Kaaro ao Ataei
Ana babaire ni kakukurei ae korakora Tamara are i Karawa e tuangi ngkami bwa antai ngkami ao tera oin bukin maiumi.
Mwaaneu aika a tangiraki, ai kakukureira reken te maungatabu ae boou aei ibukin aia tetere aine n te Ekaretia waniua te ririki ni waerake. Ti a tia n ongoraeakin rongorongo aika a kaungnano mairouia mataniwi aine ao mairoun Beretitenti Henry B. Eyring. Ngai ma Beretitenti Eyring ti tangiria ni mwakuri iaan ana kairiiri Beretitenti Russell M. Nelson, ao ti kakantaninga ana taeka ni burabeti.
I.
Ataei bon bwaintituaraoi aika a kakawaki mairoun te Atua—rikirakera ae akea tokina. Ma ti maeka n te tai ngke angiina aine a iangoia bwa akea tabeia ni karikiia ao n tabeakiniia natiia. Angiina kairake n ikawai a taotaona aia mare ni karokoa are a bon rauaki ni baike a tia ni karekei n te maiu n rabwata. Katautauan mwaitin te ririki ni mare n te Ekaretia e keerake n ae e riaon uoua te ririki, ao mwaitin te bung irouia membwa n te Ekaretia e tabe ni keerikaki. Te United States ao tabeua aaba a kaitara ma tii tabeman ataei aika a roko n te roro n ikawai ni boutokaiia ikawai ake a tia n uriitaea.1 E riaon 40 te batienti mai buakon te bung n te United States irouia tiina aika a aki mare. Ataei akanne a kai rootaki. Waaki ni mwakuri aikai a kaitara ana babaire ni kamaiu Tamara.
II.
Aine ni Boong aika Kaitira a ataia bwa te riki n tina bon aia moanibwai ae rangi ni kakannato, kimwareireia ae rianako. E taku Beretitenti Gordon B. Hinckley “Aine n aia itera bon moan te kakawaki a noora aia tokanikai ae korakora, iai kukureia ni mweengaia ao n aia utu. Te Atua e unika inanoia aine te bwai ae tabu are e kaota korakorana, n te kabouaki, n te rau, n te tamaroa, n te koaua, ao n te tangira. Ao anua ni kabane aika a kakateke aikai e kaotaki iai koauan ao kakukurein te nakoantina.”
E reitia, “Te kabanea ni korakora ni mwakuri are e kona ni karaoia te aine bon tabeakinaia ao reireiakiia ao ni maiuakin ao kaungaakiia ao kaikawakiia natina inanon te raoiroi ao te koaua. Akea riki te bwai teuana ae e kona ni kabotauaki ma anne, n aki tabe bwa tera ae e karaoia.”2
Tiina, aine aika a tangiraki, ti tangiringkami ngkai boni ngkami ao tera ake kam karaoi ibukira ni kabane.
N ana marooro ae kakawaki n 2015 ae atuunaki “Te Bubuti nakoia Mwaaneu,” E taku Beretitenti Russell M. Nelson:
“Abanuean te Atua e bon aki kona ni bwanin ngkana akea aine aika a karaoi berita aika a tabu, ao man kawakini, aine aika a kona n taetae ma te mwaaka ao man ana kariaia te Atua!
“N te bong aei, … ti kainnanoia aine aika a ataa aron karaoan bwaai aika a kakaawaki man aia onimaki ao aika a ninikoria ni katani iango aika eti ao utu n te aonaaba ae rootaki. Ti kainnanoia aine ake a babane nanoia ni kawakiniia natin te Atua ni kawain berita nakon te karietataaki; aine ake a ataia bwa a na kanga ni karekea te kaotioti ae e onoti, ake a ota ni mwaakan ao raun te entaumente n te tembora; aine ake a ataia bwa a na kanga ni wetea mwaakan karawa ni kamanoia ao ni kakorakoraia natiia ao aia utu; aine ake a reirei n aki maaku.”3
Reirei aika a kaunganano aikai a bane ni boboto iaon te “Te Utu: Te Katanoata nakon te Aonaaba,” are ni kaokan te Ekaretia e manga kamatoai reirei ao mwakuri aika a boboto iaon ana babaire Tia Karikibwai imwain ae E karika te aonaaba.
III.
Ngkai I marooro ibukiia kurubu ni kairake ibuakon te roko aei. Mwaaneu aika a tangiraki, ibukin ami atatai n ana euangkerio Iesu Kristo ae e kaokaki, kam bon kakawaki. Ami atatai e na anganingkami te kona n teimatoa n totokoi kangaanga n rikirakemi. N roromi ni kairake, kam a tia n irii taian karikirake ao burokuraem ake a karikirakei ami tarena, n aron te koroboki, te taetae, ao aron te babaire. Kam a tia n ataa ae kam bukinaki ni kateimi ao kam na kanga n totokoa te kariiri ni kewe, ni babakanikawai, n ira, ke ni kamanena te kamanging ao taian turaki.
Kakawakimi e kinaaki n te University i Meangin Carolina n ana kamatebwai America n te roro ae tebwi tabun ao taekan te aro. Te Aobutieewa n Charlotte n te rongorongo ae atuunaki “Te Roro ae Tebwitabun n te Moomon a Keiakina ae Tamaroa: N te Kamatebwai a Rianako n Roroia n te Maiu ni Ikawai.” Te rongorongo aei e taekinna bwa “Kaain te Moomon a karaoa ae rangi n tamaroa n totokoi anua aika kakamaku, e nakoraoi aroia n te reirei ao a karekea te anua ae tamaroa ibukin taai aika a na roko.” Temanna te tia kakae n ana kamatebwai, are e intawiuniia angiia ara kairake, e taku, “Ni katoai rinanin nako rongorongo ake ti tarai, iai te banna ae e itiaki: Boni kaain te Moomon moa.”4
Bukin tera ngkai kam keiaki n ae rangi n tamaroa ma taian kangaanga n aron te kaikawakirake? Ataeinaine, bwa ibukina ngkai kam ataa ana babaire ni kakukurei ae korakora Tamara are i Karawa. Te baire aei e tuangkami bwa antai ngkami ao tera oin bukin maiumi. Kairake man ami atatai anne a rangi n tamaroa moa n katokaki aia kangaanga ao aron rineakin te eti. Kam ataia ae kam kona ni karekea ana ibuobuoki te Uea n tokanikai iaon taian kangaanga ni kabane n rikirakemii.
Teuana bukina bwa bukin tera ngkai kam rangin korakora ao kam ataia bwa ngkami natin te Tama are i Karawa are e tangirii ngkami. I kakoaua bwa kam ataa kunara n taromauri “Ataei aika kam tangiraki, E Mena te Atua Irarikimi.” Aio te moan kibu ae ti a tia n aneneia ao ni kakoaua:
Ataei aika kam tangiraki e mena te Atua irarikimi,
E tararuai ngkami n te ngaina ao n te bong,
Ao e kukurei n arani ngkami bwa natina ao ni kakabwaiai ngkami,
Ngkai kam kataia ni karaoa ae eti5
Iai reirei aika uoua inanon te kibu anne: Te Moan, Tamara are i Karawa e mena irarikira ao e tararuaira n te ngaina ao te bong. Iangoa anne! E tangiriira te Atua, E mena irarikira, ao E tararuaira. Te Kauoua, E kukurei ni kakabwaiaira ngkai ti “kataia ni karaoa ae e eti.” Tera te mweengaraoi ngkana ti rinanon kakain te nano ao te kangaanga!
Eng, ataeinaine, kam kakabwaiaaki ao kam tikauarerei, ma bon natin te Tama are i Karawa ngkami ni kainnanomi ni “kataia ni karaoa ae e eti.”
Ikai N na marooro iaon bwaai aika a kakaokoro, ma I a tia n rineia bwa N na taetae iaon baika uoua.
Au moan marooro e kaineti ma te tareboon. N te tieweei ae nako ni kabuta te aonaaba e kuneaki bwa e riaon iteraia te roro ae tebwitabun aia ririki n te United States ni kabanea aia tai ae mwaiti iaon aia tareboon. E riaon 40 te batienti a taku bwa a kakaii nanoia ngkana a raroa ma aia tareboon.6 Aei bon te bwai ae e riiriki ibuakoia ataeinaine ao ataeinimwaane. Mwaaneu aika kairake—ao aine aika a ikawai naba—e na kakabwaiai ngkami ngkana kam tiatiana kamanenaan ma inaomatami iaon te tareboon.
Au kauoua ni marooro e rangin kakawaki naba. Bwaina te akoi nakoia tabeman. Te akoi bon te bwai ae e a kaman karaoaki irouia ara kairake. Tabeman kurubu ni kairake n tabeua komiuniti a kaota te kawai ibukira ni kabane. A kaungaaki nanora man aia mwakuri n akoi ara kairake n aomata nakoia naake a kainnanoa te tangira ao te ibuobuoki. Ni kawai aika a mwaiti kam anga te ibuobuoki anne ao ni kaota te tangira anne imarenami. Ara kantaninga bwa ti na bane n ira ami katooto.
N te tai ae ti te arona, ti ataia bwa Tatan e kaririira ni kabane bwa ti na aki akoi, ao a teimatoa ni mwaiti katooto ibukin aei, ibuakoia naba ataei ao kairake. Te teimatoa n aki akoi e kinaaki n aanga aika a mwaiti, n aron te iowawa nakoia ataei, te ikakaeng iaon temanna, ke te ikoikotaki ni kaitaraia tabeman. Katooto aikai n iangoana a karika te maraki nakoia kaain ami kiraati ke raoraomi. Mwaaneu aika kairake, e aki kukurei te Uea ngkana ti iowawa ke ni kateibuaka nakoia aomata.
Aio te katooto. I kinaa temanna te ataeinimwaane, are e birinako are e maeka i Utah, are e kaenaenaaki ngkai e taraa ni kaokoro, riki ngkai e taetae n oin ana taetae. E bwainikiranaki irouia kairake ni karokoa are e kabomwi n te kawai are e a kabureaki n ae e riaon 70 te bong ngkai e baireiaki kaokana nako abana. I aki ataia bwa tera ae kaungaia kurubu ni kairake aikai, angiina mai buakoia bon Aomata aika Itiaki n aromi, ma I kona n noora mwiin aia ioawawa, te taneiai ae kakamaku ae rootaki iai temanna natin te Atua. Mwakuri aika a uarereke n aki akoi a kona ni karekea mwiina ae korakora.
Ngke I ongo te karaki arei, I kabotaua ma ara burabeti, Beretitenti Nelson, e taku n aia bootaki n taromauri kairake are e tibwaia ni kabuta te aonaaba. Ngkai N na bubuti ngkami ni kabane kairake ake te korakina bwa a na ibuobuoki n ikotakin Iteraera, e taku, “Teei n okoro; riiki ni kaokoro man te aonaaba. Ngai ma ngkami ti ataia bwa kam na riki bwa te ota nakon te aonaaba. Ma ngaia are, te Uea e kainnanoiko bwa ko na taraaki n aron, bwaanam n aron, ni mwakuri n aron, ao ni kunnikainiko n aron ana reirei ni koaua Iesu Kristo.”7
Aia taanga ni buaka kairake e kaoingkami Beretitenti Nelson bwa kam na aki iowawa imarenami. A na iriira ana reirei te Tia Kamaiu ao n ibuobuoki ao n tatangira ao ni mwamwannano nakoia tabeman, n aki kabooa mwin te buakaka ngkana e kairua temanna nakoira.
N te marooro n te maungatabu ni kabuta n taekan te tai are kam bane ni bungiaki iai, Beretitenti Gordon B. Hinckley e kamoamoaia “ataeinaine aika a rangin bobotonaine ake a kataia ni maiuakina te euangkerio.” E kabwarabwaraiia, ngkai I namakinna bwa N na kabwaraibwarai ngkami:
“A tituaraoi i bon imarenaia. A ukeuke ni kakorakoraiia i bon imarenaia. A anga karineaia aia karo ma te mweenga are a roko mai iai. A moanna n nano n aine ao ni uota te katooto ae tamaroa inanon maiuia ae bwanin are e anganiia te unga n nano.”8
Ngkai ana toro te Uea, I kangai nakoimi ataeinaine, ara aonaaba e kainnanoi raoiroimi ma ami tangira. Bwaina te akoi imarenami. E reireiniira Iesu bwa ti na itangitangiri ao ni kabwara aia bure akana a bure nakoira. Ngkai ti kataia n riki bwa ti na akoi, ti kaniira niki Nakoina ao ana anainano n tangira.
Mwaaneu aika tangiraki, ngkana kam irekereke ma te mwakurin iowawa ke kateibuaka—n onoti ke n te kurubu—katokia ngkai ao ni bitaki ao kaungaia tabeman bwa a na bitaki. Aio au marooro, ao I anganingkami ngkai ana toro te Uea ae Iesu Kristo ibukina bwa Tamneina e anaa nanou bwa N na taetae nakoimi ibukin te botoniango aei. I kaota au koaua ibukin Iesu Kristo, ara Tia Kamaiu, are e reireiniira bwa ti na itangitangiri imarenara ngkai E tangiriira. I tataro bwa ti na na karaoi, n aran Iesu Kristo, amen.