Kot Epwe Tonano Chonun Mesach Meinisin

Ew kinikinin An Semach won Nang kokkot, A mut ngenikich ach sipwe kuna netipengau non manauach won fonufan.¹ Ina mwo pwe sia mefi pwe sia kuna chommong sossot mi weires nap seni ekkoch, sipwe sinei pwe kich meinisin mi kuna riaffou me osukosuk. Ua iotek pwe ewe Ngun mi Fel epwe anisikich ne weweiti pwata a iei usun.

Nupwen sia ekieki usun ach kewe osukosuk non manauach ren ach chechemeni ach nuku non Kraist, sia tongeni kuna pwe mi wor popun ach riaffou. Ekkewe mi nukuchar mi tongeni kuna pungun an Peter kapasen pesepes. A makei, “ika oupwe kuna riaffou pokiten ami foffor mi pung, nge oupwe chok pwapwa!”² Nupwen sia “aea [netipach ach sipwe] weweiti,”³ sia tongeni awatteno ach tufichin engino ngeni sossot me kaeo seni—me ochuno seni—ir. Ei sokkun wewe a awora ponuen ewe kapas eis seni nom “Pwata mettoch mi ngau a fis ngeni aramas och?”

Aramas meinisin mi ausening ikenai mi fen mefi och memefin akanaemon, netipengau, netipeta, metek, are noninen. Ika sise  ekieki usun mettoch fiti nuku⁴ me ren ach weweiti nongonong mi ennet me ese much, sipwe tongeni mefi pwe ekkewe riaffou me osukosuk sia kuna non manauach mi tongeni okufu ewe pwapwa ese much ren ach sinei pwe ewe kokkotun Semach won Nang mi ewe ennetin kokkotun pwapwa. Ese wor pwan ew napanap ach sipwe weri  ennetin pwapwa.⁵

Kot a tingorech ach sipwe anganga ach nuku non ach kewe pwisin osukosuk pwe sipwe angei ekkewe feioch me mirit sise tongeni kaeo non pwan och napanap. Sia angei kapasen pesepes ach sipwe aponueta ekkewe annuk fansoun meinisin me ese nifinifin nonnomuch, pun nupwen sia nukuchar nein osukosuk, sipwe angei feioch mi napanap non ewe muun nang.⁶ Me usun chok met sia anneani non pukfel, ewe Doctrine and Covenants a aitikich pwe ika sia noninen, sipwe kokkori ewe Samon ach Kot non iotek, pwe ngunuch repwe pwapwa.⁷

Ewe Aposel Paul, a pwisin kuna chommong osukosuk, a aea met a fis ngeni an epwe afanafan ren pochokun me ning usun ekkewe ekiekin fansoun ese much a feito nupwen sia nikitu me engino. A apasa, “Iwe ekkei kukkun riaffou sipwe riaffou ren non ekis chok fansoun, repwe awora ngeni kich ew ning napanap esap much.”⁸ Wewen pwe, sia tongeni sinei non ach riaffou pwe Kot a fen ammonata ach feioch ese much.

An Paul tufichin apasa pwe ekkewe osukosuk, esit, me noninen a kuna non manauan mi “kukkun riaffou” ese afata ukukun an riaffou, nge me ren ei a kuf ren an ekieki usun fansoun ese much ren ewe kapas allim. An Paul  nuku non Jises Kraist a otufichi i ne pwaracho mettoch meinisin. Fan nimu aramas ra wichi, fan unungat ra awata ren wok, fan ew ra monei ngeni fau; fan unungat wan sip a tano; fan chommong a feingau nemataw, me seni chon sona, me pwan chienan mi mwaken; a riaffou ren angang me weires, echik me kaka, me a kanepus non neni mi patapat me ese wor ufan.⁹

Chommong me neich sipwe fen tingorei Kot An epwe angei seni kich ach riaffou, me nupwen sise kuna ngasanon ach riaffou, sipwe fen mochen ekieki pwe Ese anusening. Ua pwarata pwe, pwan mwo non ekkewe fansoun, A rong ach kewe iotek, mi wor och popun a mut ngeni ach riaffou an epwe sopweno,¹⁰ me epwe anisikich ne pworacho ngeniir.¹¹

Non ew wokisin mi ning, Paul a aiti kich usun och “cheuchen” non inisin, minne a esenipato metek mi napanap me fan unungat a fotupukutiw, me tingorei ewe Samon An epwe angei seni i. Non ponuen an Paul kewe iotek, ewe Samon ese angei ewe cheuchen seni i nge A apasa kapasen kinamwe me awewe ngeni netipan, A apasa, “Ai chen mi naf ngonuk, pun ai manaman mi fakkun pochokun nupwen ka apwangapwang.”¹⁶ Ren wewe minafo, Paul a tufichin a tufichin etiwa me kinisou ren ewe cheuch a nom ren. A apasa, “Ua tongeni pwapwa … non ai apwangapwang, pwe ewe manamanen Kraist epwe nom woi”¹²

Nupwen sia angei ei sokun ekiek non manauach, ach tufichin nikitu a mamarita, sia kaeo ifa usun ach sipwe anisi ekkewe mi mochen aninis,¹³ me sia aucheani me pwan kinisou  ren ekkewe mettoch Kot a mutata ar repwe fis ngenikich ne aiti kich non ewe anen manauach.

Nupwen sia angang non ach kewe osukosuk, a weires ach sipwe kuna pwe ekkei osukosuk mi esinesinen ach anen winiti chon kaeo. Nge, ika sia nom non fansoun rochopwak ren netipengau are fansoun watte pwapwa, ach kaeo seni me mefi tong fan iten ekkewe mi riaffou mi tongeni efeiochukich.

Non ew mwichen steik ua fiti non ewe Philippines, netipei a weires nupwen ua kaeo usun porausen Brother Daniel Apilado. Brother Apilado me punuan ra papatais non 1974. Ra etiwa ewe kapas allim mi niwinsefan me ra ririfengen non ewe tempel. Ekis fansoun mwirin ra feioch ren nimen nour kewe. Non July  7, 1997, nupwen Brother Apilado a wisen presetenin steik, imwer a kekino. Noun Brother Apilado, a iteni Michael, a amanaua seman, a eki i seni ewe imw mi kek, me a pwan niwinong non ewe imw ne anisi ekkewe ekkoch aramas. Ina ewe saingon fansoun Brother Apilado a kuna noun at. Punuan , Dominga, me nour kewe nimen semirit mi mano non ewe ekkei.

Ina mwo pwe Brother Apilado mi manaueni manauan non och napanap mi apwapwai Kot nupwen ekkei mettoch a fis ese epeti ekkei pwe esap fis o ese akouno an mefi netipengau mwirin. Nge an nukuchar ne aponueta an kewe pwon mi pin me an anganga an nuku non Kraist a esenipato an nuku non ewe pwon pwe epwe chufengen sefan ren punuan me chon an famini. Ei apinukunuk a apochokunata ngunun.¹⁴

Non ai chufengen, Brother Apilado, iei a wisen patriarch non an steik, a pwar ngeniei punuan minafo, Simonette, me nour kewe ruemon at, Raphael me Daniel. Ennet, Jises Kraist mi tongeni o epwe pwan “apochokunata netipen ekkewe mi netipeta.”¹⁵

Non ai aporausa porausen Brother Apilado, ua nuokus pwe weiresin an riaffou epwe efisata ami ekieki pwe ami noninen me riaffou mi chok kukun. Ouse mochen ousap nenefengeni ami kewe osukosuk, nge oupwe achocho ne kaeo me aea ekkewe nongonong ese much nupwen oua fefetan non ami pwisin ekkei an riaffou.

Ouse mochen upwe kapas ngeni emon me emon ami—“ami mi pekus ren choun osemi”¹⁶—upwe apasa pwe ami pwisin osukosuk, ami pwisin noninen, metek, sossot, me apwangapwang meinisin, Semach won Nang me Noun we mi sinei usun. Oupwe nuku! Oupwe tipepochokun! Me nuku non ekkewe pwon an Kot!

An Jises Kraist popun me angang mi kapachenong pwe Epwe “engino ngeni metek me riaffou me sokopaten sossot meinisin,” “i epwe wata won inisin ekkewe metek,” me “epwe anisi noun kewe aramas anongonong won ar apwangapwang.”¹⁷

Ren ach sipwe angei ekkei niffang seni ach Chon Amanau, sipwe kaeo pwe ach riaffou—chok—ese aiti kich are efeiochu kich ika sise ennetin achocho ach sipwe kaeo seni ach kewe riaffou ren ach anganga ach nuku.

Elter Neal A. Maxwell a aporausa met a kaeo usun popun ach riafou ren ekkei kapas:

“Och sokkun riaffou, ika sia nikitu, mi tongeni efeiochukich. …

“… Ach nikitu a wewen pwe sia tipetekison, non ach riaffou, pwe sipwe kaeo seni met a fis ngeni kich. Napseni ach sopweno non ach riaffou, mi namwot sipwe pwari ach nikitu … pwe sipwe angei feiochun ach engino.”¹⁸

Ua fen kuna non manauen ekkoch aramas pwe ar anganga ar nuku mi pochokun non Jises Kraist me An kewe pwon a awora apinukunuk pwe mettoch mi murinno epwap feito. Ei apinukunuk a anisikich, apochokuna kich minne mi namwot ach sipwe tongeni nikitu.¹⁹ Nupwen sia tongeni weweiti pwe ach riaffou a kapach fengen ren popun manauach me napenon ren niwinin ach foffor mi witikich non nang, a apochokunata ach nuku non Kraist me sia angei kinamwe non ngunuch.

Iwe sipwe tongeni wewe pwe fansoun osukosuk mi fis non fansoun moch. Elter Jeffrey R. Holland a aiti: “Mi wor saram nesoponon osukosuk. Ena ewe Saramen Fonufan, ewe Fuu Ran mi Saramaram, me ewe ‘saram esemuch, minne ese tongeni epwe rochono.’ Mi ewe Kot mi Nap.”²⁰

Sia tongeni angei pochokun ren ach sinei pwe ach kewe osukosuk non ei manau repwe wesino—pwan mwo ekkewe pwin mi rochopwak mi siwin ngeni neran.

Nupwen mettoch meinisin a wes me sia fen nikitu non mettoch meinisin ren nuku non Jises Kraist, a wor ach pwon pwe “Kot epwe tonano chonun [mesach] meinisin.”²¹

Ua pwarata pwe ewe Chon Amanau a tingorei kich meinisin ach sipwe feito ren me aea An Achesefan non manauach. Nupwen sia anganga ach nuku non I, Epwe apochokuna me auroura kich non ach kewe osukosuk meinisin me, nesoponon, epwe amanauakich non ewe ningen akkar. Upwe tingoreikemi oupwe feito ngeni Kraist, nikitu non nuku, me oupwe unusoch non I. Fan iten Jises Kraist, amen.