Kakoauaa, Tangiria, Karaoa Nanona

Te rongorongo ae kakukurei bwa, iai te kaantaninga. Iai te ibuobuoki nakon te nanokawaki, te akea ni bonga, ao taian Weltschmerz ni maiura. Iai naba te ibuobuoki nakon namakinan te akea ni kaantaninga ao te bwarannano are tao ko namakinna.

Te kaantaninga aei e kuneaki ni mwaakan ana euangkerio Iesu Kristo ae kona ni bita maiura ao inanon mwaakan ana kamaiu te Tia Kamaiu ni buoka katakira n tamneira.

“I roko,” e taekinna Iesu, “bwa e na reke te maiu irouia, ao e na bati n reke irouia.”⁴

Ti karekea te maiu ae bati anne tiaki mani katuruan ara taratara n oin ara kainnano ke n oin ara mwakuri ma man rikira bwa ana reirei Iesu Kristo ni koaua—man touan Ana Kawai ao karaoan Ana mwakuri. Ti kunea te maiu ae bati man aki katuruan ara taratara n oin maiura ao mani karaoan ana mwakuri Kristo.

Ao tera ana mwakuri Kristo? Bon te onimaki Irouna, tangiria aomata n ai Arona, ao karaoi baike E karaoi.

Iesu e “nakonako ni karaoa ae raoiroi.”⁵ E nakonako ibuakoia aika aki kaubwai, aika a teweaki nako, aika a aoraki, ao aika a mama. E buokiia ake akea korakoraia, aika a mamara, ao ake a katinanikuaki. E kabanea ana tai ma ngaiia; E reitaki ma ngaiia. “Ao e katoki aorakia.”⁶

N taabo ake E nako iai, e reirei te Tia Kamaiu te “rongorongo ae tamaroa”⁷ man te euangkerio. E tibwai koaua aika akea tokia aika a kainaomataia aomata n te maiu n tamnei ao n te maiu n rabwata naba.

Naake anga ngaia ibukin karaoan te mwakuri Kristo a kunea koauan ana berita te Tia Kamaiu aei: “Bwa ane e na kabua maiuna i bukiu ao e na boni kawakinna.”⁸

E kairua Toromon, tariu ao mwaneu aika a tangiraki—te maiu aei iai “bongana.” Ma, e kona n onrake n te kaantaninga, te kukurei, ao n te rau.

Bain Iesu Kristo ni kamaiu e tauraoi nakoia ni kabane ake a Ukoukoria. I ataia n akea au nanokokoraki bwa kakoauaan ao tangiran te Atua ao te nanomwaaka ni iriiria e kona ni bitii nanora,⁹ ni kabebetea marakira, ao ni kaona tamneira ma te “kimwareirei ae moan te bati.”¹⁰

Ao eang, ti riai ni karaoa ae raka riki nakon are ti karekean te ataibwai n te euangkerio bwa e aonga n reke te aeka ni ibuobuoki aei inanon maiura. Ti riai ni karikia bwa mwakoron maiura—ni karikia bwa mwakoron kateira ma anuara.

I kan mwaneweia bwa te riki bwa ana reirei Iesu e moanaki man taeka aika teniua:

Kakoauaa, tangiria, ao karaoa nanona.

Kakouaan te Atua e kairiira bwa ti na Onimakinna mani karikirakea onimakinan Ana taeka. Te onimaki e karikirakea ara tangira ibukin te Atua ao tabeman. N rikiraken te tangira anne, a unga nanora bwa ti na katotoonga te Tia Kamaiu ngkai ti reitinako n oin mwanangara ni kawain te riki bwa ana reirei Iesu.

“Ma,” ko taku, “ko kauarerekea te bwai ae rang bubura. Kangaangan te maiu,au kangaanga, a bon rang mamatoa bwa a na buokaki n te aekaki ni ibuobuoki ae rang bebete. Ko aki kona ni bwainnaorakiia teWeltschmerz n taeka aika teniua aika: Kakoauaa,tangiria, karaoa nanona.”

Bwa tiaki taeka akanne aika a bwainnaoraki. Ma ana tangira te Atua ae e kamaiura man te bure, e kaokiira nakon te raoiroi, ao e kamaiura man te mate n tamnei .

E kinako te Atua. Ngkoe bon Natina. E Tangiriko.

E tangiriko e ngae ngke ko taku bwa ko aki tangiraki, E rang kan buokiko.

N te bong aei—ni katoa bong—E kataia ni buokiko, man tangiria ni kamarurungko, n tabekiko rake, ao n onea mwiin te nanokaawaki ane inanom nakon te kukurei ae reitinako. E tangiria ni kanakoa te rootongitongi ane ni maium are karooa maium ao ni kaonna n otan mimitongina ae akea tokina ae tabu man otamwaaka.

I a tia ni kakoauaa aei i bon irou.

Ao bon au koaua ngkai ngai ana Abotoro te Uea ae Iesu Kristo bwa ni kabane ake a nakon te Atua—ni kabane ake a bon kakoauaa, tangiria, ao a karaoa nanona—a na kona naba ni kakoauaa aei.

Koroboki aika tabu a reireiniira bwa “ngkana akea te onimaki ao e aki kona te aomata ni kakukureia [te Atua]: bwa ane nakon te Atua ao e na kakoauaa bwa boni iai.”¹¹

Ibukia tabeman, e kangaanga te kan kakoaua. N tabetai e totokoira Ara kanikatonga man te kani kakoaua. Tao iroura ibukina bwa ti wanawana, ti reirei, ke tao e mwaiti ae ti a tia n rinanona, ti aki naba kakoauaa te Atua. Ao ti a moanna n taraa te aro bwa te katei ae burababa.¹²

N au atatai, te koaua kanga tiaki te korobanna are ti tataraia mani mataiakinna ao are ti marooroakinna ma tiaki raoi ibukira. Ma kanga titebo riki ma bwain kamarauan te tano are ti uotia nakon te onaroka ao, mani maonon moara, ti karaoi beera iaon tano ake a na kabwebwerakei taian ati mani kariki uaa.¹³

Kaniko ma te Atua, ao E na Kaniko.¹⁴ Aio te berita nakoia ni kabane ake a kan kakoauaa.

E kaotaki ni koroboki aika tabu bwa ngkana e rikirake kaotan ara tangira, e rikirake naba kukureira.¹⁵ Te tangira ae taekinna Iesu ikai, kanga tiaki, aron te bwaintangira are ti kabongana n oin nanora, ke te aekaki n tangira ae ti kona ni mwanuokinna ke te aekaki n tangira are tiaki katurua ara iango iaona. Bon tiaki te tangira are e taekinaki ao e a manga manuokinaki. Tiaki te aekaki n tangira are “tuangai ngkana iai te bwai ae I kona ni karaoia”.

Te tangira ae taekinna te Atua ikai bon te aekaki n tangira ae e mena inanora ngkana ti uti n te ingabong, e raonira inanon te ngaina anne, ao e kaonrakea nanora n ara tai n tataro n te tairiki anne.

Aio te tangira ae e aki kona ni kabwarabwaraki are iai iroun Tamara ibukira.

Bon te nanoanga ae akea tokina are e anganira te kona n taraia raoi tabeman bwa antai ngaiia. Ngkana iai iroura te tangira ae itiaki—ti nooria aomata aika aki mamate aika iai aia konabwai ao naati mwaane ao naati aine aika tangiraki iroun te Atua are moan te mwaaka.

N te ai are ti taraia aomata n te aro anne, tiaki manga kataorikakiia, katinanikuia, ke ni uotarikakiia tabeman.

N ana mwakuri te Tia Kamaiu, n angiin te tai “mani bwaai aika a uarereke ake [a] riki iai bwaai aika a korakora.”¹⁶

Ti ataia bwa e kainnanoa te kataneiai ae mwaiti te riki ni mwaatai n te bwai teuana. N aron katangan te bwai ni katangitang ae te kirarineti, karinan te booro nako nanon te kouru, karaoan te ka, ke kakibaan te waanikiba, bon rinanon te kataneiai are e rikirake iai ara mwaatai.¹⁷

Te rabwata are e kateia ara Tia Kamaiu i aonteaba—Ana Ekaretia Iesu Kristo ibukiia Aika Itiaki ni Boong aika Kaitira—e na buokira ni karekea te rikirake. E katauraoa te tabo ni kataneiai maiuakinan kawai ake E reirei ao kakabwaiaia tabeman n ai Arona.

Ngkai ngaira kaain te Ekaretia, ti anganaki mwiokoara, tabera ao ara tai bwa ti na reitaki ma ngaiia n te tangira ao te ibubuoki nakoia.

E a tibwa tia, te Ekaretia ni kakorakoraa riki te mwakuri ni ibuobuoki ke te beku ibukia ke tangiraia tabemwang. E mwaiti te marooro ae karaoaki bwa tera are ti na arana iai te kakorakora ae onoti aei.

Teuana te ara ae iangoaki bon te kawakin tiibu, te iango ae tamaroa ni kaineti ma ana kakao Kristo are: “Kakaamwarakeia au tibu.”¹⁸ Ma, iai teuana kabwakana: bwa kabonganaan te taeka anne e na karikai bwa te kamea ae bubura ae te German shepherd. Ngaia are, e tamaroa irou te taeka ae mwakuri ni ibuobuoki.

Ao eang, e aki boou te iango aei. E katauraoa te tai ae boou man tamaroa riki bwa ti na maiuakina ana tua te Tia Kamaiu are ti na “itangitangiri imarenara”¹⁹ te kawai ae tamaroa ibukin katuruan ao te kataneiai ana kaantaninga te Ekaretia.

Iangoa te mwakuri ni mitinare; te ninikoria, te nanorinano, ao te aki nanokokoraki n tibwauan te euangkerio bon te katooto ae tamaroa n te ibuobuoki nakon aia kainnano tabeman n te tamnei, aomata nako.

Ke karaoan te mwakuri n te tembora—kakaean araia ara bakatibu ao anganakia ana kakabwaia te maiu ae akea tokina. Aio bon te kawai mai ieta ibukin karaoan te mwakuri ni ibuobuoki.

Iangoa ukeraia aika a aki kaubwai ao aika a kainnano, ni kakorakorai baai aika tinetine, ke kakabwaiaaia aika a aoraki ao aika a rootaki n te kainnano. Tiaki aikai ana katoto te mwakuri ni ibuobuoki ae koaua are e karaoi te Uea ngke E maiu n te aonaaba?

Ngkana tiaki ngkoe kaain te Ekaretia, I kaoko bwa ko na “nakomai man raoniira.”²⁰ Nakomai ao raoniira. Ngkana ngkoe kaain te Ekaretia ma ko aki kakaonimaki, I kaoko, taiaoka oki rikaaki. Ti kainnanoiko!

Mai, ikota korakoram ma korakorara.

Man am tarena aika a onoti, am konabwai, ao kateim, ko na buokira bwa ti na tamaroa riki ao ni kukurei riki. Ngkana ko karaoa aei, ti na buokiko bwa ko na tamaroa riki mani kukurei naba.

Mai, buokira ni katea ao ni kakorakoraa te aro ni katoki aoraki, te akoi, ao te nanoanga nakoia natin te Atua ni kabane. Bwa ti bane ni kataia n riki bwa aomata aika a boou n te aro are “a bane tain bwaai ake ngkoa” ao “bwaai ni kabane … a boou.”²¹ Te Atua e kaota nakoira te kawai bwa ti na—katamaroaira ma ni katotoongnga. E taku, “Ngkana kam tangirai, tou mwiin au tua.”²² Ti a uaia ni kekeiaki n riki bwa aomata are e kantaningaia te Atua ibukira.

Aio katein te euangkerio ae ti tangiria ni karikirakea ni kabutaa ana Ekaretia Iesu Kristo. Ti ukoukora kakorakorakin te Ekaretia bwa te tabo are ti na kona iai n uaia ni kabwarabure imarenara. Te tabo are ti totokoa iai te kariiri ni kakaai buure, ni winnanti, ao ni kataorikakiia tabeman. Te tabo are, n onea mwin tataekinan taian kabwaka, ti tabekira mani buokira imarenara ni katamaroaira nakon are ti konaa.

N na manga kaoko riki kaua. Nakomai ao Nooria. Raoniira. Ti kainnanoi ngkami.

Ko na kunea bwa e onrake te Ekaretia aei irouia tabeman aomata aika a rianako tamaroaia aika a kuneaki n te aonaaba aei. A rang bubutimwaei, a tangira, a akoi, ao aki baretaio. A mwakuri korakora, a tauraoi n anga ngaiia, ao a ninikoria naba.

A bon aki naba kororaoi.

Iai naba aia kairua.

N taai tabetai a taekini baika a riai n aki. Iai baika a karaoi ake a uringaaba iai.

Ma iai te bwai ae a titebo iai—a tangiria ni katamaroaia ao ni kaania te Uea, are ara Tia Kamaiu, Iesu Kristo.

A kataia ni karaoi bwaai n angaia.

A kakoauaa. A tangiria. A karaoa nanona.

A kan riki bwa aomata aika a aki tiorobeke, a ibuobuoki riki, a itiaki riki, kanga n ai aron Iesu.

Eang, e kona ni matoatoa te maiu aei n taai tabetai. Akea te nanokokoraki bwa iai nako taai ake ti namakina iai akean te kaantaninga ao te bwarannano.

Ma e anganira te kaantaninga ana euangkerio Iesu Kristo. Ao, n ana Ekaretia Iesu Kristo, ti katiteuanaaki ma tabeman ake a ukora te tabo are ti na namakina te mweengaraoi—te tabo are ti na uaia n rikirake iai are, ti na kona iai ni kakoauaa, n tangiria, ao ni karaoa nanona.

E ngae ngke iai kakaokorora—ti ataia bwa ngaira bon naati mwaane ao naati aine iroun te Atua ae tangiraki.

E rianako au karabwarabwa ngkai ngai kaain ana Ekaretia Iesu Kristo ao n ataia bwa te Atua e rang tangiria Natina n anganakia te kawai nakon te kukurei ao oin raoi te maiu aei ao te kawai ni karekea te kukurei ae akea tokina n te tabo ae mimitong n te maiu ae na roko.

I karabwarabwa bwa te Atua e a tia n anga te kawai ni kamaoi aorakin te tamnei ao taian Weltschmerz inanon maiura.

I kakoauaa ao i katuka au kakabwaia iaomi bwa ngkana ti kakoauaa te Atua, ngkai tiTangiria ao tiTangiriia Natina ma nanora ni kabane, ao ti kataia ni Karaoa are e tua nakoira te Atua, ti na bon karekea te kamaoaki ao te rau, te kukurei ao te kaantaninga. I a atong baikai n aran Iesu Kristo ae tabu, amen.