Kimwareirein te Mwakuri n Ibuobuoki ae Aki Tii Taraira

Imwiin te maungatabu ni kabuta ae nako, a mwaiti aomata aika a titirakinai ma te aeka n titiraki anne: “A kamwengaraoi kaintekateka ake imoa akanne?” Au kaeka bon ti tebo n taainako: “A kamwengaraoi kaintekateka ngkana ko na aki taetae.” E koaua, kee? A kamwengaraoi kaintekateka ngkana ko na aki taetae, ma I kakaitau ibukin te kakabwaia ao te karineaki n taetae nakoimi n te tairiki aei.

N tabetai ngkana ti beku, ti beku ni weteara aika kakaokoro. Tabeman a mwengaraoi ao tabeman aki, ma ti berita nakon Tamara are i Karawa bwa ti na beku Ibukina ao tabeman ma te tangira ao ni karaoa Nanona ni bwaai ni kabane.

Tabeua te ririki n nako, kairake inanon te Ekaretia a reiakinna bwa “ngkana kam ‘rin i nanon te beku ibukin te Atua’ [Reirei ao Berita aika Tabu 4:2], ko a rin n te mwananga ae te kabanea ni korakora. Ko buoka te Atua ni kawaekoa ana mwakuri, ao bon te atatai ae tamaroa, ae kakukurei, ao ni kamiimi.”¹ Te mwananga ibukira ni kabane—n aki tabe ma te ririki—ao bon te kawai naba are e kairiira nakon ana taeka ara burabeti ae tangiraki bwa “te kawai n te berita.”²

E ngae ngke, ti maeka n te aonaaba ae tii taraira are a teimatoa aomata n titiraki, “Tera ae n na karekea man te bwai aei?” irarikin titirakinana, “Antai ae n na buokia n te bong aei?” ke “N na kanga ni kanakoraoa au mwakuri ibukin te Uea?” ke “I kabanea au tai ibukin te Uea?”

Te katooto ae tamaroa bon te mwakuri ae a tia ni karaoia n aki tii taraira bon Titita Victoria Antonietti. Victoria bon te tia reirei n te Buraimwari n au mwaanga ngke I ikawairake i Argentina. Ni katoa tawanou n te Kauabong, ngkana ti botaki n te Buraimwari, e uouota ara keeke te tiaokureti. Aomata a tangira te keeke—eng, ni kabane ma tingai. I riba te keeke ae te tiaokureti! Ao e ngae ngke e kataia n tibwa te keeke ma ngai, n taainako I aki butimwaia.

N te bong teuana ngke e a tia n tibwa te keeke nakoia ataei ni kabane, I titirakinna, “E aera ko aki uota te aekaki teuana—n aron te aoranti ke te wanira?”

Imwiin ngarena teutana, e titirakinai, “E aera ko aki kataia teutana? E karaoaki te keke aei ma renganana aika onoti, ao I berita bwa ngkana ko kataia, ko na tangiria!”

I taratara nako, ao I miimi, bwa a taraa ni bane n tangira te keeke. I kukurei ni kataia. Ko kona ni ketinna bwa tera ae riki? I tangiria! Anne te moan n tai ae I tangira iai te tiaokureti keeke.

Bon inanon ririki aika mwaiti imwiina ngke I reiakina te rengarenga ae raba n ana tiaokureti keeke Titita Antonietti. Natiu ao Ngai ti kakawara tinau ni katoa wiiki. Teuana mai ibuakon ara kakawari aikai, Tinau ao Ngai ti kukurei ni kana te tiraiti n tiaokureti keeke n te moan n tai. Imwiina e kabwarabwara raoi te karaki nakoiu.

“Ko riai n ataia, Cris,” e taku tinau, “Titita Antonietti ao ana utu aki tau aia mwane, ao ni katoa wiiki e na rineia bwa e na kantokaniia n te bwati ngaia ma natina ake aman nakon te Buraimwari ke e na karekei rengarenga ni karaoan te tiaokureti keeke ibukin ana kiraati n te Buraimwari. N taainako e rineia bwa e na karaoa te tiaokureti keeke nakon kabwakaan te kantoka n te bwati, ngaia ma natina ana nakonako n ae raka nakon uoua te maire [3 km], ni katoa kawai, n aki tabe ma kanoan te bong.”

N te bong anne e a reke riki tangiran ana tiaokureti keeke. Ae kakawaki riki, I reiakinna bwa te rengarenga n ana tiaokureti keeke ae raba Victoria bon te tangira are iai irouna ibukiia naake e beku ibukiia ao ana anga karea n aki tii taraia ibukira.

Iangoakin te taneiai n ana keeke Victoria e buokai n uringa te anga karea ae aki tii taraia ae kaotaki n te reirei ae akea tokina ae anga te Uea nakoia Ana reirei ngke E nakonako nakon ana bwaoki ni mwane te tembora. Ko taneiai ma te karaki. Unimwaane James E. Talmage e reirei bwa iai 13 nnen te mwane, “ao a kabwakaaki inanona aia mwane aomata ibukin kaantaninga aika [kakaokoro] ae kaotaki man [taian] koroboki iaon bwaoki.” Iesu e tarai rainin anganano, aika raonaki ma aekan aomata aika kakaokoro. Tabeman anga aia bwaintangira ma te “kantaninga ae koaua” ngke tabeman a karin inanon te bwaoki “te mwaiti n tirewa ao ni koora aika mwaiti,” ma te kantanainga bwa ana nooraki, kinaaki, ao ni kamoamoaaki ibukin aia angamwane.

“Ibuakoia aika mwaiti bon te aine ae akea buuna ae rarikin, are … e kabwaka inanon te bwaoki ni mwane uoua te buraonti ae kinaki bwa rebeta; ana angamwane e kee iaan te tianti n te mwane n Amerika. Te Uea e weteia ana reirei bwa ana Nakoina, ni kaeti aia iango nakon te aine ae akea buuna ae rarikin ao ana angamwane ae uarereke, ao n taku: E taku nako ia, ‘E koaua ae I a tuangkami, Ba e kamaiti riki ana bwai ni nnei i nanon te ne ni mane te aine ane e mate buna anne, nakoia akekei ni kabaneia ake a nnei i nanon te nne ni mane: ba a bane ni nnei mani kaubwaia; ao neienne e kabane ana bwai ni nnei ake roona man aki kaubwaina’ [Mareko 12:43–44].”³

Te aine ane akea buna e taraa n iai nakoana ae kakawaki inanon te bootaki n ana tai. Iai irouna te bwai ae kakawaki riki: a itiaki nanona, ao e anga ni kabane ana bwai ake iai irouna. E anga ae uarereke riki nakoia tabeman, n rangin n nanorinano nakoia tabeman, ni kaokoro ma ake tabeman. Tabeman aomata ana iangoia ae, tera ae anga e aki kakawaki, ma n ana taratara te Tia Kamaiu, te “tia atai taian iango ma ana kantaninga te nano,”⁴ e nganna ana bwai ni kabane.

Tariu, ti anga ara bwai ni kabane nakon te Uea n akea te raraoma? Ti kabongana ara tai ara tarena bwa e aonga te roro ae rikirake n tangira te Uea ao ni kawakin Ana tua? Ti karaoa te ibuobuoki nakoia kaain rarikira ao nakoia naake ti tararuaia ao ni buokiia—te tai n anga karea ao ni korakorara are e kona ni kabonganaki ni kawai riki tabeua? Ti maiuakin uoua tuua ake a korakora—n tangira te Atua ao n tangiriia Natina?⁵ N taainako te tangira anne e kaotaki rinanon te ibuobuoki.

Beretitenti Dallin H. Oaks e reirei: “Ara Tia Kamaiu e anga Ngaia inanon te mwakuri n ibuobuoki n aki tauaninne. E reireiniira bwa ti na riai n Iriria man arora ni kakeai nanora aika ti tangirii n te aro bwa ti aonga ni beku ibukiia tabeman.”

E reitinako:

“Te katooto ae taneiai te aba iai ni kakeaira ibukiia tabeman … bon te ibuobuoki ae a karaoia kaaro ibukiia natiia. A rootaki tiina n te maraki ao ni kakeai aia moanibwai ao mwengaraoia ni bungia ao ni kaikawaia rake ataei. Kaaro a biti maiuia ao aia moanibwai ni boutoka te utu. …

“…Ti kimwareirei naba irouia naake a tabeakiniia kaain aia utu aika mwauku ao kaaro aika a kara. Akea mai ibuakon te mwakuri n ibuobuoki aei ae titiraki, tera ae n na karekea man karaoakina? Bwaai aikai ni kabane a tangira te mwakuri n aki tauaninne. …

“[Ao] bwaai aikai ni kabane a kamataata te reirei ae akea tokina bwa ti kukurei riki ao n rauaki ngkana ti mwakuri ao ni beku ibukin te bwai are ti anga, tiaki ibukin te bwai are ti karekea.

“E reireinira ara Tia Kamaiu bwa ti na Iriiria man karaoan ibuobuoki aika riai ni mwaninga taekara n te kawai ae tiaki taraira nakoia tabeman.”⁶

N aron naba are e reirei Beretitenti Thomas S. Monson bwa “ngkana tao ti karaoa te reitaki n itaramata ma ara Tia Karaobwai, ti na aki titirakinaki bwa, ‘Iraua am mwakuri aika ko taui?’ ma e na kangai, ‘Iraman aomata aika ko a tia ni buokiia?’ Ni koauana, ko aki kona n tangira te Uea ni karokoa ko beku Ibukina ni buokiia Ana aomata.”⁷

Nanona, tariu, bwa ti aki te kaangaanga ngkana ti tekateka n te kaintekateka ae kamwengaraoi ke ti kataia n rin n tekateka iaon ae rurukumaki mai ibuki. Ti aki naba te kangaanga ngkana ti, rinnako inanon te tabo ni bowi ni katoka tangin te ataei ae tang. Tera te bwai ae kakawaki bwa ti roko ma te nano ni beku, bwa ti kinaia naake ti na buokiia ao ni butimwaia ma te kukurei, ao ti kabwarabwaraira nakoia naake a tekateka irarikira—reitaki ma ngaia e ngae ngke ko aki mwiokoaki bwa ti na buokiia. Ao e kakawaki bwa ti karaoa are ti karaoia ma te ibuobuoki ae onoti n raonaki ma te tangira ao te mwakuri n ibuobuoki.

I ataia ae ti na aki karaoa te tiaokueti keeke bwa te tia reirei ae nakoraoi ke n iai nanona ae korakora, bukina bwa tiaki oin te kantaninga te keeke. Bon te tangira itinanikun te mwakuri.

I kakoaua bwa e karaoaki te tangira n ae onoti rinanon te anga karea—ana karea te tia reirei ao riki rinanon ana kabanea n anga karea ae akea tokina Natin te Atua. I kakoaua bwa E maiu! I Tangiria ao n iangoia ni katikui ni kabane naano n aki tii taraira bwa iaonga n tangira ao n ibuobuoki n aron are E karaoia. N aran Iesu Kristo, amen.