Bodedak el Rokui el Oldubech
A klemeriar el reng er a rengum el mo oltirakl a mo bleketakl se el sekum ke medengei el mo oltirakl e melbedebek el kirel a ike el ngii a bla molechesuar er a ikal mla mo merek el eru el klebesei.
Betik er a renguk el rodam ma rodos er ngak, chelecha de merma er tia el ulebengelel tia el itacherchar el ongdibel, ak mo obengkemiu el mereng a sulel a Rubak er a ongetikaik er ngii me a tekoi el ngii a mla remuul el me er kid. A chelitakl a kmal mle klebokel e mesebechakl a reng. Klumech a diak el dil oldak a reng, ng dirrek el ngar er ngii a klou el ngedechel ra klengar er kid!
Ngar er tia el ultebechel el ongdibel e kede kongei er a beches el First Presidency. Teru el kmal ungil el chad a mla mokedong el mora Chelchad ra Teruich ma Terung el Apostol. Me a eiai el beches el General Authority Seventies a mla mokedong.
Chelchang ea ngellitel el chelitakl a mo smodii a kedeb el uldikial a beches el mla mekedmokl, ringel el bo dechelbangel, me a ngercheled el bo dolab el moruchei:
Bodedak el rokui el oldubech a urerel a Rubak,
Mese el bo el ulebengelel a klengar e kede mo meridm a klungiaol;
Ngara klaudechelakl el kirel a llemalt mede bo dodars a olsenged,
Tia el mesisiich el oles ra klemerang.
Lako medakt, le cherreuem a mo oltuub;
Bo lemesisiich a rengum, le Rubak a obengked.
Kede mo oumechad er kid aike lolekoi a diabelong,
E ngdi Rubak el di ngii el tang a bo dorrenges er ngii.1
Ak mengesuseu er kemiu el mo blechoel el mesuub el kirel a klumech er tia el ongdibel—dirrek el omelekl—er a ika el merael mei el elolem el buil. Bo el blak a rengum el osiik a rolel el bom oltaut aika el klumech ra chelsel a temel a ongdibel ra telungalek, olisechakl el kirel a ebangkelio, me a dirrek el cheldechedecham el obengterir a rechad ra blim ma resechelim, me a dirrek el omelekingem lobengterir tirke el diak el ngara osisiu el klechelid er kau. Betok el ungil a rengrir el chad a mo oluut el kirel a klemerang el ngii a mlosisechakl er tia el ongdibel se el sekum ng modars el okiu a beltikelreng. E a klemeriar el reng ra rengum el mo oltirakl a mo bleketakl se el sekum ke medengei el mo oltirakl e melbedebek el kirel a ike el ngii a bla molechesuar er a ikal mla mo merek el eru el klebesei.
Tial klou el ongdibel a uchelel a beches el bliongel er a omesiou. A Rubak a mla remuul a meklou a belkul teletael sel domtebechel er a ta me a tang. Rodos me a rodam—rechuodel me a rengeasek—a mo mesiou er ta me tang er a beches. el chedaol el rael. A Elders quorum a mo mesisiich el lomekngeltengat er a klengar er a resechal, redil, me a rengalek el meliuekl er a beluulechad. A rodos er a Relief Society a mo melemolm el mesiou loba sel beltkil a rengrir, e mesterir a techall el mo er a rengeasek el rodos mebol teloi er tir sel metutk.
A klemched el mora beluulechad a beot e klemerang: aki mengemedaol er a rokui el ngelekel a Dios ra bitang ma bitang ra dekedek el mei ra Osobelir, e mo ngmai a klengeltengat er a chedaol templo, e mo ngara diak a ulebengelel el deureng, e mo sebechir el melilt el kirel a diak a ulebengelel klengar.2
A mera el mo suobel a ultuil ra cherengelel a klaumerang er kid er chelechang el kirel a telbiil el doruul me a dirrek el chedaol el ruoll el bo de ngai ra blil a Rubak. Chelechal taem, eng ngarngii a 159 el templo el loureor, ea betok a dirk lomekedechor. Ng somam lolekeed a templo el mo er rechad er a Ikelesia. Maluaisei aki dmeu a rengmam el mo ouchais a moktel a euid el templo el bo lomekedechor. Aikal templo a mo er a kaikid el basio: Salta, Argentina; Bengaluru, India; Managua, Nicaragua; Cagayan de Oro, Philippines; Layton, Utah; Richmond, Virginia; me a klou el basio el dirk bo lomdasu el kirel el ngara Russia.
Rodam me a rodos, a delcherul aikal templo a locha diak el bolngedechii a klengar er kau, engdi a aikel temem el mo er a chelsel a templo a bai mo mengodech. Chelsel tial reng, e ak omekngeltengat er kau el mo melilt aike el tekoi el sebechem el ocheuekl meng sebechem el mo mengoit a betok el temem ra templo. Ak omekngeltengat er kau el oba klou el kltalreng me a beltikelreng er a chelsel a blimiu me a dirrek el dmolech el soal a rengum el mo omekereu er a diak a ulebengelel el delongelem kau me a telungalek er kau. Ak omekngeltengat er kau el oba klou el klaumerang el mora Rubak el Jesus Kristo me a dirrek el klou el techellem el mo mera el oltirakl er Ngii.
Ak omekngeltengat er kau el mo klou a ngerem el kirel a olechotel a klaumerang er kau, el uasei el ngak a meruul er chelechang, el kmo kid a ulsiseb ra urerel a Kot el Mesisiich el Dios! Jesus a Osobel! Tia a Ikelesia er Ngii, el Ngii a mengetikaik er ngii el okiu a mla mengilt el remesiou er Ngii. Ak dirrek el olecholt ra klaumerang er ngak, el oba beltkil a renguk el mora tang ma tang er kemiu, el oba chedaol el ngklel a Jesus Kristo, amen.