Ekkewe Souekuno ngeni ach Mwichefen

Non ekkewe fansoun ano mei wor emon fefinach ese pupunu, itan Molly, a niwin ngeni imwan murin an angang nge a kuna pwe a nono non imwan arapakan ukukun ruu inch (ika 5 centimeter) konik non ewe aewin sasar fan pun. A mwitir apareni pwe eni chon orun we, ewe ra aea fengen paip, a chommong an sopw pisek me tutu watte pun kusunong konik non imwan we.

Iwe Molly a kokori emon chienan epwe eto anisi, ir me ruomon ra poputa ne numei me suwapei ewe konik. Nge pwan chok non ewe fansoun, ewe bell won ewe asam a ring. Chienan ewe a apasa “Ina epwe noum kewe sensen famini!”

Molly a takir. “Ikenai mi ewe saingonon ranin ei maram,” o a pwan apasa “nge ai chok nuku pwe esap nei kewe sensen famini.”

Pechen mei atasi, an rausis mei chechen, mokuran mei fofo ngeni an skarf, mei pwan poupou ew pea poun kumi, Molly a suki ewe asam. Nge nikinin ewe ese pwan nonno ngeni nikinikin ekkewe ra utta me pen asaman ewe. Nge mi wesen noun kewe sensen famini.

“Ita kopwe apuni ngeni ei ew ekkewe pumpen toilet!” A ureniei mwirin. “Iwe meni fen ew feioch seni ekkewe sensen famini,” “ekkewe sokkun nouch Nouwis Tekia ra kan aporousa atun Mwichenapen Mwichefen! A sopweno: “Nge, nupwen fansoun ai resin ekieki ika upwe fen kissir ika fen ngenir efoch suap, ra apasa ‘O, Molly, amusano am tipis. Am wa kuna pwe en mei osukosuk. Am ousap pwan atai om fansoun; am oupwe pwan niwinituk pwan non ew fansoun.’ Iwe ra pwan no.”

“Ion ewe?” chienan ewe a aisini me non ewe neni fan.

“Ngang uwa mochen apasa, ‘Nge ennetin I esap ekkewe unumon chon Nifai,’” Molly a apasa, “nge uwa chok pwan apasa non pwetete, “nei kewe sensen famini ekewe, nge ra mefi pwe esap ew fansoun mi fich ar repwe aiti ei ikenai.’”¹

Pwii kewe, ouse mochen sipwe mo nengeni fengeni ewe wisen pristut usun afen afat pwe iei “An ach Mwichefen aewin pekin anninis” ngeni emon me emon kich pwan ach famini meinisin.² Chommong ira ra katano fan iten asorun an epwe awora taropwen awewe auchean me namwotan ei angang. A fite ngorou afanafan fan asengesin ei pesepes ne fori angangen sensen famini. Ese naf ach sipwe awewei ifa usun ach sipwe mefi namanameno ika sise aponuweta ei angang. Nge achocho ne atures fan iten ei angang pwe meni ese mo tori aukukun ewe annuk me ren ach Samol fan asengesin ach “sipwe” Tumunu ach ei Mwichefen iteiten fansoun meinisin”³ me ren an pristut angangen sensen famini.

Ew weires sia kuna, a chommong siwin non napanapan chon ewe Mwichefen. Sia sinei pwe ach Mwichefen mi nom ekkis meinisin won fonufan non ukukkun 30,000 ach wart me pranch, ra nom non 188 fonu ika kinikin, iwe a fokkun weires ach sipwe tour ngeni imwen pwich me fefinach kewe ikenai esapw usun ekkewe fansoun noom non ach ei Mwichefen nupwen a kan mecheres pwe mei chok arap fengen imwach kewe ach sipwe apwonueta angangen sensen famini.

Iwe pwan, non chommong kinikinin ach ei Mwichefen, ese naf chon wiseni pristut ren ar repwe awora angangen sensen famini, ekkoch akan chok tawe ra anisi 18 ika 20 famini—ika fen pwan chomong seni—ar repwe tumunur. A pwan wor ach weires pokiten towawan neni, mo waten me pwan nefengaw sein atawe, pwan nangataman ranin me wiik an angang. Apacha fengeni me ekkoch pinin eoreni me afeiengawen ekkoch neni me non fonufan—iwe, iei ei osukosuk ese mecheres.

Pwii kewe, non eochun unusan meinisin fonufan pwan tori met ika ian epwe tongeni tawe me ian, oupwe achocho ngeni fan ew non ew maram ami oupwe sensen famini pwe iei met ach Mwichefen a achocho ngeni. Nge pokiten mi chommong neni non fonufan esap kan tawe eoch met ei sia ani napanap nge mi pwan tongeni esenipato an atongeach kewe chon kuno repwe mefi apwapwang non netiper nupwen am aua tingorer ar repwe fori ei angang mi weires. Ewe Aewin Presetensi a makei ngeni meinapen pristut non ach Mwichefen non December 2001, a ngeni kich ew aurur mi watte an aninnis ngeni kich: “Mei wor ekkoch neni non ach Mwichefen” ra makei, “ikkewe ....angangen sensen famini esapw tawe eoch pokiten nafangawen chon pristut me pwan tori ekkoch osukosuk.” Sia fen poraus usun ekkoch. “Nupwen ekkei ra fis,” ra sopweno, “iwe nouch kewe meinap repwe achocho are repwe aea met aninnis mi kawor ngenir fan iten repwe tumunu me apochokuna chon ach ei Mwichefen.”⁴

Pwii kewe, ika pwe non ai we wart ika pranch awor ekkei esin osukosuk mi weires, ngang me chienei non Pristut seni Aaron am aua aea an ewe Aewin Presetensi aurour (a nom non ewe puken annuk) non ei napanap: Aewin, ina mo ika epwe maram nangatam ren am aupwe fori, aua achocho ne apwonueta ewe annuk ne “tori imwen emon me emon ekkewe chon mwichefen,”⁵ o aupwe fori kokkot pwe epwe mecheres am tonong ekkewe imw pwe chon mwichefen repwe nom pwan tawe. Akkomw aupwe akokkota ne churi ekkewe ir epwe namwot aupwe anisir—investigators ekkan misineri ra aitir, ekkewe ra keran papatais, ekkewe mi semwen, me ekkewe ir mi anaemon, tori ekkewe ra patapateno non ach Mwichefen, pwan tori ekkewe famini an emon chok sam ika in fengen me semirit, ika pwan ekoch.

Nupwen sia anganga ach kokkotun feino non ekkewe imw meinisin, ina mo ika epwe maram nangatam ne apwonueta, sipwe pwan achocho churi aramas me famini mi nom non ach nis mi kawor ngenikem me ren ewe Samon. Ewer sipwe kutta ika ir mi fiti kich non fan, nge usun ekkewe pukfel ra apasa “pwe repwe kapas fengen nefiner usun tufichin ngunur.”⁶ Nge pwan, sipwe koko won telephone, email me text inir, ika fen pwan kapong ngenir won ekewe neni ren usun facebook ika myspace. Ach sipwe anisi ekoch osupwang mei sokono, sipwe angei seni nouch kewe pukfel ekkoch wokisin, ika fen pwan seni afanafan non ach mwichenapen mwichefen ika pwan ew pekin keit seni ach Mwichefenin Mormon seni masowan won ach ewe website LDS.org. Non kapasen pesepes seni ewe Aewin Presitensi, sipwe achocho ngeni met kich mi tongeni, non ukukun met anninis mei kawor ngeni kich.

Pwii kewe, ai tungor non ei pwinin pwe oupwe kuna auchean ami sensen famini. Ouse mochen, non napanap minafo me aochuno, ami oupwe nengeni wisemi kewe pwe ami noun ach Samon chon kuno ngeni Noun kewe aramas. Wewen ei pwe oupwe ne nikitano ami foffor me nom, ren ami oua chok anneani masowan neuch kewe magazine seni ach Mwichefen meni ekkoch famini ra fen wes ne annea. Aua apinukunuk pwe, amo ita, oupwe apwonueta ew fansoun wenechar, aea ewe kapasen annim non ami tumunu chon ach ei Mwichefen, sipwe cheni ekiekin pekin ngun me pekin inis non ewe napanap mi och.

Iwe, nge met epwe “annea” pwe non pekin sensen famini, meinisin met mi och epwe “annea,” iwe aporousa meinisin! Ewer mi ennet, pwe a fokkun auchea usun ami oua afeiochu me tumunu ion ekkana ra nomw fan tumunuemi, nge ese pwan anongonong won inet are ewe neni oua churir. Met a auchea nge ami oupwe tongei noumi kewe aramas me oua apwonueta ewe annukun “ach sipwe tumunu fengeni ewe mwichefen iteiten fansoun meinisin.”⁷

Fan ewe May 30 non ewe year ano, chienei emon itan Troy Russell a backuni efoch waan pickup me non nenien imwen waan ewe ren an epwe uwei pisekin donation ngeni ewe nenien Deseret industries. A mefi pwe taian wan ewe a sano won och mettoch mi nangeta. A ekieki pwe ew mettoch a turutiw me mwirin waan ewe pickup, iwe a tou nge a kuna noun we achengicheng tiu ierin aat, Austen, a chapeno won ewe simen. Ekkewe pupuchor, ewe afeiochun pristut, ekkewe chon sein ambulance, me chon non ewe pioing, ese chiwen wor namwotan, pwe Austen a sopono.

Ese chiwen sinei mour, ese kuna kinamwei, Troy ese tongeni chiwen chipeno non an riaffou. A apasa pwe a nu seni ukukun met mi tongeni non an riaffou, nge a fangeta ese chiwen mochen manau. Nge non ewe fansoun, afen pwan eto unungat pochokun mi epichano an riaffou.

Aewin ewe tong mi awora an apinukunuk a feito seni Semach won Nang, ewe Ngun Mi Fel a kapas ngeni netipan Troy, a aiti I, a tongei I, a pwan mongunu ngeni i pwe Kot mi sinei memmef meinisin a eto ngeni emon sam nupwen noun at mi fokkun unuseoch me murino a mano. Aruwan, punuwan ewe, Deedra, ewe a wisen kamoch Troy non poun ne tongei me a achemata pwe neminewe mi pwan riaffou seni soponon neur ewe at nge esapw och an epwe pwan turuno seni pwan punuwan ewe. Aunungatin non ei tutunap nge porousan John Manning, ewe sensen famini mi fokkun angangeoch.

Ennetin use sinei inet John me chienan ewe ra kan no churi imwan ewe Russell famini, ika pwan met ra ani afanafan atun ra tori ewe imw, ika fen pwan ifa usun ar ra aporousa met ra fori. Nge met ngang mi sinei pwe non ewe ier atun neras Brother Manning a angetiwei Troy Russell a akieta seni an ewe osukosuk me ren annen imwan ewe usun chok nge i afen wisen akieta ewe kukkun at Austen. Iei usun sensen famini ika chon tumunu ika pwipwi non ewe kapas annim pwe iei wisan, John a apwonueta an angangen pristut a tumunu me annisi Troy Russell. I a apasa “Troy, Austen a mochen kopwe pwan uta sefan won pechomw kewe—pwan won ewe nenien pasket—iwe ina upwe eto reom kunok 5:15 nesosor. Kopwe moneta pwe use pwan mochen upwe tonong fongonuketa—me ngang mi sinei pwe Deedra esapw pwan sani ai upwe fongonuk.”

“Ngang use mochen na” Troy a apasa ngeni ei mwirin, “pokiten ngang ua kan soun uwei Austen iteiten nesosor nge a men emetek netipei ai chemeni. Nge John a achocho ne tingor, iwe uwa fiti. Seni ewe aewin ran, am aua fos fengen—ika fen ngang ua fos me John a wisen ausening. Iwe ngang ua chok wisen fos nupwen am sa ngeni pwan niwin seni ewe fan. Fan ekkoch ua fos nupwen am aua park nepekin ewe aan nge katon ewe akkar an tuputa won Las Vegas. Aewin mi ekkis weires, nge mwirin ekkis fansoun ua mefi pwe a niwin sefan ai pochokun usun chok emon chon ach Mwichefen a play basket 6 fit 2 inis taman mei fokkun angangaw nge I ewe a tongei ei o a ausening ngeni ei tori an ewe akkar a tuputa ne asarama sefan non manauei”⁸

Pwii non ewe pristut mi pin, nupwen sia kapas usun sensen famini ika chon tumunun ika ach angangen pristut—ese pwan nifinin met kopwe aita ngeni—iei ei met kich sia porous fengen won. Am aua tingor ngeni kemi sensen famini oupwe noun Kot chon kuno ngeni Noun kewe, oupwe tongei me tumunu pwan ioteki ekkewe aramas wisemi pwe oupwe tumunur, usun chok am tongeikemi me tumunu kemi pwan ioteki kemi. Amo oupwe achocho me apochokuna ekkewe chochon aramasen Kot non ennetin ami angang, ua iotek, fan iten neuch ewe Chon Masen Siip mi murino, ngang noun chon pwarata, pwan ach Samon Jises Kraist, amen.