Mo Omekungil er a Beluulechad

Rodam me a rodos, ngar tial klebokel temel a Baskua, e kede ngeltengat el mo ngmai a olisechakl me a ulekrael el ngara remesiungel a Dios.

A chedaol ulekrael me a osischeklel a Demad er a Babeluades a ngosukid el mo omekrael a klengar er kid er a chelsel tial meringel el taem. El uaise el mlulaoch, “seseb, me a eolt,” mekemad,chisel a mekemad, me a desiu er a kakerous el beluu,” “me a betok el teletelel a mekngit,”¹ “rakt,”² “bosech, me a omekodall el rakt ”³ a melemall er a telungalek, buai, me a beluu.

Ngarngii a tara omelemall el meruul el meliuekl er a beluulechad: ng melemall er kemiu me a ngak el kirel a mimokl el klechelid. Tia mocha klou el tekoi a osiik el mo mengeroid er a klechelid me a klaumerang el ngara Dios er a basio er a buai, skuul, teletelel a buai, me a tekoi el buai. A romtok er a mimokl el klechelid a osiik el meruul a llach el kirel a olechotel a ikel doumerang. Te dirrek el melenguul a uldelid el teletelel a klaumerang.

Aikakid el teletael a rulterir a rechad el uai a lak a belkrir, diak a belkul a osisecheklir, osisiu, omengull, tekoi er a chedaol, me a budech er a uldasu.

Ngera a mimokl el klechelid?

Ng mimokl el mo mengull a rokui el teletelel: mimokl el mo kldibel, mimokl el mo mengedecheduch, mimokl el mo meruul a ikel chad a oumerang, e mimokl el rebebil a mo meruul a osisiu. Mimokl el klechelid a mecherei a dersta er kid el mo melilt el kirel a ikel doumerang, teletelel a klengar er kid e meruul lokiu a klaumerang er kid, me a ikel Dios a mengerchir er kid.

A omeruul el mo mengeroid a mimokl el klechelid a diak el beches el teletael. Chelsel a reksi, ea rechad er a klaumerang a mlora klou el ringel el uchul a teletelir a rebebil. A rechedal a Ikelesia er a Jesus Kristo er a Uriul-klebesei el Santo a di osisiu.

A ucheled, e tirkel betok el ulsiik er a Dios a mlei er tial Ikeleisa eleng osisecheklel er a chedaol olisechakl, luldimukl er a klaumerang el ngara Jesus Kristo me a Tngakireng er Ngii, ouchel el reng, uldasu er a duerreng, me a Ongeru el Lemei a Rubak er kid.

Ultok, omecherabech, me a delngerengel a ulmekringel er a kot el profet er a uriul-klebesei er kid, el Joseph Smith, me a rultirakl er ngii.

Mesel klautok er a 1842, ea Joseph a lliluches a teruich mea edei el klou a belkul tekoi el kirel tial mukeroul el Ikelesia, el uldimukl er tiakid el chimong: “Aki mengerchir ra llemalt ra omengull el mora Dios ra Rokui el Klisiich el oltirakl a rengmam, e dirrek el kongei ra uaisei el techall el mora rokui el chad, me bol sebecherir el ngar sel sorir el teletael, ra sorir el basio, e longull el ngar sel sorir.”⁴

Tial tekingel a mo er a rokui, iilmokl, e ngara omengull. Tiakid a belkul a mimokl el klechelid.

A Profet el Joseph Smith a dirrek el dilu el kmo:

“Ak bleketakl el melekoi el ngar medal a Babeluades el kmo Ngak a keldmokl el mo mad el mesebechakl a llemeltir a re Presbyterian, a Baptist, a lechub a ungil chad er a ngidil klechelid; el kirel a osisiu el olisechakl el ngii a merderd a llemeltir a … Resanto el mo merderd a llemeltir a Rekatolik,a lechub eng ngidil klechelid el diak el merael a chisel e mechitechut el mengesebechakl er tir.

”Ng beltik el reng el kirel a iilmokl [a] meklemesii a renguk—er a tekoi er a buai me a iilmokl el klechelid el mo er a rokui el chad.”⁵

Ng dirrek, tirkel rechedal a Ikelesia ruchei a lulemall er tir e ulultoil er tir el mo melai a tal telael el mail, el mlara New York el mo er a Ohio el mo er a Missouri, el governor er sei a ultebedii a tekingel el kmo a rechedal a Ikelesia “a momdasu er tir el cheraro e kirir el mo dibus a lechub e te tuobed er tial beluu.”⁶ Me te chilliis el mo er a Illnoise, engdi a omelemall a milemolem. A mekngit el chad a milkodir a Profet Joseph, e ulmedasu el kmo a le kodir eng mo tomellii a Ikelesia e mo omriid er tikrel loumerang. Engdi tirkel loumerang a dimlak el mesim. Ngkel ulkiuelel a Joseph, el Brigham Young, a milngedereder er a dersta telael el rechad el rirolii a 1,300 (2,100 km) mail el bedul ngebard el ngii a dodengelii er a chelechang el beluu er a Utah. ⁷ A ruchelek a mle teloi er tirkel mle kot el uchelel tial omerael.

A ikekid el sils el mle klou a odechelakl, ea Ikelsia er a Rubak a mla mukeroul el mo bekord el 17 million a rechedal, el kuk betok er a tedobech er tir a kiei er a ikrel a Merikel.⁸

Sera April 2020 ea Ikelesia er kid a mle outkeu er sel 200 anniversary er a Oltel a ebangkelio el lulbang a klumech el mo er a beluulechad, el milkedmokl lokiu a First Presidency me a Chelechad er a Teruich me a terung el Apostol. Ng omuchel el uasei, “Aki kuoll ouchais el kmo a Dios a betik a rengul er a Rengelekel el ngara bek el beluu er a beluulechad.”⁹

A betik er a rengud el prophet, Russell M. Nelson, a mla smodii:

“Kede oumerang er a ilmokl, blekokeuii, me a tabesul lomeruul el mo er a rokui el ngelekel a Dios.

“Kid el rokui a rodam e rodos, el dersta el chad a ngelekel a oubeltik el reng el Chedam er a Babeluades. A Ngelekel Sechal, el Rubak el Jesus Kristo, a siotai er a rokui el mo er Ngii, ‘chedelekelek me a becheleleu, kelbus me a mimokl, sechal me a redil.’(2 Nephi 26:33).”¹⁰

Momdasu lobengkek a eua el teletael el buai me a dersta el chad a ngmai a klungiaol er a mimokl el klechelid.

Kot. A mimokl el klechelid a mengull er sel kot me a ongerung el klou el llechul a Dios, e nguu a Dios el mo chedul a klengar er kid. Kede menguiu er a babier er a Mateus:

“Bo le betik a rengum er a Rubak el Dios er kau loba rengum el rokir, ma klengar er kau rokir, ma uldesuem el rokir.”¹¹

“E a ongerung el klou a belkul a di uai ngii, Bo el betik a rengum er a ngar bita er kau el ua le betik a rengum er kau.”¹²

A omngara chelsel a ikelesia, blil a nglunguuch, basio er a omengull, a lechub a le beached a chedeuel blai, el roltirakl er a Kristo, a rokui el di osisiu a klaumerang er tir, e sebechir lochotii a blak el reng el mo er a Dios lokiu a omengull el mo er Ngii e ngarngii a rengrir el mo mesiou er a Rengelekel.

A Jesus Kristo a kmal ungil olechotel tial beltik el reng me a omesiou. Sera temel a Urerel, Ngii a ulmekereu el kirir a remechebuul,¹³ ulmekungil er a smecher¹⁴ me a meiko.¹⁵ Ngulmekang er a resongerenger,¹⁶ e ulemok a chimal el mo er a remekekerei el rengalek,¹⁷ e ulusubes er tirkel milruul a mekngit el Kirel, e milngerus er Ngii.¹⁸

A chedaol llechukl a ouchais el kmo a Jesus “a mirrael el meruul a ungil.”¹⁹ Me kid meng kired.

Ongerung. Mimokl el klechelid a omekduch a olechotel a klaumerang, urunguled, me a budech.

Sel dechedal a Ikelesia, e kede mo obengterir a bebil er a klechelid el mengesebechakl er a rechad er a rokui el klechelid e omult a reng me a llemeltir el mo melekoi a ikel loumerang. Tiang a diak el belkul a mo kongei a ikel loumerang, malechub a ikel doumerang, engdi betok a osisiu ser kid er a bai tirkel sorir el mengusem a ngered.

Ak dirk mle omtechei er a Ikelesia er sel annual G20 Interfaith Forum el mlarngii er a Italy. Ak mle semeriar, e blak a renguk, serak bok kebetech lobengterir a remerreder er a amt me a klechelid el meliuekl er a beluulechad. Ak mlo omtab el telemall me a klekakerous a sebechel mesmechokl e mo omekungil sel doldanges er a Dios, el Demad el rokui, me a Jesus Kristo, el Ngelekel Sechal. Ngkel Kot el Ngarbab el Chad er a Omekungil a Rubak e Osobel, el Jesus Kristo er kid.

Ngarngii a kora mlei e ra uldesuek serak bok merek el mengedecheduch. Tirkel el teuid el chad mla mo merek el mengedecheduch a dimlak el longesimer el ousbech er a teletael er a klechelid er tir malechub eng ngara ngklel a Dios. Me sera kungedecheduch, e ak kulmedasu, “Ngak ak di mo kmu ko mesulang e mo dengchokl, a lechub e ak mo mengesimer el kmo ‘el ngara ngklel a Jesus Kristo’?” Ak mlo melbedebek el kmo ngak ak techang, e mle medengei el Rubak a mo soal a bok delii a Ngklel el mo mengesimer er a klemechek. Mak rirelii. Mesel kumdasu el kirel, eng mle techelek el mo ouchais a kuumerang; e ngarngii a mimokl el klechelid er ngak el mo sioning er a chedaolel Ngklel.

Ongedei. Klechelid a omekduch a rengrir a rechad meng mo sorir el olngeseu ra rebebil.

Sel klechelid a ngarngii a techelel e mimokl el mo meruul a tekoi, ea roumerang a remuul a beot me a ungil omeruul er a omesiou. Sel tekoi ra Jewish er a chuodel el “tikkun olam,” a belkul a “mo meruul malechub omekungil er a beluulechad,” a mocholt er a chelechal taem lokiu a urerir a rebetok el chad. Kede mla dmak e oureor lobengekel a Catholic Charities, el lodengelii el Caritas International; Islamic Relief, me a ngidil chelechad er a re Jewish, Hindu, Buddhist, Sikh, me a cheldebechel er a Kristiano el ua Salvation Army me a National Christian Foundation. Me ke dmak el rokui el mesou er a rebetok el millions el lousbech a ngesou, me dirk mlorengii el olengeseu er a rechiliis er a mekemad lola a tento, blil a cheliuaiu,²⁰ e merous yobo, ma yobo ra polio²¹ ma COVID.²² A llechukl el medechel ra mla mekedmokel a kemanget, ma rousbech a ngesou a dirrek el kmal betok.

Ngdiak a ker el kirel, a rechad er a klechelid, el dmak loureor, a sebechir rulli a meklou a utlutelel omeruul. Osisiu el taem, aikel omesiou kuk di ngara ta el mora tang a blechoel diak derenges el kirel engdi ngmo mengodech a klengar.

Ak medesuii sel okesiu el ngara Lukas el Jesus Kristo a uelengeseu er ngkel melakl el dil er a Nain. A Jesus, a ulbengterir a roltirakl er ngii, e milsang tial omerael er a kemeldilel ngkal di chimol ngelekel a melakl el dil. A lak ngak ngelekel, eng ngkal dil a mo chemau a ringel er a reng, chedaol tekoi, me a udoud. A Jesus, ra lesang ngkal dil el dil medidelangel, a dilung, “Lako mlangel.”²³ E sola Ngii a mlo rutechii a kahol me tirkal chad el milngol er ngii a mlo dechor.

“Kel chad,” Ngii a dilung “Ak dmu er kau el kmo, bekiis.

“Me ngikal mlad el chad a mlo dengchokl, e mocha mengedecheduch. Me a [Jesus] a ngiluu el mo msa delal.”²⁴

Olekiis er a mla mad a ongasireng, engdi a bek el ungil teletael me a cheokl el kirel a tara chad el ngara ringel a rael er a telbiil el dersta er kid a dirrek el sebechir el “[merael] el meruul a ungil,” e medengei el kmo a “Dios [a] obeng[ked].”²⁵

Ea Ongeuang. A mimokl el klechelid a omeruul el oldak a reng e obetiterir a rechad el mo dmak el kirel a kedmeklel a llach er a kldung me a klikiid.

Chelsel a Beches el Renged e kede menguiu el rebetok el chad a mlo mengeroid er tir er a Jesus Kristo, e mengeremrum a Osisecheklel, “Tia kmal meringel el osisechakl; ng techa sebechelel lorrenges er ngii?”²⁶

Tial mondai a dirk orrengesall er a chelechal taem el ngar tirkel sorir a bol lak a klechelid er a omelekoi me a omeruul. Engdi omko a lak a klechelid el mo olngeseu el mo omeklemal e olengeseu er a meringel el taem, eng techang kel mo meruul? Ng techang a mo olsisechakl el kirel a llemalt, omereng el saul, klausubes, me a kellou el reng? Ng techang a mo olecholt a bliochel el beltik el reng, klechubechub, me a ungil teletael el mo er a rebla dobes er tir me a ngara chelbuul? Ng techang a mo olngeseu er tirkel ngodech a omerellir engdi, ng kirir el melai a omeruul el di uai rokui el rengelelek a Dios? Ng techang a mo odars a chimorir el mo er tirkel ousbech a ngesou e diak losiik a chetengakl? Ng techang a mo mengull a budech e olngesenges a llach el ngii a meklou a ultutelel er a bai ikel merael a chisel omeruul? Ng techang a mo onger er sel ongtil a Osobel “Bong, e moruul a osisiu el tekeoi”?²⁷

Kid a mo meruul er ngii! Oi, e rodam me a rodos, ke de mong.

Ak siotai er kemiu el mo melisiich er sel urerel a mimokl el klechelid. Ngii a olechotel a olisechakl er a mimokl el omelilt el mlara Dios.

Mimokl el klechelid a mo meruul a kakerous el olisechakl el mo tabesul. Sel ungil er a klechelid, el mo rullii, me a omeruul er a bek el sils el oubeltik el reng el klechelid a uchul a llomes a mo klou sel dongeleuolu el mimokl el mo olecholt e meruul aikel meral chedul a klemerang.

Ak sioning el kmo a Russell M. Nelson a ngar el profet er a Dios. Ak ouchais el kmo a Jesus Kristo a omekrael e mengetikaik er tial Ikelesia. Ng mlad el kirel a kengtid, e milngerus er a kerus, e milkiis er a kodall er a ongedei el sils.²⁸ Ngii a uchul, eng sebeched el lmuut el mo kiei el mo cherechar; e tirkel ngarngii a rengrir a sebechir el mo kiei lobengkel a Demad er a Babeluades. Tial klemerang a kuuchais er ngii el mo er a beluulechad. E mereng a saul el ngak a mimokl el meruul er ngii. El ngara a ngklel a Jesus Kristo, amen.