Ewe Kokottun Angaseno mi Nap
Ua sinei nupwen sia ennetin aier seni ach kewe tipis, ra moreno—esap wor mwirimwrin!
Ekkoch maram me mwen Preseten Boyd K. Packer a tou seni ei manau, am chon nouwis non pristut me kinikinin aninnis am aua feioch ne ausening ngeni an poraus ngeni kem. Use fen tongeni wes ne ekieki usun met a ani kapas. A apasa pwe a kutta me non ekiekin usun unusan manauan ren och tipis a fori me a aier seni me a era ese tongeni kuna mwirimwirin. Rese chiwen nom. A pwan pwarata pwe me ren ewe asoren Achasefan an ach we Chon Amanau, Jises Kraist, pwan ren aier, an tipis ra unusan moreno, usun ita rese fen fis. Preseten Packer a peseikem nouwis pwe aupwe pwarata pwe ei mi ennet ngeni emon me emon kich mi ennetin aier.
Ua sinei usun emon mwan a fori och tipis non ekkewe ier a no. Non fansoun nangatam, ei mwan a mefi sau me noninen an epwe ereni punuan we are an kewe chon emwenin pristut. A mochen wesen aier, nge a fen pwan apasa pwe epwe chok fen fangatani an manau ese much me mwen epwe fen ariaffouni are asaua punuan me noun kewe ika epwe fen pwari an tipis.
Nupwen sia tipis, fan chommong Satan epwe sotun ereni kich pwe ewe mi murrino sipwe tumunu aramasach seni ar repwe sinei usun tipisich, pachenong ach pwari ngeni pisop, ion minne a tongeni efeiochu manauach me ren ekkewe kii a nom ren pun i soukapungen Israel. Nge ennetin, ewe mettoch mi murrino me met Kraist a mochen sipwe fori, ach sipwe pwari me aier. Iei an Semach won Nang kokkotun angaeseno mi nap.
Iwe, ei mwan a pwari an tipis ngeni punuan we mi nukuchar me nouwisen Mwichefen, me a aporausa usun an watte niaman. Ina mwo ika a weires nap seni meinisin non manauan, memmefin ngaseno, kinamwe, tong, me kinisou ngeni ach Chon Amanau, pwan an sinei pwe ewe Samon a eki oson mi chou a esenipato pwapwa ese wor awewen, ina mwo met epwe pwan fis mwirin. A fen sinei pwe punuan me noun kewe repwe netipechou—o mi pung; me pwan epwe wor niwinin an tipis me epwe tou seni wisan—o mi pwan pung. A fen sinei pwe punuan epwe netipeta, epwe metek me epwe song—mi pwan pung. A fen ekieki punuan epwe feino o mochen kaimu seni fiti nour kewe—nge ese pwan ina.
A fen sinei pwe punuan me noun kewe repwe netipechou—o mi pung; me pwan epwe wor niwinin an tipis me epwe tou seni wisan—o mi pwan pung. A fen sinei pwe punuan epwe netipeta, epwe metek me epwe song—mi pwan pung. A fen ekieki punuan epwe feino o mochen kaimu seni fiti nour kewe—nge ese pwan ina.
Fan ekkoch watten tipis a eseniapto kaimunon pupunu, anongonong won nonnomun, fan ekkoch mi namwot. Nge ei mwan a fokkun mairu pun punuan a farapachei, me a finata pwe epwe anisi non unusan an tufich. Mwirin och fansoun a tufichin amusano an tipis ngeni. A mefi ewe manamanen echikar an ewe Achasefanin ewe Chon Amanau. Ekkoch ier a no, ekkei ruemon pupunu fiti unumon nour kewe ra pochokun me nukuchar. Ekkewe ruemon pupunu, ra angang non tempel, me ar pupunu fengen a murinno, o uren tong. Anonnonun an ei mwan kapasen pwarata me an tong me kinisou ngeni ewe Chon Amanau a fokkun pwan pwa me non manauan.
Amulek a pwarata, “Ua mochen pwe oupwe feito me ousap chiwen apochokunano netipemi; … ika oupwe aier … , ewe kokkotun ngaseno mi auchea epwe mwitir kawor ngenikemi.”1
Nupwen ua angang ren punuwei we non an nemeni ew misin, am aua feino ren ewe airmaik pwe am aupwe soni ew watten mwichen misineri ew nesessor. Emon anuon a fokkun pwano ngeni kem. Usun a netipengau, chou, me usun a noninen. Am aua katonochu non ena ran. A tori nekunion me ei anuon a pwari an tipis me noun kewe nouwis ra finata pwe a namwot epwe niwino ngeni fonuan. Ina mwo pwe am aua netipengau pwe a fen makken me ese fen aier me mwen a feito ngeni an misin, ren am feino airmaik am aua kapas ngeni non tong usun an tipepochokun ne pwari an tipis, me am aua pwon ngeni pwe aupwap chok poporaus fengen.
Ei anuon mi murinno a feioch pun seman me inan ra fokkun tuppwen, pwan souemwenin pristut mi murinno, me ewe wart mi uren tong. Mwirin ew ierin an achocho ne ennettin aier me feioch seni ewe Achasefanin ewe Chon Amanau, a tufichin niwin ngeni an misin. A weires upwe fen awewe usun ukukkun watten am pwapwa otun am feino soni non airmaik. A ureno ren ewe Ngun mi Fel, uren pwapwa, me nukuchar me mwen ewe Samon, me a fen atapwan epwe fori an misin. A winiti emon misineri mi fokkun och, me mwirin am me punuwei am aua tufich ne fiti an ririfengen non tempel.
Nge siwinin, ua sinei usun emon misineri, pokiten a sinei pwe an tipis ese mo pwari epwe fen esenipato an epwe mwitir niwin ngeni fonuan, a fori an kokkot pwe epwe fokkun angang weires me epwap pwari ngeni ewe presetenin misin ekkoch chok ran me mwen epwe wes. Ese wor an niaman seni Kot me a sotun rikiseni ewe kokkot minne ach Chon Amanau mi atong a fen fori fan itach.
Otun am misin, fan ew ua fiti punuwei nupwen a no interfiu ren emon mwan ita epwe paptais. Nupwen punuwei a fori ewe interfiu, ua nonnom nukun ren ekkewe sister ir ra wisen aiti. Nupwen a wes ewe interfiu, punuwei a erenir pwe a och ewe mwan epwe paptais. Ei mwan a fokkun kechiw non an poraus pwe a fen ekieki pwe an tipis watte a fori me nom non manauan epwe fen epeti i seni an epwe paptais. Ese fan chommong ua kuna ewe pwapwan emon a tou seni kiroch ngeni saram usun chon ua kuna non ena ran.
Elter D. Todd Christofferson a pwarata:
“Ren ach nuku non [ach] Chon Amanau me An manaman, ach memmefen netipechou epwe winiti apinukunuk. Netipan me mochenin emon mi ekkisiwin, me ewe tipis mi sotuni kich me akkom a winiti ew foffor sise mochen fori. …
“… Ese nifinifin niwinin ach aier, epwe muchuno non ach pwapwan museno seni tipis.”2
Ekkei mettoch ra achemato ngeni ei usun Enos non ewe Puken Mormon, i ewe a “sio ngeni [ewe Samon] non iotek mi pochokun,” iwe a rongorong ew mongungu a apasa, “Enos, om kewe tipis a museno senuk. …
“Iwe ngang, Enos, ua sinei pwe Kot esap tongeni chofona; ina minne, ai tipis a tottonuno.
“Iwe ua apasa: Samon, ifa usun a fis?”
“Iwe a apasa ngeniei: Pokiten om nuku non Kraist. … ina minne, Feino, om nuku a enimenimochukeno.”3
Non ai ammonata ei afananfan ua fen mochen ekkis sinei ifa usun tetennin nei kewe ra weweiti aier me met ra ekieki usun ewe Chon Amanau, iwe ua tungorei nei kewe repwe kapas eis ngeni nour kewe ekkei kapas eis. Ua fokkun mefioch ren penuer.
Met wewen aier? “Nupwen ka efonu emon, ka tongeni apasa ʻomusano’ me anisir repwe uta sefan.”
Met ka mefi nupwen ka aier? “Ka tongeni mefi I; mefi An pwichikar non netipomn me ewe memeffingau a sueno.”
Ifa usun mefiom ren Jises me Semach won Nang nupwen ka aier? “Ua mefi pwe Jises a mefi pwe a wor namwotan an fori ewe Achasefan, me a pwapwa pwe sia tongeni nom ren I sefan.
Pwata Jises me Semach won Nang ra mochen upwe aier? Non kapasen tettenin nei nengin a serafo: “Pun ra tongei ei! Ika sia mochen fefeita ne winiti usun chok Ir, mi namwot sipwe aier. Sia pwan mochen ewe Ngun mi Fel epwe nom rech fansoun meinisin, iwe mi namwot sipwe aier iteiten ran pwe Epwe chiechi ngeni kich. Usap tufichin awewe ai kinisou ngeni Ir.”
Nupwen Brynlee a ruanu ierin a rongorong ekkei kapas eis a apasa, “Use sinei, Papa. Kopwe fen aitiei.”
Non ew mwichenap a fen fis, Elter Jeffrey R. Holland a apasa: “Ina mo ika ka ekieki pwe ka kon mang, are a fen nu senuk om tufich, ina mo chommongun mwanino ka mefi ka fori … , ina mwo ukukkun towawen ka mefi ka sai seni neniom, om famini, me Kot, ua pwarata pwe kese towaw seni An tong mi pin. Ese tufich pwe kopwe feitiw anonnon minne an Kraist saramen Achasefan esap toruk.”4
O, ina ai mochen fan iten nei kewe me tetenin nei, pwan emon me emon ami, pwi me fefinei, pwe oupwe mefi ewe pwapwa me memmefin kan ngeni Semach won Nang me ach Chon Amanau, nupwen sia aier seni ach kewe tipis me apwangapwang iteitan ran. Aier mi namwot ngeni meinisin noun Semach won Nang. Menni tipis mi namwot sipwe aier seni? Met a epeti kich? Non menni napanap sipwe achocho ne napeno?
Ua sinei, usun Preseten Packer a pwisin sinei me pwarata usun, pwe nupwen sia ennetin aier seni ach tipis ra wesin moreno—ese chiwen mwirimwirir! Ua pwisin mefi pwapwa, ngaseno, me tipepochokun mwen ewe Samon ren ai ua aier.
Me rei, ewe ennetin manaman non ei manau esap kaimunon ewe Setin Par, are mwokutokutun chuk, are echikaren inis. Ewe mananam mi nap a fis nupwen sia feino ren Semach won Nang non tekison non iotek, ennetin tungor pwe epwe omusano ach kewe tipis, me sia nimocheno seni ekkana tipis me ren ewe asoren achasefan an ach Chon Amanau. Non itan Jises Kraist mi pin, amen.