Ekkewe Feiochun ach Fel ngeni Samach won Nang

Ew me nein ekkewe uruo a fis mi fokkun amwarar me murino non pukefel ina ewe uruon an ewe Chon Amanau churi ekkewe aramas non Merika mwirin An mano me manausefanita. Ekkewe aramas ra fen riaffouni ew tatakis mi fokkun watte minne a efisi “unusen kinikinin ewe puun a siwin.”¹ Ewe uruon ekkei mettoch a affata pwe mwirin ewe osukosuk ekkewe aramas meinisin ra soposopono ne kechiw,² me nukanapan ar ennetin riaffou, ra ennetin mochen chikar, kinamwe, me ngaseno.

Nupwen ewe Chon Amanau a feitiw seni nang, ekkewe aramas ra turuno ren Pechen fan ru. Ewe aewin a fis mwirin an apasa, ren mumuta seni nang:

“Nengeni, ngang Jises Kraist, ewe ekkewe soufos ra pwarata pwe epwe wareto ngeni ewe fonufan.

“Iwe nengeni, Ngang ewe saram me ewe manauen ewe fonufan.”³

Iwe a tingor ngeni ekkewe ir mi nonnom pwe repwe “Uta me feito rei, pwe oupwe tongeni wanong poumi non nepeki, me oupwe pwan tongeni attapa nemon ekkewe chufon non pei me won pechei, pwe oupwe tongeni sinei pwe Ngang ewe Koten Israel, me ewe Koten ewe unusen fonufan, me ua fen ninnino fan iten tipisin ewe fonufan. …

“Iwe nupwen ar ra feino meinisin me ra kuna ren pwisin inisir, ra puchoruu meinisin, ra apasa:

“Mwareiti! Feioch ewe iten ewe Kot mi Fokkun Tekia!”⁴

Iwe mwirin, ren ewe oruen fansoun, “ra chappetiw ren pechen Jises.” Nge ei fansoun a fis ren ew popun, pwe aua kaeo pwe ra “fel ngeni i.”⁵

Nepoputan ei ier a wor wisei ai upwe churi ew steik non notoun Merika. A chok ew Raninifel. Ew chok mwich. Ren chok chon ewe Mwichefen. Ua katon nupwen aramas ra tonong non ewe imwen fan me feino ngeni ekkewe sea mi pon non mosonoson. Mongunungunun porous sia rong me non ewe anenong. In me sam ra achocho—fan ekkoch ese fisita—ne amosonosonu nour mi mesepat. Iwe usun chok nom.

Nge mwen chok ewe mwich epwe poputa, kapasen aurouren ewe Ngun mi Fel a feito non ai ekiek.

Ekkei chon ei mwichefen rese chok feito ar repwe apwonueta wiser ika ausening ngeni chon afanafan.

Ra feito fan iten ew popun mi ennet me unusen auchea.

Ra feito pwe repwe fel ngeni

Nupwen ewe mwich a soposopono, ua kakaton ekkoch chon ewe mwichefen non ewe mwich. Arapakan pwe nikinikir chon nang, ew napanapen mosonoson me kinamwe. Och mettoch usur a akinamwei nguni. Ewe memef a fis rer non ena Raninfel a fokkun nap amwararan.

Ra fel ngeni Kot.

Ra mefi nang.

Ua tongeni kuna me non mesemeser.

Me ua fitir ne pwapwa me fel ngeni Kot. Iwe nupwen ua fori ei, ewe Ngun a kapas ngeni netipei. Iwe non na ran, ua pwisin kaeo och mettoch usui, usun Kot, me usun napanapen ennetin ach fel ngeni non manauach.

Aramas mi pin non fansoun soponon ra amwarar nupwen ra anganga wiser non ewe Mwichefen. Nge fan ekkoch sia chok fori pwomen angang, usun ita ach chok fori ach pekin angang. Fan ekkoch ach fiti mwich me fan non ewe muu esap wor ewe kinikinin fel ngeni mi pin. Iwe me nukun ena, esap wor rech ew pekin ngun mi napanap ne churi ewe emon esemuch—ewe sia fich ngeni pwe kich noun emon Sam won Nang mi uren tong.

Iwe pwe esap chok ew mettoch epwe fifis, are och mettochun pwapwa, Ach fel ngeni a ew mettoch mi aucheanap non ach feifeita non pekin ngun. A ew mettoch sipwe mochen, kukkuta, me akachocho ne weweiti.

Nupwen sia fel ngeni Kot, sia feino ren fiti ennetin tong, tipetekison, me ingeiti. Sia esinna me etiwa pwe I ach king mi tekia, ewe chon Forata ekkewe fonufan, Samach mi achengicheng me uren tong.

Sia asamonu me asufonu I.

Sia fangeno inisich ngeni I.

Sia seikata netipach non iotek, aucheani An kapas, pwapwa non An chen, me achocho ne tapweno mwirin ren ennetin netipach.

Ach fel ngeni Kot a ew mettoch mi auchea me non manauen emon chon kunon Jises Kraist pwe ika sise etiwa I non netipach, sipwe kutta I non namwotongaw non ach mwich, fan, me tempel.

Ennetin chon kuno ra memef ar repwe fel ngeni I ewe a fori nang, me fonufan, me ewe sat, me ekkewe konik—kokkori iten ewe Samon neran me nepwin.⁶

Sia tongeni kaeo usun ennetin ach sipwe fel ngeni ren ach katon ifa usun ekkoch—aramas ekkewe meni resap kon sokkono senikich—weri, omwokutu, me fel ngeni me mwen ewe a feito seni nang.

Non ewe aewin kinikinin ewe 19[engon me tiuen] ngoroun ier, ewe namanamen Chon nuku Kraist a arap ngeni an epwene poutuno ewe ekiek pwe Kot mi chiwen kapas ngeni aramas. Nge non ew fansoun non 1820 [engorou wanupuku rue], ena a siwin  feinfeino nupwen emon at sou atake mi tekison a tonong nein ekkoch ira me a fotopukutiw ne iotek. Seni ena fansoun, a soposopono ne wor nemasepwi mi amwarar, pwarata, me pwaton chon nang ra aurano ewe fonufan, ra awora ngeni aramas mirit usun nonnomun me popun Kot me nefinan ngeni aramas.

Oliver Cowdery a awewei ekkena ran pwe resap tongeni monnukuno. Mwirin a pwarano ewe pochokunen pwapwa, mwar me esukusuk ra mefi.⁷

An Oliver kewe kapas ra uwei ekkewe aewin kinikin mi fiti ennetin ach fel ngeni ewe a feito seni nang—ew memefin ingeno me ennetin kinisou.

Iteiten ran, nge akkaewin non ewe ranin Sabbath, a wor rech ewe tufich mi murino ach sipwe weri ekkewe amwararen me eingeingen nang me awora kinisou ngeni Kot ren an efeiochun murinno me uren umoumoch.

Ei epwe emweni ngenikich apinukunuk. Ikkei ekkewe aewin kinikinin fel ngeni.

Won ewe feiochun ranin Pentecost, Ewe Ngun mi Fel a tonong non netipen me ekiekin ekkewe chon kuno noun Kraist, a ourano ir ren saram me mirit.

Tori ena ran rese kon sinei met repwe fori. Jerusalem a ew neni mi afeiengaw ngeni ekkewe chon tapweno mwirin ewe Chon Amanau, iwe eni ra fen aureki met epwene fis ngenir.

Nge nupwen ewe Ngun mi Fel a ourano netiper, tipemwaramwar me tiperuweru a morono. Seni ewe memef mi nap ren ar fel ngeni, ekkewe Sounengin Kot ra angei ewe saram seni nang, mirit, me pochokunen kapasen pwarata. Me ena a esenipato nuku.

Seni ena fansoun, ekkewe Aposel me Souneng ra mokutukut fiti pochokunen emwen. Ren pwaracho, ra afanafan usun Kraist Jises ngeni unusen ewe fonufan.

Nupwen sia fel ngeni ren ewe ngun, sia etiwa saram me ennet non kich, minne mi apochokuna ach nuku. Ekkei ra pwan namot ren ennetin fel ngeni.

Non ewe Puken Mormon sia kaeo pwe seni ewe fansoun Alma ewe Kukkun a ngaseno seni riaffoun an pwisin nukumach, I ese chiwen usun akkom. A pwaracho ne “sai non unusen ewe fonu … me nein ekkewe aramas …  , ra wesewesen achocho ne forsefani ekkewe feiengaw meinisin minne [a] fen fori ngeni ewe mwichefen.”⁸

An fel ngeni ewe Kot mi Napanap fansoun meinisin a napanapeni napanapen emon chon kuno mi pochokun.

Ach ennetin fel ngeni a siwini kich ngeni chon kuno mi ennet me nikitu noun ach we Masta mi achengicheng me Chon Amanau, Jises Kraist. Sia siwin me winiti usun I.

Sia winiti aramas mi weweoch me kirekiroch. Sia fokkun amusano. Sia fokkun tong.

Sia weweiti pwe ese tufich ach sipwe apasa pwe sia tongei Kot nupwen ewe chok fansoun sia oput, sise sani emon, ika amonungaw seni ekkoch unukuch.⁹

Ach ennetin fel ngeni a emwen ngeni ew mochen mi wenechar ne fetan won anen chon kuno. Iwe ena a emwen ngeni tong ennet. Ikkei ekkei auchean kinikinin ach fel ngeni.

Nupwen ua ekiek usun met a poputa pwe a ew chok nesosorun Raninfel, non ena chok imwen mwich, non ena steik, pwan mwo ikenai ua memef ren ena mettoch ren pekin ngun ua weri epwe afeiochu manauei feinfeino.

Ua kaeo pwe ika mwo sia tongeni nemeni ach fansoun, wisach, me met sia okuno ngeni ach sipwe fori—ika mwo sia cheki ekkewe tettenin mettoch sia mochen awesi meinisin—ika sise fel ngeni ach we Chon Angasano mi umoumoch, King won nang, me Kot mi ning, sise kuna unusen ewe pwapwa me kinamwein ewe kapas allim.

Nupwen sia fel ngeni Kot, sia esinna me etiwa I ren ewe chok sufon usun chok ekkewe aramasen Merika me nom. Sia feito ren fiti memef sise tongeni weweiti usun amwarar me ingeno. Sia ingeno non kinisou ren murinon Kot. Iwe iei, sia angei apinukunuk.

Sia ekipwichi an Kot kapas, iwe ena a ourano ngunuch ren saram me ennet. Sia weweiti met sia kuna non pekin ngun minne sia chok tongeni kuna me ren ewe saramen ewe Ngun mi Fel.¹⁰ Iwe iei, sia angei nuku.

Nupwen sia fel ngeni, ngunuch ra nimochuno me sia mochen tapweno mwirin ach we Chon Amanau, Jises Kraist. Iwe seni ei foffor, sia angei tong ennet.

Nupwen sia fel ngeni, sipwe wau netipach non iotek ngeni ach Kot mi afeioch fansoun meinisin.

Sia pinini me asamonu fansoun meinisin—non ach kewe imwen mwich, imwach, tempel, me non ach angang meinisin.

Nupwen sia fel ngeni, sia suki netipach ngeni ewe manamane echikara ren ewe Achaesefan an Jises Kraist.

Manauach ra winiti esisin me napanapen ach fel ngeni.

Pwii me fefinei, memefin pekin ngun rese kon napeno seni met a fis unukuch nge ra napeno me ren met a fis non netipach. Ina ai pwarata pwe ach ennetin fel ngeni epwe siwini ew mwichen Mwichefen ngeni kametip ren pekin ngun mi amwarar. Epwe efeiochu netipach, awatteno ach weweiti, me apochokuna ach kapasen pwarata. Pwe nupwen sipwe mut ngeni Kot netipach, usun chon for Konupin nom, sia “tonong non an kewe tit ren kinisou, me non an kewe nenien kapung o mwareiti: [sia] kinisou ngeni I, me efeiochu itan.

“Ewe Samon mi murino, an tong ese much o an nikiitu epwe nonnom feinfeino.”¹¹

Seni ennetin me memmefin netip ach fel ngeni, sia marita me napeno non apinukunuk, nuku, me tong ennet. Iwe seni ena foffor, sia ionfengeni saramen nang non netipach epwe ourano manauach ren mettochun nang, sipwe angei kinamwe, me pwapwa feinfeino.

Ina ewe feiochun ach fel ngeni Kot non manauach. Ei ua pwarata non iten Jises Kraist, amen.