“Feito Tapweno Mwiri” non Om Anganga Tongen Kraist me Aninnis.

Chon angei ewe Nobel Prize itan Elie Wiesel a nom non ew piong non an asoso mwirin a reirei me won ngasangasan nupwen tetenin noun we at a nimu ierin a feito churri. Nupwen ewe kukkun at a nenengeni semenapan, a kuna an metek. “Papachi,” a eis, “ika a fen watteno ai tong ngonuk epwe [kisitiw om metek]?”¹ Ikenai ua ani ena chok kapas eis rech. “Ika a watteno ach tong ngeni ewe Chon Amanau, epwe kisino ach riaffou?”

Nupwen ewe Chon Amanau a kokkori noun kewe chon kuno repwe tapweno i, ra manaueni ewe annukun Moses, mi pachenong kuttan “efou mas ngeni efou mas, o efoch ngii ngeni efoch ngii,”² nge ewe Chon Amanau a feito pwe epwe aponueta ena annuk ren an Achasefan. A ait usun ew nongonong minafo: “Oupwe tongei chon koum ngeni kemi o iotekir ekkewe mi eriaffoukemi me essitakemi.”³

Ekkewe chon kuno ra kaeo are repwe kunu seni ekkewe napanapen aramas futuk me kunu ngeni ewe napanapen tong an ewe Chon Amanau ren are siwini oput ngeni omusomus, kiroch, me tong. Ewe minafon annuk ne “tong fengen”⁴ese mecheres ne aponueta. Nupwen ekkewe chon kuno ra noninen ne nonnom ren chon tipis are sokkun napanapen aramas, ewe Chon Amanau a aitir non engino, “Fansoun menisin oua fori ei napanap ngeni pwii kei mi kisifochofoch, oua pwan fori ngeni ei”⁵ Are usun emon Soufosun ewe Puken Mormon a apasa “Nupwen oua angang ngeni chiechiemi aramas oua chok angang ngeni ami Kot.”⁶

Ren kich an ewe Chon Amanau chon kuno non fansoun soponon, sia feito ren I non ach tongei me anisi noun kewe. Non ach fori ei sisap tongeni towaw seni sossot, weires, me riaffou non futuk, nge epwe kukkun ach riaffoun non ngun. Ina mwo non ach sossot sia chok tongeni kuna pwapwa me kinamwe.

Ach tongen Chon Nuku Kraist a poputa non imwach. Sam me in, wisemi oupwe sense me misineri mi atong ngeni noum kewe semirit me serafo. Ir ekkewe chon kutta ennet. A ina wisemi oupwe anisir ne ekesiwin ngeni Kraist. Ennetin, kich meinisin sia sotun ekesiwin ngeni Kraist—wewen sipwe ureno ren tongen ewe Chon Amanau.

Ren ach tapweno Jises Kraist, an tong a apochokuna kich pwe sipwe aninnis fengen non ach sai non manauen fonufan. Sise tongeni fori anaemon chok.⁷ Oua fen rongorong ai ani ekkei kapasen Quaker: Kopwe eki ei me upwe ekiuk me sipwe feita fengen [fein feino].⁸ Kich chon kuno sia poputa ne fori ei nupwen sia paptais, non ach pwarata pwe sia mochen “mwarei fengeni an emon me emon chou, pwe repwe tongeni pan.”⁹

Ach osukuna fengen ewe annukun ewe muu¹⁰ a ew napanapen aninnis fengen me tong fengen. Sam me in fiti semenap me inenap, sia kan aporaus usun ngauen nonnomun fonufan—sukun rese aiti nouch mettoch mi och. Nge a watte ach tufich. Sia tongeni aea ekkewe tufichin aiti nouch kewe non ach kewe famini—wewen iei chok. Ousap mut ngenir repwe nuu senikemi. Nupwen a wor tufichin aporausa om ekiek usun ewe kapas allim me ekkewe mettochun manau, kouno mettoch meinisin, mommot me fos ngeni noum kewe are tetenin noum kewe.

Sisap osukosuk pwe esap kich chon osukunen kapas allim mi nipwakoch. Ese wor och mirit are och puken nesen a och seni ach pwisin anneani ekkewe pukefel, iotek, ekipwich, me kutta emwen seni ewe Ngun mi Fel. Ewe Ngun mi Fel epwe emweni kemi. Ua pwon ngeni kemi: Ewe wisen sam me in a fiti ew niffangen sinei osukun non ewe napanap mi och ngenikemi me noumi kewe. Chemeni pwe an Kot manaman ne anisi kich ngeni mi pung ina An we tong. “Sia tongei i, pokiten a akkom tongei kich.”¹¹

Serafo, ami sensen ewe kapas allim mi fokkun manaman. Oua feino fan pwe oupwe kaeo pwe oupwe niwino neimw me aiti me anisi ami kewe famini, chon neniemi, me chiechiemi. Ousap niuokus. Oupwe nukuchar ne pwarata usun me oua sinei pwe mi ennet. Oupwe ekieki usun ifa usun ekkewe misineri ra napeno pokiten ra manaueni ew manau mi pin—ra aea ar fansoun, me nipwakoch ne kapasen pwarata pwe repwe anisi me efeiochu aramas. Nupwen oupwe aporausa ami kapasen pwarata usun ewe kapas allim, ami nuku epwe mar me ami tipepochokun epwe watteno.

Ew me nein ekkewe mettoch mi kan och non angangen Nuku Kraist ina ach sipwe anneani pukefel, iotek me mwich fengen non ach famini. A fen nap seni ipuku ier a no, souemwenin Mwichfen ra sou pesei kich sipwe atawe kich—och fansoun iteitan wiik. Nge chommong me neich sise fori me sise angei ekkewe feioch. Pwinin famini esap chok afanafan seni Mama are Papa. Ina ach fansoun famini pwe sipwe poraus fengen usun mettochun ngun, pwe sipwe anisi nouch kewe repwe kaeo ne aninnis me tong fengen, me pwapwa fengen, kapasen pwarata, me marita o napeno fengen. Non ach fori pwinin famini iteitan wiik ach tong fengen epwe napeno, me ach riaffou epwe kisino.

Sipwe chechemeni: ewe angang mi aucheanap non ach famini sia fori me ren ewe Ngun mi Fel. Nupwen sia puchor non song, ewe Ngun mi Fel a su seni kich me su seni ach famini. Nupwen sia fos non tong, ewe Ngun mi Fel a tongeni nom rech. Sipwe pwan chemeni pwe nouch kewe ra aukuku ach tong ngenir anongonong won aukukkun fansoun sia atawe ngenir. Me mwen mettoch meinisin sisap poutano ach engino me sisap fangeta.

Ekkewe pukefel ra poraus ngeni kich nupwen ekkoch noun Semach won Nang ra finata ar resap fiti an kokkot, nang a kechiw.¹²Ekkock sam me in ra tongei me aiti nour kewe ra pwan kechiw nupwen nour kewe ra fini ar resap fiti kokkotun ewe Samon. Met sam me in repwe fori? Sise tongeni angei seni emon an pungun finata seni ach iotek. Chemeni seman ewe at mi mwanuochuno, a witiwit pwe noun we epwe pwisin pwata, non a katon i “mi chok chiwen towaw,” a sa ngeni.¹³ Sia tongeni iotek me tungor usun aururun inet sipwe fos me met sipwe apasa ewer pwan fan ekkoch, inet sipwe chok mosonoson. Chemeni pwe nouch kewe me aramasach ra fen finata repwe fiti ewe Chon Amanau non ewe manau mwen uputiw. Fan ekkoch, epwe chok seni ar pwisin kaeo pwe ekkana memef repwe pochok sefan. Ennetin, mi namwot repwe pwisin finata ne tongei me tapweno ewe Samon.

A wor pwan ew napanap chon kuno ra pwarata ar tong ngeni ewe Chon Amanau. Ikenai ua mochen ingeiti ekkewe ir ra angang ngeni ewe Samon non ar tumunu pwan ekkoch aramas. Ewe Samon a fokkun tongeikemi! Non ami aninnis non mosonoson, oua tapwei I ewe a pwonu, “Sememi we mi kuna non monomon, i pwisin epwe niwini ngenikemi non pwapwano.”¹⁴

Ua ekieki usun chon neniei, punuan ewe a semwenin me non ekiekin minne a weiresin chemeni mettoch. Iteitan Raninifel a anisi an epwe ufouf pwe repwe no fan, a fori mokuran, me a mina an makeup, me pacheta an kewe ear ring. Non a fori ei angang a fen ew nenien appiru ngeni mwan me fefin non am wart—are fen unusan fonufan. Ew ran punuan ewe a apasa ngeni, “Ua chok mochen kuna sefani punuei we me nonnom ren i.”

A penueni, “Ngang punuomw.”

A penu non pwetete, “O iwe, mi och!”

Usap tongeni fos usun tumun ika usap fen fos usun ewe chon tumun mi nap non manauei—an ewe Chon Amanau chon kuno ngeni ei—punuei feinfeino, Mary. A fangeno meinisin non tumunoch me tong. Poun mi chok usun Poun kewe mi pwetete. Usap tongeni nom ikei ika esap fan itan punuei. Me ren i upwe tongeni nikitu tori neseponon me nonnom ren non manau ese much.

Ika a watte om raiffou, ren pwan ekkoch are anaemon chok, ua pesei ngonuk mut ngeni ewe Chon Amanau epwe chon tumunuk. Anongonong won an tong.¹⁵ Etiwa an kapas: “Usap nikitikemino, upwe niwinsefaniti kemi,” A pwon.¹⁶

Pwi me fefinei, ika pwe sise mi unusan fori, sipwe kunu ngeni omusomus, kiroch, me tong. Sipwe nikiti ewe maun mi chok sou fis non netipan aramasen futuk, me pwarata an Kraist, tumun, tong me, me kinamwe.¹⁷

Ika “oua fen angei ewe mirit usun ewe ningen [me ochun] Kot”¹⁸ me pwan “ewe achasefan minne a monneta seni ewe nongonongen ewe fonufan”¹⁹ “esap wor ami ekiekin oupwe efeiengawa fengeni kemi, nge oupwe nonnom non kinamwe, … Iwe ousap mut ngeni noumi kewe… repwe atai ekkewe annukun Kot, me fiu me anini fengen nefiner. … Nge oupwe aitir … pwe repwe tong fengen nefiner, me angang fengen nefiner.”²⁰

Me mwen chok ewe Chon Amanau a Irapengisino, a aiti noun kewe Aposel: “Iwe iei upwe ngeni kemi ew annuk mi fo, oupwe tong fengen. Ussun chok ngang ua tongei kemi”²¹ me “Ika ami mi tongei ei, iwe oupwe anneasosichi ai kewe annuk.”²²

Ua pwarata pwe an ewe Chon Amanau napanap ngeni kich a usun chok ewe napanapen ewe nios Christus. an Thorvaldsen. A sopweno ne eitau poun kewe ²³  ren an pesei sipwe “Feito tawpeno mwiri”. Sia tapweno mwirin I non ach tong fengen me aninnis fengen me non ach aneasosichi an kewe annuk.

Ua pwarata pwe I mi manau me A tongei kich ren ew tong mi unusoch. Iei An we Mwichefen. Thomas S. Monson i Noun we soufous won fonufan ikenai. Ua ani iotek pwe epwe napeno ach tongei Semach won Nang me Noun we at, pwe epwe kisino ach riaffou. Non itan Jises Kraist, amen.