Pwe Oute Monuki

Neanowas allim, achengicheng pwi me fefinei. Sia ennetin feioch non ei mwichenapen mwichefen. Ewe aewin ierin ai fiti ewe Mwichen Engon me Ruemon Apostel mi fokkun atipetekisonaei. Non ei ier ua fokkun kaeo, mamarita, me ua ennetin iotek ngeni Semei won Nang. Ua fen mefi ewe aninis seni ekkewe iotekin ai famini, chienei, me chon ewe Mwichefen seni unusan fonufan. Kinisou ren ami ekiek me iotek.

Ua pwan tufichin chufengen ren chienei kewe mi acheingicheing, ekkoch ua siner seni nom me chommong ua keran churir. Mwirin ai churi chienei ewe mi acheingicheing ua sinei me tongei ren chomong ier ina met a ngeniei pochokunen ekiek ai upwe amonata ai ei afanafan ikenai.

Nupwen aua chufengen, chienei we a pwarata ngeniei pwe a wesen osukosuk. Non an kapas a mefi pwe a “tipemwaramwar ren an nuku” iwe a kutta ai aninis. Ua mefi kinisou pwe a pwarata mefian me an osukosuk ngeniei.

A pwarata pwe a ennetin mochen met a fen mefi me nom non pekin ngun me met a ekieki epwe poutseni iei. Nupwen a kapas, ua ausening me iotek pwe upwe sinei met ewe Samon a mochen ai upwe apasa.

Chienei we , usun chon ekkoch me neimi, a ani ewe kapas eis mi fat non ewe konun Kinter, “Semei won Nang, en mi weswesen manau?”¹ Ren ami ekkewe oua pwan ani ei kapas eis, upwe pwarata och kapasen pesepes upwe pwan pwarata ngeni chienei we me ua apinukunuk pwe epwe apochokunata ami nuku me ami oupwe mochen winiti emon neun Jises Kraist chon kaeo.

Upwe poputa ren ai achema ngenikemi pwe ami noun Semach won Nang at me nengin me An tong ese sisiwin. Ua sinei pwe a weires ach sipwe chechemeni ekkei memmefin tong nupwen oua kuna osukosuk are sossot, netipengau are ouse tongeni fori met oua mochen.

Jises Kraist a sinei usun osukosuk me sossot mi watte. A fangano manauan fan itach. Ekkewe aua me mwen a mano a fokkun weires, nap seni sia tongeni weweiti, nge An asor fan itach a pwarata An ennetin tong mi unus fan itach.

Ese wor ach foffor mi ngau, tipis, are mettoch sia finata epwe siwini An Kot tong fanitach. Esap wewen pwe a pwapwaiti tipis, esap pwan wewen pwe ese wor namwotan ach aier nupwen sia tipis. Ousap monuki pwe Semach won Nang a sinei me tongei ami meinisin, me A moneta an epwe anisikich fansoun meinisin.

Nupwen ua ekipwichi usun an chienei we osukosuk, ua ekieki usun ekkewe kapasen emirit non ewe Puken Mormon: “Iwe iei, nei anuon, chechemeni, chechemeni pwe ina won ewe foun ach Chon Angasano, i ewe Kraist, ewe Noun Kot, ewe mi auchea oupwe aueta ami nongonong won; pwe nupwen ewe tefin epwe tinato an asepwan mi pochokun, ewer, an kewe assefich non ewe ewuniar, ewer, nupwen an kewe pungun foun ice meinisin me an monumon mi pochokun repwe wichi kemi, esap wor an nemenem womi ne etekinikemitiw ngeni ewe pwangen riaffou me riaffou esemuch, pokiten ewe fau minne oua kauuta won, minne a ew nongonong mi nukuchar, ew nongonong won minne ika aramas ra kauuta won resap tongeni turutiw.”²

Ua pwarata pwe “ewe pwangen riaffou me riaffou ese much” mi eu neni aramas rese mochen nom non. Iwe chienei a mefi pwe a karap ngeni ei neni.

Nupwen ua kapas ngeni aramas, usun chienei we, ua kaeo usun ekkewe mettoch ra finata non manauer non ekkewe ier mi efisata ar repwe monukano ekkewe mettoch mi pin, ar repwe apwangapwangano, me mefi tipemwaramwar. Ua pesengeniir, usun chok ua peseingenikemi iei, ami oupwe chechemeni nupwen oua fen mefi ewe Ngun mi Fel me nupwen ami kapasen pwarata mi pochokun; chechemeni ekkewe nongonong oua for non pekin ngun. Ua pwon ika oua fori ei, me ouse fori ekkewe mettoch mi rese apochokuna ami kapasen pwarata are mi turunufasei ami nuku, oupwe tongeni chechemeni ekkewe fansoun nupwen ami kapasen pwarata mi pochokun ren ami iotek me echikipin. Ua pwon pwe oupwe pwan mefi ewe kinamwei me pwapwan ewe kapas allim an Jises Kraist sefan.

Kich meinisin sipwe akkom apochokuna pwisin kich non pekin ngun mwirin sipwe pwan apochokuna ekkewe aramas unukuch. Ekieki usun ekkewe pukfel fan chommong, me chechemeni ekkewe ekiek me memmef oua angei nupwen oua anneaniir. Kuta mirit seni pwan ekoch neni, nge ausening ngeni ewe kapasen pesepes seni ekkewe pukfel: “Nge mi öch pwe aramas repwe tipachemika repwe aneasochis ngeni ekkewe aurouren Kot.”³ Fiti fan, auchean fiti mwichen sakramen, me angei ewe sakramen me asofosefani ami kewe pwon mi pin, fiti ewe pwon ne chechemeni ewe Chon Amanau fansoun meinisin pwe Ngunun epwe nonnomremi fansoun meinisin.

Ese nifinifin met sokkun tipis sia fen fori are ach memefin nipwakingau, sia tongeni efeiochu me apochokuna aramas fansoun meinisin. Ach anisir non ewe napanapen Kraist mi tongeni anisikich ach sipwe mefi ewe tongen Kot non onononun netipach.

Mi auchea ach sipwe chechemeni ewe kapasen pesepes non Deuteronomy mi pochokun: “Oupwe tumunu kemi! Oupwe chechchememi pwe oute monuki non fansoun ami manau, ekkewe mettoch oua fen pwisin kuna. Oupwe aporausa ngeni noumi kewe me noun noumi kewe.”⁴

Tetenin tapin aramas ra angei niwinin met sia finata. Aporausa ami kapasen pwarata ngeni ami famini; peseingeniir ar repwe chechemeni met mefier nupwen ra mefi ewe Ngun mi Fel non manauer me tingorer ar repwe makei mefier non nour puken achem pwe ekei kapas epwe anisir ar repwe chechemeni ar kewe feioch seni ewe Samon nupwen mi namwot.

Oupwe chechemeni, Nifai me pwin kewe ra niwin ngeni Jerusalem ar repwe angei ekkewe seleich piras mi masoeni uruon aramaser kewe, pwe resap monuki met a fis ngeniir me nom.

Pwan, non ewe Puken Mormon, Ileman a aita noun kewe mwirin “aewin semer” pwe resap monuki ekkewe feioch seni ewe Samon:

“Nengeni, nei anuon, ua mochen pwe oupwe chechemeni ne aneasochisi ekkewe annukun Kot; Nengeni, ua fen ngenikemi iten semach me inach kewe akkom ekkewe ra tou seni ewe fonuen Jerusalem; iwe ei ua fori pwe nupwen oupwe chechemeni itemi kewe oupwe chechemeni ir; iwe nupwen oupwe chechemeni ir oupwe chechemeni ar kewe angang; iwe nupwen oupwe chechemeni ar angang oupwe chechemeni pwe a fen affateno, me pwan makkeno, pwe ir mi och.

Iei minne, nei anuon, ua mochen pwe oupwe fori met minne mi och, pwe epwe tongeni affateno usumi, me pwan makkeno, pwan mwo usun a fen affateno me makkeno usur.”⁵

Chommong aramas ikenai mi pwan ani pwan cho ei oreni ne eita nour kewe mwirin iten kewe souneng mi itefouno non pukefel are ar kewe neuo ar repwe pesengenir ar resap monuki manauen ar kewe neuo.

Nupwen ua uputiw, ua angei ewe it Ronald  A. Rasband. Ai last name a osufonu an semei kewe neuo. Ai middle nameA ua angei an epwe anisiei ai upwe chemeni an inei we neuo ir seni Denmark iter Anderson.

Seman seman seman inei we Jens Anderson i seni Denmark. Non 1861 ewe Samon a emwenano ruemon misineri ngeni imwen Jens me Ane Cathrine Anderson ewe, ikeweia ekkewe misineri ra aitir me nour we at 16 ierin, Andrew, usun ewe kapas allim mi niwinsefan. Iwe ngang me ai famini mi feioch seni ar nuku. Ekkewe Anderson ra anneani ewe Puken Mormon me ra papatais mwirin ekkis fansoun. Eu ier mwirin, ekkewe Anderson ra aponueta ewe koko seni ewe soufos ar repwe sai ngeni epekin ewe sat itan Atlantic ar repwe fiti ekkewe Sounang non Merika.

Nge atongan pwe, Jens a mano atun ar sai won ewe sat , nge punuan me noun we at ra sopweino ngeni Salt Lake Valley, ra war September 3, 1862. Ina mwo ika ra kuna osukosuk me ra netipengau, ar nuku ese apwangapwangano me ewe nuku an chommong mwirimwirir ese pwan apwangapwangano.

Sasing

Ewe Chunga non an Elter Rasband ewe ofes

Non ai ewe ofes a itiwetiw ew chunga⁶ mi ningoch a esisinata achechemen ewe aewin chufengen nefinen ai kewe neuo me ekkewe misineri akkom. Uwa awora ai pochokunen memmef pwe usap tongeni monukano ai kewe tetenin aramas, me pokiten itei we upwe chechemeni mwirimwiriton ar nikitu me fangeno.

Ousap monuki, tipemwaramwar ren, are tunano met ouwa mefi pwe seni ewe ngun mi pin. Setan a mochen pwe sisap ekieki usun ach kapasen pwarata, nge ewe Samon a mochen epwe asarama kich non ach sipwe kaeo me fiti I non An angang.

Upwe aporausa porausen manauei mi pwarata usun ei nongonong mi ennet. Ua chechemeni eu fansoun nupwen ua angei eu memmef ren ponuwen ai iotek. Ponuwen ewe iotek mi fat me pochokun. Nge, ua mang ai upwe fori met ua mefi ai upwe fori, iwe mwirin och fansoun, ua mefi tipepwaramear usun met ua mefi. Ekkoch me neimi mi pwan tur ren ai sokkun sossot seni Setan.

Fitu ran mwirin, ua neno ren ei wokisin mi pochokun seni ekkewe pukfel non ai ekiek nupwen ewe Samon a achema ngeni Oliver Cowdery:

Ennet, ennet, Ua apasa ngonuk, ika ka mochen angei pwan och pwarata, kopwe chechemeni ewe pwinin nupwen ka sio ngeni ei non netipom.

Met use porous non kinamwe ngeni om ekiek usun met ka ani kapas eis? Pwan met pwarata a nap a tongeni wor remw mi nap seni pwarata seni Kot.​?⁷

A usun ita ewe Samon a apasa, “Iei, Ronald, ua fen erenuk met kopwe fori. Iwe kopwe fori!” Ua fokkun kinisou ren ewe kapasen fon me emwen fiti tong minne ua angei! Non chok ena fansoun ua mefi kinamwe seni ewe memmef me ua tongeni sopweno, ua sinei non netipei pwe ai iotek a ponu.

Ua aporausa ei poraus ai upwe pwarata pwe sia tongeni mwitir ne monuki mettoch me ifa usun ach mefi ewe ngun mi fel a tongeni emweni kich. Ua kaeo ai upwe aucheani ekkei sokkun mettoch, “pwe ute monuki.”

Ngeni chienei we , me meinisin mi mochen apochokuna ar nuku, ua ngenikemi ei pwon: nupwen oua nukuchar non ami manaueni ewe kapas allimin Jises Kraist me aponueta ekkewe annuk, ami kapasen pwarata epwe tumun, me epwe mamarita. Aponueta ami kewe pwon mi pin, ese nifinifin met aramas mi fori unukumi. Oupwe tiniken non wisemi sam me iin, pwi me fefinei, inenap me semenap, tetenin iin me tetenin sam, me chiechi mi apochokuna ekkewe aramas oua tongei ren ami kapasen pwarata me ami aporausa ekkewe pekin ngun ouwa mefi. Oupwe nukuchar me tupwen, pwan mwo nupwen ekkewe ekiekin tipemwaramwar mi tonong non manauach ren fofforun ekkoch aramas. Kuta ekkewe mettoch epwe apochokuna kemi non pekin ngun. Ousap etiwa ekkewe mettoch aramas mi era pwe mi “ennet” nge mi mwan, me chechemeni ami oupwe makei mefiemi memmefin “tong, pwapwa, kinamwe, engino, umoumoch, manauoch, nikiitu, tipetekison, me nemeni mochenin netipach.”⁸

Non ekkewe osukosuken manauach,oute monuki pwe ami noun Kot at me nengin are pwan pwe ami mi tongeni niwinsefaniti ami oupwe nonomw ren I, minne epwe nap seni mettoch meinisin sia tongeni angei seni fonufan. Oupwe chechemeni ekkewe kapas seni Alma: “Iwe iei nengeni, ua apasa ngenikemi, ami pwi, ika oua fen mefi ew ekkesiwinin netip, me ika oua fen mefi pwe oupwe konu ewe konun tongen ngaseno, upwe eis, ami mi tongeni mefi iei?”⁹

Ngeni ami meinisin mi mefi pwe mi namwot oupwe apochokuna ami nuku, ua sio ngeni kemi:Oute monuki!Ouse mochen ousap monuk.

Ua pwarata pwe Joseph Smith i emon soufosen Kot. Ua sinei pwe a kuna me kapas ngeni Kot ewe Sam me Noun we, Jises Kraist, usun chok met a makei non pusin anon. Ua ennetin kinisou pweese monuki an epwe maketiw met a fis ngeni, pwe kich meinisin sipwe tongeni sinei usun an kapasen pwarata.

Ua ennetin pwarata usun ewe Samon Jises Kraist. I mi manau; Ua sinei pwe I mi manau me a emweni ei Mwichefen. Ua pwisin sinei ekkei mettoch, ese wor emon a ereniei, me ua iotek pwe kich meinisin sisap tongeni monuki ekkewe nongonong mi fochofoch me ennet—akaewin pwe kich noun Semach me Inach won Nang minne ir mi manau me ra tongei kich, ra mochen epwe wor rech ewe pwapwa esemuch. Ua pwarata ekkei mettoch mi ennet fan iten Jises Kraist, amen.