Chedaol Beltik el Reng el ngara Uldesuel a Chedam
A moktek er a osisechakl me a llechul tial mla moluut el Ikelesia a mo kudmekelterir a rengelekel a Dios el kirel a mo suobel me sel kot el ngarbab el dauch er a diak a ulebengelel klengar.
A uldasu er a ebangkelio a ochotii a beltkil a rengul a Demad er a Babeluades el mo er a rokui el Rengelekel. Me sel kired el mo medengelii tiang, eng kired el mo medengelii a Uldesuel me a Llechul. Ng kmal ulis el betik a rengul er a Rengelekel meng nguldureklii a Ditang el Ngelekel Sechal, el Jesus Kristo, el mo Osebeled e mo Olsobel er kid, e mo ngara ringel e mo mad el kired. Chelsel a mla moluut el Ikelesia er a Jesus Kristo er a Uriul-klebesei el Santo, e ngarngii a kmal ungil klemedengei er kid el kirel a uldesuel a Demad er a Babeluades. Tiang a rulid el mo obang a kakerous el uldasu sel domes er a moktek er tial klengar, a chedaol kerekeriil el mo okiuelel, me a kot el ngarbab el klebkall er a bekesel ochid el mo er a rokui el rengelekel a Dios.
Ng betik a renguk er kemiu, el rodam me a rodos er ngak. Ng betik a renguk er a rokui el ngelekel a Dios. Sera uleker er a Jesus el kmo, “Ng ngeral llach a kot el ngarbab er ngii el rokui?” Ng ulsisechakl el kmo a omoubeltik el reng el mo er a Dios me a er a ngar bita er kau a kot el ngarbab el llechul a Dios.1 A ikel tekoi el mildung a kot e leng rulid el mo mukeroul el chedaol e le kid a meruul sel uai a le beltkil a rengul a Rubak el merkid. A oureng ulekum me kid el rokui a ungil medengelii a olisechakl me a llach el Demad er a Babeluades me a Ngelekel, el Jesus Kristo, a mla remuul el ngara Ikelesia er a Jesus Kristo er a Uriul-klebesei el Santo. A ikal kulekoi er tiang a mo melasm el mo omeketakl el kmo ngmekerang a beltkil a rengul a Dios a mo smodii tial olisechakl me a ikel ulekrael el llach er a Ikelesia.
I.
A dodengelii el cheleuid el kerekeriil er a uriul er tial klengar a kmo a rungil rechad a mo er a basio el domekedong er ngii el babeluades ea remekngit el rechad a mo er a basio el domekedong er ngii el beluu er a ngau. Tial cheleuid el luldasu el kirel a ikal teblong el basio a melutk el kmo tirkel diak el sebechir el meruul a rokui el llechul a Dios el mo er a babeluades a kmal di mo er a beluu er a ngau.
A oubeltik el reng el Chedam er a Babeluades a ngarngii a ungil uldesuel el mo er a Rengelekel. A mla mocholt el olisechakl er a mla moluut el Ikelesia er a Jesus Kristo a olsisechakl el kmo a rokui el rengelekel a Dios—me a rokui el teletael el diak el sebechel mdung rokui —a mo metik er tir el ngara rengedel a klebkall.2 “A blil a Demak a betok a delemerab er ngii,”3 a Jesus a ulsisechakl. A chedaol ocholt er a chelechal taem e kede medengei el kmo ngarngii a edei el kakerous el delemerab er a rengedel a klebkall. Sel Ulebongel el Kerekeriil ea dersta er kid a mo meritel el utluil er a urered me a ikel soal a rengud.4 Eng di uchei er tiang, eng kired el mo ngara ringel el kirel a kengtid el dimlak bo douchel el kirel. A chedaol llechukl a kmal ungil meketeklii tiang.5 Seikid e a mellemalt el Chad er a Kerekeriil a mo meskid a delengchekled er a chelsel a tara ikel rengedel a klebkall. Ng uaisei, el dodengei a chedaol ocholt er a chelechal taem, a rokui a mora kerekeriil me … , a rokui el chad a mo ngmai ikel kirel morngii leng uchul a urerel, chederdellel,er a chelsel a delemerab el mla mekedmokl.6
A Rubak a ngililti el kuk di kekerei a lochotii el kirel a teblong er a ika rengedel a klebkall. Sel ngodech er tiang, a Rubak a mla ocholt a betok el kirel sel kot el ngarbab el rengedel a klebkall, el Biblia a mesaod er ngii el “klebkellel a sils.”7
Sel klebkellel a “celestial” 8eng ngarngii a edei el dauch malechub eng bliongel .9 E sel kot el ngarbab er a ikang a mo suobel el ngara rengedel a sils, el de bo er ngii e kede mo uai a Demad me a Ngelekel, el Jesus Kristo. A mo ngosukid el mel borngii a teletael er a kledios e mo mengodech me bol sebeched el medengei a chedaol klisiched, ea Rubak a mla ochotii a olisechakl e remuul a llechul el ultuil er a diak a ulebengelel el llach. Tiakid sel dolsisechakl er ngii er a Ikelesia er a Jesus Kristo er a Uriul-klebesei el Santo ele sel moktek er a olisechakl me a llach er tial mla moluut el Ikelesia a mo mengedmokl er a rengelekel a Dios el kirel a osebelir el ngara klebkellel a sils e, lmuut er ngii, el kirel a mo suobel el ngara kot el ngarbab el saus.
A telbiil el mla meruul me a klengeltengat el yaksok el mo er a mui a klaumerang er tir el ngara templo er a Dios a klou a ultutelel. Tia ouchais el kirel aikal templo domkedchor ra beluulechad er rokir, el rechad er a choir a mla ungil oiteklii. A rebebil a rau a rengrir el kirel tial omesodel, el diak lodengei el kmo a telbiil me a chedaol ruoll er a templo a omekrael er kid el kirel a osobeled. Tiang a di mo bleketakl sel ocholt a klemerang er aikel edeiel saus er a klebkall. Eleng sel beltkil a rengul a Demad er a Babeluades el mo er a rokui el Rengelekel, Ngii a ulecholt a bebil er a rengedel a klebkall —as Elder Quentin L. Cook uluuchias er chelii -- el ngii el rokui a kmal mengasireng er a bai ikel kuk di sebeched el omtab.10
A Tngakireng er a Jesus Kristo a uchul meng mo sebechel meruul tiang. Ng mla ochotii el kmo Ngii a mengebkall er a Chedam, e olsobel a rokui el urerel a chimal.11 E mo suobel el ngara kakerous el rengedel a klebkall . Kede medengei el chedaol ocholt er a chelechal taem a uasei a rokui el renged a oltirakl a llach me a beldeklel a omeruul.12 Ng klou a ultutelel:
Ngkel diak el sebechel loltirakl a llechul a rengedel a sils a diak el sebechel kiei er a klebkellel a celestial.
E ngkel diak el sebechel loltirakl a llechul a rengedel a terrestrial a diak el sebechel kiei er a klebkellel a terrestrial.
Me a ngkel diak el sebechel loltirakl a llechul a rengedel a telestial a diak el sebechel kiei er a klebkellel a telestial.13
Ea tara omelkingel, a rengedel a klebkall el bo denguu er sel Uriul el Kerekeriil a miltib lokiu sel uldesuel a Demad er a Babeluades. Ngarsel uldasu e ngarngii a betok el renged me a rokui el Rengelekel a mo sebecherir el mo er sel renged el sebechir el “kiei” er ngii.
II.
A olisechakl me a llach er a mla moluut el Ikelesia er a Rubak a meruul a ikal diak a ulebengelel klemerang el loba teletael el sebechel mo ungil medengei el okiu sel uldesuel a Demad er a Babeluades el kirel a rokui el Rengelekel.
Ma leuaisei, e kid a mengull er sel mimokl el omelilt er a chad. Te betok a medengei el Ikelesia a blak a rengul loldubech er sel mimokl er a klechelid. Aikal omeruul a olngeseu el melisiich er sel uldesuel a Demad er a Babeluades. Kede melasm el mo olngeseu er a rokui el Rengelekel—el diak el dil rechedal a Ikelesia—a oldeu er tial mekreos el mimokl el omelilt.
Osisiu, a lebebil er a taem e te oker er kid el ngera uchul me kede oldurokl er a remisionari el mora betok el beluu, el uldimukl er a basio el betok a reKristiano er ngii. Te dirrek el oker er kid el ngera uchul meng klou a ulengesuid el mo er tirkel rechad el diak el rechedal a Ikelesia er kid e diak el ulecherangel el kirel a urerel a misionari. Kede meruul er tiang ele Rubak a mla olisechakl er kid el mo mengull er a rokui el Rengelekel el rodam e rodos er kid, meng soad el merous a ikel teletael er a chedaol me a tech el mo er a rokui el chad.
A diak a ulebengelel olisechakl a dirrek lochotii a kakerous el uldasu el kirir a rengalek. Ngokiu tial uldasu e kede mesang a omechell me a omtebechel er a rengalek el telengtengil a chedaol uldasu. Ng deurreng e chedaol ngerachel el mo er tirkel tir a sebechir el meruul er ngii. Ma leuaisei, eng mla medung er kid el mo olsisechakl e mesebechakl a olisechakl me a omeruul el ngii a kot el ungil teletael el kirel a ulekurulir me a deurreng er a rengalek el ngara uldesuel a Dios.
III.
A ulebongel, a Ikelesia er a Jesus Kristo er a Uriul-klebesei el Santo a lodengelii el uasei a telungalek a chedul a Ikelesia. Ng di sel diak el ungil bleketakl a sel klemerang el kmo a chedul a telungalek a diak el dil ngara deluill er tial klengar. A diak a ulebengel deleuill a dirrek el dodai er tial uldasu er a klechelid er kid. A mision er tial mla moluut el Ikelesia a mo olngeseu er tirkel rokui el ngelekel a Dios el mo sebechir el mo ngmai ikel kot el ngarbab el Dios a ngmai el mesterir. Ng okiu a mo suobel el okiu a Tngakireng er a Kristo, ea rechad rokui a mo nguu a diak a ulebengelel klengar (mo suobel er a rengedel a celestial), el Delad er a Eva a dilu “Dios a mesterir tirkel rokui e lolngesenges.” Tiang a diak el dil iior a mo suobel. President Russell M. Nelson a ulmeklatk er kid el kmo “sel diak a ulebengelel uldesuel a Dios, ea mo suobel a kirel a dersta el chad; [engdi] a mo suobel loba ngarbab el klengeltengat a kirel a telungalek.”15
Sel klou a belkul el merkid a sel chedaol ocholt er a Dios el kmo a mo suobel a kmal di mo er ngii lokiu a klaumerang el mo er a telbiil er a diak a ulebengelel chebechiil er a delongelel a sechal me a redil.16 Sel chedaol olisechakl a uchul e kede olsisechakl el kmo “a teletelel a sechal me a redil a klou a ultutelel er a dersta el chad er a klengar ruchei, klengar chelechang, me a diak a ulebengelel olangch me a moktek.”17
Tiakid a dirrek el uchul a Rubak a rullii a mla moluut el Ikelesia er ngii el mo omtok a tekoi er a buai me a odbechel a tekoi er a llach el mengodech er a Osisecheklel er a chebechiil el delongelel a sechal me a redil, e mo omtok a ikel teletael el uchul a rau el reng e mengodech a teletelel a redil ma sechal malechub a ikel klekarous a di meruul el mo osisiu er a delongelel a sechal me a redil.
A deruchelel a mla moluut el Ikelesia el kirel a ikal tekoi a blechoel el rurtelir a rengara bitang el mo omtok. Kede medengei el tiang. A uldesuel a Demad er a Babeluades a meskid a “ultok er a rokui el tekoi,”18 e sel mesisiich el ultekengel a Diablong a kmal melutk a ikel rokui lomtok er tial uldasu. A ulebongel, e ngii osiik el momtok er a omerolled el kirel a mo suobel lokiu a terebengel a chebechiil, ultekengel a cheroll er a rengalk, alechub eng menguid a klsechal ma klredil er kid. Engdi, kede medengei el kmo cherengel a taem ea chedaol moktek me a uldesuel a Demad er a Babeluades a diak el bol mengodech me bol sebechel meruul a ikel ngii a teletael malechub eng sorir a rebetok el chad. A di teletael er a klechad a sebchel mengodch, engdi a moktek er a Dios a meketeklii er kid er a kemangt el taem, el kmo tirkel otirakl a telbiilir a morngii a techelir el mo ngmai a blal yaksok el klengeltengat. 19
Sel diak a mouai ngii el mekreos el osisechakl el mo ngosukid er a omengedmekled el kirel a diak a ulebengelel klengar el kot el ngarbab er a rokui el sengk er a Dios,17a sel chais el mora telungalek er a 1995.18 A olchotel, a uaisei, el locha ngodch er a llechul a beluu, ma omeruul, el uaia a teletael er a tmak el kiei ma chebechiil er a osisiu el chad. Tirkel diak el mui el medenglii a moktek er a Demad el kirel a Rengelekel a sebchir el mo medengelii tial chais er a telungael el kmo ng diak el mmengodch el tekoi. E sel kuk ngodech er tiang, ea Uriul-klebesel el Santo a kongei el kmo a chais er a telungalek, el dilubech er a olisechakl el diak el mesim, a ochotii a belkul sel deleuill er a telungalek el ngii a kot el klou a belkul el telengtengil tial diak a ulebengelel omeruul el sebechel mo er ngii.
Tiakid a tekoi el diak a mo uaingii el olisechakl me a llach er a mla moluut el Ikelesia er a Jesus Kristo er a Uriul-klebesel el Santo.
IV.
Chelsel a betok el deluill me a omeruul er tial klengar, eng kired el kiei el ngarngii a klekakerous er kid. Sel doltirakl er a Kristo el kired loubeltik el reng el mo er a rechad, eng kired el kiei el ngara budech lobengterir tirkel diak el loumerang el uaikid. Kid a rokui el ngelekel a oubeltik el reng el Chedam er a Babeluades. El kired el rokui, ng mle bekesel Ochil el mo kiei er a uriul er a kodall, ea ulebongel, a rengedel a klebkall. A Dios a kmal soal kid el rokui a bo dolasm el mo nguu sel kot el ngarbab el klengeltengat er Ngii sel doltirakl a kot el ngarbab el Llechul, telbiil, me a chedaol ruoll, el ngii a meruul er a chelsel a chedaol el templo er Ngii el mla mekedechor el meliuekl er a beluulechad. Ng kmal kirred el ouchasi aikal mo klemerang ra mo cherechar el mo er a rebebil. Engdi sel beltkil a rengud el mo er a rokui el kmeed er kid, e kede blechoel el kongei a ikel lolilt. El ua ngkel profet er a Babier er a Mormon a ulsisechakl, ngkired el outekangel el merael mo ruchei, el oba “beltik el reng er a Rubak me a rokui el chad.”19
El uaia tekingel a President Russell M. Nelson er tial mlo merek el klou el ongdibel: “Ng dirkak er a reksi er a beluulechad el klemedengei el kirel Osobel a kmal imis el mla mo klou a ultutelel el mo er a dersta el chad. … A klikiid el osischeklel a Kristo a mesisiich! Ng mengodech a klengar er a rokui el chad el tir a medengelii e osiik el mo oltirakl er ngii er a klengar tir.20
Me kid el rokui bo doruul a ikel chedaol osisechakl er a chelsel a klengar er kid, a ngii a nglunguchek el ngara ngklel a Jesus Kristo, amen.