Osisechakl er a Blai—Uchul a Deureng e Chedaol Ngerachel
A kulengit a ngesou er a babeluades er chelechal dolasm el mo olisechakl el uaia Kristo er a chelsel a rekeblid.
Ngak me a bechik, er a Julie a mla mekurelterir a retelolem el ngalek, e chelechang eng dikea rengelekemam er a blai. A kmal miss er a rengelekam sel le ngara blai er a bek el sils. Ak miss el mesuub er tir e olisechakl er tir.
Chelechal sils e a cheldechedechak a kmal di melutk el kirir tirkel loungalek me a remelatk el mo oungalk. Betok er kemiu a omekeroul er a rengalek er chelechang. A rebebil, eng locha merekung sel taem. E a kuk rebebil, a klaungalek a di locha mo klengeltengat er medemiu el taem. Nglunguchek me de rokui el mo mtebengar a deureng me a chedaol ngerachel sel dolisechakl er a ngalek.1
Kid a roungalek, a ouchais er a rengeleked el kirel a Chedam er a Babeluades me a Ngalek, el Jesus Kristo. Kede olngeseu er a rengeleked el melekoi er a kot el nglunguchir. Kede omekrael e olngeseu er tir sel siseb er a rolel a telbiil2 lokiu a techolbechelid. Kede olisechakl er tir el mo oltirakl a llechul a Dios. Kede olisechakl er tir el kirel a Uldesuel el mora Rengelekel, e dirrek lolngeseu er tir el mo omtab er a ngerel Chedaol Reng. Kede ouchais er tir a cheldecheduch el kirir a reprofet er a recheuodel e mengelechel er tir el mo oltirakl er a profet er chelechal taem. Kede ngara nglunguuch el kirel a klungiolir e ngara ringel el kirel ongarm el mo er tir. Kede ouchais el mora rengeleked el kirel a klengeltengat er a templo, e melasm el mo ungil kudmekelterir el mo mui el mesiou el misionari. Kede ouchais er tir er a ungil omellach sel kuk lorael mocha oungalek. Meng uaisei—el diak demeterob—el chedam e chedil. Ng diak demeterob el sensei er tir. Ng diak el sebeched el mengubet er a ikal diak a ulebengelel ngerachel.
Chelechal sils, e ka domdasou a bebil er a ungil techall el dolisechakl er a rengeleked er a rekeblid.
Osisechakl er a Temel Ongdibel er a Telungalek
Ka domuchel er a ongdibel er a telungalek, el ngii a mle kot el klou a ultutelel tekoi er a blai el kmlukeroul er ngii. Ng diak debedebek a tokubets el suobel el mlosisechakl er a ongdibel er a telungalek, ak di medengei el kmo ng dimlak a tal lobosech.3 Ak mle medengei el kmo ngera mle klou a ultutelel mora rechad er a blik.4
Ak lotkii a tara kmal mle soak lomeruul er sel temel a ongdibel er a telungalek. A demak a olengit er a ta er kemam el ngelekel el “Melai er a Test.” Ng msa ngalek a kmo ng tela el tekoi el kirel oltirakl el uaia, “A kot, e bo er a uum e bekengii e mchesmerii a icebox. E mrurt el mo er a rum e mnguu a telulasech er a saks er ngak. E mluut el mei, e mordekekl el mo er bab e me er eou el edei el taem, e mdu el kmo, ‘Chedam, ak mla remuul!’”
Ng kmal soak sel bol temek. Ng kmal soak el rulii el mo ungil, e kmal ungil a renguk sel kdu el kmo, “Chedam, ak mla remuul!” Tial omeruul a rirellak el mo ansing er ngak e dirrek el rullii a odikel el buik el mo chelellakl sel sekum a delak me a demak olisechakl a suobel er a ebangkelio.
A President Gordon B. Hinckley a milellach el kmo: “Alsekum e ke oumededenger el kirel a klungiolel a ongdibel er a telungalek, e bo er a chesemel. Mongidb er a rengelekem er bita er kau, e molisechakl er tir, mouchais er a klaumera er kau, e mdak el menguiu chedaol llechukl e mungil dmak el ngara omilil.”5
Ng blechoel di morngii a olibesongel el mo merrob er a ongdibel er a telungalek.6 Ng uaisei, eng di ak siotai er kemiu el smiik rolel e rulii a ongdibel er a telungalek el mo kot el klou a belkul e mrellii el mo ungil omilil.
Osisechakl er a Nglunguuch er a Telungalek
A nglunguuch er a telungalek a tara kot el bedochel el techall er a osisechakl.
Ng kmal soak a osischeklel a demal a President N. Eldon Tanner el kirel a nglunguuch er a telungalek. A President Tanner a dillii tiakid:
“Ak lotkii a tal kesus er a ki moutubaruach el ngara nglunguuch, e a demak a dilu er a Rubak el kmo, ‘A Eldon a ngarngii a rirelii er chelechal sils el dimlak el kirel rulii; ng mla meluluuch, malsekum e ke ousubes er ngii, e ng diak el luut el meruul er ngii.’
“Tiang a rirellak el mlo blak a renguk el diak luut el meruul er ngii el kuk ngaruchei er a bai blo kelebus.”7
Sera kngeasek el buik e a le bebil er a taem eng mo seselk a renguk er a kuk kmal betok lomeluluuch er a telungalek, e di ngak lomdasou el kmo, “Kede ko er a dirk mlo merek el meluluuch er a sesei el bung er a memong?” E chelecha, el bla bo kungalek, e ak mla momedengei el kmo ng diak el sebechel mo iimis a nglunguched.8
Ak blechoel mechas a renguk er a Chedam er a Babeluades sel louchais el kirel a Jesus Kristo el kmo ng Betik er a Rengul Ngelekel.9Ngungil a renguk el meluluuch el kirir a rengelekek lomekedong a ngklir sel lorrenges er ngak louchais er a Chedam er a Babeluades el kmo te kmal betik er a renguk. Ng uaia lak a ungil taem el dochotii a beltikelreng el mo er a rengeleked el uai sel doluluuch lobengterir e domekngeltengat er tir. A telungalek sel bol kldibel el ngara nglunguuch, e a mesisiich e melemolem e di mereko el osisechakl a mosisechakl.
Osisechakl er a Di Mitil a Taem
A osisechakl er a rechedam me a rechedil a uaia toktang loureor er a di mitil a taem. Ng kired el di blechoel kldmokl lolisechakl er a rengeleked le ng diak dodengelii a techall el kmo ng oingerang.
Kid a uaia Osobel, el osischeklel a “dimlak di le ngara chelsel a ikelesia ng dirrek el mla er a bek el bedengel a basio—a lomengur lobengterir a roltirakl er Ngii, a lolengakd a ralm er a chido, me a lurrael lengelakl a delul a kerrekar.”10
Tela el rak er a memong, e a delak a ulechais er ngak a eru el kot el mle ungil taem lulsaod el kirel ebangkelio lobengkel a obekuk, er a Matt, a chimong a mle taem lolatam a selokel e a chimong a lulmekall el mo omes er a toktang er a uingel. A tara tekoi el kmal kchat er ngii er a delak a sel duch er ngii el di kldmokl er a mitil a taem lolisechakl er a rengelekel.
A osischeklel a diak a ulebengelel. Sera taem el kusiou el bisop, e ngii el delak, el mle okeuid me a eai a rekil, a dilu er ngak el kmo ng kirek el mo mengimd. Ng mle medengei el kmo ng kirek el ungil okesiu, e dimlak el kora mesaul a rengul el subedak. Ng betik a renguk er kau, e Chedil!
Chelechal, kchedam eng blak a renguk el mesuub e melbedebek a chedaol llechukl me luchul e bok kldmokl er sel taem el rengelekek malechub a rengelkir a rengelekek di le kiul lochotii a techall er a osisechakl.11 “A bebil er a kmal ungil taem er a osisechakl a omuchel el uaia le ko er a ker er a rechedal a [telungalek].”12 Kede locha orrenges er a chelsel aikaikid el taem?13
Ng soak sel ongtil a Apostol Petrus: “Bo blechoel kldmokl lodersii a nger el mo er a ngii di el chad [me a rengalek] loker kau el kirel a uchul a deureng el ngar kau.”14
Sera kngeasek el buik, e ngak me a demak a mle blechoel lousekool el kaibedechakl a chimomam e omes el kmo ng techa mesisiich. Aki di diul meral merengmam lomet er a chimal a chad e omes el kmo ng techa kot el mo meringel. Chelechang eng ko er a diak a rechad el kmal ousekool er ngii, eng di sel taem e a ki mle blechoel ousekool er ngii. A tara kuk ki mousekool, e a Demak a ulemes er ngak e kmo, “Ng kmal mesisiich a chimam, e Rungalek. A kureng me a chimam a melemolem el mesisiich el diak bo morutech a mekull er a bedengel a redil.” E sola ulengit er ngak me kulemolem el klikiid er a tekoi er a deleboes e ngilsuterir a rebebil mo meruul er a osisiu el teletael.
A Elder Douglas L. Callister a ulechais er tiakid el tekoi el kirel a demal: “A tara ki mngara omerollam el me remei e a demak a di mle kiul dmu el kmo, ‘Ak mle harau ongeltacher ngak er chelechal sils. Ak lilchesii a tekoi el “ke mesulang” er a check el mle ongeltacher ngak. A kmal mereng a sulel a Dios lomekngeltengat er a telungalek er kid.’”
A Elder Callister a kmal kullii a demal el sensei: Ng ulsisechakl lokiu omeruul me a teletael er a blekongesenges.”15
A kumdasou e ngungil a kuk debong e di el kid loker kid, “Ngera kmo olisechakl, a lechub e ngerang a kulisechakl , el mo er a rengelekek lokiu omeruul me a olchotel a blekongesenges?”
Olisechakl er a Telungalek Lokiu Omesubel Chedaol Llechukl
A omesubel chedaol llechukl er a telungalek a kot el ungil teletael er a osisechakl er a blai.
A President Russell M. Nelson a dilu el kmo, “A rechedam me a rechedil a diak el kirir el kuk di mo mesisiich er a tekingel a Rubak, ng dirrek el ngarngii a chedaol ngerchelir lolisechakl er ngii el mo er a rengelekir.”16
A Julie me a ngak er a ki momekeroul er a rengelekam, e aki milasm el oba ulterekokl el teletael er a osisechakl. A ta er a rak e ki kuk tilbir el mo menguiu er a Babier er a Mormon el tekoi er a Sebangiol el telungalek. Tiang locha mle uchul ea Rubak a ulemekedong er tirkel ngelekam el mlo er a mission el mo er a ikel beluu el melekoi a tekoi er a Sebangiol? Es posible [Ng locha uasiei].
Ng kal mlo serrechokl a renguk el kirel a Brother Brian K. Ashton er a louchais er ngak el ngii me a demal a milnguiu a bek el llel a babier er a chelsel a Babier er a Mormon er a longeteruich me a ongeru el skuul er a high skuul. A Brother Ashton a kmal soal chedaol llechukl. Ngellechukl er a uldesuel me a rengul. A demal a dillemii tial tane er a uldesuel a Brother Ashton er a lengeasek, e tial tane17 a mla mukeroul el mo chimol kerrekar er a klemerang. A Brother Ashton a mla meruul er a osisiu el teletael el mo er tirkal meklou el ngelekel.18 A eai a rekil ngelekel sechal a dirk uleker ngii, “Chedam, ng oingerang e ak mo menguiu er a Babier er a Mormon lobengkem?”
Olisechakl lokiu Okesiu
A ulebongel, e sel kot el klou a belkul el osisechakl er a roungalek a okiu okesiu er kid. Kid a mle modurch el mo “okesiu el mo er a roumerang, lokiu omelekoi, cheldecheduch, beltikelreng, reng, klaumerang, me a klikiid lomeruul.”19
A dirk mlo merek el omerollam, e a Julie me a ngak a mlo er a ikelesia e milsa tiakid el teletael. A ngeasek el chad, el merolung el mo er a mission, a milngedecheduch er a temel a sakrament miting.
Ng dilu el kmo, “Kom locha omdasou el kmo a demak a kmal ungil chad er a chelsel a ikelesia, eng di …” E ko er a mlo chelellakl, e ngak a milngiil el kmo ngerang lmuut el tekingel. E ng dula el kmo, “Ngii a lmuut el ungil a blekerdelel chad er a blai.”
A kulureng a sulel ngika el ngeasek el buik ruriul el kirel omengull er ngii el mo er a demal. Ak mlo medengei ruriul el kmo a demal a mle bisop er a ward. Ng uaisei el ngika el bisop a mle blak a rengul mesiou er a ward er ngii, e ng di ngika el buik a ulemdasou el kmo a kot el ungil okesiu er ngii a ikel ngara blai.20
A Elder D. Todd Christofferson a mellach el kmo: “Ng kmal betok a techelled el olisechakl … er a merael mei el telcheroll, e kired el mo er sel kot el tkul er rebab el sebeched el kirir. E a kot el ngaruchei, eng kired el melemolem el mengelechel e ngosuterir a roungalek el mo ungil e ulterekokl el sensei … oumesingd lokiu okesiu.”21
Tiaikid a teletelel Osobel a lolisechakl.22
Tial mlo merek el rak, er a ki mngara vacation lobengterir tirkal teru el kot el mekekerei el ngelekam, e a Julie millekoi me ki bo moruul a techolbechelid el kirir a re mla mad er a templo er a St. George me a San Diego. Ng ko er a di mle ngak el mengiremrum—lomdasou el—kmo, “Kede mlo er a templo er a blid, e chelecha e kede ngara vacation. Ngera meng kuk diak doruul a ngodech el tekoi?” Uriul er a techolbechelid, e a Julie mle soal a ki mnguu a siasing er kemam er a iikrel a templo. Ak luueta el di ngak el—mengiremrum. Omomdasou e ngera dilubech—aki millai a siasing.
A Julie soal a rengelekam a lolab a ungil siasing el kirel a ngesou el mo er a rebeldekam, me ngak me ngosisiu. Ng dimlak ki mousbech er a chelderoder el suobel el kirel a templo. Aki mla er a omeruul—me ak mereng a sulel a chedil el betik a rengul er a templo e soal a rengelekel a lomerk er a tial beltikelreng.
A roungalek sel sekum e te mengeluolu er a beltikelreng e ochotii a ungil okesiu, e a rengalek a di mereko el ngeltengat.
Ulebongel
Kemiu el rokui el melasm el mo ungil sensei er a chelsel a delengchekliu, a kureng me bo betik er a budech me a deureng er sel blakelreng er kemiu. E a momelchesiu el kmo komousbech a ngesou malechub eng kedmekliu e a kulengit me motireklii lokiu odbechel Chedaol Reng e bo mngara blakelreng.23
A Elder L. Tom Perry a millekoi el kmo, “A ungil ulekerreuil a beluu, a deureng er a rechad, a klungiolir, me a budech el mo er tir a di ultuil er a chimol osisiu el teletael el ngii a osischeklir a rengalek er a blai.”24
Choi, a blik er chelechang a bechachau, eng di ak dirk kldmokl er sel techall, e semeriar er a ikel medechel el techall el mo olisechakl er a remeklungang el ngelekek, me a rengelekir, e oureng, me a tara klebesei, e a kulisechakl er a rengelekir a rengelekir.
A kulengit a ngesou er a babeluades er chelechal dolasm el mo olisechakl el uaia Kristo er a chelsel a rekeblid. El ngara ngklel a Jesus Kristo, amen.