Ngang Mi Nafoch? Upwe fen tour ngeni?

Achengicheng pwi me fefinei, met ren ei feioch ren ach sia chufengen ach sipwe kaeo seni noun ewe Samon kei chon angang. Ifa me murinno ren chommongun anen an Samach won Nang emwenikich me efeiochukich? I a fokkun mochen sipwe niwino ren I.

Non ew kinikinin umoumoch nupwen ua emon anuwon toktor ua awesi sukunen toktor, ua ketiw me non ewe pranch ren pekin kaeo ngeni safei fan iten tumunun monukun tori 18 ier. Nupwen ua churi ekkewe pwan ekkoch chon ewe mwich, ua mefi pwe ese naf ai tipachem me moneta me nein meinisin. Ua ekieki pwe ese wor ew an upwe tongeni usun tufichin meinisin chon ewe mwich.

Nepoputan non ounungatin maramem ewe, ua momot non ewe nenien kangof non piong ua kekechiw ngeni inisi tori ai ua moureno nupwen ua sotuni ne amasowa ewe taropwen nuing ren emon semirit at mi uri semwenin ammat. Use mwo memmefi ai upwe mefi tipemwaramwar non manauei. Use fokkun sinei ifa usun ai upwe anisi osukosuken ewe semwenin ammat ren emon 10 ier. Ua poputa ne ekieki ika met ewe u fori ikewe.

Non na chok fansoun, emon me nein ekkewe mi mukono chon ewe neni a wata poun won afarei. A eisiniei ika ifa ussi, me ua pwarano ai ningeringer me nuokus. An ponueni a ekesiwini manauei. A ereniei ukukun an me meinisin ekkewe chon ewe neni mi mukono ingeitiei me ifa usun ar mefi pwe upwe emon tokter mi murinno. Ren mochomochan, a nuku non ngang non ew fansoun nupwen use pwisin nuku non pwisin ngang.

Usun pwisin ai sinei, napengeni sia rong ekkewe member ra eis, “Ngang mi nafoch usun emon arams?” ika “Upwe fen tongeni tour ngeni ewe muun celestial?” Ewer, ese wor och mettoch usun “ach sipwe nafoch.” Ese wor emon me neich epwe tongeni “angei” ika “fich ngeni” ach manau, nge mi weweoch ach sipwe ekieki ika kich mi ketiw me mwen mesen ewe Samon, ina usun ua awewei ekkei kapas eis.

Fan ekkoch nupwen sia fiti fan, sia mefi tipemwaramwar pwan mwo ren ewe koko ach sipwe emwirinouo inisich. Sia ekiek non mosonoson, “Use tongeni fori mettoch meinisin ua kaeo” ika “Use tongeni ai upwe murinno usun meinisin ekkei aramas.” Meni sia mefi usun chok met ewe ua fori non ewe pioing non ena pwinin.

Ouse mochen, achengicheng pwi me fefinei, sipwe ukutiw ne awewe fengenikich me ekkoch. Sia chok eriaffoukich ne anonno fengenikich me okkufu fengenikch. Sia amwanono ach ekiek ren auchean inisich ren ekkewe mettoch ese wor ika mi wor rech me ekkewe ekiek an ekkoch. Ika sipwe anonno fengen mettoch, iwe sipwe anonno fengeni ifa usuch me nom ngeni usuch ikenai—me ngeni ika epwe ifa usun ach mochen sipwe usun non ekkana fansoun mwach. Ew chok ekiek usun kich a auchea ren met Samach won Nang a ekieki usun kich. Ouse mochen oupwe tingor ika met ekiekin usumi. I epwe awenakich nge esap etipemwaramwarakich; ena an Setan otuputup.

Mut ngeniei upwe awenecharau me affatau. Ponuen ekkewe kapas eis. “Ngang mi nafoch?” me “Upwe fen tour ngeni?” Ponuer pwe “Ewer kopwe nafoch ngeni” me “Ewer, kopwe tour ngeni ika kopwe chok akkaier me kosap awewe om fofforungaw me u ngeni I. Ewe Koten nang esap I chon tumunu pekin urumwot epwe foruta an kinetipingen an epwe etiwakicheu ach sisap fiti ewe urumot. I Samach mi tong o unusoch a mochen nap seni och mettoch an epwe angei noun meinisin ar repwe niwinno nonnom ren non nenian non nikinikin famini feinfeino. A ennetin fangeno Noun We Anaemon pwe sisap mano nge sipwe ani ewe manau esemuch!¹ Ouse mochen oupwe achifoua, me ouse mochen oupwe awora ami anean me kinamwe seni, ena ennet ese much. Pwi me fefinei, Semach won Nang a mochen kich sipwe tour sipwe niwinno ren I! Ina an angang me an ning.²

Ua sani usun napanapan an Preseten Gordon  B. Hinckley afanafana ei nongonong. Ua rongorong an afanafana non ekkoch fansoun, “Pwi me fefinei, ewe Samon a mochen kich sipwe achocho, nge kopwe wesewesen achocho!”³

“Wesewesen achocho” wewen sipwe wesewesen fori ren ukukun ach tufich, esinna ia sia mochen sipwe fefeita me ia, me pwan achocho sefani. Ren ach eniwini ne fori ei, sia kanengeni me kanengeni ach ewe Samon, a napano ach mefi Ngunun we,⁴ me a napano ach angei an chen, are an aninnis.⁵

Ua ekieki fan ekkoch pwe sise esinna ifa ukukun an ewe Samon mochen an epwe anisikich. Ua sani ekkewe kapas an Elter David A. Bednar, a apasa:

“Napengeni kich sia fen weweochuti pwe ewe Achasefan fan iten chon tipis. Use kon fat, nge sia sinei me weweiti pwe ewe Achasefan pwan fan iten souneng. …

“ Ewe Achasefan mi awora aninnis ngeni kich ne pworacho ngeni are kunnu seni mi ngaw o epwe anisi kich ne fofforoch are winiti aramasoch. …

“‘… Iei … ren ewe chenin ewe Samon emon me emon aramas … repwe angei pochokun me aninis ar repwe fori angang mi murinno minne resap tongeni ar repwe tufichin [fori]. … Ewe chen ew manamanen aninnis...’ [Bible Dictionary, “Grace”; awewe mi pachenong] … ika aninis seni nang emon me emon kich sia mochen an epwe ngenikich ewe tufich ach sipwe tongeni tori ewe muun celestial.”⁶

Iwe met sipwe fori ach sipwe angei ei aninis seni nang sipwe tingor fan itan me mokutukut won ekkewe memmef mi pung sia angei.

Ewe porous mi napanap pwe ika a wor ach tekisosonun aier, ach kewe tipis resap epeti senikich ach sipwe fefeita. Moronai a apasa ngenikich usun ekkewe chon atai annuk non an ewe fansoun, “Pwe nupwen repwe achocho ne aier me mochen repwe musono, fiti ennetin ar mochen, repwe musono.”⁷

Iwe ewe Samon a pwisin apasa ren ekkewe chon tipis:

“Ika epwe pwarata tipisin fan mesom me ngang, me aier seni ennetin netipan epwe musono, me ngang upwe pwan omusano.

“Ewer, ika nei kewe aramas repwe achocho ne aier upwe omusereno me ar kewe tipis ngeniei.”⁸

Ika kich sipwe netip pwetete ne aier, Kot epwe fokkun omusakicheno, ina mwo ika sipwe eniwini ne fori ewe chok ew tipis. Usun Elter Jeffrey R. Holland a apasa: “Ina mwo ika ka ekieki pwe ka mitiseni chommong tufich, ina mwo ika ka mefi pwe ka fori chommong mwan… , ua pwarata pwe kose sai towaw seni ikewe kopwe kuna ewe tong an Kot. Ese tufich om kopwe kokotiw seni ewe saramen an Kraist ewe Achasefan ese much epwe chok tongeni asarama ngonuk.”⁹

Esap wewen pwe tipis mi ketiw. Iteiten fansoun meinisin tipis mi wor osukosukan. Iteiten fansoun meinisin tipis a efeiengawa me emeteki ir me ruemon ewe chon tipis me ekkewe ra osukosuk ren an kewe tipis. Me ennetin aiersefan ese fokkun mecheres.¹⁰ Ouse mochen oupwe weweiti pwe inamo ika Kot a angeiano ekkewe niwinin me nimengawen ach tipis nupwen sia aier, meni I esap mwittir angeiano meinisin ekkewe osukosuken ach tipis. Fan ekkoch ra chok nonnom rech non unusen manauach. Me ewe wesewesen akaewin tipis mi ngaw ewe si ota kokotun ach sipwe fori me mwen epwe fis, nupwen emon epwe apasa, “Upwe tipis iei me upwap aier mwirin.” Ua nuku pwe ei sokkun mi turunufasei ewe asoren me riafoun Jises Krasit.

Ewe Samon a pwisin affata, “Pun Ngang ewe Samon use tongeni upwe nengeni tipis fiti met ukukun mi mumuta.”¹¹

Iwe Alma a affata, “ Nengeni, ua apasa ngonuk, fofforungaw esap tongeni pwapwa.”¹²

Ew me nein ekkewe popun an Alma ewe porous pwe mi pung pwe ren tipis mi chok ekkeniwin, sia atowawano kich seni ewe Ngun, sia mefi tipemwaramwar, iwe mwirin sia kouno ne aier. Nge ua eniwini, pokiten an ewe Chon Amanau ewe Achasefan, sia tongeni aier me musono unus, mwitirin chok ika ach aier sefan mi ennet.

Met sise tongeni fori sipwe apungano pwata sia tipis nap seni aier. Esap ponueta ach sipwe pwarata inisich non ach tipis ren ach apasa, “Kot mi sinei a men chok weires ngeni ei, nge I a etiwaei.” “Ennetin achocho” wewen sia nikitu tori ach sipwe tour ngeni nonnomun ewe Samon, minne a affatoch non ewe kapas eis ra eisinikich ren ach sipwe tongeni angei nouch taropwen mumutan non tempel.

Pwan och mettoch a pwan tongeni eppet seni kich ach sipwe tonong non nang me aimu senikich ewe aninnis sia mochen iei ewe angangen u ngeni. Seni ewe puken Moses, sia kaeo pwe Setan a koturuu seni nang ren an angangen u ngeni.¹³ Sia nom non angangen u ngeni inet chok fansoun sia apasa non netipach, “Use mochen Kot, me ese namot ai upwe aier.”

Non wisei we emon tokterin semirit, Ua sinei pwe ika emon a poponi aninnisin pekin aion mi tongeni esenipato mano, minne a emwen ngeni manon inis. Usun chok, nupwen sia u ngeni Kot, sise chiwen etiwa ewe aninis me apinukunuk, an Jises Kraist, minne a emwen ngeni manon ewe ngun. I ewe an, me I ewe ew chok apinukunuk. Ese wor emon neich a tongeni fori ei won pwisin an pochokun. Ese wor emon neich epwe tongeni “nafoch,”etiwa ren ekkewe tufichin me umoumochun Jises Kraist,¹⁴ nge pokiten Kot a afona ach pungun finata, sise pwan tongeni manau ika ese wor ach achocho ne nikitu. Ina usun ewe napanap nefinen chen me foffor. Sia tongeni nuku non Kraist pun I a mochen anisi kich me siwini kich. Ennetin, A fen anisikich. Kopwe chok kouno me ekieki usun o esinna An aninis non manauom.

Ua pwarata ngenikemi pwe ika oua fokkun achocho me ousap ekiekingaw ika u ngeni—aier sefan ew angangen tingoren ewe chen, ika aninis an Kraist—oupwe ennetin “nafoch,” ngeni ami oupwe ketiw me mwen Samon; oupwe tour ngeni ewe muun celestial oupwe unusoch non Kraist; me oupwe angei ekkewe feioch me ning me pwapwa Kot a mochen fan iten emon me emon noun kewe—pachenong ami meinisin me ngang. Ua pwarata pwe Kot mi manau me a mochen pwe sipwe niwino ren non nenian. Ua pwarata pwe Jises mi manau. Non iten Jises Kraist mi pin, amen.