Nakomai, Ongora nakon Bwanaan te Burabeti

N taekinan te Beretitenti n Ana Ekaretia Iesu Kristo ibukiia Aika Itiaki ni Boong aika Kaitira, e taku te Uea:

“Ao teuana riki, taben te Beretitenti n te nakoa n te Nakoanibonga ae Rietata e na tararua te ekaretia ae bwanin, ao n riki n aekan Mote—

“… Eng, e na riki bwa te tia mamata, te tia kaotioti, te tia rairairi, te burabeti, ao ni karekei ana bwai n tituaraoi te Atua ni kabane are e kaaki i aon te tia kairiri n te ekaretia” (Reirei ao Berita aika Tabu 107:91–92; e kairaki katuruturuana).

I a tia ni kakabwaiaki ni kakoauai tabeua ana bwaintituaraoi te Atua iaoia Ana burabeti. N na karakina nakoimi te bwai are I rinanona ae tabu n te tai are I kakoaua iai n aei? Imwain nakoau ae ngkai, I ibuobuoki ibukin kinaakin ao kakaean taabo ake a na kateaki iai taian tembora ibukin taai aika a na roko. Imwin Tebetembwa 11, 2001, toauakin tian te U.S. e a rangin tararuaki riki. Ibukin aei, a anaa uoua nakon teniua te aoa kain te Ekaretia ni mwananga mai Vancouver, Canada, ni kaean te Tembora i Seattle Washington. Beretitenti Gordon B. Hinckley, te Beretitenti n te Ekaretia n te tai anne, e baireia bwa te tembora i Vancouver e na kakabwaiaia kaain te Ekaretia. E kariaiakaki te kakae ibukin te tabo, ao imwiin tuoakin tabeua ana bwai te Ekaretia, tabeua taabo i Vancouver ake tiaki ana bwai te Ekaretia e baireaki naba.

E kuneaki te tabo ae e rangin tamaroa ae katauaki ibukin katean bwain te aro ae kaan ma Kawain Canada ae reiti nakon aba nako. Te tabo anne e kai rin te aba iai, e kaonaki ma arokan Canada aika te kai te mwaiango aika a tamaroa ao te tabo ae kai nooraki are e katereia tengaa aomata ni buti n aia kaa.

Ti kaota te tabo ma tamneina ao mwabena n te bowi ni Komete ibukin Taabo ae a na Kateaki iai taian Tembora. E anga ana kariaia Beretitenti Hinckley bwa ti na karaoa te boraraoi ibukin te kaboaba ao n ataia raoi bwa e tau te tabo ibukin katean te tembora. N Ritembwa n te ririki anne, ti ribooti rikaaki nakon te komete ni kaotia bwa e a bwanin ara kamatebwai, ao ti ukoukora te kariaia ni waakinan te kaboaba. Imwin ongoraeakinan ara ribooti, e taku Beretitenti Hinckley, “I namakinna bwa I riai n noora te tabo ae e na kateaki iai te tembora.”

Imwina riki n te namwakaina anne, uabong te bong imwin te Kiritimati, ti a nako Vancouver ma Beretitenti Hinckley, Beretitenti Thomas S. Monson; ao Bill Williams, te tia korotamnei n aron katean te tembora. Ti kaitibo ma Paul Christensen, te beretitenti n te titeiki n te tabo, are e nikiriira n te tabo anne. Te bong anne e bon aomwaimwai teutana man bubu, ma e kukurei Beretitenti Hinckley n otinako man te kaa ao ni waaki n nakonako ni kabuta aon te tabo.

Imwin kabanean ara tai iaon te tabo anne, I titirakina Beretitenti Hinckley ngkana e tangiria ni kan noori riki taabo tabeua ake a tia ni baireaki. E taku bwa eng, e tangira ni kan noorii. Ko nooria, n taraakin taabo ake tabeua, ti a kona ni karaoa te kabotau iaon nakoraoia.

Ti a buti ni kananau ni katobibia aon Vancouver n tarai tabeua bwaai, n tokin te tai ti a okira te tabo are ti moan mwananga mai iai. E taku Beretitenti Hinckley, “Aei te tabo ae nakoraoi.” Ngkanne e titiraki, “Ti kona n nako ni kawara ana auti ni bootaki te Ekaretia tao teuana te kamwakoro te maire [0.4 kiromita] raroana?”

“Eng, Beretitenti,” ti kaeka.

Ti a oki nakon te kaa ao ni buti nakon te auti ni bootaki ae uaakan. Ngke ti roko n te umwantabu, e taku Beretitenti Hinckley, Rairaki ikai nakon te maing.” Ti rairaki ao n ira te kawai n aron tuangakira. E a moanna n rietata teutana te kawai.

Ngke e a roko te kaa n te tabo ae rietata, e taku Beretitenti Hinckley, “Katoka te kaa, katoka te kaa.” Ngkanne e a kotea te mwakoro n aba ae n te atai ao e taku, “E uara te tabo aei? Aio te tabo ae e riai ni kateaki iai te tembora. Aio te tabo ae tangiria te Uea bwa e na mena iai te tembora. Kam kona ni kabooa? Kam kona ni kabooa?”

Ti tuai raoi n taraa te tabo aei. E mena riki mai buki ao e raroa man te kawai, ao akea taekana ni mwakoro ibukin te kaboaki. Ngke ti kaeka ae ti aki ataia, e kotea te tabo Beretitenti Hinckley ao e a manga taku riki, “Aio te tabo ae e na tei iai te tembora.” Ti tiku inanon tabeua te miniti ao ngkanne ti a nako n te marae ni wanikiba bwa ti nang okiri mweengara.

N te bong are imwina, Ngai ma te Tari Williams ti a weteaki nakon ana aobiti Beretitenti Hinckley. E a korea tamnein ana baire iaon te mwakoro ni beebwa: te kawai, te umwantabu, rairaki ikai nakon te maing, te x ni kaota te tabo are e na kateaki iai te tembora. E titiraki bwa tera rongorongona ae e a tia n reke. Ti tuangnga e bae n aki rinea te tabo ae e na taraa ni kaangaaga aron karekeana. A bwaibwai iai teniman aomata: temanna mai Canada, temanna mai Inria, ao temanna mai Tiaina! E aki tau ibukin katean bwain te aro.

“Eng, karaoa ami kabanea n tamaroa ni karekea te tabo anne,” e taku.

Ngkanne a kaoti taian kakai. Inanon tabeua te namwakina ti a bwaibwai n te tabo, ao imwina kawan Langley, British Columbia, e anga ana kariaia ibukin katean te tembora.

Tamnei

Vancouver British Columbia Tembora

N iangoan te bwai ae ti rinanona aei, I karinanoai n ataakina ngkai Ngai ma te Tari Williams a bon bane ara reirei ma ara ririki n taneiai n te bwaibwai n te auti ao te aba ma bairean aron katean te tembora, Beretitenti Hinckley ae akea ana kataneiai ae kinaaki; ma iai irouna te bwai ae kakawaki riki: te bwaintituaraoi n te mwaaka n nonoori ngkai te burabeti. E kona n noora te tabo are e na kateaki iai ana tembora te Atua.

Ngke e tua te Uea nakoia Aomata aika a Itiaki ake ngkoa n te kabanea ni bong bwa a na katea te tembora, E taku:

“Ma e riai te auti ni kateaki nakon arau ni kaineti nakon te banna are N na kaotia nakoia.

“Ao ngkana au aomata a aki kateia ni kaineti nakon te banna are N na kaotia … , N na aki butimwaia mai baia” (Reirei ao Berita aika Tabu 115:14–15).

N aron ae e karaoaki nakoia Aomata aika a Itiaki ake ngkoa, arona naba ma ngaira n te bong aei: te Uea e kaotia ao n reitinako ni kaotia nakon te Beretitenti n te Ekaretia te banna are e na kairaki iai uean te Atua inanon ara bong. Ao, n te rinan ae onoti, e katauraoa te kairi ni kaeti ma arora n tatabemaniira ni kairi maiura, n aron ara mwakuri a na butimwaeaki naba iroun te Uea.

N Eberi 2013 I taetae iaon te mwakuri ae irekereke ma katauraoan ao katean aan tembora nako ni kakoaua bwa e kona ni kaitarai angibuaka ao kabuanibwai are e kabaeaki iai. Ma aan te kateitei ai bon tibwa te moan. E kateaki te tembora man taian kai ni kateitei, a ikoikotaki raoi ao n nakoraoi ni kaineti ma banna aika a kaman baireaki. Ngkana a na riki maiura bwa kanga ai aron te tembora ngaira n tatabemaniira ti na kataia ni kateia n aron ae e taku te Uea (taraa 1 I Korinto 3:16–17), ti kona n titirakiniira i bon iroura, “Tera taian kai ni kateitei ae ti na kateitei iaona bwa ti aonga ni kanakoraoi maiura, ae mimitong, ao n aki kai rootaki n angibuakan te aonaaba?”

Ti kona ni karekea kaekaan te titiraki aei n ana Boki Moomon. Ni kaineti ma taekan ana Boki Moomon, e taku te burabeti ae Iotebwa Timiti “I tuangiia taari bwa Ana Boki Moomon bon te boki ae te kabanea n eti mai ibuakon booki nako iaon te aonaaba, ao bon ngaia kiingin ara ekaretia, ao e na kaania riki te Atua te aomata ngkana e iri nanon reirei ake a taekinaki inanona, nakon taian boki riki tabeua.” (te kabwarabwara nakon ana Boki Moomon). N te kabwarabwara nakon ana Boki Moomon, ti reireinaki bwa “naake [a] karekea aia kakoaua mai ieta mairoun te Tamnei ae Tabu [bwa ana Boki Moomon bon ana taeka te Atua] ni karekea naba te rabakau bwa man te mwaaka naba anne ao Iesu Kristo bon te Tia Kamaiua te aonaaba, bwa Iotebwa Timiti bon Ana tia kaotioti ao te [burabeti ibukin Kaokan te Euangkerio], ao Ana Ekaretia Iesu Kristo ibukiia Aika Itiaki ni Boong aika Kaitira bwa abanuean te Uea ae e a manga kateaki riki iaon te aba.”

Aikai ngkanne tabeua taian kai ni kateitei aika a kakawaki ibukin ara onimaki n ae onoti ao ara koaua:

1. Iesu Kristo bon te Tia Kamaiua te aonaaba.

2. Ana Boki Moomon bon ana taeka te Atua.

3. Ana Ekaretia Iesu Kristo Ibukiia Aika Itiaki ni Boong aika Kaitira bon abanuean te Atua iaon te aba.

4. Iotebwa Timiti bon te burabeti, ao iai ara burabeti aika a maiu iaon te aba n te bong aei.

N namwakaina aika a nako, I ongora n taian marooro ni katoa maungatabu are e anga Beretitenti Nelson ma ngke e moan weteaki bwa te Abotoro. Te mwakuri aei e a tia ni bita maiu. Ngkai I kamatebwai ao n iangoa raoi ana 34 n ririki Beretitenti Nelson n reken wawanawana, e kaoti te botoniango ae itiaki ae e teimatoa man ana anga reirei. Botoniango aikai n tatabeua nako a irekereke ma taian kai ni kateitei ake a taekinaki ke bon teuana te kiing n te kai ni kateitei ibukin ara tembora. A kairaki inanona onimakinan te Uea Iesu Kristo, te rairannano, te bwabetito ibukin kabwaraan bure, ana bwaintituaraoi te Tamnei ae Raoiroi, kamaiuakiia maate ao te mwakuri n te tembora, kawakinan te bong ae te Tabati n tabuia, waakina am iango n te kabane, tiiku ni kawain te berita. E taetae Beretitenti Nelson ibukiia ni kabane ma te tangira ao te anganano.

Te boua ao te kai ni kateitei ibukin te Ekaretia ibukin maiura bon Iesu Kristo. Aio Ana Ekaretia. Beretitenti Nelson bon Ana burabeti. Ana reirei Beretitenti Nelson e kakoaua ao e kaoti kabwaia ni maiun ao n anuan Iesu Kristo. E taetae ma te tangira ao e atatai n rikin te Tia Kamaiu ao Ana mition. E a tia naba n kaota ana koaua n taai aika a mwaiti ni weteaia mai ieta burabeti aika a maiu—te Beretitenti n te Ekareti—are e mwakuri iaana.

Ngkai, n te bong aei, bon tibwangara ni kamatoa ngaia bwa ana burabeti te Uea ae maiu iaon te aba. Ti a taneiai ni kamatoaia ara mataniwi n te Ekaretia rinanon te banna mai ieta ni katei baira bwa kaotan ara butimwaai ao ara boutoka. Ti karaoa aei tabeua te miniti n nako. Ma koauan te kamatoa e mwakuri raoi ae riaon riki te kanikina n te rabwata. N aron ae koreaki n Reirei ao Berita aika Tabu 107:22, te Moan Beretitentii a na “kamatoaki man nanon, ana onimaki ao ana tataro te ekaretia.” E bwanin man koaua ara kamatoa ibukin te burabeti ae maiu ngkai ti karikirakea te banna n onimakina ana taeka, ni karekea te onimaki ni mwakuriia, ao ngkanne n tataro bwa e na reitinako ana kakabwaia te Uea iaoia.

Ngke I iangoa Beretitenti Russell M. Nelson, I karekea mweengaraoiu n ana taeka te Tia Kamaiu ngke E taku, “Ao ngkana au aomata a na ongo ni bwanau, ao nakon bwanaia au tia mwakuri ake I a tia n rineia bwa a na kairia au aomata, noria, e koaua ae I tuangkami, a na aki kamwaingaki man aia tabo.(Reirei ao Berita aika Tabu 124:45).

Te ongora ao te kakauongo nakoia burabeti aika a maiu e na iai korakorana, ni biti maiura. Ti a kakorakoraaki. Ti a kakoaua riki ao n onimakina riki te Uea. Ti ongo ana taeka te Uea. Ti namakina ana tangira te Atua. Ti na ataa aron kairan maiura ae iai bukina.

I tangira ao I kamatoa Beretitenti Russell M. Nelson ao ake tabeman ake a tia ni weteaki bwa burabeti, taan mamata, ao taan karekei kaotioti. I kakoaua bwa iai ana bwaintituraoi te Uea are e a tia ni katoka te Uea iaon atuuna, ao I kakoaua anne ngkai ti katea aan maiura maiuakinan te kakauongo nakon ao n ongo bwanaan te burabeti ae maiu, maiura a na kateaki ni kaineti ma ana banna te Uea ibukira, ao ti na karekei kakabwaia aika akea tokina are a tia ni berita iai nakoira. Te kakao e tabangaki nakoia aomata nako. Nakomai, ongora ni bwanaan te burabeti; eng, nakomai nakon Kristo ao ko na maiu. N aran Iesu Kristo, amen.