Olisechakl er a Ebangkelio er a Budech

Kemiu el rodam me a rodos er ngak, ak mengemedaol er kemiu el mei er a klou longdibel! Ak mla olsingch el kirel chelecha el sils loba klemeriar reng. Ak meluluuch el kiriu er a bek el sils. Ak dirrek el mla meluluuch me tial klou longdibel bo el taem er a omelisiich er a chedaol tekoi el mo er a derta me a derta er kemiu.

Me tial mlomerek el klou longdibel, e a ringel er a beluulechad a di melemolem. Tial lomekodall el secher er a beluulechad el rokir a dirk melemolem el melemall a klengar kid. E chelechang e a beluulechad a mla motilech er a uldikel el omcheracheb er a re million el sechal, redil, me a rengalek el dimlak a ngera le tilemall.

A reprofet a milsa tial sils er kid, el morngii a mekemad me a chisel a mekemad e a beluulechad el rokir a soiseb er a uldikel.¹ Me kid el oltirakl er a Jesus Kristo, a olengit er a remengeteklel a beluu me bo loba budech e losiik a semecheklel aikel kuk klekakerous er tir. A ki omekedong er a rokui el chad er ker me a ker el mo meluluuch el kirir tirkel lousbech a ngesou, e mora ikel sebecherir lolengeseu er a re metacher beserir, e mo melai a ngesou er a Rubak el mo merrob a ngiidi el meklou el klautok.

Rodam me a rodos, a ebangkelio er a Jesus Kristo a kot el ulsbechall er chelechal sils. A uldikel a tomall a rokui el tekoi el Osobel a ullab e ulsisechakl. Ng betik a renguk er a Rubak el Jesus Kristo e ouchais el kmo a ebangkelio er Ngii a di chimongel nger el kirel a budech. A ebangkelio er Ngii a klumech er a budech.²

A ebangkelio er Ngii adi tal nger sel sekum a rebetok el chad er a beluulechad a mui er a dakt.³ Tiaikid otutii sel klou a ultutelel tekingel Osobel el mo er a roltirakl er Ngii el kmo “bo … er a rokui el beluu, e molisechakl er a ebangkelio el mo er abek el chad.”⁴ Kid oba chedaol ngerachel el mo omerk er a klisichel me a budech er a Jesus Kristo el mo er tirkel rokui el mo orrenges e kongei me a Dios a mo mesisiich er a klengar tir.

A bek le chad el mla soiseb er a telbiil lobengkel a Dios a mla yaksok el mo omekerreu er a rebebil e mesiou er a re ngesool. Ng sebeched lochotii a klaumera er kid er a Dios e mo kldmokl longer tirkel mo oker el kirel “a urunguled el [ngar kid].”⁵ A dersta er kid a ngarngii a ngerchelel kirel omengideb er a Israel.

Chelecha el sils e ak lmuut el smisichii sel tekingel a Rubak el kmo a bek el klikiid, el ngeasek el sechal a mo kldmokl el mo er a mision. Kemiu a Ruriul-klebesei el Santo el ngeasek el sechal, a urerel a klemisionari a ngerachel er a priesthood. Kemiu a rengeasek el sechal a mla mekedmokl el kirel chelechal taem el sils er a omengideb er a Israel. Me sel bo er a mision, e kemiu a klou a ngercheliu er a chelsel tial klou el ureor!

Kemiu a rengeasek e sebechiu el odos, a mo er a mision a dirrek el kmal ungil, eng di kemiu, el melilt er a techall. Ng betik a rengmam er a rodos el misionari e kmal mui el mengemedaol tir. Aike el mruul el kirel tial ureor a kmal mengasireng! Moluluuch el mo medengei el kmo a Rubak ng kongei el bo er a mision, e a Chedaol Reng a mo onger er a rengmiu me a uldesuiu.

Kemiu a rengeasek el sechelei, a dersta er kemiu a meklou a belkmiu er a Rubak. Ngii a mla mengeluolu er kemiu el kirel chelecha el taem el mo olngeseu el mengideb er a Israel. A uldesuem el mo er a mision, a morael lomais a lechub e kedi mesiou, a mo omekngeltengat er kau me a lmuut el betok el chad. Aki dirrek el kmal mengemedaol er a robekel e mo er a mision a lsekum eng sebechir. A blakerreng er tir a diak a mo mtechir.

A rokui el misionari a olisechakl e ouchais el kirel a Osobel. A iilkolk er a reng el ngara beluulechad a rulii a llomes er a Jesus Kristo el kmal lemuut el mo usbechall. A rebek el chad a kirel ngarngii a techellir el mo medengelii a mla moluut el ebangkelio er a Jesus Kristo. A rebek el chad a kirel ngarngii a techellir el mo medengei el kmo te metik er a budech er ker le“[ngelakl] er a rokui el klemedengei.”⁶

A kuureng me tial klou longdibel bo el taem er a budech me a mui el chedaol tekoi el mo er kemiu. Bo mosiik e mngai a chedaol ocholt er a chelsel aika el ongdibel, a ngii a nglunguchek el ngara chedaol ngklel a Jesus Kristo, amen.