A Urerel a Misionari a Ulmekngeltengat er a Klengar er Ngak el mo Cherechar

Ke mesulang e, President Nelson, el liluut el melekoi el kirel a urerel a misionari.

Rodam me a rodos, sesei el rak ra mla memong e ak milngedecheduch er a klou el ongdibel, ea osengel a klitechetul a medak a di mle kiul mo diak lungil el domekedong er ngii el macular degeneration, meng mla mo diak el ungil omes tial medak.

Me serak chau er tial teletael, e ak meral mlo mereng a saul el kirel a bebil a teletelel a ues, ludimukl er a teletael el dilubech ruriul. Me sera kumes er tial klengar er ngak, eak mlo omtab a bebil er a omeruul el mle klou a rirellii er a chelsel. A tara ikel omeruul a milkera serak ngeasek el sechal el milesiou el cherrungel el misionari er a England a ulmekngeltengat er a klengar ngak e ulemesiul er a chedaol omerollek.

Ak kulmedaus el kmo ng milkera ia ringel er a keizai sera Great Depression er a 1930 a uchul meng mlorngii a kerior el mera telungalek er ngak. A demak a meral milasm el mel dil ngarngii tial siobai er ngii el lolterau a mlai e mesiou er a telungalek er ngii er a chelsel tial meringel el taem el demak me a delak a mlo diak lomais el mora ikelesia el telkib el taem.

Meng locha dimlak ki bora ikelesia el dmak el telungalek, eng di tiang a dimlak el torbengak el mong lobengterir a resechelik a le bebil er a taem.

Sel taem, ea mo er a mision a di mle ngara uldesuek, engdi dimlak kusaod er ngii el mo er a demak me a delak.

Me serak ngara daingak, ea rebebil er a resechelik me a ngak a tilbir el mo mora mision. Ak mlo mesang a bisop er ngak, mak riruul a babilengek el mo misionari ea delak me a demak a mle dibus. Sera le kaieri a demak me a delak, eng mlo mechas a rengrir er a kuuchais er tir el kmo ak mla mokedong el mo mesiou el misionari er a Great Britain. Ak mereng a sulir el mle ungil a rengrir loldubech er tial uldesuek me a rungil resechelik el ulngeseu er ngak el tibir el mo mesiou.

A urerek el misionari a kildmeklak el mo ungil bechiil e ungil chedam e mlo ungil lorurt a siobai. Ng dirrek el mle kudmeklak el mo mesiou er a chelsel a klengar er ngak el kirel a Rubak er a chelsel a Ikelesia er Ngii.

Sel klou el ongdibel er a April 1985, e ak milngedecheduch er sel miting er a priesthood. A cheldechedechad a mle kirir a rengeasek el sechal. Ak milngedecheduch el kirel a kedmeklel a mo mesiou el misionari. Ak dilung, “Chelsel a ikel rokui el osisechakl el blak ngai er a urerek er a Ikelesia, eng diak a uaisel kmal mle klou a ultutelel er a bai ikel osisechakl el kngilai serak 19 [teruich me a etiu] a rekik el elder el mle mesiou el cherrungel el misionari.”¹

A Rubak a medengelkau. Sel kemiu a mesiou el ngara mision, e komo chemau a omeruul el ngii a mo ngosukemiu el mo ungil Medengelii. Kemiu a mo mukeroul er a teletael er a chedaol sel mosiou er ngii. Ngokiu a Ngklel, e kemiu a modurokl el mo oureor el olngeseu er a rebebil. Ng mo meskemiu a omeruul el obang a odbechel a Chedaol Reng. A Rubak a mo kongei er kemiu el mo olsisechakl el omtechei er Ngii. Ng sebechemiu el lochotii er Ngii el kmo Ngii a sebechel loumerang er kemiu e ultuil er kemiu.

Aikal mlo merek el eim el buil, ea Elder Jeffrey R. Holland me a Elder Quentin L. Cook, el dirrek el milesiou el misionari er a British Isles, a ulbengkek el mlo oldingel er a rechedal a ikelsia me a remisionari er ngarsel klebokel el beluu. Mak ngarsei, e ak kulmedasu a ikel omerollek serak ngeasek el misionari. Ak ouchais el kmo ng mision er ngak a uchul e ak mlo medengei el kmo a Demak er a Babeluades me a Osobelek, er a Jesus Kristo, a medengelkak e betik a rengrir er ngak.

Ak mle ngeltengat el mlarngii a terung el ungil remerredel er a mision er ngak, el Selvoy J. Boyer me a Stayner Richards, el uldimukl er a keldemir, el Gladys Boyer me a Jane Richards. Mesel kumdasu er a mla memong, e ak mlo ungil metebengii el kmo te ulmerang er ngak e betik a rengrir er ngak. Te ulsisechakl er ngak a ebangkelio. Te milngerchir a betok er ngak. Te milskak a betok el ureor el mo melasm er ngak me a ngerachel er a omerreder el mo olngeseu er ngak el mo mukeroul e mengedmokl el kirel a klengar er a omesiou.

Ak dirrek el ulmedasu serak mukedong lokiu a President Spencer W. Kimball el mo oungerachel er sel Canada Toronto Mission lobengkel a bechik, er a Barbara, me a rengelekek. A President Kimball a ulmekedong er kemam el mo mesiou sera April 1974, el di mle kedeb el taem uriul er sel klemechel kirel a misionari el dai er ngii a “When the World Will Be Converted.”² Tial klemechel ea President Kimball a silodii sel uldesuel el kmo ng mekera ea ebangkelio a mo oberk el mo er a beluulechad rokir. Ng ulmekedong a lmuut el betok el misionari el meliuek er a beluulechad. Ngii a ulmeklatk er kid er a ikel Rubak a mengerchir el rokui el chad a kirir el mo mengelechel el mo tirkel kiei er a beluulechad.³ A osisecheklel a President Kimball el kirel a omengerchir a rengeasek el sechal el mo mesiou el misionari a mlo uchul a cheldecheduch er a chelsel obliil el meliuekl er a beluulechad. Tial omengerchir a dirrekak el mengodech. Ak oureng a saul er tial tutau el President Russell M. Nelson a liluut el mesisiich el louchais a ikel longerchir a Rubak.

Ng mocha teruich el rak sera President Thomas S. Monson a louchais el mo ngariou a rekrir a misionari el rengeasek el sechal me a rengeasek el redil.⁴ A kuk di uldesuek, e sel kmal uchul tial omengodech a mo mesterir a rengeasek tial techall el mo mengodech a klengar er tir el mo mesiou el misionari.

Me ngak el Apostol er a Rubak el Jesus Kristo, e ak omekedong er kemiu el rengeasek el sechal—me a tirkel rengeasek el redil el sorir el mo mesiou el misionari—el kmo momuchel er chelechang el mo mengedecheduch er a rechad er a blimiu el kirel a mora mision. Ak dirrek el siotai er kemiu el mo mengedecheduch er a resechelimiu el kirel a mora mision, ea lsekum a tara sechelim a kora omedednger el mora mision, e bai momekduk a rengrir mebol longedecheduch er a bisop er tir.

Bol ngarngii a rengmiu el kiriu me a Chedam er a Babeluades el kmo kemiu a mora mision e omuchel er a chelechal taem el mong e ko mo melasm el meruul a rengmiu, omerelliu, me a uldesuiu el mechelins e klikiid. Ak siotai er kemiu mebol ngarngii a mesisiich el klaumerang er kemiu er a mla moluut el ebangkelio er a Jesus Kristo.

Rechedam me a rechedil el roungalek er tirkal ungil rengeasek, kemiu a klou a ultuteliu er a tial omengedmeklir. Momuchel er a chelechal sils el mo mengedecheduch er a rengelkiu el kirel a mo mesiou el misionari. Kede medengei el kmo a telungalek a sei a kot el klou a rellii el olengeseu er a omengedmeklir tirkal rengeasek el sechal me a rengeasek el redil.

A lsekum a rekim a dirk ngarsel ulecherangel el kirel a mesiou el misionari engdi dirrekak bo mosiou eleng uchul tial omekodall el rakt a lechub kuk di bebil er a tekoi, e ak siotai er kau el mo mesiou er a chelechang. Bo mongedecheduch er a bisop er kau, e bo mongedmokl el mo mesiou er a Rubak.

Ak olengit er kemiu a re bisop el mo olngeseu er a rokui el rengeasek el sechal me a rengeasek el redil el kmeda er sel rekil a misionari el mo mengedmokl el mo mesiou, e dirrek el olengit er kemiu a re bisop el mo osiik er tikrel sebecherir engdi dirrekak el losiou. Msiotai er a dersta el ngeasek el sechal el mo misionari, me a ngeasek el redil el soal mo mesiou.

Mo er tirkel remisionari el mesiou er a chelechal taem, aki oureng a suliu. A mision er kemiu a ngarngii er tial temel a omekodall el rakt el ngara beluulechad rokir. Meng uchul tiang, ea mision er kemiu a diak uai a teletelel serak ngara mision a lechub a teletelel a remisionari el mle mesiou er a uchei er a 2020. Ak medengei el kmo ngdiak el beot. Engdi a le ngarngii tial meringel el taem, a Rubak a ngarngii a ureor el kirem el mo meruul, e kemiu a mla rullii el mo ungil. Uai tial okesiu, ko mla ousbech a technology lokiu a betok el teletelel el osiik er tirkel keldmokl el mo mesuub el kirel a Oltel a ebangkelio er a Jesus Kristo. Me kom blak a rengmiu el mesiou lousbech er sel ngarngii klisichem, e ak medengei el kmo a Rubak a chemat er a dechal a rengum. Ak medengei el kmo a ureriu a mo omekngeltengat a klengar er kemiu.

Sel bo merek er a mision er kemiu, e molakt el kmo kemiu a dirrekak bo merek er aikel urerel a Ikelesia. Molisiich a ikel ungil blekeradel el msiluub er a mision er kemiu, e molemolem el melisiich a klaumerang er kemiu, blak a rengmiu el loureor, meluluuch, e mo olngesenges er a Rubak. Mongull a telbiil el kemiu a mla remuul. Molemolem el mo omekngeltengat e olngeseu er a rebebil.

Ak meluluuch el kmo kemiu el rengeasek el resechal me a rengeasek el redil me a rechad er a blimiu a mo mesang e medengei el kmo ng mekerang a urerel a misionari a mo omekngeltengat a klengar er kemiu el mo cherechar. Bo modengei er a chelsel a uldesiu e molchesuar a chelsel a rengmiu a klisichel sel siotai el Rubak a milsterir el mo er tirkel ungil misionari el rengelekel a Mosiah el sechal. Ng dilu el kmo ng kirir el mo merael e ouchais er a Tekingel; e kirir el mo meklou a rengrir er a kemanget el ringel me a kerior, me bol sebecherir el ungil lolechotel a teletael er Ngii, e Ngii a mo rultelir el mo dongu er a Chimal el kirel a osobelir a betok el chad.⁵

A Dios bo lomekngeltengat er a rengeasek er a Ikelesia el mo semeriar el mo mengedmokl er tir el mo mesiou er Ngii a ngii a nglunguchek, el kudersii er chelechal tutau el ngara chedaol ngklel a Rubak el Jesus Kristo, amen.