Angangen Aninis
Memper meinisin mi auchea, me mi auchea epwe wor ar tufichin angang.
Nupwen ua emon kukun at ua sani ai angang ren tetenin semei we Lyman me tetenin inei we Dorothy non ar we atake. Tetenin semei we Lyman a wisen emweni am angang, me tetenin inei we Dorothy a wisen aninis ne uwei war ewe taraku minen nom. Ua chechemeni ai pwapwa nupwen aua sa non pokak are achocho ngeni am aupwe tota won eu chukuchukuta: Tetenin semei we Lyman a puchor, “Kopwe amweta ngeni ewe kia mi angang fengen, Dorothy!” Ina atun ua poputa ne iotek. Iwe mwirin, seni ewe aninis an ewe Samon me akurongen ekkewe kia , Tetenin inei we Dorothy a amweta ngeni ewe kia mi angang fengen. Meinisin ekkewe taia mi kun me mokut, iwe ewe taraku a poputa ne sa me aua sopweno ne angang.
“Amweta ngeni ewe kia mi angang fengen” a wewen pwe a amweta ngeni ewe kia non ewe taraku pwe ekkewe parikin mi angang fengen ne awora pochokun wate. 1Eu kia mi angang fengen, fiti fengen me ekkewe fofou taia ra kun, iwe a atufichi ewe taraku an epwe amweta ewe kia , awateno ewe pochokun, me mokut.
Ua ekieki pwe kich mi usun eu kia mi angang fengen nupwen sia achocho ne angang fengen non ewe Mwichefen—non wart me pranch, me non ekkewe mwich. Usun chok ekkewe kia ra angang fengen ne ochufengeni ar pochokun, mi wor ach pochokun nupwen sia angang fengen. Nupwen sia chufengen ne angang fengen, sia tongeni fori chomong mettoch nap seni met sia pwisin tongeni fori. A fokkun apwapwa nupwen sia angang fengen me aninis non ewe angangen ewe Samon.
Angangen Aninis mi eu Feioch
Ewe tufich ne angang ngeni ekkoch mi eu feiochun chon ewe Mwichefen. 2 Ewe Samon a apasa pwe ika sia tongei I, sipwe angang ngeni I3 me sia angang ngeni I ren ach angang ngeni ekkoch.4
Nupwen sia angang ngeni ekkoch, sia arap ngeni Kot.5 Sai kaeo usun I non och napanap naman esap fis ika sise fori. Ach nuku non I a wateno. Sia weweiti ach kewe osukosuk. Sia kuna pwapwa non manauach. Ach tong fan iten aramas a awateno, pwan ach mochen angang ngeni ekkoch. Ren ei an mi feioch, sia apiru Kot, me sia ammonata ne niwin ngeni I6
Preseten Marion G. Romney a aitikich pwe: “Angang ngeni ekkoch esap eu mettoch sia engino ngeni won ei fonufan ach sipwe tufichin nom non ewe ningen akar. Ach angang ngeni ekkoch ina met masowen manau fefeita non ewe ningen akar.”7
Ach Angang Ngeni Ekkoch mi Tongeni Weires
Nge ach angang non ewe Mwichefen, mi tongeni weires ika sia kokko ngeni ach sipwe fori eu mettoch sia niweiti, ika sia chipwang ne angang, are ika sia kokko ngeni ach sipwe fori och mettoch sise mochen fori me akkom.
Ua keran chok angei eu wis mi minafo. Ua angang ngeni ewe Southeast Area non Africa. Ua men sani ai angang non eu neni minne ewe Mwichefen mi kukkun me a poputa ne mamarita, me aua tongei ekkewe Sounang. Iwe ua kokko ai upwe niwin ngeni Utah, me ennet, use ennetin pwapwa. Mi wor chommong mettoch use sinei usun ren wisei minafo.
Eu pwin mwirin ua ekieki usun siwinin wisei, ua tan usun seman seman seman semei we Joseph Skeen. Ua kaeo seni noun puk pwe nupwen i me punuan, Maria, ra feino ngeni Nauvoo, a mochen angang ngeni ekkoch, iwe a kuta ewe Soufos Joseph Smith me a kapas eis ifa usun a tongeni aninis. Ewe Soufos a tingorei an epwe angang won ewe atake an ekkewe Smith fitu main seni ewe sop me epwe achocho, me a achocho.8
Ua ekieki usun ewe tufich a uor ren Joseph Skeen pwe a tongeni angei wisan non ei napanap. Iwe mwitir chok ua weweiti pwe a nonno chok ai tufich, usun chok kich meinisin. Wisen Mwichefen meinisin mi feito seni Kot—me ren Noun kewe chon angang mi kefin.9
Ua ennetin mefi non nguni pwe wisei a feito seni Kot. Mi auchea pwe sia weweiti ei mettoch—pwe wisach mi ennetin feito seni Kot me ren ekkewe souemwenin pristut. Mwirin ei mettoch a fis, mefiei a siwin me ua ur ren ai mochen angang ngeni ekkoch. Ua kinisou ren ewe feiochun aier me ekesiwinin netipei. Ua men sani wisei we minafo.
Ina mwo ika sia ekieki pwe wisach non ewe Mwichefen a chok feito seni an ewe souemwenin pristut ekiek ika sia angei pokiten ese pwan wor emon epwe etiwa, sipwe feioch ren ach angang. Nge nupwen sia esina poun Kot non ach kokko me angang fiti unusen netipach, sipwe angei pochokun non ach angang me sipwe winiti chon angangen Jises Kraist.
Mi Namwot Epwe Wor Ach Nuku Sipwe Fori Angangen Aninis
Mi namwot epwe wor ach nuku ach sipwe fori wisach. Ekis fansoun mwirin an Joseph a poputa angang non ewe atake, I me Maria ra fokkun semwen. Ese wor nour moni me rese sinei chon ewe neni. Eu fansoun mi fokkun aweires ngenir. Non noun puken porousen inisin, Joseph a makei, “Aua sopweno ne angang [me] aua nikitu non ewe Mwichefen ren am nuku, ina mwo ika ewe Setan a achocho an epwe atai manauem me aniwinikem ngeni ia aua feito me ia.”10
Ngang, fitifengen me fite puku mwirimwirir, mi ennetin kinisou pwe Joseph me Maria rese niwin. Sipwe feioch nupwne sia nikitu non wisach me non ach angang me nikitu ren unusen ach nuku.
Ua sinei emon sensen ewe klasin Nongonongen ewe Kapas Allim mi angangoch a anisi ekkewe chon sukun me a efisata ar poraus fengen, nge ese ina usun me nom. Mwirin a fiti ewe Mwichefen, a angei an kokko an epwe osukunna Kinter. A mefi pwe ese nipwakoch ne osukun, nge a sinei auchean an angang, iwe a etiwa ewe kokko. A mwitir nuokus, me a kouno ne fiti fan pwe esap osukunna an ewe klas. Nge sia kinisou pwe, noun sensen famini a kuna pwe ese chuen fiti fan, a churi i, me a tingorei an epwe niwin sefan. Ewe pisop me chon ewe wart ra anisi i. Iwe, nupwen a watte an nuku, a poputa ne osukunna ekkewe semirit. Nupwen a anganga ekkewe mettoch non ewe puk Teaching in the Savior’s Way, ewe Samon a efeiochu an angang, me a winiti emon sense mi angangoch.11
Inisich ra mochen kuta och popun pwe sisap angang usun chok “Use mwo moneta ne angang; Mi pwan wor met upwe kaeo,” “Ua pekus me ua mochen asoso,” “Ua chinap—pwan emon mi tongeni fori,” are “Ngang mi fokkun osukosuk.”
Pwich me fefinach, ach etiwa me fori wis mi eu angangen nuku. Sia tongeni nuku non met nouch soufos, Preseten Thomas S. Monson, a aitikich fan chommong: “Ion ewe Samon a kokkori, ewe Samon a anisi,” me “Nupwen sia fori ewe angangen ewe Samon, ewe Samon ewe anisi kich.”12 Ina mwo ika sia wesen osukosuk are sise mwar ren ewe wis, ika sia fokkun nuokus are sia chipwang, ewe Samon a mochen sipwe amweta kia, awatteno ewe pochokun, me angang.
Use kuna och esisin pwe Preseten Monson me noun kewe chon anins non ewe Aewin Presetensi me ewe Mwichen Engon me ruemon mi tawengau are pekus. Ra aitikich ifa usun sipwe angei manaman non manauach nupwen sia anganga ach nuku, etiwa wis, me aponueta wis ren ach achocho me tiniken. Ra “aninis ne amokutu ewe taia”13 fitu ier me nom, me ra sopweno ne aninis ne feino me fefeita.
Ewer, ra fori wis mi auchea, nge iteiten wis mi auchea. Preseten Gordon B. Hinchley, emon soufosun nom me Presetenin ewe Mwichefen, a apasa: “Kich mi chufengen non ei angang. … Wisemi mi aucheanap non neniemi usun chok wisei non neniei. Ese wor eu wis non ei mwichefen mi kukkun are ese auchea.”14 Ekkewe wis meinisin mi auchea.15
Sipwe Angang
Sipwe anganga ach nuku, “aninis ne amokutu ewe taia,” me fori ei “angang mi pin.”16 Sipwe “amweta ngeni ewe kia mi angang fengen,” fitifengen me Aunt Dorothy ewe mi nukuchar. Ussun momongeang me pwipwi , sipwe angang.
Ika oua mochen apwapwai noumi kewe pisop are presetenin pranch, oupwe eisini “Ifa usun ua tongeni aninis?” “Ian ewe Samon a mochen ai upwe angang ia?” Nupwen a iotek me a ekieki usun wisemi non manauemi, ami famini, me ami angang, epwe angei pwarata an epwe sinei met wis epwe fich ngenikemi. Nupwen oua efeioch ngeni ewe wis, oupwe angei eu feiochun pristut pwe oupwe angangoch. Amioupwe feioch! Memper meinisin mi auchea, me mi auchea epwe wor ar tufichin angang.17
Jises Kraist I Ach Nenien Appiru
Jises Kraist, ach nenien Appiru mi nap, a fangano manauan fan iten ewe angangen Seman. Non ewe Mwichenap mwen ei fonufan a for, Jises, ewe a kefin me epinipin seni ewe nepoputan, a pwarata, Ngang iei, kopwe tinieino.18 Ren an fori ei, A winiti emon chon angang ngeni kich meinisin. Me ren Jises Kraist me ewe pochokun sia angei seni an Achesefan, sia pwan angang. Epwe anisikich.19
Ua pwarata ai ennetin tong ngeni ami ekkewe ouse tongeni angang non ewe Mwichefen ren sokopaten wis pokiten nonnomun manauemi nge oua manaueni manauemi non ewe napanapen angang. Ua iotek pwe oupwe feioch ren ami achocho. Ua pwan apasa ai kinisou ngeni ami ekkewe oua aponueta wisemi iteiten wik pwan ami ekkewe opwap etwia wisemi ne angang. Kot ewe emon sia angang ngeni, A aucheani ach aninis me angang. Aramas meinisin mi angang repwe angei An Kot chen.20
Ese nifinifin ieremi are nonnomun manauemi, oupwe achocho pwe angang epwe ach ereni.21 Angang non wisemi. Feino won ami misin. Angang ngeni inemi. Angang ngeni chon wasona. Angang ngeni monun unukumi. Oupwe chok angang.
Amo ewe Samon epwe efeiochu kich meinisin ren ach achocho ne angang me winiti chon tapweno mwirin Jises Kraist.22 Ua pwarata pwe I mi manau me a emweni ei angang. Fan iten Jises Kraist, amen.