Eng di Kid a Diak Dorrenges er Tir

A tekoi el orrenges a melekoi el kmo ke de mesang e omtab er a chad malechub eng kmong ngerang. Meng uaisie, e a tekoi er tial chelitakl “Let Us All Press On” a mellach er kid el mo kongei el tibir el diak bo domtab “a ikel lolekoi a re mekngit el chad.” A Lehi me a tirkal chad lulbengkel el menga er a redechel sel kerrekar a meskid a mesisiich el okesiu er a diak lomtab er a roltuub me a romekakou el ngii a blechoel metuobed er sel klou e meteu el blai.

A llechul a Kristo a llechukl “loba Reng er a ngar el Dios … er a chelsel a [rengud]”⁶ el melisiich er kid el mo “diak dorrenges” er a betok el ongelaod, ulekakou, me a betok lolechau er tial mla ruebet el beluulechad. Tia kid okesiul tiang, a klaumerang el bedul a Rubak el Jesus Kristo a toketek a klisichel a chedaol klengar er kid. A klaumerang er a Osobel a osisechakl er a omeruul me a klisiich. Me sel doruul el oltirakl er a klemerang el ngara ebangkelio er Ngii, e kid a mukngeltengat er a chedaol klisiich el mo merael bedul uchei er a chelsel a ongarm er a klengar e melemolem osenged el bedul a deureng el Osobel a oldars el merkid. Ng merang, “sel doruul a ikel ngii a melemalt eng diak el kired el medakt, e le a Rubak, el ngii a olngeseu er kid, a kmal di mo kmeed er kid.”⁷

Sel de siseb er a chedaol telbiil e de klikiid el ngmai a chedaol ruoll er a priesthood eng omak er kid lobengkel e lochetid el mora Rubak el Jesus Kristo me a Chedam er a Babeluades.⁸ A beot el belkul tiang a kmo kid a oumerang er a Osobel el ngii a Omtechei er kid⁹ e Mengedecheduch el kired¹⁰ me kede ultuir er a Urerel, klechubechub, me a krasia er ngii¹¹ er a omeroled er tial klengar. Me sel blak a rengud el mera Kristo e de moak lobengkel, e ke de nguu a omekbeches, omekungil, me a melisiich el klengeltengat er sel diak a ulebengelel cherechar el Tngakireng er Ngii.¹²

Sel de kiei el soad el mengedmokl a telbiil a mekdebechii a chedaol delongelel me a Rubak el ngii a dmolech e mesisiich. Me sel dongull a ikel teletelel tial chedaol telbill me a chedaol ruoll, e ke er di merael el mo kmeed el mo er Ngii¹³ e mo melchesuar er sel redechel a chedaol el teletelel me a Ngii el meral kiei e nga er a klengar er kid. Me a Jesus a mo klou a belkul el merkid el diak el kuk dil cheldecheduch el ngara chedaol llechukl; a okesiul me a osisecheklel a mengetikaik a bek el soad, domdasu, me a doruul.

Ak di beches el melekoi ng diak el sebechek el moungil smodii sel meral teletelel me a klisichel a delongelel a telbiled lobengkel a mla mekiis e ngar el Ngelekel a Dios. Eng di ak sioning el kmo sel deleongel lobengkel ngii me a Chedam er a Babeluades a merang e ngii a blil a klouelreng, budech, deureng, me a chedaol klisiich el ngii a ngosukid el mo “diak medakt, ngii mesel lomtelub a cherarou.”¹⁴ Me sel doruul-a telbiil e doltirakl-a telbiil el chedal a Jesus Kristo, eng sebeched el mukngeltengat el mo “bekeu, e le a Rubak a ta lobengked”¹⁵ e diak domtab a mekngit longetikaik me a otuub.

Sel kurael loldingel er a rechedal a Ikelesia el liueklii a beluulechad, e ak blechoel loker er tir tial ker: ngera ngosukemiu el mo “diak morrenges” a ongetikaik er a beluulechad, ulekakou, me a otuub? A nger er tir a a kmal osisechekill.

A rubang a blakereng el chad ra ikelesia a blechoel melilt a ikel lorechudel e longterir el kirel a klisichel a Chedaol Reng el mora klengar er tir lokiu a tmolech el omengiuel a chedaol llechukl, blak a rengrir el meluluuch, e ungil mengetmokl er tir el kirel a mo melai ra chedaol belsoil. Ma dirrek el blechoel el dorenges er ngii a ikel ngeseu ra reng el ngara re mekedung el chad ra telungalek me tirkel de ta rengud el sechelid, a ikel ngarngii a belkul losisechakl el desuub e lokiu sel doldingel e mesiou ra mla moluut el Ikelesia ra Rubak, mesel klisiched el mesang sel bleketakl el chemersel a ngidil ngerang ra chelsel malechub eng tuobed ra chelsel sel klou e meteteu el blai.

Ak mla mtebengii el ikal omerellir a rechedal a ikelesia a ngarngii el teletael el kmal klou a belkul. Sel kot e ngaruchei el tekoi, a tirkal loltirakl a tekoi a ngarngii sel mesisiich el klaumerang er tir ra Demad ra Babeluades er sel luldasu ra deurreng mesel ngerchelel a Jesus Kristo el ngii a Okised ra Kodall e Osebeled. Ea ongerung, a ikel klemedengei ma klaumerang er tir ra reng a kmal di tir, el ngara rengrir, e klebechel; ngdiak el dil tekoi lolekoi ma kal meringel el belkul. A kurenges er tirka lobang a blakel reng el chad el mesaod a telbiil el mesterir a klisiich mel ngoriakl ra uldikel mesel delongelir el mora ngar el Rubak lolngeseu er tir ra ikel lungil ma metacherbesul el taem. Mesel ngar tirkal chad, ea Jesus Kristo a meral ngara rengrir el Osobelir.

siasing/Llecheklel

Kampas

A telbiil ra ebangkelio ma chedaol ruoll a ouedikel ra chelsel a klengar er kid eldi ua kampas. A kampas a klekedall lousbechel el olecholt er a dimes, diluches, ongos me a ngebard el moktek a omekrael e lolecholt er sel le ngar ngii. Ngosisiu el teletael, ea telbiil me a chedaol ruoll a melutk er kid el mong e ngosukid el blechoel el melatk a deleuill er kid lobengkel a Rubakel Jesus Kristo er tial omeroled er a rael er a telbiil.

siasing/Llecheklel

Kristus

Sel kot el ngarbab el dorael bedul ngii kid el ngar tial beluulechad a mong e mo mecherrungel er a Kristo.¹⁶ A chedaol telbiil me a chedaol ruoll a ngosouir osenged el bedul Osobel e melasem, lokiu a krasia er Ngii,¹⁷ el merael el di mo uai Ngii. E meral sebechel, “a diak desa el [klisiich] a mo ngosouir kau me a ngak el kirel tial klebokel el urerel a klemerang.”¹⁸

A telbiled el ulekrael lobengkel a Dios ma Jesus Kristo ea rael el uchul eng sebeched el ngmai a ikel desuub ma klisiched meng “diak dorrenges.” E tial deliongel a mesisiich sel dolemolm el blak a rengud el urrekodel er sel deel el lomdideled. Ngdi a re bebil ra Nephi a uleker, “Ngera belkul sel deel lomdideled el lilsang a demad … ?

“Ma [Nephi] a ulenger er tir el kmo tiang a tekingel a Dios; e ngkel kongei el lorenges a tekingel a Dios, e mo urekodel er ngii, a diak el bol riid; e diak a ngibesereng ma odelcheklel a cherarou el mo mesisiich me bol mecheuid, el ngititerir me bol metemall.”¹⁹

Kulengit me momtab el kmo sel mo sebechem el otngakl a ngibesereng ma meringel el lodelcheklel a cherarou a yaksok el mor tirkel chad el “blak a rengrir” e diak el bor tirkel kuk di “urekodel ra” tekingel a Dios.

Ka domtab, a Apostol Johanes a silodii a Jesus Kristo el kmong Tekoi.²⁰

“Sera uchelel eng mle Tekoi, e a Tekoi a ulebengkel a Dios, e a Tekoi a mle Dios. …

“Ng uleak ngii ea Dios a riruul a bek el tekoi; Ng dimlak a ngerang el lobeob el dimlak loeak ngii. …

“E ngii el Tekoi a uchelel a klengar, e kiliei lobengked, (e kede milsang a klebkellel, el klebkall el mlar a Chedam el mor a dital Ngelekel,) el mui ra krasia ma klemerang.”²¹

Maleuaisei, a tara ngklel a Jesus Kristo a “Tekoi.”²²

E dirrek, sel eai el tebechelel a klaumerang a melekoi, “Aki oumerang er a Biblia el kmo ng tekingel a Dios se el loltirakl ra melemalt el oidel; aki dirrek el oumerang el kmo a Babier er a Mormon meng tekingel a Dios.”²³

Maleuaisei, a ikel losisecheklel a Osobel, el llechukl el medechel ra chedaol llechukl, meng dirrek el “tekoi.”

Ngdi soak el melekoi el kmo sel blak a rengud ra tekingel a Dios a uldimukl ra (Kot) melbedebek, menguul, e melisiich er sel di delongeled kid ma Osobel ma Demal e lokiu a ikel telbiil ma chedaol ruoll ra mla moluut el ebangkelio, ma (Ongerung) meluluuch, loba blak el reng, e blechoel lousbech a ikel chedaol llechukl ma ikel losisecheklir a re ngar el profet ma re apostol a ultebechel el klemerang el ocholt. Mesel doltirakl leng “blak a rengud” el kirel a Rubak e dobult le ke de kiei loltirakl a osisecheklel,²⁴ ak yaksok er ngikel chad ma rokui el kmo kede mo mukngeltengat el mo “dechor er a chedaol basio, e mo diak de mengukl.”²⁵ Alsekum e kede kiei el ngara Kristo, eng Ngii a kiei e merael lobengked.²⁶ E merang, “ia ikel sils er a ringel ea re Santo er ngii a mo oyeng, e melisiich a tekingel a klemerang.”²⁷

Merael bedul uchei. Orreked. Diak morrenges.

Ak sioning el kmo blakelreng er a telbiil me a chedaol ruoll er a mla moluut el ebangkelio er a Osobel a rullid el mo sebeched el merael bedul uchei er a urelel a Rubak, el mo orreked er Ngii el Tekingel a Dios, e mo diak dorrenges er a ongetikaik er a cherarou. Klakouad el kirel a llemalt, e a derta rekid bol nguu a saider er ngii, tia “el mesisiich el saider er a klemerang,”²⁸ el ngara chedaol ngklel a Rubak el Jesus Kristo, amen.