Taeka ni Kaukuki

Tariu ao Mwaneu aika a tangiraki, ti ingainga ni manga ikotaki ma ngkami n te maungatabu ni kabuta n te Ekaretia n Okitobwa aei. Ti anga ara butimwaai n tangira nakoimi n tatabemani ngkami. Ti rang kakaitau ibukin ami tataro ni kamatoa. Ti kona n namakinii. Kam rabwa!

Ti rang kakaitau ibukin ami mwakuri korakora ni karaoi reirei ake a taekinaki n te maungatabu ni kabuta onoua namwakaina n nako. Taian Titeiki Beretitentii ni kabutaa te aonaaba a ukoukora te kaotioti ae riai ni manga barongaa riki aia kooram unimwaane. Mwaane man kooram akanne ni ikotaki ma aine n te Bootaki n Aine a mwakuri korakora n tabeakiniia tarira ao mwaanera n te aro ae tamaroa riki man mimitong. A anaaki nanora n raoiroimi ao ami mwakuri ae rakaibaana ni uota ana tangira te Tia Kamaiu nakoia ami utu, kaain rarikimi, ao raao ao ni buokiia n aron ae E karaoia.

Man te maungatabu n Eberi, Titita Nelson ao ngai ti a tia ni kaitibo ma kaain te Ekaretia man aaba aika aua aika bubura ao aaba ake iaon taari. Mai Ierutarem nako Harare, mai Winnipeg nako Bangkok, ti a tia n namakina ami onimaki ae korakora ao korakoran ami kakoaua.

Ti onrake n te kukurei ni mwaitia ara roronrikirake ake a tia ni kaaina ana taanga te Uea ni buoka ikotakiia Iteraera aika uamaenako.¹ Ti karabwai ngkami! Ao ngkai kam reitinako ni iri au kakao ake a taekinaki n aia taromauri te roronrikirake n te aonaaba ni kabuta, kam anga te banna ni katoto nakoira ni kabane bwa ti na iria. Ao tera te bitaki ngkami te roronrikirake ae kam karaoi!

N ririki aika nako, ngaira ake kaain te kauntira n te Ekaretia ti maroroakina te titiraki: bwa ti na kangaa n taekina te euangkerio n itiakina ae bebete ao taian otenanti ma te namakin ae akea tokina, nakoia natin te Atua ni kabane?

Ngkai ngaira Aika Itiaki, ti a tataneiai n iangoa te “ekaretia” bwa te bwai ae riki n ara tabo n taromauri, man boutokaaki ni baike a karaoaki n te mweenga. Ti kainnanoa te bitaki nakon te katei aio. E a bo tain bwaai ake a boboto n te mweenga ni boutokaaki n te Ekaretia, inanon ara mwaanga, ara uoote, ao n autin nako te titeiki.

Ngkai e reitinako n rababa nako te Ekaretia n te aonaaba, e mwaiti membwa ake a maeka n taabo aika akea te umwantabu iai—ao anne e kona n reitinako inanon te tai ae maan. I uringa te utu ake, ibukin te kangaanga anne, a tangiraki n taromauri ni mweengaia. I titirakina te tina bwa e uara te taromauri n oin mweengana. E kaeka, “E rang tamaroa! Kaain abau e a kabonganai riki taeka aika raoiroi n te mweenga, bwa e ataia bwa e na kakabwaiaa te toa ikai ni katoa Taabati.”

Ana kantaninga te Ekaretia mangkoa ni karokoa ngkai bon te buokia membwa ni kabane ni karikirakea aia onimaki inanon ara Uea Iesu Kristo ao Ana Mwakuri ni Kamaiu, ni buokiia ni karaoan ao kawakinan aia berita ma te Atua, ao ni kakorakorai ao ni kabaeia aia utu. Inanon kamangaongaon te aonaaba ae ti maeka iai, e bon aki bebete. Teuare e buakaka e karikirakea ana buaka iaon te onimaki ao iaora ma ara utu ao e rikirake korakoran ana bubuaka. Bwa ti aonga ni maiu n te aro n tamnei, ti kainnanoi aanga ni kaitarai ana bubuaka ao aanga ake a na buokira n tain te kangaanga. Anne bukina are, ti tangiria ngkai ni karaoa te bitaki nakon te waaki are e na reitinako ni kamatoaiia ara membwa ao aia utu.

N ririki aika bati, Taan kairiri n te Ekaretia a tia ni mwakuri iaon te karikiram ibukin kakorakoraia utu ao aomata n tatabemaniia rinanon reirei ake a boboto n-te mweenga ao ni boutokaki n-te Ekaretia ibukin reiakinan reirei, kakorakoran te onimaki ao ni kaungai aia taromauri aomata. Ara mwakuri inanon ririki aika bwakanako ni katabua te Taabati—ni karaoia bwa te bong ni kakukurei ao ana kanikina te aomata nakon te Atua n ara tangira Ibukina—e na katamaroaaki man bitaki aika ti na kabwarabwarai ngkai.

N te ingabong aei ti na katanoata te booraoi ae boou ao te itoman imarenan reirein te euangkerio n te mweenga ao n te Ekaretia. Ngaira n tatabeman bon tabera karikirakean tamneira. Ao koroboki aika a tabu a kamatataa bwa kaaro iai moan katabeaia n reireiniia natiia.² Bon taben te Ekaretia ni buokia membwa n tatabeman n te kouru ae mimitong are e kateaki ibukin karikirakean ana atatai te aine ke te mwaane n rabakaun te euangkerio.

Unimwaane Quentin L.Cook e na kabwarabwarai ngkai bitaki aika bongana aikai. Ni kabane membwa n te Kauntira n te Moan Beretitentii ao Aia Kooram Abotoro ake Tengaun ma Uoman a reitaki ni kamatoaa te rongorongo aei. Ti kukurei ni kamatoaa te kairi mairoun te Uea are e a tia ni kaira karikirakean taian kainibaire ao karaoakiia are Unimwaane Cook e na taekin.

Tariu ao mwaaneu aika a tangiraki, I ataia bwa E maiu te Atua! Iesu bon te Kristo! Aio Ana Ekaretia, are E kairaki rinanon te taetae ni burabeti ao taian kaotioti nakoia Ana toro aika nanorinano. I kakoaua n aran Iesu Kristo, amen.