Kawenea Aan te Mwakuri ae Korakora

Ngkai karo i Tion, iai katabeara ae kakawaki bwa ti na karina inanoia natira tangiran ao kateimatoaan te kukurei, te oota, ao te koaua n ana euangkerio Iesu Kristo. N ara tai ni karikirakeia natira, ti na moana karaoan kateira inanon mweengara ao ti katea aron te waaki n itoman ao te aroaro inanon reitakira n ara utu. Ni karaoan anne, te katei are ti karaoia e na riai n unika ni kamatoa te anua ae raoiroi are a na aki kona ni kamaingaki inanoia natira ae e na anganiia te korakora ni kaitarai kaangaangan te maiu.

N ririki aika a mwaiti e a tia ara utu ni kukurei n ara katei ae te kaemba ni katoa ririki i taubukin te Maunga ae Uintah i meangin mainukun Utah. Ti mwananga 20 te maire (32 km) iaon te kawai ae bubu man kiriatibu ti roko n te mwanono ae tikiraoi ma ni kiriin aona ma oona aika a ririeta are e biri mai iai te karanga ae e onrake nanona n te ran ae mwaitoro ma n itiaki. Ni katoa ririki te kantaninga bwa e na tei matoa kakawakin te berita ao te reirei n te euangkerio inanoia natira ao tibura, ngai ao Susan ti tuangiia onoman natira mwaane ao aia utu bwa a na katauraoa te reirei ae uarereke iaon te bwai are a taku bwa e bongana n te mwenga ae kateaki iaon Kristo. Ngkana ti bootaki n ara taromauri n utu n te tabo ae e onoti, ao a moana kanakoan aia reirei.

Tamnei

Rongorongo aika a koreaki iaon taian atibu

Te ririki aio, tibura a korei atuun aia reirei iaon atibu ao ngkanne, temanna imwin temanna,a taunii ni karerenai iaontano n tei ibukin te koaua bwa anne are e reke mai iai te maiu ae kakukurei. N raonakin aia reirei ake onoua bon te koaua ae e aki kona ni bitaki bwa Iesu Kristo bon atibun te maninganinga n te kateitei anne.

N ana taeka Itaia, “Ma ngaia ae e kangai ana taeka te Uea ae Iehova, Noria, I kawenea te atibu i Tion bwa aana, ae te atibu ae e a tia ni kataki, ae te atibu ae bouan te maninganinga ae kakawaki, ae te boua ae nene.”¹ Iesu Kristo bon bouan te naninganinga ae kakawaki ae aan Tion. Bon Ngaia are e kaotia nakon te Burabeti Iotebwa Timiti: “Mangaia are, tai kua ni karaoan ae raoiroi, bwa kam kawenea aan te mwakuri ae korakora. Ao man bwaai aika uarereke e kaoti te bwai ae korakora.”²

Reirei aika reiakinaki rinanon te katei ti na moana karaoana ni mweengara, e ngae ngke a uarereke ao a bebete, a rikirake kakawakiia n te aonaaba. Tera bwaai aika uarereke man bebete aron, a na karaoakia, bwa aonga n roko raoi natira ibukin karaon mwakuri aika a korakora ni mauia?

E aki maan n nako ao Beretitenti Russell M. Nelson e taetae nakoia te koraki n taromauri ni kaan ma Toronto, Canada, ao n ringii nanoia ni kauringiia karo n tibwangaia ae kakawaki bwa ti na reireiniia natira. Ibuakon tabera ae kakawaki ake a taekinaki, e katuruturua Beretitenti Nelson tabera ngaira aika karo bwa a na reiakiniia natia bwa a aonga ni mataata bwa bukin tera ti anaa te toa, kakawakin bungiakia inanon te berita, ao katauraoam ibukin karekean te kakabwaia n tamanuea, ao e kaungaia karo bwa a na kaira te wareware iaon koroboki aika tabu ni kabane n aron te utu.³ Man konabwai aikai, ara burabeti aika a tangiraki a kaumakiira bwa ti na karaoa mweengara bwa “te tabo ni katana ara onimaki.”⁴

N Ana Booki Moomon, Enoti e korea ana kakaitau ae nano are e namakinna n ana katooto tamana, are e a tia n “reirei[nna] n aron ana taeka, ao aron naba kawain te Uea.” Ma nanona ae korakora e taekinna Enoti, “Ao e na kakabwaiaki aran te Atua ibukin aio.”⁵

E tiku tangiran kateira ake a uarereke ao ni bebete ake ti aki toki ni kakaraoi ni mweengara inanon 35 te ririki n ara tai ni mare. Angiin kateira a karako mwaitia ma bon iai bukiia. Te katooto:

• N te tairiki koraki ngkana I raroa man mweengau, I ataia n taainako bwa iaan ana kairiiri Susan, n rokon natira te mwaane ae te ikawai ao e onimakinna bwa e na kaira ara kamatebwai n utu ni booki aika tabu ao ara tataro n utu.⁶

• Kateira riki teuana––ti aki kona ni kitana ara auti ke ni katoka ara marooro n te tarebon n aki atonga “I tangiriko.”

• E a tia ni kakabwaiaki maiura man kaokoroan te bong teuana ni katoa tai ni kukurei inanon ara tai ni intawiu ma natira mwaane. N teuana ara intawiu I titirakina natiu te mwaane ibukin nanona ao ana katauraoi nakon ana mition. Imwin ara marooro, ao ti na iango inanon tabeua te tai, ngkanne e a kerake ni kaniiai ao man n taku, “Dad ko uringa ngke I uarereke ao ti aki totoki n intawiu ma ngkoe?” I taku “Eng.” “Ko ataia,” e taku, “I berita nakoim n te tai arei bwa N na nako n te mition, ao ko berita bwa ngkoe ao Mom kam na nako n te mition ngkana kam a kara.” Ngkanne a manga akea te kakarongoa. “Iai ami kaangaanga ae e na tuka aron nakomi ni beku—tao eng tao N na kona ni ibuobuoki?”

N ae teimatoa, ni kabane katein te utu akanne ni ikotaki ma te tataro, warekan koroboki aika tabu, te bootaki n utu n te tairiki, kaean te taromauri, e ngae ngkai a taraa ni uarereke ao ni bebete, karikirakean te katei n aroaro ae tangira, te karinerine, te katiteuanaki, ao te kakawakinaki. N te tamnei are e raoni kekeiaki aikai, a kawakinaki natira man ana kai ni bakarere teuare buakaka are a karinaki ibuakon katein te aonaaba n ara bong.

Ti kauringaki n ana reirei Ereman nakon natina: “Uringnga bwa bon iaon te bwa are ara Tia Kaboomwi, are Kristo, natin te Atua, are kam na riai ni katea iai aami; bwa ngkana te riaboro e kanakoa te ang mairouna ae korakora, eng, ana kanoa ibuakon te ukeuke n anti, eng, ngkana ni kabane te atibu ae bwaka mai karawa ao te angibuaka ae korakora a bwaka iaomi, bon akea korakoraia iaomi ni katiki ngkami nakon marawan te nanokawaki ao te maraia ae aki totoki, ibukin te bwa are ko kateaki iaona, are bon aan te kateitei ni koaua, aan te kateitei are ngkana aomata a kateitei iaona ao aki kona ni bwaka.”⁷

N ririki aika nako, ngke I beku bwa te bitiobi ngai, temanna te unimwaane e tuangai bwa e kan kawarai. E taekina arona ni kitana te Ekaretia ao aron kateia ae tamaroa ana karo ngke te kairake ngaia. E kabwarabwara aron uruakin nanona are e a tia n rinanona ni mauina ngke e ukoukora aron te kukurei ae e teimatoa ma e aki reke, ibuakon te kukurei ae kai toki are e reke n te aonaaba. Ngkai, inanon mauna rimwi, e a rinanon te bebete, n tabetai e aki rau n te namakin n ana wirikiriki Tamnein te Atua are e kairia rikaaki nakon reirei, karaoan bwaai, namakin ao kamanoana n tamnei inanon uarerekena. E kaota ana kakaitau n aia katei ana karo, ao n taeka n taai aikai, e a manga taekina are e taekina Enoti: “E na kakabwaiak aran te Atua ibukin aio.”

Man au taneiai, okin te mwaane aei nakon te euangkerio titebo aroia ma aika mwaiti are e okioki nakoia natin te Atua bwa a bonako n te taina, ao ni manga oki nakon te reirei ao nakon aroia n aia tai n rikirake. N taai akanne, ti kakoaua ana taeka ni wanawana te tia koroboki n taeka n rabakau are e kairoroia karo, “Reireia te tei aroarona ae riai: ao ngkana e a unimwaane ao e bon aki kitanna.”⁸

Angiia karo a kaitara ma taai ni bwaranano ao aekakin rinanin nako aia botumwaka ao te korakora ni karikirakeia natiia. Irarikin anne, ngkana a kamakura aia onimaki karo n reireiniia natiia ni kaokiokia ni kamatoa, n tangira ao ni karaoa aia kabanea ni kona ni buokiia iaon kawaia, e na reke te kantaninga ae korakora bwa te reirei are a reiakinna e na butimwaeaki irouia natiia.

E mataata Mote ma kairan koaua ake a kainnanoaki n te reirei ni katoa tai. E reiakinna, “Ko na reirei’a raoi natim [taeka aikai] n aikai, ma n taekin ngkana ko tekateka i nanon am auti, ao n nakonakom i nanon te kawai, ao ni wenem, ao n teirakem.”⁹

Ti katorobubua irarikiia natira n tain te tataro n utu, ti tabe ibukiia rinanon ara kekeiaki ni karaoa te wareware ni koroboki aika tabu, ti taotaonaki nano, ni beku ma te tangira ibukiia ngkai ti uaia n ibuokanbwai n te bootaki n utu n te tairiki ao ni bubuti ibukiia n tain ara tataro ae e onoti iaon bubuan waera nako karawa. Ao ti rang n tangiria bwa a na butimwaei reirei aika a koaua ake ti a tia n reiakin i nanoia ao n aia iango natira.

I kakoaua bwa e aki kakawaki ae ti na raraoma bwa natira a “mataata ni bwaai“ ni kabane n tain ara reirei, n aron kainnanoia ni wareki koroboki aika tabu ke n karaoa te bootaki n utu n te tairiki, ke ni karaoa kanoan te Beku ibukin te Atua ke ni mwakuria kanoan Kinakiia Ataeinaine ke tabeua ana bootaki te Ekaretia. E aki kakawaki ae ti na raraoma bwa tao n te tai anne a mataata ni kakawakin waaki akanne ma e kakawaki riki bwa ngaira, aika karo ti kamwakura ara onimaki ae tau n iriira ana reirei te Uea ni kekeiaki ni mauna, reirei, kaoia, ao ni kaoti bwaai aika a riai ni karaoaki ake a karekeaki man ana euangkerio Iesu Kristo. Bon te kekeiaki ae karaoaki man ara onimaki––ara koaua bwa n teuana te bong a na butimwaea ao ni mauakina te reirei are ti anganiia man uarerekeia.

Te bwai are ti taekina, te bwai are ti kabwarabwara ao n reirei bwaai tabeua ake e na riki imarenara. Ni karaoan ni kabane ara katei are a na reiakina ana reirei Kristo, Te Tamnei ae e Raoiroi e na kaota koauan ara reirei ao ni karikirakea te reirei are ti a tia n reireiniia natira inanon ara kekeiaki ni kabane inanon nako kawaira. I kakoaua n aran Iesu Kristo, amen.