Aine ao Kamatebwaian te Euangkerio n te Mweenga

Mwaneu ae kam tangiraki, e bon kakukurei te kaaitibo ma ngkami. Aio bon te tai ae kaingainga n Ana Ekaretia Iesu Kristo Ibukiia Aika Itiaki ni Boong Aika Kaitira. Te Uea e bon tibwatibwai atatai n taekan Ana Ekaretia ike Eberita bwa E bon riai.

Kam uringnga bwa tera ae E taku: “Maanra te ran ni buti n tiku n aki itiaki? Tera te mwaaka are katuka karawa? “N ai aron te aomata ae arora baina ae uarereke ni katoka te Karaanga are Missouri ni kawaina ae e baireaki, ke ni bita kawaina, n aron totokoan Teuare Mwaaka n nurakin atatai mai karawa nako aoia Aomata aika Itiaki ni Boong aika Kaitira.”¹

Mwakoron ana tibwatibwa n atatai te Uea ae irekereke nakon kaumakan Ana tibwatibwa nakon naano n ataibwai ao inanon nanoia Ana aomata. E a tia ni kamataata bwa natin Tamara are i Karawa aika aine a na karaoa te tabe ae kakawaki ni kaumaka te kakai anne. Teuana koauan n te kakai bon Ana kairiiri ni kairakiia Ana burabeti n anga korakoran katuruturuan kaetietin te euangkerio inanon mweenga ao irouia utu.

Kam na bae n titiraki, “A na kanga ni karaoia taari aine aika onimaki ni buoka te Uea ni kakorakora kakawaki tibwakin te atatai iaoia Ana Aomata aika Itiaki?” Te Uea e anga te kaeka n “Te Utu: Te Katanoata nakon te Aonaaba.” Kam na uring taian taeka, ma kam na noori nanoia aika boou ao ni kinai bwa te Uea e kaman noori bitakin ingainga aikai. Inanon te katanoata, E anganiia taari aine katabeaia n riki bwa taan reirei inanon te utu inanon taian taeka aikai: “Tiina bon tabeia ae kakawaki n tabeakiniia natiia.”² N ikotaki ma tabeakinan koauan te euangkerio ao atatai.

Te katanoata e reitinako: “Kaaro ao tiina a katabeaki ni buoka temanna ma temanna bwa rao aika ti te arona ngaia.”³ Ngaiia bon rao aika tii te arona, tii te arona aia konabwai ibukin rikiraken te tamnei ao ibukin ukoran te atatai, ao ai ngaia are a na katiteuanaaki ngkana a ibuobuoki ibon irouia. Ngaiia bon tii te arona tokin kawaia ae ai aron te Atua n tabekakirake ni ikotaki. Ni koauana, a aki kona n tabekakirake n akean temanna ma temanna.

Bukin tera, ngkanne, natin te Atua te aine a kabaeaki ao n tii te arona n irekereke ni karekea kakawakin te katabeaki n tobwaa aemoan kakawakin aron te atatai mai i karawa ana riai ni karekea ni kabane, ataakin te koaua mai karawa? Nakon au atatai, I ko na nooria, bwa e a tia te Uea ni karikia taian utu n te aonaaba aei.

Bon Ewa are e karekea te atatai bwa Atam e kainanoa kanakin uaan te aroka ibukin te atatai ibukiia ni kawakin ana tua te Atua ni kabane ao ni karekea aia utu. I aki ataia bwa bukin tera e roko nakon Ewa moa, ma Atam ao Ewa a nakoraoi reitakiia ngke te atatai e anganaki Atam.

Teuana ana katooto te Uea ni kabonganai tabeakinan bwaintangiraia aine bon te kawai are E kakorakoraia natin Ereman mwaane. I karekea te namakin n te nano ngke I wareki karaki ni koroboki aika tabu ao imwina I uringa ana taeka ni kakoaua raoi tinau ngke I kitana mweengau ibukin te beku te tanganibuka.

E taua mwiina Ereman:

“A bon tia n reireinaki irouia tinaia, bwa ngkana aki nanououa, ao e na kamaiuia te Atua.

“Ao a taekin nakoiu aia taeka tinaia, ni kangai:Ti bon aki nanououa bwa a ataa aio tinara.”⁴

Ngke I tuai atai ni kabane nanon te Uea ibukin kakawakin te katabeaki ibukin tobwakin te utu nakoia taari aine aika onimaki, Au koaua e na nakon am konabwai n tangira. E anaa korakoran te tangira n namakina kainanoan temanna riki nakon are iroum. Anne bon ana tangira Kristo ae itiaki ibukin te aomata are ko tabeakinna. Te namakin anne n te tangira ae aki bwaka e bon roko mairoun te aomata ae rineaki bwa te tia tararua ngaia ibukin namakinan Ana Mwakuri ni Kamaiu Iesu Kristo. Ana motinano te Bootaki n Aine, are tinau bon te banna ni katooto, irou e kaunga aron: “Te Tangira ae Aki Bwabwaka.”

N aroia naati aine iroun te Atua, iai iroumi aron ao korakoran te konabwai n namakin ae kainanoaia tabeman ao n tangira. Anne, mwiina, ae e na ko na n anganiko riki te namakin nakon ana wirikiriki te Tamnei. Te Tamnei e kona ngkanne ni kairiko bwa tera ko iangoia, tera ae ko taekinna, ao tera ae ko karaoia nakoia aomata n te aro bwa te Uea e na anganiko te atatai, koaua ao ninikoria nako aoia.

Ngkami taari aine ake kam ongora nakon te reirei aei ngkami ake kamwamwananga n tabo nakorinanon te maiu aei. Tabeman taiankairake n ataeinaine n te tetere n te maungatabu ni kabuta aika atibwa aia moan tai. Tabeman bon kairake n ataeinaine aika katauraoi n riki bwa ana tia tararua te Atua ike e bon tangiriia bwa ana riki iai. Tabeman a tibwa mareaki ake a tuai karikiia natiia, tabeman bon tiina ni kairake ma temanna ke raka riki natiia. Tabeman bon tiina aika tebwi tabun te ririki ao tabeman iai natiia aika a mwakuri ni mitinare. Tabeman iai natiia ake a tia n riki ni mamaara aia onimaki n te euangkerio ao a raroanako man mweengaia. Tabeman a maeka n tii ngaiia ma akea raoiia ae kakaonimaki. Tabeman bon tiibu unaine.

Ma, ngaia are tera am kangaanga ibon iroum, boni ngkoe mwakorona—kakawakin mwakoron—ana utu te Atua ao oin am utu, n taai aika ana roko, n te aonaaba aei, ke n te aba n tamnei. Onimakinam mairoun te Atua bon tabeakinaia n aron mwaitiia Ana ao kaain am utu n aron am konaa ma te tangira ao am onimaki iroun Iesu Kristo.

Am kangaanga ae kinaaki bon ataakina bwa antai ae e na tabeakinaki, ni kanga, ao ni ngai. Ko kainanoa Ana buoka te Uea. E atai nanoia tabeman, ao E ataia bwa ningai are ana tauraoi ni kariaia tabeakinaia. Am tataro n onimaki e na riki bwa e kakawaki ibukim. Ko kona n katine iaon Ana kairi.

E anga te kaunganano aei: “Bubutia te Tama n arau n te onimaki, ni kakoaua bwa ko kona ni karekea, ao ko na karekea te Tamnei ae Raoiroi, are e na kaotii bwaai ni kabane ake a riai.”⁵

N reitaki nakon te tataro, te kamatebwai raoi n koroboki aika tabu e na riki bwa mwakoron mwaakan rikiraken am tararua. Aio bon te berita: “Ma ngaia are kona iango imwain ae kona taekinna; ma kawakinii n am iango n tainako taeka ni kamaiu, ao are kona anganaki ni katoa aoa bwa te mwakoro anne a na bane n reke irouia aomata.”⁶

Ngaia ko tangira riki te tai n tataro, iaongoia, ao iangoraoi iaon bwaai n tamnei. Ko na karekea te koaua n atatai tibwaia nako aom ao karikirakea korakoram n tabeakiniia inanon am utu.

E na iai taai aika ko na namakinna bwa rikirakem ni kamatebwai bwa e na kanga n tamaroa nakon te tararua ae mwaraara. “E na anaa te onimaki n te teimatoa. E anganiko te kaunganano aei:

“Mgaia are, tai kua ni karaoan ae raoiroi, bwa kam kawenea aan te mwakuri ae korakora. Ao man bwaai aika uarereke a na otinako bwa bwaai aika a bubura.

“Nooria, te Uea e kainanoa te nano ao te iango ae tatauraoi, ao naake a tauraoi ao aongeabaa na kana raoiroin aban Tion niboong aika kaitira aikai.”⁷

Rokomi n te tairiki aei bon kakoauaana bwa kam tauraoi ni kariaia ana kakao te Uea nakon te tararua. Are e bon koaua riki ibukiia te rooro ae kairake aika rokon te tairiki aei. Ko kona n ataia bwa antai ae e na tabeakinaki inanon am utu. Ngkana ko tataro ma te nano ae koaua, te ara ke te moamoa e na roko nakon am iango. Ngkana ko tataro ni kan ataia bwa tera ae ko na karaoia ke tera ae ko na taekinna, ko na namakina te kaeka. Ni katoa tai ko ongotaeka, mwaakam n tararua raoi e na rikirake. Ko na riki n tauraoi ibukin te bong ngkana ko kona n tabeakiniia oin natim.

Tiina aika tebwi tabun te ririki a kona n tataro n ataia bwa a na kanga n tabeakiniia natiia te mwaane ke natia te aine ake a taraa n rawa n tabeakinaki. Ko kona n tataro n ataia bwa antai are e na kona ni karekea ana kairi te tamnei are e kainanoia am ataei ao e na kariaia. Te Atua e ongo ao e kaekai tataro te nanorawawata mairouiia tiina aika raoraoma, ao E kanakoa te buoka.

Riki, te tibu te unaine n te tairiki aei e na namakina te maraki n nano ao man te korakai ao kangaangaia natina ao tibuna ataei. Ko riai ni karekeate ninikoria ao kairi man te taneiai mairouia utu inanon koroboki aika tabu.

Man ana tai Ewa ao Atam, rinanon te Karo are Iteraera, ao iaoia ni kabane utu n Ana Boki Moomom, iai teuana te reirei ae koaua: reitinako n tatangira.

Ti karekea te kaunganano n ana katooto te Tia Kamaiu ngke E tobwaa tamneiia natin Tamara i Karawa ake a kakaitara. Riki ngkana ngaiia ao ngaira ti karika te maraki, bain te Tia Kamaiu e bon teimatoa n aroraki.⁸ E taetae iananon te ka 3 Nibwaai nakoia Mwaanena ao Tarina n tamnei, ike E a tia ni kataia mani bwaka n tabeakinaia: “O ngkami aomata … ake kain te bata are Iteraera, ai iraua au tai n bobotii ngkami n aron te moaaine ngkana e botia bunna iaan baina, ao I a tia n tabeakini ngkami.”⁹

Ibukiia taari aine ni katoai mwakoron mwanangaia ni maiuia, inanon aroia utu ni kabane, rinanon katei ni kabane, te Tia Kamaiu bon am tia katooto ae nakoraoi bwa ko na kanga ni karaoa te mwakoro ae kakawaki n Ana katooto ni katuruturua kamatebwaian te euangkerio inanon te mweenga.

Ko na uotii am namakin mai inanom n te tangira ae kororaoi nakon te bitakin ana waaki ni kakukurei te utu ao mwakuriana n te utu. Anne e na uota korakoran rikiraken te tamnei. Ngkana ko tataro ma ao ibukiia kaain am utu, ko na namakina ana tangira te Tia Kamaiu ibukiia. Anne e na riki n raka ao n raka am bwaintangira n tamnei ngkana ko ukoria. Kaain am utu a na bon namakinna ngkana ko tataroia ma korakoran te onimaki.

Ngkana te utu a ikotaki ni wareki koroboki aika tabu ni kabaibati, ko na kaman tia n ataiia ao n tataro ibukina ni katauraoiko. Ko na kunea taai aika kimototo n tataro ibukin te Tamnei ni kaotaa am iango. Ngkanne, e roko am tai ni wareware, kaain am utu a na namakina am tangira ibukin te Atua ao ibukin Ana taeka. A na riki n tabeakinaki Irouna ao iroun Tamneina.

Te tibwatibwa ae tii te arona e na kona n roko inanon te utu n te ikotaki ngkana ko tataro ao ni babaire ibukina. E na bon anaa te korakora ao te tai, ma e na uotii kakai. I uringa te reirei are e reireiai tinau ngke I ataei. I kona n nooria n au iango karanakin te mabe ae kaotaa aronmwamwanangan te Abotoro ae Bauro. I miimi bwa e kanga ni kunea te tai ao korakorana ni karaoa anne. Ni karokoa ngkai I kakabwaiaaki ma ana tangira ibukin te Abotoro ae kakaonimaki aei.

Ko na kunea tatabeua kawai n tibwai nakon karikirakean te atatai n taekan te koaua rinanoiia am utu n ana Ekaretia te Uea e kaokaki. Ngkami n tatabeman kam na tataro, kamatebwai, ao iangoia n ataia bwa tera am tibwatibwa ae e na kona n riki. Ma N atakina aei: n tatabeman ngkami, kam na reitaki te buaka ma natin te Atua, n riki bwa mwakoron te kakai n te euangkerio ao maiuakinna bwa e a aonga ni ikotaki Iteraera ao ni katauraoa ana utu te Atua ibukin mimitongin okin te Uea Iesu Kristo. I a atong baikai n aran Iesu Kristo ae tabu, amen.