Sel Rengul a Profet
Ng sebeched loutkeu el kmo a profet er a Rubak a ngar ngii ea urelel a Rubak a mlekedmokl lokiu sel Ngii a mileskid.
Ak mle blak a renguk el meluluuch me a Chedaol Reng bo lobengked er tial chedaol sils. Aikal bla de ues a chetengakl leng kel mo meng teruich me a cheuid el profet er chelelchal taem a mla nguu a kengei er tial chedaol ongdibel.
A kulsiik a ulekrael el mo medengelii a soal a Rubak a bo kusaod, ma uldesuek a mlora dirk blem katekoi lobengkel a beches el Kot el Presidency. Sera kim kadecheduch, e a tara counselor a mlouchais a tekoi el ua taikid. Ak meral loureng ulekum ma rechedal a Ikelesia a sebecherir el mo melchesuar er a delechel tial mla mekedmokl, er a okedongel a beches el profet er kid, el President Russell M. Nelson, me sel ultutelel a cheledaol e chedaol ongdibel el morngii er tial klou el ongdibel.” Ng dirrek el ulemtab, “Ng mla morngii a teruich el rak, meng betok, tokuni a rengeasek er a Ikelesia, el diak el lletkii malechub el bla lesa choua tia el tekoi.”
Tia rirellak el momdasu er ak blarengii el teletael. A kot el profet el kudengelii a President David O. McKay. Ak mle 14 a rekik er sera le mad. Ak medengelii a klengitelreng el mlei er sera bol dibus, ea iuosech er a medal a delak, me a klengitelreng el telungalek er ngak a ulmelchesuar er ngii. Ak dobedebek a tekoi el “Kulengit mo mekngeltengat er a President David O. McKay” er a le tobed ra ngerek el di mle beot el ngara nglunguchek e le alsekum meng dimlak kumtab a kulekoi, ngii me a uriul er sera bol dibus, e ak dirrek el di mo melekoi osisiu. Ak melbedebek alsekum a renguk me a uldesuek ng locha sebechel loiuul aikal kumelchesiu me a ngara renguk el mo er tirke el merael mei el profet. Eng di tia kmal diua chedam ma chedil el betik a rengrir er a bek el ngelekir, e ak miltik er a beltikelreng el kirel, me a omak er ngak el mora, klaumerang er ngak er a President Joseph Fielding Smith, el uleak ullel a President McKay, me a dirrek el tirkel mle oeak ullel. Harold B. Lee, Spencer W. Kimball, Ezra Taft Benson, Howard W. Hunter, Gordon B. Hinckley, Thomas S. Monson, e chelechang e ng President Russell M. Nelson. Ak meral mui el oldubech er tirka el bek el profet lodersii a chimak—me a renguk.
Mesel tirka el betik ra rengud el profet a le mad eng uaisei el bo dolchesiu a klengitelreng me a riid. Eng di a kngtil a rengud a mo moded er a deureng me a urunguled el ngii a mei sel bo desang sel kot el ngarbab el klengeltengat er a Oluut: a okedongel me a kengei er a ngar el profet el ngara beluulechad.
Tiakid a uchul, e ak mo mengedecheduch el kirel tial chedaol el teletael el mla mekedmokl er a uriul er a oketiu el klebesei. Ak mo smodii el euang el bliongel: a kot, sel bol dibus a profet mel bolak a First Presidency; ongerung, sel taem er a omengiil er a lmuut el mengederodel er a mo beches el First Presidency; ongedei, okedongel a beches el profet; e a ongeuang, kengei er a beches el profet me a First Presidency er a cheledaol ongdibel.
Se el Mad a Profet
Sera January 2, 2018, ea profet er kid el Thomas S. Monson ra lorael el mora bital beluu. Ngii a mo kiei el ngara rengud. A tekingel a President Henry B. Eyring er a le mad a President Monson a smodii a domelchesiu. “Sel olechotel a klengar er ngii, el diua Osobel, a bol kerekikl er ngii el mo odersii el mo er a remechebuul, resmecher—me a rokui el chad—er a beluulechad el rokir.”1
President Spencer W. Kimball a silodii:
“Sel lengelt a imol bduch er a eanged, e a tang a me chemolt, e a kodall a mechellii a klengar.
“A urerel a Rubak a diak a ulebengelel. Ngii mesel ngarbab el merredel a mad, e ngdiak a di chimol taem e a Ikelesia a diak lak oungerachel er ngii, el sulel a bekokouii el Omeskid a Rokui el msa a rengedel meng melemolem el di ngarngii. El uai tia el dilubech … uchei er chelechal taem, a rechad a mla melakl a debull, smuld chiuosech ra mederir, e mo chobangel a ngarmedad.”2
Delongelel a mlo Merek me a sel mo Beches el Omengedereder
Sel taem er a delongelel a kodellel a profet me a lmuut el omengederodel er a First Presidency a dolekoi er ngii el kmo “apostolic interregnum.” Chelsel tial taem, e a Chelechad er a re Teruich me a terung, el ngarcheungel a chederdellel a president er a quorum, a dmak el olab a kiis el lorrurt er a urerel a roungerachel er a Ikelesia. A President Joseph F. Smith a ulisechakl el kmo “Ng di ngarngii a bdelul a Ikelesia, me alsekum a Presidency er a Ikelesia a mo merek lokiu a kodall malechub a kmong ngerang, e sel mo nguu a bdelul a Ikeleisa a re Teruich me a terung el Apostol, di merekmo luut el morngii a presidency.”3
Sel kot el dirk ke mlo bechachau el kingall sera President Monson a lemad sera January 2 el uriul er a teruich me a erul klebesei el Sandei, January 14. Sera tutau er a Chedaol Sils, ea Chelechad er a re Teruich me a terung a mlo dmak er sel ngarbab el delmerab er a Salt Lake Temple lokiu a reng er a olsengerenger me a nglunguuch, el omekrael er ngii a President Russell M. Nelson, el kot el ngarbab el Apostol e President er a Chelechad er a re Teruich me a terung.
Okedongel a Beches el Profet
Tial cheledaol e diak dobes er ngii el miting, loltirakl er a ungil-kldmokl lokesiu el dmak loldubech, ea Rodam el dilengchokl tirkel ngarbab er a kmeed el iliuekl el 13 el kingall a uleldars chimorir el kot el mo kongei er a omengederoder er a First Presidency e mochu kongei er a President Russell Marion Nelson el President er a Ikelesia er a Jesus Kristo er a Uriul-klebesei el Santo. A mlo oeak ullel tial kengei a uldekial a Chelechad er a reTeruich ma terung el iliuekl e ngilai a chimorir loia er bebul a bdelul a Preident Nelson el olterekokl er ngii, e ngkel ongerung el ngarbab el Apostol a milengedaol.
A President Nelson a ulecholt a ngklir a re counselor er ngii, el President Dallin Harris Oaks, President Henry Bennion Eyring, lobengkel a President Oaks el President er a Chelechad er a Teruich me a terung el Apostol me a President Melvin Russell Ballard el Acting President er a Chelechad er a Teruich me a terung el Apostol. Uleakullel a osisiu el sengkio el kongei, ea ta ma ta er tirkal rodam a mlo moterkokl el mo er a ikel obis el lengar ngii lokiu a President Nelson. Tiang a mle imis el chedaol el omeruul, lobengkel a klou el Chedaol Reng. Ak meskemiu a meral sioning er ngak el kmo tiang a urungulel a Rubak, el ngii a ki mle blak a rengmam el meluluuch el kirel, e mlocholt el mesisiich el ngara omeruul me a milkedmokl er sel sils.
Me a omengedaol er a President Nelson me a omengederodel er a First Presidency, e sel bechachau el kingall er a apostilic a mlo diak, e sel beches el milteketek el First Presidency a ulemuchel el oureor, meng, dimlak a tal el taem mel meterob a orretel a rengedel a Rubak er tial beluulechad.
Cheledaol Ongdibel
Chelecha el tutau, tial chedaol omeruul a milkedmokl lokiu a chedaol llechukl el kmo a rokui el tekoi a kirel meruul el ngara blechebechel, lokiu a kengei er a ikelesia, lokiu a nglunguuch loba klaumerang,4 e a tedei el Presiding High Priests, … el nguu a kengei lokiu klemerang, klaumerang, me a nglunguuch er a ikelesia, a udelii a chelechad er a Presidency er a Ikelesia.5
Elder David B. Haight a silodii a mlo merek el lomeruul el uai tia el de ngarngii er chelechang:
“Kid a sioning e teloi er a kot el chedaol el sils—el cheledaol ongdibel el meruul a tekingel a babeluades. El di ua ngara mong el taem, el mla er ngii a betok el olsengerenger ma nglunguuch el blo er ngii a re Santo liueklii a beluulechad me bol nguu a klou el Reng er a Rubak, el ngii a chemolt … er chelechal tutau.
“A cheledaol el ongdibel, el ngklel a ochotii, a olecholt er a chedaol, ulserechakl, e kuoll el re Santo a kldibel el okiu a omengedereder er a First Presidency.”6
Rodam me a rodos, ng sebeched loutkeu—e oldiu, “Hosanna!”—le omelkingel a Rubak, el profet er a Dios, a ngar ngii e a Rubak a ungil a rengul el kmo a urerel a mle keldmokl lokiu sel Ngii a mileskid.
President Russell M. Nelson
Tial chedaol teletael a ngoikid el mora tara chedaol mlokedong el profet. A President Monson el tara kot lungil chad el mla mei ra beluulechad, a President Nelson a uaisei el dirrek. Ng mla nguu a dmolech el omengedmokl me a osisechakl er a Rubak el mo omekrael er kid er chelechal taem. Ngklou el klengeltengat el lobang a President Russell M. Nelson el ungil e blak a rengul el profet—ngii a 17 el President er a Ikelesia er chelechang el ngii a ulebongel el taem.
A President Nelson a meral ngodech lungil chad. Ng mla er ngii a techellek el oureor er a Chelechad er a Teruich me a re terung lobengkel el president er a chelechad er kemam el mla mo kmeed el eru el rak. Ak mla obengkel ngar omerael e mechas a renguk er a klisichel a bedengel. Ng kired lorreched me kerdi obengkel! A idisel a beluu el blal bo er ngii a 133 er a chelesel a klengar er ngii.
A odngelel a mora rokui, kekerei me a meklou. Ng uaia lodengelterir a rokui el chad e meral diak lobes a ngakl. A rokui el medengelii a omdasu el kmo ng kot el soal tir. E meral uaisei el mora derta er kid—le uchul a meral beltkil a rengul e kerekikl er a rebek el chad.
Sel klasoues er ngak ma President Nelson a di tekingel a ikelesia, engdi ak dirrek el mla mo medengei a luruul lureor ruchei er a bol General Authority. Ng betok er kemiu a medengei el kmo ng kot el meduch lomotk a chaidireng ra beluulechad er rokir, sera uchelel a kltoktang er ngii eng, mle tar tirkel milebii a mesil ra chaidireng-olmeded. Ngii ulureor er a chelechad ra omesuub el ngii a olngeseu a mle kot el tekingel a betkel a chaidireng el mora chad er sera 1951 lousbech ra teletael el heart-lung bypass. President Nelson e ulemotk er a chaidirengul a President Spencer W. Kimball el dimle telkib el taem eng mo profet.
Meng, sera President Nelson a le mokedong el mo er a Teruich me a terung er sera 34 el rak ra mla memong a mlo torbengii a urerel er a kltoktang el meruul e melisiich a chaidireng, e ulemuchel mesiou el Apostol el blak a rengul el melisiich e meruul a rengrir a rebetok er a retelael el meliuekl er a beluulechad, el dersta er tir a mla mo mesisiich e mukar er a tekingel me a ungil lomerellel, omesiungel, me a beltkil a rengul.
Di uaia Rengul a Kristo
Sel kumes er a diua rengul a Kristo er a omeruul ra bek el sils, e ak kmesang a President Nelson. Ng dirkak kisa chad el oba choua tial blekeradel el kuk ngarbab el ua ngii. Ng meral lungil losisechakl el mei er ngak el mle sebechek el mesang a olechotel a uaia rengul a Kristo er a President Nelson.
Chelsel a sesei el sandei er a okedongek er ngak el mora Teruich me a terung er sera October 2015, eng mlo techellek el mesa klengar er a Presidnet Nelson sera le toktang. Ak ngiluu a siotai el mora ongdibel sera lenguu sel chetengakel el mle kot lurelel a botk er a chaidireng. Sera ksiseb er tial basio, e ak mlo mechas a renguk er a rebetok el selmong el chad el mlar ngii el momes e chemat er a ureor el President Nelson a riruul er a betok el rak ruchei el sera le toktang e chad er a botk.
Sel kesus, e te betok el selmong el chad a mlodechor el chemat e menguul a le kildmokl a President Nelson el kirel a kot lungil tekingel a ukeruul. Ng mle betok el ungil tekoi a lulecholt a derta el chad el kirel a President Nelsonel el kirel kakerous el klungiaol kildmokl, ngdi bai kmal chilsir a renguk er a kungedecheduch er a chad el dilengchokl ra bita er ngak. Ng dimlak lodengei el kmo ak techang, eng di mle medengelii a President Nelson, el Dr. Nelson, el uluungerachel er a remesuub el mo toktang lomotk a ulud er a skuul ra kltoktang er sera 1955.
Ng ka el chad a ble lolsisechakl er ngii a President Nelson. Nguluchais a betok el lodengei. E kora mle tokubets a omesodel er a teletelel a President Nelson a lolsisechakl, meng, millekoi, ngii a mlo merael chisel el kirel. Ng silodii el kmo a betok losisechakl a botk ra chaidireng a mla er ngii er a blil a botk. Seikid, ea remesuub a omes e omotk el ngar eungel a chad loungerachel, tiang a uaial lureor er a klas. Nguluchais el kmo a blil a botk el ngar eungel a tara oungerachel a dil katotaod er ngii, e kaiuechit, omelchesiu a berraod, ma bechechelingaol reng. Ngkal chad a silodii el meringel el teletael, el bebil ra taem eng ual otuub. Maluaisei, e tirkal mesuub el mo chad er a botk a ulmedasou el kmo tiang a diak el dil beot el omesuub.
E ngii a kuk mlo smodii a ngodech el teletael el de betik er ngii e ra blil a botk el ngarngii a President Nelson. Ng mle blil a budech, chelellakl, e kuoll. A re mo toktang a llomes er tir loba omengull. Engdi, sel bol merek el olecholt a loruul, ea Dr. Nelson e mle mengerchir er a kot el ngarbab el teletael er a omeruul er a derta er tirka el mo toktang. Ngkal chad a dilchelii a omesodel el uase a kot lungil ukeruul el ngiluu a resmecher ma kot lungil toktang a tilobed er sel blil a botk er a Dr. Nelson.
Tiang a diak el chesir a renguk. Le tia sel bla kisang ra medak, e mukngeltengak er a Chelechad er a Teruich me a terung. A kumelchesiu er ngak, el uak, ta er tirka el ngara “omesubel a kltoktang.”
A President Nelson a tokubets a lolsisechakl ra rebebil el omesterir a omeruul el moungil loba ungil blekeradel, omengull, me a omelkakl. Ngii a cholechotel a diua rengul a Kristo e okesiu el merkid el rokui. Ngokiu ngii, e kede subii el kmo ngii di el teletael el de ngarngii, a omerelled me a rengud a sebechel mo osisiu ngii ma llechul a ebangkelio er a Jesus Kristo.
Chelechal taem e kid obang a klengeltengat el loldubech er a profet er kid, el President Russell M. Nelson. Chelsel a klengar er ngii eng mla kudmokl a betok el ngerchelel, el ngalek ra skuul, chedam, professor, bechiil chad, toktang, oungerachel ra priesthood, chedam el rubak, e Apostol. Ng riruul aikal ngerachel—e melemolem el meruul—loba rengul a profet.
Rodam me a rodos, a ikel bla deues ma duruul er chelechang, el cheledaol el ongdibel, a mekrolak el mora sioning er ngak el kmo a President Russell M. Nelson a ngar el omelkingel a Rubak el mora rokui el chad. Ak dirrek el dochelir a klaumerang er ngak er a Dios el Chedam, me a Jesus Kristo, me a ngerchelel el Osobeled. El ngara ngklel a Jesus Kristo, amen.