An ewe Ngun Ennetin Mochen
Iteiten atun sia iotek a tongeni fansoun mi pin ach kapas ngeni Semach, non iten ewe Nau, me ren manamanen ewe Ngun mi Fel.
Non weiresin manauach, sise akanaemon ne fori ach angang, fiu non ach kewe maun, kuna sossot ika kapas eis rese ponu. Jises Kraist a aitikich ren kapas monomon pwe aramas “repwe iotek fansoun meinisin me resap tipemwaramwar.” A awewe porausun emon soukapung ese sufoniti Kot me ese afanni aramas. Fan chommong, emon fefin mi mano punuan a feito ren, pesei an epwe apungu emon a fiu ngeni. Ren ekis fansoun, ewe soukapung ese anisi. Nge pokiten a resin chuchuri me pesei, ewe soukapung a ekieki, “Pokiten ewe fefin a eweiresiei, upwe apungu, pwe esap sopweno ne aosukosukaei.”
Jises a awewe:
“Ifa usun Kot esap anisi pwisin noun kewe aramas ra tingor ngeni nepwin me neran … ?
“Upwe apasa ngenikemi epwe anisir o epwe fakkun muttir anisir.”
Me ewe Samon a eisini ewe kapaseis: “Nge ifa usun, ewe Noun Aramas epwe kuna nuku won fonufan nupwen epwe wareto?”1
Iotek mi fakkun namwot ne awora nuku. Nupwen ewe Samon a niwinsefan epwe kuna aramas ra sinei iotek non nuku me ra monnota ne angei manau ese much? “Iteiten armas mi tingor ngeni ewe Samon pwe epwe anisir, repwe kuna manau.”2 Kich noun emon Semach won Nang a tongei kich, me emon me emon kich sia tongeni pwisin kapasfengen ren Kot ika sipwe iotek “ren ennetin netip, ren ennetin popun, fiti nuku non Kraist”3 pwan ren ach fori ponuan ach kewe kapas eis sia angei me ren ewe Ngun mi Fel. Non nuku sia iotek, sia ausening, o sia anneasochis, pwe sipwe ew chok ren ewe Sam me ewe Nau.4
Ewe iotekin nuku a suki ewe aan pwe sipwe angei feioch seni nang. Ewe Chon Amanau a aiti:
“Oupwe tingor, iwe oupwe angei, oupwe kutta, iwe oupwe kuna, oupwe fichifich iwe ewe asam epwe suk ngeni kemi:
“Pun io mi tingor epwe angei o are emon epwe kutta epwe kuna o ewe asam epwe suk ngeni emon mi fichifich.”5
Ika sia nuku sipwe angei, mi namwot sipwe tingor, kutta, me fichifich. Non an kutta ewe ennet, Joseph Smith a anneani non pukfel, “Nge ika emon me neimi ese mirit, epwe tingor ngeni Kot, iwe Kot epwe ngeni I, pun Kot mi kisasew o kirokiroch ngeni aramas meinisin.”6 Pwe an iotekin nuku epwe ponueni, nang a suk ngeni. Kot ewe Sam me Noun we, Jises Kraist, ra feitiw non ning me fos ngeni Joseph, o ra poputani ewe fansoun kinikin a unus. Ngeni pwisin kich, manamanen echikar mi amwarar, tumun, weweiti non pekin ngun, omusomus, me ennetin kinamwe ekkana ir ponuan a feito ika sia pwarata “ennetin mochenin ngunuch”7 non nuku.
Sia iotek ngeni Semach, non iten Jises Kraist, me ren manamanen ewe Ngun mi Fel, iei usun sia churir me unumon non ach iotek.
Sia iotek ngeni Semach won Nang me I chok pun I ewe “Kot non Ngang, ese wor muchunon, seni nepoputan tori feinfeino … , ewe chon for nang me fonufan, me mettoch meinisin won. I ewe Chon For, me a wor an kewe annuk pwe sipwe “tongei me angang ngeni I, ewe chok Kot mi manau me ennet, me epwe I chok sipwe pin ngeni.”8
Nupwen sia iotek ngeni Semach non nuku, “I epwe chacharikemi non ami riaffou, … [me oupwe] kametip won an tong.”9 Preseten Henry B. Eyring a awewe pwe an seman kewe iotek non an semwenin cancer a aiti i usun nefinan Kot ngeni Noun kewe:
“Nupwen an riaffou a wesen watte, aua kuna i a fotopuku nesesor unukun ewe pet. I ese pochokkun epwe tota sefan non ewe pet. A erenikem pwe a iotek me eisini Seman won Nang ika pwata a watte an riaffou nge a chok achocho ne fofforoch. A era pwe ponuan pwetete a feito ngeni: ‘Kot a mochen noun kewe at repwe pochokkun.’
“Iwe a chok nikiitu tori nesoponon, a nuku pwe Kot a tongei i, ausening ngeni, me epwe apochokkuna. I a feioch pun a sinei seni nekukkunun o ese nemenano pwe Kot a chok kaneto non ach iotek.”10
Sia iotek non iten Jises Kraist pun ach manau ese much a anongonong won Kraist, me “Kot ese ngeni aramasen fonufan pwan ew it a tongeni amanaua kich.”11 Sia feito ren ewe Sam non iten Jises Kraist12 mi pin pun I ewe chon peni kich ngeni ewe Sam me I a tingor fanasengesich.13 I a riaffou, chaa, me mano ne aninga Seman, me An tingor fanasengesich a suki ewe aan pwe emon me emon a tongeni kuna kinamwe non ei manau me ewe manau ese much epwe feito. I ese mochen sipwe sopweno ach riaffou ika kuna sossot ese namwot. A mochen sipwe kunnu ngeni I me mwut ngeni I epwe apwasa osach, echikara netipach, me animenimochuna ngunuch ren An pochokkunen epinipin. Sise mochen turunufasei itan ren iotek mi namwotongau. Ach kewe iotek mi for non iten Jises Kraist ir ew minen pwarata usun ach ennetin tong, ach kinisou ese much, me ach tiniken ne iotek usun I a iotek, ne fori usun chok a fori, me winiti usun chok I.
Sia iotek me ren manamanan ewe Ngun mi Fel pun ewe emon a tingor ren emwenin ewe Ngun mi Fel, an tingor epwe nonno ren netipan Kot.14 Nupwen sia iotek non nuku, ewe Ngun mi fel epwe emweni ach ekiek pwe ach kapas epwe fen fich ren netipan Kot. “Ousap tingor pwe oupwe asonanopa won ami kewe mochenia mi ngaw, nge tingor ren pochokkunen nukuchar, pwe ousap tup ngeni sossot, nge oupwe anagang ngeni ewe Kot mi ennet me manau.”15
“Ese chok auchea pwe sipwe sinei napanapan ach sipwe iotek, nge mi pwan nonno auchean ach sipwe sinei napanapan ach angei ponuen ach kewe iotek, sipwe weweiti, sipwe tipachem, sipwe kuna ren mesach mi fat me weweiti an Kot mochen me netipan me an popun fan itach.”16
Preseten Eyring a era: “Ai kewe iotek ra ponu. Ponuen ai kewe kapas eis mi fatoch ngeniei nupwen mochenin netipei mi kukkun seni ai mochen sinei ewe netipan Kot. Ina ewe atun ekkewe ponu seni Semach won Nang me tongeni pwar ngeni ach ekiek ren ewe mongungu mi pwetete me a mak won netipach.”17
Nupwen ewe Chon Amanau a tonong non ewe atake itan Gethsemane, Ngunun a fakkun chou ngeni mano. Non an riaffou, ewe chok emon A tongeni kunnu ngeni ina Seman. A pesei, “Ika pwe mi tufich, kopwe angei seniei ei kapen riaffou.” Nge a pwan sopweno, “Nge esap ai mochen, nge minne ka mochen.”18 Ika mo ese wor tipisin, wisen ewe Samon epwe “[riaffouni] metek me riaffou me sokopaten sossot meinisin,” kapachenong ekkewe semwenin Noun kewe aramas. “[I] epwe riaffou ren pekin aion pwe I epwe tongeni wato won inisin tipisin noun kewe aramas, pwe I epwe tongeni tonano ar kewe atai annuk anongonong won ewe manamanen an epwe angaserano.”19 Fan unungat a iotek, “Semei, netipom epwe fis.”20 Ewe kap ese angei seni. Non tipetekison, fiti nuku ne iotek I a pochokkun pwe epwe sopweno me apwonueta an angang mi pin pwe epwe ammonatakich ren ach manau ese much, pwe ekkewe repwe aier, nuku o anneasochis repwe weri feiochun manau ese much.
Ponuen ach kewe iotek meni esap met sia mochen. Nge non fansoun osukosuk, ach kewe iotek a winiti ewe minen apochokkuna kich ren tong me chen. Non atun ach tingor non iotek, sipwe angei pochokkun ne uta sefan o sopweno ne apwonueta meinisin wisach sia kokor ngeni. Ngeni Noun souneng non fansoun fitikoko, ewe Samon a era pwe sipwe echipano netipach … ; pun aramas meinisin ra nom non Poun kewe; Sipwe mosonoson me sinei pwe I ewe Kot.21
Ika sia iotek pwisin kich, ren chon ach famini, non fan, ika non ewe tempel, are ese nifinifin ie sia nom ia; ika sia iotek ren netipechou me netip niamam ne kutta omusomusen tipis, miritin nang, are ewe pochokun ne nikiitu, sipwe iotek fansoun meinisin ren netip mi uren tong, o sia puchor ngeni Kot fan itan nonnomuch kewe are nonnomun chon unukuch. Ach ennetin mochen mi fiti ew ngunun kinisou pokiten ach kewe feioch me ach kinisou ren met sia kaeo non manauach epwe awora non netipach ach nukuchar non Kraist, ew “saramen apinukunuk, me ew tongen Kot me aramas meinisin.”22
Iotek ina ew niffang seni Kot. Sisap mefi akanaemon. Ua pwarata pwe iteiten atun sia iotek a tongeni fansoun mi pin ach kapas ngeni Semach, non iten ewe Nau, me ren manamanen ewe Ngun mi Fel. Non ewe itan Jises Kraist mi pin, amen.