Kataia, Kataia, Kataia

Mauri tariu ao mwaaneu, I rang kakaitau ibukin te tibwanga bwa n a taetae ma ngkami. Te maungatabu aei e a tia ni kakorakoraai ao n reiakinai. Te anene ao taeka ake a tia n taekinaki a tia n uotaki nako nanora iroun te Tamnei ae Raoiroi. I tataro bwa teraa are I taekinna ko na namakina man te tamnei naba anne.

Inanon ririki aika bwakanako, I riki bwa te moan kauntira nakon te beretitenti n te mwakoro ni iteran Amerika Meang. N te taina, inanon butira ni kaei ara mwanga aika a uarereke, e taku nakoiu, “Hal, ngkana ko kaitibo ma temanna, karaoiia n ai aron ae ti tebo ma a mena inanon te kaangaanga ae kakaiaki, ao n angiin te tai ko na bon eti.” E aki n ae eti, ma I reiakinna inanon ririki aika bati bwa e bon rang karinanoa n aron ana katautau. N te bong aei I tangiria ni kakorakorai ngkami n te kangaanga are kam kaitarai.

Ni maiura aio e a tia ni karikia te Atua ae e tangira bwa te tabo ni kakatai ao n rikirake ibukira ni kabane. Ko uringa ana taeka te Uea ibukiia natina n tain Karikan te aonaaba: “Ao ti na kataiia ma ngkai, n nooria ngkana a na karaoi bwaai ni kabane are e na tuangiia te Uea ae Atuaia.”¹

Mai moana, ao e bon aki bebete te kakatai. Ti kaitarai kariiri ake a roko bwa man karekean rabwatara aei. Ngaira ni kabane ti maeka n te aonaaba ae e a rikirake ni korakora buakanan te koaua ao oin kukureira iroun Tatan. Te aonaaba ao maium kanga n taraakina iroum e a rikirake n tei mangaona.

Aio karauan nanom: te Atua ae tangira are e kariaia kakatai aikai bwa ana reke iroum e katauraoa naba te kawai bwa ko na tokanikai iaoia. Tamara are i Karawa e tangirira ngaia are E kanakoa Ana Riki Temana bwa e na buokiira.² Natina Iesu Kristo E anga Maiuna ibukira. Iesu Kristo e katokai iaona ara bure ni kabane i Keketemwane ao i aon te kai. E rinanon te korakai, te maraki ao korakoran ara bure n te aro are E na konaa ni karau nanora ao ni kakorakoraira n tain taina kataki nako ni maiura.³

Ko uringa are e taku te Uea nakoia Ana toro:

“Ao te Tama ao Ngai bon tii teuana. I mena iroun te Tama, ao te Tama irou; ao ngkana kam a tia ni butimwaeai, kam mena irou ao Ngai iroumi.

“Mangaia are, I mena i buakomi, ao boni Ngai te tia kawakin tiibu ae raoiroi, ao ana atibu Iteraera. Ane e kateitei i aon te bwaa aei e na bon aki bwaka.”⁴

Ara burabeti Beretitenti Russell M. Nelson, e a tia naba n anga te karaunano ae aekan anne. Irarikin anne, e kabwarabwara te kawai bwa ti aonga ni kateitei iaon te bwaa ao ni katuka aran te Uea i nanora bwa kairara rinanon katakira.

E taku: N te taina ao e na roko te bwara n nanon, uringa, e aki nanonaki bwa e na bebete te maiu aei. Ana kaitaraki taina kakatai ao rawawata ana kabebeteaki inanon taia. Ngkana ko uringa ae ‘bon akea te bwai teuana ae kanganga iroun te Atua’ (Ruka 1:37), ataia ae bon Tamam. Bon ngkoe natina te mwaane ao te aine ae ko karikaki ni Katotongana, ko katauaki rinanon kororaoim ni karekea te kaotioti bwa buokam inanon am waaki aika raraoi. Ko na konaa ni katoka arana ae tabu iaom. Ko na konaa n taetae ma te onimakinaki n aran te Atua ae tabu (taraa R&B 1:20).”⁵

Ana taeka Beretitenti Nelson e kauringira te berita are e kuneaki n tataron te toa, te berita are e kakoroa nanona Tamara are i Karawa ngkana ti karaoa nanon are ti a tia ni berita iai.

Ongora nakon taekana: “O Te Atua, te Tama ae Akea Tokina, ti butiko n aran natim, Iesu Kristo, bwa ko na kakabwaia ma ni katabua te kariki aei nako nanon tamneia ake ana bane ni kanna; bwa a na kanna ni kauringa iai rabwatan natim, ma ni kakoaua nakoim, O te Atua, te Tama ae Akea Tokina, bwa a boni kukurei ni katoka iaoia aran natim, ma n aki toki n ururingnga, man ni kaawakin ana tua nako ake e a tia n anganiia, bwa e aonga ni memena Tamneina irouia n taai nako. Amen.”⁶

Ni katoa tai are ti taekina te taeka amen n tain te tataro are e taekinaki ibukira, ti berita ma nanora bwa n tauakin te kariki ti kukurei ni katoka i aora aran Iesu Kristo ae tabu, n aki toki n ururinga, ao ni kawakin Ana tua. Ao ngkana ti karaoi baikai E berita nakoira bwa e na memena Tamneina iroura n taainako. Ibukin berita aikai, e riki te Tia Kamaiu bwa te bwaa are ti konaa n tei ni kamanoaki iaona ao n aki maaku n tain taian kakatai.

N au tai ni iangoa nanon te taeka ni berita ake a irianaki ma kakabwaia aika a beritanaki I a tia ni iangoia bwa teraa nanon ae ti na kukurei ni katoka aran Iesu Kristo iaora.

E kabwarabwaraa Beretitenti Dallin H. Oaks: “E rang ni kakawaki bwa ngkana ti anaa te toa ti bon aki kakoaua bwa ti katoka iaora aran Iesu Kristo. Ti kakoaua bwa ti tauraoi ni karaoia. (Taraa R&B 20:77) N taekinana ae ti bon kakoaua ibukin kukureira e kaotia bwa iai te bwai teuana ae e na riai ni karaoaki imwain ae ti nang bon katoka raoi te ara ae tabu anne iaora n te aro ae e rang kakawaki.”⁷

Te kibu n taeka ae ti “kukurei ni katoka [iaora]” Arana e tuangiira bwa ni moan katokaan Arana iaora ngke ti babetitoaki, katokakin Arana e bon aki toki n te babetito. Ti na riai ni mwakuri n reitanako katokaan Arana inanon maiura, ni ikotaki ma kabouan ara berita n tain te toa ao ni karaoi berita inanon ana tabo ae tabu te Uea ae te tembora.

Ngkane uoua titiraki aika moan te kakawaki ibukira bwa “Teraa ae n a riai ni karaoia ni katoka Arana iaou?” ao “N a kangaa n ataia ae e a reke te rikirake?”

Ana taeka Beretitenti Nelson e kaota te kaeka ae moan te ibuobuoki. E taku bwa ti konaa ni katoka aran te tia Kamaiu iaora ao ti konaa n taetae Ibukina. Ngkana ti taetae Ibukina, ti bon beku Ibukina. “Bwa e na kangaa te aomata ni kinaa te toka are e tuai ma ni beku irouna, ae te iruwa nakoina, ao e raroa nako man ana iango ma ana kaantaninga?”⁸

Te taetae Ibukina e kainanoa te tataro n onimaki. E tangira te nano maraki n tataro nakon Tamara are i Karawa n reiakina bwa teraa taeka ae ti na taekin ni buoka Ana mwakuri te tia Kamaiu. Ti riai n tauraoi nakon te kakabwaia: “Tao man oin bwanaau ke man bwanaaia au toro, bon ti te arona.”⁹

Ma ngaia ae e riaon riki ae tii te taetae Ibukina ni katoka Arana iaora. Iai taian namakin inanora ae e riai n reke iroura bwa ti aonga n tau bwa Ana toro.

E kabwarabwara te burabeti Moomon te namakin are ti na tau iai ao n anganira te konaa ni katoka Arana iaora. Namakin aikai ni ikotaki ma te onimaki, te kantaninga, ao te tangira ae kororaoi, are bon ana tangira ae itiaki Kristo.

E kabwarabwaraa Moomon:

“Bwa I motikia bwa iai onimakinan Kristo iroumi ibukin ami nimamannei; bwa ngke arona bwa akea onimakinana ao ngkanne kam aki tau ni warekaki ibuakoia aomatan ana ekaretia.

“Ao riki, tariu aika kam tangiraki, N na taetae nakoimi ni kaineti ma te kantaninga. Kam kangaa ni kona ni karekea te onimaki, ma ti ngkana iai te kantaninga iroumi?

“Ao teraa are kam na kantaningaia? Nooria, I taku nakoimi bwa kam na karekea te kantaninga rinanon ana mwakuri ni kamaiu Kristo ao mwaakan mangautina, bwa kam na kateirakeaki nakon te maiu are akea tokina, ao aio ibukin ami onimaki irouna n aron te berita.

“Ngaia are, ngkana iai ana onimaki te aomata e na riai n iai te kantaninga irouna; bwa ngkana akea te onimaki ao bon akea te kantaninga irouna.

“Ao riki, nooria, I taku nakoim bwa e bon aki kona n reke te onimaki irouna ma te kantaninga, ma ti ngkana e nimamannei, ma n nanorinano inanona.

“Ao ngkana ngaia ao, ana onimaki ma ana kantaninga e bon matebuaka, bwa akea ma ibuakoia ae butimwaeaki iroun te Atua, ma ti ngkana e nimamannei ma n nanorinano nanona, ao e taekinna ni mwaakan te Tamnei are e Raoiroi bwa Iesu bon te Kristo, ao e na riai n iai irouna te tangira ae kororaoi; bwa ngkana akea te tangira ae kororaoi irouna ao bon te akea ngaia; ngaia are e riai n iai te tangira ae kororaoi irouna.”

Imwin kabwarabwaran te tangira ae kororaoi, e reitianako man taku Moomon:

“Ma te tangira ae kororaoi bon ana tangira Kristo ae itiaki, ao e teimatoa n uaa te toki; ao ane e kuneaki irouna n te kabane ni bong, ao e na bon nakoraoi ibukina.

“Ngaia are, tariu aika kam tangiraki irou, tataro nakon te Tama ma korakoran nanomi ni kabane, bwa kam na kaonaki n te tangira aio, are e a tia ni katoka iaoia ni kabane ake taan irira Natina, are Iesu Kristo ni koaua; bwa kam aonga n riki bwa natin te Atua; bwa ngkana e kaoti ao ti na riki n arona, bwa ti na nooria n arona ngkai; bwa tia aonga ni karekea te kantaninga aio; bwa ti aonga ni kaitiakaki n arona ae e itiaki. Amen.”¹⁰

Au koaua bwa te Tia Kamaiu e katuka Arana i namomi. A mwaiti mai buakomi, ae ami onimaki Irouna e a rikirake. Ko a namakina riki te kukurei ao n ataia ae ana nakoraoi bwai nako. Ao koa namakina ana tangira Kristo ae e itiaki ibukiia tabeman ao ibukim.

I noria irouia mitinare ake a beku ni kabuta te aonaaba. I nooria irouiia membwa n te aro a marooro ma raraoia ao kain aia utu ibukin Ana Ekaretia Iesu Kristo ibukia Aika Itiaki ni Boong aika Kaitira. Mwaane, aine, kairake, ao bon ataei a ibuobuoki ibukin tangiran te tia Kamaiu ao kain rarikiia.

Ni moan reken te ribooti n te kabuanibwai ni kabuta te aonaaba, a karaoi aia babaire membwa bwa ana nako ni ibuobuoki, tabetai nakon aba tabeua n akea tuangakiia. N tabetai a kunea bwa e kangaanga te tataninga irouiia ni karokoa ae e tauraoi te tabo are e rootaki bwa ana kawaria.

I ataia ae tabeman mai buakomi are kam ongora n te bong aio ana namakina bwa ami onimaki ao kantaninga a rotaki man ami kanganga. Ao ko a kainanoa namakinan ae ko tangiraki.

Tariu ao maneu, te Uea iai ana konaa irouia ake irarikim n namakina ao n tibwaua Ana tangira. Ko konaa n tataro ma te onimaki bwa te Uea e na kairiko bwa ko na tangira temana Ibukina. E kaekai tataro mai iroun temana ae nano rinano n ai arom. Ko na namakin ana tangira te Uea ibukim ao ibukin temana are ko buokia Ibukina. Ngke kam buokiia natin te Atua n aia kangaanga, ko na namakina am kanganga a na taraa ni bebete. Am onimaki ao am kantaninga ana kakorakoraki.

I a bon tia n noora koauan te aeka ni koaua anne. Inanon maiuna, e a tia kainabau n taetae ibukin te Uea ao ni beku ibukiia tabeman Ibukina. N aron ae I taekinna mai imwaaina, temanna ara bitiobi e taku nakoiu n tetaina: “I rangin miimi. Ni katoa tai ae I ongo bwa iai temana n te uoote ae e reke n te kanganga, I kabaitiai bwa na buokia. Ma inanon te tai are I roko, e taraa n ae e a kaman roko kainabam ikekei.” E bon koaua anne bwa e riki n tabo ni kabane are tia tia ni maeka iai inanon 56 te ririki.

Ngkai e a tii kona n taekini tabeua taeka n te bongina. E kakawaraki irouia aomata ake e tangiriia ibukin te Uea. Ni katoa tairiki ao moaningabong I anenei kuna n taromauri ma ngaia ao ti tataro. I riki bwa bwanaara inanon te tataro ao inanon te anene. N tabetai ao I noora wiina ni kakamwakuri n taekinii taekan te anene n taromauri. E tangirii riki aia anene ataei. Te namakin ae rinanona e kabwarabwaraki raoi n te anene “I’m Trying to Be like Jesus.”¹¹

Tebongina n nako, imwin aneneakin taekan te korati n “Love one another as Jesus loves you. Try to show kindness in all that you do,” e taku n te bwanaa ae e bebete, ma ni matata,“Kataia, kataia, kataia.” I taku bwa e na kunea, ngkana e kaitibo ma Ngaia, bwa te Tia Kamaiu e a tia ni katuka arana inanona ao e a tia n riki ngaia n ai Arona. E uouotia inanon ana tai n rawawata ngkai, n aron ae e na uouotiko inanon am tai n rawawata.

I kaota au kakoaua bwa e kinako te Tia Kamaiu ao e tangiriko. E ata aram n aron ae ko ata Arana. E atai rawawatam. E a tia ni karekea te taneiai ma ngaiia. Rinanon Ana Mwakuri ni Kamaiu, E a tia n tokanikai iaon te aonaaba. Bwa man kukureim ni katokaa Arana iaom, ko na kabebetei rawawataia aomata aika mwaiti. Ao ko na kunea inanon te tai bwa ko bon kinaa raoi te Tia Kamaiu ao ko bon rang tangiria. E na rin arana inanom ao e na tiku n am iango. Bon te ara are ko na bon weteaki iai. I kakoauaa, ma te nanon ni kakaitau ibukin Ana tangira nakoiu, nakoia au utu, ao nakoimi, n aran Iesu Kristo, amen.