Aomata ni kabane A Riai Ni katokaa iaoia te Ara are e Anga te Tama

Tabeua te wiiki n nako, I ira bwabetitoakiia ataei aika waniua aia ririki. A tia ni moana reiakinan ana euangkerio Iesu Kristo mairouiia aia karo ao aia tia reirei. E moanna n rikirake aia onimaki Irouna. Ao ngkai a tangiria n Iria nako nanon nein te bwabetito n riki bwa kaain Ana Ekaretia ae kaokaki. Ngke I tarai nanoia, I mimi bwa e kanga aron otaia n teuana mwakoron aia berita ae tabu ae kakawaki: aia motinnano ni katokaa iaoia aran Iesu Kristo.

Mai moana, e a tia te Atua ni katanoata kakawakin aran Iesu Kristo n Ana babaire ibukira. Te anera e reireiniia ara moan karo, Atam: “Mangaia are, ko na karaoi bwaai ni kabane are ko karaoi n a aran te Nati, ao ko na raira nanom ao ni wetea te Atua n aran te Nati n aki toki.”¹

Te burabeti n Ana Boki Moomon te Uea Beniamina e reireiniia ana aomata, “A na a akea te ara riki teuana ke te kawai riki teuana ke te anga are e na reke iai te kamaiuaki.”²

E manga taekina riki te koaua aei te Uea nakon ana Burabeti Iotebwa Timiti: “Nooria, Iesu Kristo bon te ara ae e anga te Tama, ao bon akea te ara riki teuana are a na kamaiuaki iai aomata.”³

N ara tai, Beretitenti Dallin H. Oaks e a tia n reirei bwa “naake a kamwakura te onimaki n aran Iesu Kristo ae tabu ao n rin inanon ana berita … iai inaomatana iaon ana anga karea ni kamaiu Iesu Kristo.”⁴

E tangiria Tamara are i Karawa ni kamataata raoi bwa aran Natina, Iesu Kristo, tiaki ti te ara ae ti teuana ibuakoia aika mwaiti. Aran te Tia Kamaiu iai mwaakana ae onoti ao ni kakawaki. Bon ti ngaia te ara ae kona n reke iai te kamaiuaki. Man katuruturuan taekan te koaua aei ni boong ni kabane, e kakoaua Tamara are i Karawa nakoia Natina ni kabane bwa iai te kawai n oki rikaaki Nakoina. Ma karekean te kawai ae koaua ae tauraoi e aki nanonaki n ae okirikaakira e otematiki. E tuangiira te Atua bwa a kainnanoaki ara mwakuri: “Mangaia are, a na riai mwaane [ao aine] ni kabane ni katoka te ara are e anga te Tama.”⁵

N te aro bwa ti na karekea te mwaka ni kamaiu are e roko rinanon aran Kristo, ti riai n “[kananorinanoira] imatan te Atua … ao n roko ma naano aika nanomaraki ao tamnei aika raraoma … ao [ni] kukurei ni katoka [iaora] aran Iesu Kristo man kororaoi, n aroia ataei aika a tia ni koro waniua aia ririki, atia ni “karekea man babetitoaki nakon ana ekaretia.”⁶

Aomata ni kabane ake a kukurei ni katoka aran te Tia Kamaiu iaoia a riai n tau ibukin karekean te otenanti n te bwabetito bwa te bwai ni kakoaua n te rabwata nakon te Atua n aron aia babaire.⁷ Ma te bwabetito ai tibwa bon te moan.

Te taeka anaia bon tiaki te aoriori. Bon makurian te taeka ma nanoia aika mwaiti.⁸ N aron naba anne, ara motinnano ni katoka iaora aran Iesu Kristo e kainnanoa te mwakuri ao iai mwakorona aika mwaiti.

Te katooto, teuana nanon te taeka ae anaia n imatang bon kanakin ke karekea inanon rabwatan temanna, n aron are ngkana ti anaa te mooi nima. Man katokaan iaora aran Kristo, ti motinnanoia bwa ti na irii Ana reirei, Kateina, ao Ana tangira inanora bwa ti aonga n riki bwa mwakorona ngaia ae antai ngaira. Ngaia ae, e kakawaki ana kakao Beretitenti Nelson nakoia kairake n ikawai bwa ana “tataro mwaaka ao ni kakorakoraia ni [ukoukoria] ni kan atai nanon atuun ana reirei [te Tia Kamaiu] aika kakaokoro atunna ao nanon oin araia [ibukiia]”⁹ ao kanuaingkami n ana taeka Kristo inanon booki aika tabu, riki Ana Boki Moomon.¹⁰

Nanon riki te taeka ae anaia n imatang bon kariaiakan te aomata n tabena ae onoti ke ni kamoamoa koauan te iango ke te reirei. Ngkana ti katokaa iaora aran Kristo, ti Kariaia bwa ara Tia Kamaiu e teimatoa ni butimwaai Ana reirei bwa kairan maiura. Inanon iango ni kabane aika ti karaoi, ti kona n anaa Ana euangkerio bwa e koaua ao n onimakinna ma nanora ni koaua, marurungira, ara iango, ao korakorara.

Te taeka anaia n imatang e kona n nanonaki naba n ae katiteboakira ma te ara ke taekan bukina. Angiia mai ibuakora ti a tia n rinanon taneiai ma te katabeaki n te mwakuri ke ni karaoa taekan arona ke ni mwainging. Ngkana ti katoka iaora aran Kristo, ti katoka iaora taben te tia reirei ni koaua, ti tei ibukin ana mwakuri, ao ti “tei bwa taan kakoaua [Ibukina] n taainako ao ni bwaai nako, ao n taabo nako aika [ti] nako iai.”¹¹ E a tia Beretitenti Nelson ni weteia ni “kabane ataeinnaine ao ni kabane ataeinimwaane … bwa ana ira a na botaki ni kairake te Uea n ibuobuoki ni ikotia kaain Iteraera.”¹² Ao ngaira ni kabane ti kukurei ni karaoi ana wewete te burabeti ni kabongana aran Ana Ekaretia are kaokaki iroun te Tia Kamaiu: Ana Ekaretia Iesu Kristo ibukiia Aika Itiaki ni Boong Aika Kaitira.¹³

Ngkana ti katoka aran te Tia Kamaiu iaora, ti riai n ataia bwa rikin Kristo ao Ana Ekaretia bon ti teuana ao ti tebo. Aki kona ni kamaenakoaki. Ti tebo, ara reirei nakon te Tia Kamaiu ao ara kakaonimaki n Ana Ekaretia aki naba kaokoroaki. Ngkana ti kabwaka n ara motinnano nakon temanna, ara motinnano nakon temanna e na kerikaaki, aio bon bwaai aika ana riai riki.

Tabeman aomata aki kariaia bwa ana katoka iaoia aran Iesu Kristo ao Ana mwakuri bukina bwa a taku bwa e aki riai, e katabuaki, ao e tia tianaki. Ni koauana, katokaan aran Kristo iaora e a anganiko te inaomata ao te kakorakoraaki. E kauringa te namakin ngke ti a tia ni kariaia ana baire te Atua rinanon te onimaki iroun te Tia Kamaiu. Ma te nano n tangira aei, ti kona iai ni kunei raoi bukin ara kantaninga n ara bwaintangira ao ara tarena mai ieta, taneiai ma Ana tangira ae kakorakora, ao n rikirake tabeaiangara ibukin aia warebwea tabeman. Ngkana ti katoka iaora aran te Tia Kamaiu, ti taui ni kabane bwaai aika a raoiroi ao n riki n ai Arona.¹⁴

E kakawaki bwa ti na uringnga ni katoka aran te Tia Kamaiu iaora bon anne te motinnano n te berita ae tabu—are e na moanaki ma te berita ae ti karaoia n te bwabetito. E a tia Beretitenti Nelson n reireinira, “[Ara] motinnano n irakin te Tia Kamaiu man karaoan berita aika tabu ma Ngaia ao mani kawakinan berita aika tabu aikanne e na ko na ni ukii mataroan te kakabaia ma te tamnei ni kabane ao mate tangira aika tia ni katauraoaki.”¹⁵ Teuana te kakabwaia mai ieta bon katokaan aran te Tia Kamaiu iaora n te bwabetito are e a tia ni katauraoa te otenanti are imwiina n te kawai ae beritanaki, iai aron kamatoaakira. Ngke I titirakina raoraou ae wanibwi ma waniua ana ririki bwa tera ae nanonaki n anaakin aran Kristo nakoina, e kaeka, “E nanonaki n ae I kona ni karekea te Tamnei ae Raoiroi.” E eti are e taekinna.

E reke ana bwaintituaraoi te Tamnei ae Raoiroi man te kamatoaakl imwiin are ti a tia ni kaitiakaki man te otenanti n te bwabetito. Te bwaintituaraoi aei bon te bwaai ae koaua karekean te Tamnei ae Raoiroi bwa e na riki bwa raom n taainako. Ngkana ti kakauongo ao n ongotaeka nakon Natina, te bwanaa ae maraara n rau, E na kateimatoaira iaon te kawai are ti rinanona inanon te bwabetito, e kauringiira ngkana ti kaririaki bwa ti na kitanna, ao ni kaungaira bwa ti na rairinanora ao ni biitira ngkana e riai. Ara taratara imwiin te bwabetito bon kateimatoaan te Tamnei ae Raoiroi n taainako ma ngaira bwa ti aonga ni waakinako n te kawai ae beritanaki. E kona n raoniira te Tamnei ae Raoiroi ti ngkana ti kawakin maiura bwa ana itiaki ao n inaomata man te bure.

Ma bukin aei, e a tia te Uea ni katauraoa te kawai ibukira bwa ti na teimatoa ni kaboua mwiin ara bwabetito rinanon riki te otenanti n—te toa. Ni katoa wiiki ti kona ni “kakoaua … bwa [ti] bon kukurei ni katoka [iaora] n aran [te] Nati”¹⁶ riki man rokora irouia ao ni kabuta te kanikina n rabwatan ao raraan te Uea inanon baira—te kariki ao te ran—ao uotiianako nanon tamneira. N okira, te Tia Kamaiu E na karaoa ana kakai ni kaitiakiira ni karekea riki ana kairoro ae reitinako te Tamnei ae Raoiroi. Aio kakoauaan ana nanoanga ae akea tokina ae ti reke n aran Iesu Kristo? N aron are ti katoka Arana iaora, E anai ara bure ao rawawatara Iaonaao Baina “e teimatoa n aroria”¹⁷ ni katobibiira ni bain Ana tangira.¹⁸

Te toa bon te kauring ni katoa wiiki ae katokaan aran Iesu Kristo iaora bon te motinnano ae maiu ao n reitinako, tiaki te bwai ae tii riki ni bongin ara bwabetito.¹⁹ Ti kona n reitaanako ao ni kaokioka kakimwareirein “te karea ae tabu anne, aki kona n ata kakawakin te Mwakuri ni kamaiu aomata, ni kabwarai ara bure ao n taua rabwatana ao raraana.”²⁰ E na aki kamiimi ngkana natin te Atua ana atai kakabwaia aika korakora, n iai te tamnei iai are e kona n roko man katokaan aran Kristo iaoia, e na teimatoa aia namakin ni kukurei ao nanoia e na rin n taainako inanon te berita ma Atuaia.²¹

Ngkana ti ira kawain te berita ae baireaki ma ieta aei, ara motinnano ao ara kekeiaki ni uouota aran Iesu Kristo iaora e na anganiira te korakora “n uringnga n taua [Arana] ao e na koreaki n taainako [inanora].”²² Ti na tangira te Atua ao kain rarikira ao n namakina te kan ibuobuoki nakoia. Ti na karinei Ana tua ao n teimatoa ni kaniira ma Ngaia ni karekean riki berita aika tabu ma Ngaia. Ngkana ti noria bwa ti mamaara ao n aki konabwai ni kakoroi nanon nanora aika raoiroi, ti na bubuti ibukin te korakora are e na roko rinanon Arana, ao E na roko ni buokiira. Ao ti kekeiaki ni kakaonimaki, e na roko te tai ngkana ti na Noria ao ni maeka ma Ngaia, ao ti na kunea bwa ti a riki n ai Arona, ngaia are ti a tauraoi n oki nako matan te Tama.

Ibukina bwa ana berita te Tia Kamaiu e boni koaua: naake a “kakoaua aran Iesu Kristo, ao n neboa te Tama n arana, ao n teimatoa n te onimaki n arana ni karokoa te toki”²³ ana kamaiuaki n uean te Atua. Ma ngkoe, I kimwareirei bwa kakabwaia aika akea kabotauaia aikai a kona n reke man katokaan iaora aran Iesu Kristo, are ngaia ao arana are I kakoaua, amen.