tial techall el me mengedecheduch er kemiu er tial mora reksi el klou el ongdibel. Kede mla kongei er a President Russel M. Nelson el mo meng 17 el President er Ikelesia er a Jesus Kristo er a Uriul-klebesei el Santo. Mesel ngak a mle ngeltengat loureor lobengkel er a bek el sils, eng mla moterkokl el me er ngak lokiu Chedaol Reng el kmo a President Nelson a mlokedong er a Dios el mo mengetikaik er a mera el Ikelesia er a Rubak.

Ak dirrek al sioning el kmo a Rubak a mla mekedongii a Elder Gerrit W. Gong me a Elder Ulisses Soares el mo mesiou el chedal a Chelechad er a Teruich me a Terung el Apostol. Ng betik a renguk er tir e oldubech er tir. Ng mo, okiu osisecheklir, e te mo omekngeltengat a klengar el liueklii a beluulechad me a telecheroll.

Tial ongdibel a dirrek el mora reksi lokiu a tara tekoi. President Nelson a mla ouchais ra ulekrael el bakes el bedul uchei er tial kldmokl uldesuel a Rubak el kirel a Ikelesia er Ngii. Tial uldasu a ulsiseb er ngii a beches el teletael el kirir a chelechad ra priesthood el ngara ward ma stake me bol sebeched el otaut a ngerchelel a priesthood el dolab. A ikal ngerachel a rokui el di melutk er a ulekerreuid el mora rengelekel a Chedam.

Tial uldesuel a Rubak el kirir a re Santo er Ngii el mo ngmai a ulekerreu a lulengedmokl er ngii er a ikal merko el betok el rak. Sera uchelel a Nauvoo, ea Prophet Joseph Smith a ulusbech a ungil rolel e te momekerreu er a rebetok el chebuul el beches el chedal a ikelesia el me soiseb ra beluu. Teuang er a roungalek er a roungalek er ngak a mle bebil er tir—a re Eyrings, Bennions, Romneys, me a re Smiths. A Profet a kildmeklii a ulekerreuir tirka el Santo loltirakl ra bingel a beluu. Chelsel a Illinois e a ikal bliongel a lomekedong el “wards.”

A re Santo er a le ngara omerolir er a ked, e a ulekerreuir el mo ra ta ma tang a milkedmokl lokiu a “cheldebechel.” A uchelir a re demak ra le kaeri er ngii ra le misionari ra beluu el ngii a Oklahoma er chelechang eng mlo kebetek ra rael ngii me a ta ra ikal cheldebechel. Ng mle mechitechut leng mle smecher me ngii me a ulebengkel a di mle dengarch er a kekerei el kareta.

A ulengerachel er tial cheldebechel a uldercheterir a reteru el ngeasek el dil el mo olngeseu ra ngidi el chad el mlar tia el kareta. A ta er tir, el beches el chedal a ikelesia ra le ngara Switzerland, ng di milsa ta er tirka el misionari e kmal mlo chubur. Te ulsebelii tirka el cheldebechel ra re Santo. Ng mlo ungil meng mlo sebechel merael el mora Salt Lake Valley lokiu bitar ngka el ulsebelii. Te mlo kaubeltikelreng e mlo mechiil. Ngii a mlo demal, a demal a demak er a Henry Eyring, e ngii e delal, a delal a delak er a Maria Bommeli Eyring.

Betok el rak ruriul, ea rechad sel losaod er tial ringelel omerael el meleboteb a meklou el beluu, eng dilu el kmo, “Eang, ngdi mlak el meringl. Sera ki morael, e a ki mle kadecheduch er a omerolam er a ongasireng el kemam el terung el miltik er a ebangkelio er a Jesus Kristo. Tiang sel kot el mle ungil a renguk er ngii el taem el bok debedebekii.”

El mer chelechang, ea Rubak a mla ousbech a bek bedengel a teletael lolengeseu er a re Santo er Ngii el omekerreu er a tang. E chelechang eng mla omekngeltengat er kid loba mesisiich e uldak el chelechad er a ward ma stake—el chelechad el oureor el dmak ngii me a cheldellel a ward.

Cheldellel a ward, cheldebechel, me a mesisiich el chelehad a rokui el ousbech a eru el tekoi el mo kudmeklii a moktek ra Rubak el kirel a re Santo er Ngii el ngii a mo omekerreu er a ta ma tang el di uai Ngii a lomekerreu er tir. Ng mekedmokl sel sekum a re Santo a omelchesiu er a beltkil a rengul a Kristo el mo er a ta ma tang el kuk ngarbab er a ikel sorir el meruul. A chedaol llechukl a omekedong er ngii el “dmolech el beltikelreng … el bliochel el beltkil a rengul a Kristo” (Moroni 7:47). Me te mo kudmeklii sel sekum a Chedaol Reng a mengetikaik er a omekerreu el chad el mo medengei aikel Rubak a medengei el ungil kirel ngkel lolasem el lolengeei er ngii.

Betok el taem ra ikal merko el sandei, e a rechedal a Ikelesia el ngar bita er ngak a meruul a tekoi el ua lodengei a bo loruul a Rubak, el uaikel mla medung er tiang er chelechang. Mei e bok beskemiu a eru el okesiul. A kot, a kuk di tara cheldecheduch er a sacrament miting er a 14 a rekil el sensei el ngara Aaronic Priesthood el medengei a sebechir a rolab a priesthood el kudmokl er a omesiungir el mora Rubak. Ongerung, a oba Melchizedek Priesthood el ngii el, oba beltikel reng ra Kristo, el mlukrael el mo olngeseu er a telungalek.

A kot, e bok beskemiu a tekingel ngikal ngeasek el buik el mengedecheduch er a sacrament miting. Ak mla er ei. Ka molaesm el mo melbedebek er sera om 14 a rekmiu e bo morrenges er ngii el melekoi a betok el tekoi el chad el ua klungel a ual kirel medengei:

“Ng meral soak el chedal a chelechad er a resensei er a ward er kemam er sera bok 14 a rekik er tial mlo merek el rak. A sensei a dirk olab a rokui el ngerchelel a deacon me a kuk bebil ra beches el ngerachel.

“Me te bebil er kemam a sensei, ea lmuut el bebil a mei er a ngar medad, ma rokui el ngara Ikelesia a mo mukngeltengat er a priesthood, meng kmal klou a ultutelel kemam el rokui a ki bo modengei a ngerchelel a sensei.

“A kot luchul ea, Doctrine and Covenants 20:53 a melekoi el kmo a ngerchelel a sensei a mo klekar el kirel a ikelesia, e mo obengkel el melisiich er ngii.

“A ongerung, a Doctrine and Covenants 20:54–55 a melekoi el kmo:

“Ng ngerchelel a sensei el omes meng diak a klengit er a ikelesia, ma diak a delcherecher el reng, blulak, omelaes, me a mekngit el cheldecheduch.

“Ng ngerchelel a sensei lomes me a rechad a blechoel el mei ra ikelesia, e dirrek lomes er tir me te meruul a ngerchelir (mesa D&C 20:54–55).”

Ngika el ngeasek el chad a millemolem el kmo:

“A Rubak a melekoi er kid el diak el dil ngercheled el omekerreu er a Ikeleia el le merkong ma dirrek el rechedal a Ikeleia el di uai a Kristo e le tiang a Ikelesia er Ngii. Alsekum e kede melaesm el omecheliu a llechul, e ungil mora ta ma tang, e melemalt, ungil sechelei, e ungil a rengud el dmak, seikid eng mo sebeched el nguu a Chedaol Reng me ngobengked e medengei a soal a Demad er a Babeluades a doruul. E a lsekum eng diak, eng diak el sebeched el kudmokl a ngercheled.”

Ng millemolem el melekoi el kmo:

“Sel sekum a sensei a melilt el mo ungil a blekerdelel me ngungil loldingel, outkeu er a rechedal a ikeleisa, mengedmokl chedaol belsoil, olngeseu a le ngara blil, e chad ra budech, e ngkang a melilt el mengull er a priesthood el lobang e oltaut a ngerchelel.

“A ungil sensei a diak el belkul a kmo ke er di bekongerachel sel de ngara ikelesia ma lechub a ikel doruul er a ikelesia. A Apostol Paul a ulsisechakl, ‘Bo lungil a blekerdelem me losuub er kau a ruumerang, er a ungil omerellem ma tekoi er a ngerem, ma bltikerreng er kau, ma blakerreng er kau er a ngerchelem, ma klikiid el klechad er kau.’ (1 Timothy 4:12).”

Ngika el ngeasek el chad a dilu el kmo:

“Ng diak el iior er a de ngarngii me a de borngii, kid a sebeched lungil a blekerdeled loltirakl a llemalt er a bek el taem er a bek el basio.

“Ngak ma demak a oldingel er a re Browns.¹ Sel bek el taem el kibong, e ngungil a renguk el oldingel er tir el mo medengelterir. A tara tekoi el soak er tirka el Browns a sel tal ki bong, e te blechoel el sorir lorrenges e dirrek el blechoel el ngarngii a ungil cheldecheduch el louchais.

“Sel dungil medengelterir a rechedal a ikelesia leng kid loldingel er tir, a rulii sel ongerung el ngerchelel a sensei el mo beot, tiang a outkeu er a rechedad sel mei ra ikelesia. Ngosuterir a rechedad el moungil a rengrir el mlei ra ikelesia a ngosuterir a el mo omelchesiu ra beltikelreng e mo kldmokl el melai er a chedaol belsoil.

“Uriul er a doutkeu er a rechedad el mlei ra ikelesia, ea sensei a olngeseu sel bek el Sandei el mengedmokl ra chedaol belsoil. Ng mera lungil a renguk el merous e mengedmokl a chedaol belsoil er tial ikelesia e le a rebek el chad a kmal ngar omengull. Ak blechoel lomelchesiu ra Chedaol Reng sel kungedmokl e kurous a chedaol belsoil. Ng klengeltengat el merngak el sebechek el meruul er ngii er a bek el Sandei.

“A bebil ra omesiou el uaia omerusel chedaol belsoil a le ues a rechad me te oureng a sulam el kirel, eng di a bebil ra omesiou el uaia omengedmeklel chedaol belsoil a blechoel mekedmokl el diak le meues. Ng diak a ultutelel de meue sel dosiou; sel klou a belkul a kmo a Rubak a medengei el kmo kid a mesiou er Ngii.

“Sel de sensei, eng kired el blechoel di melasem el melisiich er a Ikelesia, resechelid, me a re keblid lokiu otutel a ngercheled el oba priesthood. Tia diak el beot, eng di a Rubak a diak el beskid a ngerachel e lak el dedesii a roled me bol sebeched el kudmeklii sel ngii a mle soal’ (1 Nephi 3:7).”

Sera bol merek ngkal ngeasek, e ak millemolem el mechas a renguk er ngii el kmal ultebechel e mellomes. “Ak medengei el kmo kid a mengai el mo ungil sel dolilt el mo oltirakl er a [Jesus Kristo].”

A tara cheldecheduch er a omesiou er a priesthood a mildung er a tal buil ra mla memong er a sacrament miting. Ak dirrek el mla er ngaii. Me tial cheldecheduch, ng kal meketeketa loba Melchizedek Priesthood a dimlak lodengei el kmo ng silodii a tekoi el Rubak a soal a bol dubech lokiu tirka el mla mo mesisiich el chelechad er a priesthood. Tiakid sel chaidirengul sel tekingel:

Ngii me a oldingel lobengkel a kirir loldingel er a reteuid el telungalek. Ng kmeed el tir el rokui a dimlak el sorir odingel. Tirka loldingel sel bo lomes er tir, eng diak el sorir lomok a chesmerir. Sel loudengua, eng diak lolai ra dengua. Sel le bechei a klemechir, eng diak a tekingir el mo er er tir. Ng kal klou el chad a mocha meluches a babier el mo er tir. Ng dirrek el ulemuchel lousbech a kora kmard el bibrurk el envelope el mengerechir me bo luchul el bo longer er ngii.

A ta er tirak el teuid el telungalek a mesobil redil el diak le ngara ikelesia el mla ra Europe el mei. Te mle terung a remekekerei el ngelekel.

Uriul er a betok el lomelasem loldingel er ngii, eng ngiluu a text. Ng di mle kiul louchais el kmo ng kmal mechesang el diak el sebechel lomes er tir. Ng erung a urerel e dirrek el mle soldau. A meral urerel a mle bulis, e a soal mo detective e lmuut el mora belual el mo melemolem ra urerel er sei.

Tirka loldingel a dimlak a ta mel sebechir el modngelii ra blil. Meng mle blechoel el text er ngii. Bek el buil eng oldurokl ra babilengel milluches loba chimal el mo er ngii, el obengkel a card er a chedaol sils el mora rengelekel.

Ng dimlak el nguu a henji er a babilengel. Engdi ngkal redil a mle medengelterir, e medenge dengua er tir, e medenge el kmo tir a di melemolem el meruul er tial omesioungel a priesthood.

A ta er a klebesei eng ngiluu a orechudel text el mlar ngii el redil. Ng ulusbech a ngesou. Ng dimlak lodengelii a bishop eng di bai medengelterir tirka el kirir loldingel er ngii.

Ng di medechel a sesel el klebesei, eng mo ra tara beluu el tal buil el ngara omesubel a klsoldau. Ng diak el sebechel ngoititerir a rengelekel. A delal, el kirel lomes er tir, a dirk silebek el mora Europe el mo omes er a bechil, el mle bkais chemrungel a secherel.

Ng kal diak el blechoel ngara ikelesia el mesobil redil a di mle sebechel mecheral a ticket ra kot el kekerei el ngelekel mora Europe eng di Eric el klou el ngelekel sechal el 12 a rekil a diak.² Ng ulengit er a roldingel er ngii mel sebechel el siketerir a rungil telungalek ra LDS el nguu Eric el mora blirir e lomes er ngii el okedei el klebesei!

Ng kal oldingel a mle text er ngii el kmo ngmo ra ikel bkul rebab el sebechel. Meng mle omekedong er a roungerachel er ngii. Ea bishop a milsa kengei el mo omes er a rechedal a ward council, uldimukl er a merredel er a Relief Society.

Ngkal Relief Society president a di mle mereched el metik ra reteuang el telungalek ra LDS, loungalek er a rekmeed losisiu a rekrir ra Eric, el mo nguu el mora blirir el ta el sandei. Chelsel tia el tal buil, e tirka el telungalek a ulemekang er a Eric, e msa delmerab el ngarngii ra chelek a meseked el blirir, e ngiluu lobengterir el mora di mla lekedmokl lomilil er a summer, te ngiluu el mora ikelesia, e obengkel el ngar ongdibel er a telungalek, me a lmuut el betok lomeruul.

Tirkel ulungalek ra resechal el diua rekil a Eric, a ngiluu lobengterir el mora miting er tir ra chelechad ra deacon me a ikel bo loruul. Chelsel tial okedei el klesebei, ea Eric a mle ngara ikelesia er a bek el Sandei el ngii a mong meng ketengel.

Uriul er a delal ra bol merek er a training, ea Eric a millemolem el ngara ikelesia, el blechoel lobengterir tirka el teua el telungalek ra LDS malechub a rebebil el mla mo sechelil, uldimukl er tir a tirka el kirir loldingel er a delal. Chelsel a taem eng mlo mechedaol el deacon e mlomuchel merous a chedaol belsoil.

Chelechang e bo domes er a ngarmedad el sils er a Eric. Ng diak bol mechas a rengud alsekum eng mo tara menguteling er a Ikelesia er a belual a delal sel luut el mong—ngmo uaisei e le re Santo el dmak loureor el ta rengrir el mesiou el ngar eungel a omengedereder er a bisop, el mo mesiou loba beltikelreng me a klisichel a Chedaol Reng.

Kede medengei el kmo a dmolech el beltikelreng a klou a ultutelel el kirel osebeled er a rengedel a Dios. A Moroni a milluches el kmo a lak a beltikelreng eng diak el sebechem el mo suobel er a rengedel a Dios. (mesa Moroni 10:21; dirrek el mesa Ether 12:34).

Ke de rokui el medengei el kmo a beltikelreng a sengk el me er kid ruriul er a de turk er sel tkul rebab el sebeched. Ngkired el meluluuch el mora Chedam el meral ngara rengud, me bol sebeched el nguu tial beltikelreng, el ngii a lomesterir tirkel rokui el meral loltirakl ra Ngelekel, el Jesus Kristo (mesa Moroni 7:48).

Sel kumes er ngii e kede nguu a Chedaol Reng sel dechau omesiungir a rebebil. Tiaikid a uchul me ke doba ngerachel er a priesthood el mesoiu el kirel a Osobel. Sel de ngar omesiou er a rebebil, e ng diak de sal lomdasu er kid, me a Chedaol Reng a sebechel dingerang eng mei er kid e olngeseu er a klengar er kid el mo nguu sel sengk er a dmolech el beltikelreng.

A kuchias er a sioning er ngak el Rubak a mla omuchel er a klou el bakes el bedul uchei el kirel a Uldesuel el kired el mengai el mo mui ra ulekrael e mui er a beltikereng el ngara omesiou loba piresthood. A kureng a sulel er a beltikelreng er Ngii, el di beot el meskid. El ngara ngklel a Jesus Kristo, amen.