Kinisou non ewe Ranin Sabbath

Achengicheng pwi me fefinei ami meinisin non fonufan chon ach ei Mwichefenin Jises Kraist ren Aramas mi Pin non Fansoun Soponon, ngang uwa fokkun kinisou pwe Preseten Thomas S. Monson a tingorei ai upwe wisen kapas non ach ei mwichenapen mwichefen non ei rannin Sabbath. Ua iotek pwe ewe Ngun mi Fel epwe atoura ai kei kapas ngeni non netipemi.

Ikenai ngang uwa mochen kapas ussun memefin netip. Ewe ew upwe anonga ai apourous won ikenai pekin kinisou—non ewe rannin Sabbath.

Sipwe fokkun kinisou ren chommong mettoch: an emon sise sisinei kirekiroch ngeni kich, mongo mei wor atun ach echik, imw asan mokurach nupwen monumon, chuu mei kup a chikar sefan, pwan ekkewe kechiwen monukon ra keran uputiw. Chommong kich sipwe chemmeni ekkei fansoun ennetin kinisou.

Ren ekkewe Aramas mi Pin non Fansoun Soponon, ewe Sabbath a ew fansoun, ennetin ew raanin kinisou me tong. Ach Samon a wau an aureur ngeni ekkewe Souneng non Jackson County, Missouri non ewe ier 1831 pwe ar iotek me kinisou epwe ngeni nang. Ekkewe Sounengin akom a kaor ngenir ew pekin pwarata an epwe aitir met repwe fori atun raanin Sabbath pwan ar repwe sinei echikipin me iotek.¹

Ir, me kich, ach Samon a aiti kich ach sipwe feningeni me ngeni ach kinisou non raanin Sabbath. Usun chok ami sinei, met a fokkun auchea ewe tong kich mei mefi ren fan asengesin ekkewe chon ngeni kich ekkewe niffang. Ikei met annon ach Samon ren an epwe ifa usun ach sipwe kinisou me epwe ifan usun ach sipwe tong non ewe raanin Sabbath:

A ngenikich ewe annuk, A apasa: Sipwe tongei ewe Samon ach Kot ren unusan netipach, ren unusen ngunuch, ekiek, me pwan pochokun; me sipwe angang ngeni I non iten Jises Kraist. …

Sipwe ennetin kinisou ngeni ewe Samon ach Kot ren mettoch meinisin.

Sipwe asor ngeni ewe Samon ach Kot non ennetin wenechar, pwan mo ren netipechou me netip niemam.²

Iwe ach Samon a awora ew esinesin ren fan asengesin ika ese wor ach kinisou ngeni Semach won Nang me Jises Kraist ekkewe chon awora ngeni kich niffangach: ren an apasa pwe ese wor met aramas ra fori a asonga Kot, ese pwan nifinifin ion epwe napono an song ren, nap seni ekkewe rese esina I non mettoch meinisin, pwan ekkewe rese aponuweta An kewe annuk.³

Chommong ami ekkei chon rongorong ouwa fen awora apwapwan raanin Sabbath pwe ew ran ach sipwe chechemeni me awora kinisou ngeni Kot ren an afeiochu kich. Oua chechemeni ewe kon:

Akan tori ei taropwe pwan wor chon churi ei ekkewe Aramas mi Pin non Fansoun Soponon mi tupon ekkewe ir mei riaffou ren ar uwo chou. Ekoch ra arapakan ar mefi pwe repwene fangeta. Uwa anean me iotek pwe met ekkei uwa apasa usun ach kinisou won ewe Sabbath epwe annisi ion mei apwapwang non ar nuku nge epwe pwan wor kokon non netiper.

Ew feioch kopwe ennetin kinisou pwe sia tongeni fiti mwichen sacrament. Mei wor ekkoch ion mei terinong non imw rese tongeni pwata seni ar nenien kokon. Mei pwan wor ekkoch ir mei mochen repwe nomw ian sia nonomw ian nge rese tawe ngeni pokiten mei wor ar angang non pioing, me pekin angangen police, ika pwan tori ekkewe ir mei fangeno manawer non fonu pwas me nein petewon ar repwe tumunu kich. Pokiten sia tawe me chienach Souneng ach sipwe tongeni angei fengeni sakrament an epwe anisikich ach sipwe mefi kinisou me mefi an Kot tong me umoumoch ren.

Pokiten ewe Soufos Joseph Smith me ewe kapas annim mei niwinsefanito, pwan ew feioch sipwe anneani pwe sia tongeni angei ewe sakrament iteiten wiik—a amoneta, a afeioch, a pwan kawor ngeni kich seni chon kuno mei wor ar mumuta seni Kot. Sipwe ennetin kinisou nupwen ewe Ngun mi Fel a epini iotekin ewe sakrament, a keit seni peun ekkewe pristut mei tipetekison, ra asomonu Semach won Nang.

Ew nein ekkewe feioch sia tongeni anneani, ew mi nap ena ewe memmefin omusomus sia angei nupwen sia angei ewe sakrament. Sia mefi tong me kinisou ren ewe Chon Amanau, ewe an asor ese much a otufichikich ach sipwe nimenimochuno seni tipis. Nupwen sia angei ewe pinawa me konik, sia chechemeni pwe A riaffou fanitach. Me nupwen sia mefi kinisou ren met A fori fanitach, sia mefi An tong fanitach me ach tong fan iten I.

Ewe feiochun tong sia angei epwe anisikich ne aponueta ekkewe annuk ach sipwe “chechemeni i fansoun meinisin.”⁵ Oupwe pwan mefi tong me ennetin kinisou, usun chok ngang, ren ewe Ngun Mi Fel, ewe Semach won Nang a pwon pwe epwe nononmw rech fansoun meinisin nupwen sipwe aponueta ach kewe pwon mi pin. Sia tongeni anneani ekkei feioch iteiten Raninfel me mefi kinisou.

Ewe Sabbath a pwan ew murinon raani sipwe chechemi ach kewe pwon mi pin sia fori nupwen sia papatais non konik ren ach sipwe tongei me angang ngeni neun Semach won Nang kewe. Ach sipwe aponuweta ena pwon won ewe Sabbath epwe pwan seni achsipwe fiti ew sukun ika mwich seni unusen ennetin netipach ren an epwe annisi pwich me fefinach kewe mi nom rech an epwe awora ar nuku me tong. Ena pwon epwe pwan pachenong ach aponuweta wisach kewe.

Ngang mei kinisou ren ekkewe chommong Raninfel uwa senseni mwichen tiken me non Bountiful, Utah, pwan ew Sukunen Raaninfel me Idaho. Me uwa chechemeni ekkewe fansoun uwa emon chon anninis ngeni punuwei we non ewe nenien tumun semirit, ai angang nge chon wisen ioni me ainet neun semirit nios.

A fite ier me mwan, ewe Ngun mi Fel a annisiei ai upwe essina pwe ai kewe kukun angang mei namot ngeni neun Semach won Nang kewe. Fan ekoch uwa mairu pwe ekoch me neir ra chechemeni me kinisou ngeniei ren ai achocho ne angang ngenir fan itan neuch we Masta non ekewe ranin Sabbath.

Fan ekkoch sise chiwen kunna uwan ach angang non raanin Sabbath, sise pwan tongeni kuna kapachanapan an noun ach ewe Samon kewe ekkoch chon angang. Nge ewe Samon mei chok forata An ewe muu me ren Noun kewe chon angang mi tupwon me tipetekison, ngeni ewe nesopon mei fokkun amwarar. Ewe Ngun mi Fel chok epwe tongeni akuna ngonuk.

Ngang uwa marita non ai fifiti mwichen sakrament non ew kukkun branch me New Jersey fiti fengen me ekoch chienei me ai famini. Fik-me-nimu ier anno, ngang uwa papatais non Philadelphia non ewe chok faan forien ach ei Mwichefen minne aua tongeni feino ngeni non Pennsylvania are New Jersey. Nge mei pwan wor ew kukkun branch a nomw non Princeton, New Jersey, non ewe fansoun, iei afen wor ruu watten wart. Non chok ekkewe raan, fite ngorou serafo ra efisi apwapwan ewe epinipinin ewe tempel a nomw Philadelphia Pennsylvania.

Nupwen ai uwa emon anuon, a tori ei ew koko ren ai upwe emon distrik misineri non ewe ew chok faan non Albuquerque, New Mexico. Ikenai awor ew tempel pwan ruanu steik.

Uwa no seni Albuquerque ai upwe no sukun Cambridge, Massachusetts. Awor ew chok imwen fan me ew distrik non unusen Massachusetts me Rhode Island. Uwa wawa taraku ngeni mwichen sakrament non ekkewe kukun branch nge pwan kuna ningen ekkewe neni, ekkoch ra nomw non neni mei rent ika kukun imw mei for sefan. Ikenai awor ew an Kot tempel mei piin non Belmont me chommongono steik non ewe neni.

Non ewe fansoun ngang use kuna fichi pwe ewe Samon afen nipenau ewe Ngun mi Fel won ekkewe aramas non ekkewe mwichen sakrament. Ngang uwa mefi nge use kuna aukukun me kokotun an ach Samon epwe anapano me eningano An ewe Muu. Emon soufous a pwarata met a kuna, a pwan maketiw met ekkei kich mei kuna ikenai. Nifai a apasa pwe ukukun chochochon esapw wate nge kapachanapen ewe saram epwe fokkun wachemuk non an murino.

“Iwe non ewe fansoun ua kuna ewe mwichefenin ewe Namen Kot, me chochon ra chokukkun.

“Iwe non ewe fansoun ngang, Nifai, ua kuna ewe manamanen ewe Namen Kot, pwe a feitiw won ekkewe sounengin ewe mwichefenin ewe Nam, me won ekkewe aramas pwon noun ewe Samon, ekkewe ra toropas fetan won unusen ewe fonufan; iwe ra fotata wenechar me ren ewe manamanen Kot non ning mi napanap.”⁶

Non ei fansoun soponon, a wor ew oseni a afata ifa usun nonomuch me met epwe fis non ekan raan mwach usun met a mak non neuch ewe puken Doctrine and Covenants:

Ewe Samon a apasa pwe sise mo weweiti unusan feiochuch seni non peun ewe Sam, met a amonata fan itach;

Me sise mo tongeni pworacho ngeni metoch meinisin ikenai; nge, sipwe chok pwapwa, pwe I epwe emweni kich. Ewe muu epwe ach me ekkewe feioch epwe pwan ach, me unusan pisekisekin fansoun ese much epwe pwan ach.

Nge ion epwe etiwa ekkei mettoch meinisin non ennetin an kinisou epwe achifouwa; nge pisekin ei fonufan epwe kawor ngeni, epwe kapach fan ipuku, ewer, epwe soposop.⁷

Ngang uwa mefi sokonon wattenon ennetin kinisou ren feioch me tong seni Kot a mamarita non ach ei Mwichefen. Usun nge ekan fen napeno nein chochon ach ei Mwichefen nupwen fansoun me nenien sosot me riaffou ren ar nuku, nupwen ar repwe sio ngeni Kot ren an epwe annisir.

Non ei fansoun sia nononomw non a wor sosot mei weires, usun chok aramasan Alma kewe ra nomw faan muun Amulon ewe mei fokkun ngaw, i ewe a watta chou won sekurun ekkewe aramas a kon chou ar repwe engino ngeni:

“Iwe non ewe fansoun ewe mongunun ewe Samon a feito ngeni ir non ar kewe riaffou, a apasa: Sachetai mokuremi me oupwe kinamwe, pun ngang mi sinei usun ewe pwon mi pin minne oua fen fori ngeniei; iwe upwe fori ew pwon mi pin ngeni nei aramas me angasereno seni fotek.

“Iwe upwe pwan ekisano ekkewe chou minne ra wata won afaremi, pwe ousap tongeni mefir me won nukunupemi, pwan mwo nupwen oua nom non fotek; iwe ei upwe fori pwe oupwe uta pwe oupwe chon pwarata ngeniei mwirin, me oupwe tongeni ennetin sinei pwe ngang, ewe Samon Kot, ua churi nei aramas non ar riaffou.

“Iwe iei non ewe fansoun pwe ekkewe osochou minne ra nom won Alma me pwin kewe ra paneno; ewer, ewe Samon a apochokunareno pwe repwe tongeni engino ngeni ar kewe uochou ren mecheres, iwe ra fangeta fiti pwapwa me fiti tipepos ngeni mochenin ewe Samon meinisin.”⁸

En me ngang kich chon pwarata pwe fansoun sia aponuweta an pwon mi pin ren Kot, nupwen mei weires, I mei rongorong ngeni ach iotekin ach ennetin kinisou ren met An niffang ngeni kich a pwan ponuweni ach iotekin tingoren pochokun me engino non ach ennetin nuku. Mei nap seni faan ew, I A awora ngenikich ach pwapwa me ach pochokun.

Oupwe ekieki fichi met oupwe fori non ei raanin Sabbath ren ami oupwe fen ngeni me pwarata ami ennetin kinisou pwan ren ami oupwe apochokuna kemi me chienemi ren ami oupwe moneta ngeni sossot non ekan raan mwach.

Ami mei tongeni poputa ikenai ren ami iotek fengen non ami famini ami oupwe apasa ami ennetin kinisou ngeni Kot ren met a efisata ngeni kemi. Ami mei pwan tongeni iotek fan asengesin oupwe sinei met ach Samon a mochen oupwe fori fan Itan non ami annisi ekoch. Mei pwan tawe oupwe awora ami iotekin tingor ngeni ewe Ngun mi Fel epwe emweni kemi ngeni ion ami ouwa tongeni annisi ekkewe ach Samon a mochen oupwe feino annisir.

Ngang upwe pwon ngeni kemi pwe ami iotek epwe ponu, nge nupwen oupwe fori met ponuwan ami kewe iotek, oupwe mefi pwapwa non raanin Sabbath me netipemi epwe ur ren kinisou.

Ngang uwa pwarata pwe Kot ewe Sam mei sinei pwan tongei kemi. Ewe chon Amanau a achasefan fan iten ami kewe tipsi pokiten a tongeikemi. Ir mei sinei itemi usun chok Ar sinei iten ewe Soufos Joseph nupwen Ra pwaa ngeni. Ngang uwa pwarata pwe iei ewe ennetin Mwichefenin Jises Kraist pwan I epwe aponuweta ekkewe pwon mi pin ouwa fori me asofosefan ren Kot. Napanapemi epwe winiti usun napanapen ewe Chon Amanu. Oupwe angei pochokun ne pworacho ngeni ami kewe sossot me memefin tipemwaramwar. Oupwe kuna pwapwa non ewe ranin Sabbath. Ua pwon ngeni kemi fan iten ewe Samon Jises Kraist, amen.