Chelechang a Temel
Chelechang eng taem el kired el mesuub. Chelechang eng taem el douchel a rengud. Chelechang eng taem el sebeched lomekngeltengat er a rebebil.
Rodam me a rodos er ngak, tial klou el ongdibel a mocha er a reksi er a chelsel a betok el teletael. Kede mla mukngeltengat lokiu a nglunguuch, klumech, me a chelitakl el mla modars. Kede mla ngmai a llomes lokiu a remesiungel a Rubak.
Kede mla ngmai a meklou a belkul ulekrael el kirel a ngara medad el taem. A nglunguchek a kmo a Chedaol Reng bla longedecheduch er kemiu aikel ngii a soal a Rubak a bo moruul.
Ng blechoel diak dodengelii a ngara medad el taem. A eanged a mengedngodech. A tekoi er a keizai meng mengedngodech. A bkaischemrungel el tekoi, mekemad, aksident, me a secher a sebechel mereched el ngodechii a klengar. Aikaikid el omeruul a kmal diak el sebeched el mekera el kirel. Engdi ngarngii a tekoi el kid a sebechedel omtebechel, el ludimukl er ngii a mekera dousbech a temed er a bek el sils.
Ng kmal soak tiakid el poem er a Henry Van Dyke, el mle llechukl er a Wells College er a New York. Ng kmo:
A llechul a chimak
A mingii a ngara medak er a chelii:
El uchei, eng diak dodengelii a mo duubech,
Er a tekoi, el diak el sebechek el mekera el kirel.
E diak a luut er ngii,
Le taem a di merael, leng diak el kloklem:
Ng di chimol taem omobang,—
El ngii a CHELECHANG.1
Ng uaisei, el kired el suubii chelii, e uaisei, el kired el mengedmokl el kirel a ngarmedad el taem. Engdi chelechang eng sebeched el meruul. Chelechang e ng taem el kired el mesuub. Chelechang eng taem el douchel a rengud. Chelechangeng taem el sebeched lomekngeltengat er a rebebil e mesebechakl er a rengesool.2 El uaia tekingel a Mormon el mo er a ngelekel er a Moroni, “Bo el blak a rengud loueor; … lee ngarngii a urered el bo doruul [er a] chelecha el dengara chutem, me bo de mesisiich er ngike el cherreuel a llemalt, me bo denguu a ulengull er a rengedel a Dios.”3
A cheraro a diak lolengull. Ng blechoel mo ngarngii a omtok a klemerang. Ak lmuut el meklii a tekingek er a tutau el kmo bo moruul aikel tekoi el ngii a mo choisisii a chedaol klechad er kemiu, e molemolem lomakes el bedul uchei er a ngii di el ngera olbesongel me a techall el duubech.
A ungil mesisiich el chedaol klechad a meleketek sel bo dengar omengull er a chelsel a templo el mukeroul a klemedengei er kid er a klungel me a delchel a klengeltengat el dengai er a chelsel. A kulengit er kemiu me bo bechei a teletael er a beluulechad e mngai a moktek er kau el bedul a klengeltengat er a templo. A temiu el ngarsei a uchul a klengeltengat el mo cherechar.
Me sel Ikelesia a merael mo klou, me a templo a mo betok. Ngarngii a okouang me a kleuang[44] el beches el templo el lomekedechor er a chelechang. A llmuut el bebil a mo omekbeches Ak meluluuch el kirir tirkel dachelbai rechad el oureor kirel a templo el meliuekl er a beluulechad.
El okiu a saul el reng, ng ungil a renguk el ouchais el kmo ng mo ngarngii a beches el templo er a ikal basio: Wellington, New Zealand; Brazzaville, Republic of the Congo; Barcelona, Spain; Birmingham, United Kingdom; Cusco, Peru; Maceió, Brazil; Santos, Brazil; San Luis Potosí, Mexico; Mexico City Benemérito, Mexico; Tampa, Florida; Knoxville, Tennessee; Cleveland, Ohio; Wichita, Kansas; Austin, Texas; Missoula, Montana; Montpelier, Idaho; and Modesto, California.
Aikal 17 el templo a mo omeklengeltengat a kmal betok el klengar er tiang me a bital beluulechad. Ng betik a renguk er kemiu, e rodam me a rodos er ngak. Engdi sel kot el klou a ultutelel, a Rubak a betik a rengul er kemiu. Ngii a Osobel e Osobelem. Ng omekrael er a Ikelesia er Ngii. Bo de klikiid el chad er medal a Rubak, el ngii a dilu el kmo, “Ko mo chedak, e ngak a mo Dios er kemiu.”4
Aika nglunguchek el ngara chedaol ngklel a Jesus Kristo, amen.