Oltirakl er a Jesus: Mo Chad er a Budech

Tial kmal klou el blal ruul a internet a klengeltengat e ringel, el kuk di kirel er chelechal taem.

Chelsel a beluulechad el mui er a social media me a uldasu el mong e mei, a tekingel a chimol chad a sebechel obriid el mo klou. Sel tekingel, a le klemerang me a lak, a le melemalt malchub e ng chelbirukel, a le bekokeuii malchub e ng rasechebeab, a mereched el oberk er a beluulechad.

A tekoi er a social media el bekudasu e ungil a omesind a diak el sal ulecholt, ea tekoi er a mondai me a kelsib el reng a di blechoil ultaut er a dingad, al uldasu er a politics, rechad er a chais, malchub ng uldasu er a tial klou el secher. Ng diak a chad a lechub ngidil ngerang, luldimukl er a Osobel me a mla moluut el ebangkelio er Ngii, el lochib ikal teletael me a omelekoi.

A ikel Osisechakl er a Bebul a Rois a klumech el mo er a rokui eng di oumesingd el kirir a roltirakl er a Osobel, tirkel tir a mla melilt el mo oltirakl er Ngii.

A Osobel a ulsisechakl a teletelel a klengar, er a ngara mong me a chelchang, er a beluulechad el mui er a mondai. “E ngeltengat a rokui el chad er a budech,” Ng dilung, “le tir a mo mokedong el ngelekel a Dios”¹

Ngultuil er a klaumera er kid er a Jesus Kristo, e kede mo chad er a budech, beulkul a mo—mengellakl, mengelekolt, malchub e ng omekoad—a rokui el bededengel ongetikaik er a cherarou.²

Sel doruul a ngercheled, a yaksok er a Ngii a kmo kid a mo mokedong el ngelekel a Dios” Bek el chad er a beluulechad a “ngelekel”³ a Dios, ng di sel omkedong er a kid el “ngelekel a Dios” a meral klou a belkul. Sel bo doltirakl ra Kristo e dolai a telbiil el Obengkel, kede mo “rengelekel” e “dikesel a renged,”⁴ “rengelkel a Kristo, rengelkel el sechal, me a rengelkel el redil.”⁵

Ng mekerang a chad er a budech el bekodir a ngeuil a diablong? Kmal diak el sebeched el kutmokl sel de chiis er tikel omtok er a kid. Kede bai, melemolem el mesisiich er a klaumerang er kid, e mo semeriar el omerk a klaumerang er a kid e blechoil mo kerekikl el mengeroid er kid er a kelsib el reng.⁶

Ng dirk, tilobed a babier el mesaod a betok el tekoi el omtok er a Ikelesia, a Reverend Amos C. Brown, a tara oungerachel er a civil rights e pastor er a ongedei el Baptist el Ikelesia er a San Francisco, a dilung:

“Ak mengull a dilubech me a osengel a chad el lilchesii aikal tekoi. Ngdi, ngdiak ues aikel le ues.”

“Ak melatk er a ngii el tara kot el klou el deureng el kudengelii a tirkal mengeteklel [a Ikelesia], el ua President Russell M. Nelson. Te, ngara udesuek, e te olchotel a kot el ngarbab el ungil mengeteklel el sebechel uldars a beluad.”

siasing/Llecheklel

President Nelson lobengkel a Reverend Brown

Ng dilu: “Ng sebeched el oumondai el kirel a tekoi er a mla memong. Ng sebeched el kotouar el mes aikel rokui el ungil el ngarngii er a chelchang. … Ngdi aikal teletael a diak el sebechel omkungil a mondai er a beluu. … El ua ulsisechakl a Jesus, ngdiak ede olingatech a mekngit el oba lmuut el bebil er a mekngit. A klengar er a kid a kirel mo ngara beltik el reng me a chubechub, mal muut el mora tirkei el omes er a kid el ual de cherreuir.”⁷

A Reverend Brown a chad er a budech. Ng mle chelellakl e melengmes e milkodir a ngeuil a diablong. A rechad er a budech a diak el mechitechut; te mengesuseu er a rorel a Osobel.⁸

Ngera melisiich er a kid el mo sebeched el mengelekolt, mengellakl, e omotech a ngeuil a diabelong el tmaut er a ikel betik a rengud er a ngii el klemerang? A klisiich a mei er a klemerang er a kid er a Jesus Kristo me a klemerang er a kid er a Tekingel.

“Ke ngeltengat, sel loltuub er a kau a chad, … e tmu bek bedengel a mekinget lekor kau el diak el klemerang, ele kemiu a oltirakl er ngak.

“… Ele klou el omeksulliu a kldmokl er a eanged el kiriu: a reprofet el mle chad er uchei er kemiu a dirrek el ble le ua ise er tir.”⁹

Eru el tekoi el klou a belkul el osisechakl a omekrael er kid el mo soad el mo chad er a budech.

Kot, a Demad er a Babeluades a mileskii el talchad a mimokl el melilt, e sebeched el melilt a roled. Tial mimokl el melilt a tara kot el ungil sengk er a Dois.

Ongerung, el oba tial mimokl el melilt, a Demad er a Babeluades a mecherei meng ngarngii a “ultok er a bek el tekoi.”¹¹ Kede “tchuarm a mecheuadch, meng sebeched [el] mo medengei a ungil.”¹² A ultok a diak el kirel mongasch a chaserreng. Kede mesuub el mo ungil melangch a ungil er a mekngit.

Kede outkeu a klengaltelngat er a mimokl el melilt, e medengei el kmo ng ngarngii a betok el diak el oumerang aikal doumerang. E merang, te mo mekesai er a uriul klebesei a mo melilt el oumerang er Jesus Kristo er a kot er bab er a rokui el desuir me a omerolir.

A social media a uchul, a di imol ngor er a diak el oumerang a sebechel mo teletel a kmal betok el mekngit el ngor, me al uasei el kmal betok el ngor, kede ngiltii a rolel a chad er a budech.

A rebebil a mesa First Presidency me a Chelchad er a Teruich me a Terung el ua el moktek er tir a ngara tekoi er a, keizai, siobai, me a chelsang.

Ng di, ng kmal ngodech a omerollam el mora ngerchelam. Ng dimlak a sengkio malchub e ki mengilt lokiu a babier. Ng dimlak a keisia el milngetmokl er kemam, e ki mokedong e mechedaol el omerk a klaumerang er a ngklel a Jesus Kristo er a bek el beluu el mo merek a klengar er kemam. Ng blak a rengud lomekngeltengat er a re smecher, resabisi, rengara klengitelreng, me a remechebuul e melisiich er a rengedel a Dios. Kede melasm el mo medengelii aikel soal a Rubak e omerk er a ngii, e tokubets el mor tirkel osiik a diak a ulebengelel klengar.

Ng soad a omereng el saul er a bek el chad el mora osischeklel a Osobel, a tekingel a Rubak el okiu a profet a oumesingd a diak el keed er a uldasu er a beluulechad. E mle blechoil uaisei.

A Osobel a millekoi el mo er a re Apostol er Ngii:

“A le [chetirir] kemiu a beluulechad, e ko medengei el kmo ng mle chetirir ngak ruchei er a le bol chetirir kemiu. …

“… Aikal rokui el tekoi el bol loruul … le te diak el lodengelii a uldurech er a ngak.”¹⁷

Ng betik a rengud e omekerreu er a rodam er kid, a loumera me a lak. Ng ulsischeklid a Jesus er a chelsel a cheldecheduch er a Ungil Chad er a Samaria el kmo tirkei el chad er a ngodech el klemerang a kirir el olngeseu a bek el ngesool, mo chad er a budech, meruul a ungil e ngar bab lungil el tekoi.

Sera Ongeru el buil, a llechukl er a Arizona Republic a dilul kmo, “a ruldubech er a llach er a Bipartisan el Uriul-klebesei el Santo a mo melekau er a re modil ma re sausechal el chad er a Arizona.”¹⁸

Kid a Ruriul-klebesei el Santo, a “dmeu a rengud el mo tara tial chelchad er a klaumerang, keisai, rechad er a LGBTQ me a remerredel er a beluu el mla dmak el ourior er a klaumerang me a kadengmes.”¹⁹

President Russell M. Nelson a tang mle oker, “A oliochel nga diak el sebechel ngarngii a e lak bo luchul a medemad?”²⁰

Kede blak a rengud el mo “oba budech el oltirakl er a Kristo.”²¹

A bebil er a uldechelakl el mlo ra Osobel a meral mle mekngit eng di dimlak a ngerang el dung. “A re bderrir a re prist ma re sensei er a llach … a kmal mle mesisiich el oltutakl er a Ngii … e oltuub er a ngii,” ngdi a Jesus “a dimlak a ngerang el dung.”²² Ng mo ngarngii a taem sel de chad er a budech el kired el di mo lmuk, e mo mlengmes, e melemolm el chellelakl.

Ng melemall a rengud sel de renges a betok el kmal mekngit el tekoi el kirel a Osobel, me a roltirakl er Ngii, me a Ikelesia er Ngii el lolekoi ma loltobed el ngara babier e tir a mle tal taem el ta er kid, milai a sakrament el obengked, e ulmerk a urelel a Jesus Kristo el obengked.²⁴

Tiang a dirrek el dilubech er a temel a Osobel el olsisechakl.

A rebebil er a oltirakl er a Jesus el mle obengkel er a temel aikel kot el klamiokel el ongasireng lomeruul a milngilt el mo “[diak el lolemolm el [merael] lobengkel.”²⁵ E mekngit, diak el bek el chad a mo melemolm el mesisiich er a beltik el reng el mora Osobel me a blak el reng el oltirakl a Llechul.

A Jesus a ulsisechakl er a kid el kmo bo dongeroid er a kid er a rebasio er a ngasechereng me a mondai. Tara olechotel, sera blol merek loumondai a Refarisi el mora Jesus e bocha le kadecheduch er a teletelel a bo lolemall er Ngii, a chedaol llechukl a kmul uasei a Jesus a chiltiterir,²⁷ e kiltmokl a ongasireng lomeruul e “klou el seked a ulkiuelel, e ngii a mle omekungil er a tir el rokui.”²⁸

E kid a dirrek el sebeched el mengeroid er a kid er a mondai e omekngaltengat a klengar er a rebebil²⁹ eng di diak de bo dongeroid er a kid mel dil kid.

Ngar a Mbuji-Mayi, Democratic Republic of the Congo, a kot a rebebil a mle obdingel a ngerir er a Ikelesia, le te diak el odengelii a klaumerang er a kid me a rechedad.

A kedeb el taem er a mla memong, Ngak me a Kathy a mlora tara kmal tokubets el ongdibel er a Ikelesia el ngara Mbuji-Mayi. A rengalek a mle keltmokl el ungil a bilir, e beches a mederir e klou a smelir. Ng kmal mle soak el mengedcheduch er tir el kirel a skulir ng di ak mlo medengei el kmo a betok er tir a dimlak el ngara skuul. A re oungerachel er kid, el oba kmal kekerei el udoud er a ngesu, a miltik a rolel el mo olngeseu.³⁰ Chelecha, e te betok er a eua el dart el ngalek er a skuul—el redil me a sechal, a rechedal a Ikelesia me a rediak—a mla mei e mosisechakl er a reteruich me a telolem el sensei el tir a chedal a Ikelesia er a Jesus Kristo.

siasing/Llecheklel

Kalanga Muya

Teruich me a euang a rekil el Kalanga Muya a dilu, “[Mekesai e ududam,] ng mlarngii a eua el rak el dimlak bora skuul. … Ak kmal oureng a saul el mora Ikelesia er a tial blal kedmeklii. … Chelchang eng mla mo sebechek el menguiu, melusech, e melekoi a tekoi er a France.”³¹ Mesaod er tial omeruul, a mayor er a Mbuji-Mayi a dilu, “Ng omekellomes er a ngak a Ikelesia er a Jesus Kristo er a Uriul-Klebesei el Santo le a bebil er a ikelesia a bliongel … [e kemiu a dmak el oureor] el obengkel a [rebebil] el mo olngeseu er a remechebuul er a beluu.”³²

Sel tal kunguiu er a Johanes bliongel 13, ng mengelechel er a ngak er a cherrungel el olchotel a Osobel el chad er a budech. El okiu a beltik el reng a Jesus a merisu a chocherir a reapostol. Kede okor e menguiu, “e ng kmal mlo ouedikel a rengul”³³ er a lomdasu er a tang el betik a rengul er a ngii el mo olterau er a Ngii. Ak mla melasm el mo medengelii a udesuel me a rengul a Osobel sera lorael a Judas. Mengasireng, el seikid el meringel el taem, ea Jesus a dimlak losaod a ikel “ouedikel” er a chelsel a rengul a lechub ngikel mo olterau er ngii. Ng bai, milngedecheduch er a reapostol er Ngii el kirel a beltik el reng, a Tekingel a dirke melemolm el ngara cheldecheduch el mei er a chelchang:

“A beches el llach ak nguu el meskemiu, El kemiu a mo kau beltik el reng; eldi uai ngak el betik a renguk er kemiu. …

Me tia ikid e a rokui el chad a mo medengei el kmo kom oltirakl er ngak, a lsekum e kom kaubeltikelreng.”⁸

Ng sebeched el betik a rengud er Ngii e betik a rengud er a rebebil er a kid. Mei e bo dechad er a budech, me bo domekedong er kid el “rengelekel a Dios,” Ak meluluuch el ngara ngklel a Jesus Kristo, amen.