Raici Jisu Karisito Vakalevu Cake ena Noda Bula

Kemuni na taciqu kei na ganequ, au doka vakalevu noqu mai tu e matamuni ena mataka nikua. Au semata na yaloqu kina yalomuni ena vakavinavinaka ena soqoni oqo, ena vanua cava ga oni tu kina e vuravura, meda rogoca nodra itukutuku na parofita, apositolo, daurairai, daunivakatakila, kei na iliuliu ena matanitu ni Kalou. Eda vakataki ira na tamata ena gauna nei Tui Penijamini, eda sa birika noda valelaca ka dolava noda katuba me mua vua na parofita ni Kalou e vuravura,¹ o Peresitedi Russell M. Nelson.

Sa balavu na buwawa ni mataqu niu vakasamataka lesu au dau gadreva tu ga na matailoilo meu rai vinaka kina. Niu dolava na mataqu e veimataka, sa vaka me veilecayaki vei au o vuravura. E buwawa na veika kece, caquru, ka duitutu. Na watiqu mada ga sa buwawa na kena irairai ka sega ni kena irairai dina au dau taleitaka! Au gadreva dina, ni bera niu cakava e dua na ka ena dua na siga, oya meu na taura na noqu matailoilo me vukea noqu kila na veika e tu wavoliti au ka rekitaka na vei ka bulabula me vukea noqu veitosoyaki ena siga oya.

Ena veiyabaki, au sa kila ni itovo oqo e tukuna tiko niu vakararavi tiko ena rua na ka: imatai, dua na iyaya e vukea me matata, raimatua, ka yavutaka na vuravura voliti au; ikarua, na gagadre meu dusimaki vakayago ka meu dusimaki tikoga ena salatu dodonu. Na ivakarau rawarawa, e veisiga oqo sa ilova tiko vei au e dua na rai titobu ni noqu veiwekani kei na noda iVakabula, o Jisu Karisito.

Na noda bula sa sinai tu ena taro, lomaleqa, ogaoga, kei na madigi eso, na loloma ni iVakabula vei keda yadua na Luvena ni veiyalayalati, vata kei na Nona ivakavuvuli kei na lawa, era ivurevure vakarautaki e veisiga meda vakararavi kina meda “rarama sa cila, … sa vakararamataka [tiko] na [matada] [ka] sa vakabulabulataka [tiko] na [noda] kilaka.”² Nida vakasaqara na veivakalougatataki ni Yalo kina noda bula, eda rawa ni raica na ivakavuvuli i Jekope, na “veika me vaka na kena ituvaki dina, kei na ituvaki dina ena qai yaco mai.”³

O keda na luve ni veiyalayalati ni Kalou, eda kalougata vakalevu ena iyau levu vakalou me vakatorocaketaka noda rai vakayalo. Na vosa kei na ivakavuvuli i Jisu Karisito e tukuni ena ivolanikalou kei na nodra itukutuku na Nona parofita digitaki, kei na Yalona e ciqomi ena masu e veisiga, gole wasoma i valetabu, kei na cakacaka vakalotu ni sakaramede e veimacawa ena vukea me vakatikori na vakacegu ka vakarautaka na isolisoli digitaki mo kila e kauta mai na rarama i Karisito kei na Nona kila kina noda bula ena vuravura buwawa oqo. Na Noda iVakabula sa noda kabasi talega ka noda pailate nida mua yani ena maravu kei na voravora ni draki ni bula oqo. Sa rawa ni vaka maravutaka na salatu dodonu e muataki keda kina noda icavacava tawamudu. Sa qai cava e vinakata o Koya meda raica, kei na vanua meda na gole kina?

Na noda parofita lomani e vakavulica me “vakoti na noda rai vua na iVakabula kei na Nona kosipeli” ka dodonu meda “segata meda raici Koya ena noda vei vakasama kecega.”⁴ A yalataka o Peresitedi Nelson “ni sega na ka ena sureta vakalevu cake na Yalo me vakataka noda raimatua ga vei Jisu Karisito. … Ena liutaki iko ka tuberi iko ena nomu bula kevaka ona solia nomu gauna Vua ena nomu bula—ena veisiga yadua.⁵ iTokani, o Jisu Karisito sa vu ni noda vakanamata kei inaki na noda icavacava. Me vukea noda tudei tiko ka mua yani kina salatu dodonu, sa sureti keda na iVakabula meda raica noda bula ki Vua meda raici Koya vakalevu cake ena noda bula. Au sa vulica vakalevu na veisureti bibi oqo ena noqu vulica na Veiyalayalati Makawa.

Na lawa i Mosese a soli vei ira na Isireli makawa me kosipeli veivakarautaki, a caka me vakarautaki ira na tamata kina veiwekani ni veiyalayalati cecere vata kei na Kalou mai vei Jisu Karisito.⁶ Na lawa, sa sinai ena ivakatakilakila me dusimaki ira sa vakabauta mera “nanamaki tiko kina lako mai” kei na Veisorovaki i Jisu Karisito,⁷ ena inaki mera vukei na kawa i Isireli mera raimatua vua na iVakabula ena nodra vakabauti Koya, Nona solibula, kei na Nona lawa kei na ivakaro ena nodra bula⁸—sa inaki mera rawata mera kila vinaka sara na nodra Dauveivueti.

Me vakataki keda nikua, era sureti na tamata makawa ni Kalou mera raica na nodra bula ki Vua mera raici Koya vakalevu cake ena nodra bula. Ia ena gauna ni cakacaka ni iVakabula, sa yali na Karisito mai vei ira na Isireli ena nodra sokalou, era biuti Koya tani ka kuria ena lawa na ivakarau tawakilikili e sega tu na kena ivakatakilakila me dusia na ivurevure dina ni nodra vakabulai kei na veivueti—o Jisu Karisito.⁹

Na nodra veisiga yadua na Isireli sa mai tu vakatani ka buwawa mai. O ira na luvei Isireli, ena tuvaki oqo, era vakabauta ni itovo kei na ivakarau ni lawa sa salatu ni bula ni tamata ka vakatikina sa vakalailaitaki na lawa i Mosese me dua na ivakarau tudei sa qaravi kina na nodra bula na tamata.¹⁰ Sa gadreva kina na iVakabula me raicimatua ka vakamatatataki tale na Nona kosipeli.

A dua kina na iwiliwili levu ni Isireli a cata na Nona itukutuku, ka laki yaco sara mera beitaka na iVakabula—o Koya a solia na lawa ka vakaraitaka nio Koya ga “na lawa, kei na rarama”¹¹—sa voroka tiko. Ia o Jisu ena Nona Vunau ena Ulunivanua, ni tukuna tiko na lawa i Mosese, ka kaya, “Dou kakua ni nanuma niu sa lako mai meu vakaotia na vunau, sa na nodra vakavuvuli na parofita: au sa sega ni lako mai meu vakaotia, meu vakayacora ga.”¹² Na iVakabula, ena Nona Veisorovaki, a tinia na ivakatakilakila, lawa, kei na ivakarau vakalotu era a cakava tiko na kai Isireli ena gauna o ya. Na iotioti ni Nona solibula a veimuataki mai na caka isoro kama kina noda solia “na yalo raramusumusu ka yalo bibivoro,”¹³ mai na cakacaka vakalotu ni solibula kina cakacaka vakalotu ni sakaramede.

A vakavulica o Peresitedi M. Russell Ballard, na ulutaga oqo, ka kaya, “Ni vakasamataki qo, na solibula a veisau mai na cabo isoro ki vei koya sa cabora.”¹⁴ Nida kauta na noda isoro vua na iVakabula, eda sureti tiko meda raici Jisu Karisito vakalevu ena noda bula, nida solia ena yalomalua na yaloda ki Vua me nanumi ka kilai vinaka na Nona lomasoli uasivi kina loma i Tamana. Nida raimatua tiko vei Jisu Karisito, eda na raica ka kila vinaka nio Koya ga na ivurevure kei na sala me ciqomi na veivosoti kei na veivueti, kina bula tawamudu kei na bula vakacerecerei.

Me vaka e dua na dau muria na kosipeli, au sotava e vuqa era raica ka vakadinata na veisau ni noqu itovo, vakarau, kei na digidigi niu sa lewena na Lotu. Era vakataroga na “vuna” ni veika era sa raica tiko—na vuna au digitaka kina meu papitaiso ka lewena na ivavakoso oqo ni vakabauta, na Lotu i Jisu Karisito ni Yalododonu Edaidai, na vuna au biuta kina na itovo eso ena Siga ni Vakacecegu, na vuna au dinata kina na Vosa ni Vuku, na vuna meu wilika kina na iVola i Momani, na vuna au vakabauta kina ka bulataka na nodra ivakavuvuli na parofita kei na iapositolo nikua kina noqu bula, na vuna meu tiko ena soqoni ni Lotu e veimacawa, na vuna meu sureta kina na tamata mera “lako mai ka raica, lako mai ka veivuke, … lako mai ka mai tiko,”¹⁵ ka “mo lako mai ka mai ka mo tiko dei.”¹⁶

Ena gauna o ya, na taro oqori era veiuabaleti ka matata sara, ka veibeitaki talega. Ia niu taura rawa nodra vakadidike, au sa kila kina ni nodra sasaga, sa yaco meu gadreva meu taura na noqu matailoilo me matata, raimatua, ka vaqaqacotaka noqu saga meu muria kina na bula vakosipeli kei na kena ivakarau. Na cava beka na ivurevure ni noqu ivakadinadina? Au a cakava tiko beka na “irairai vakayago” ka sega ni vakatara na itovo oqo me sema kina lawa ni Kalou me “vaqaqacotaka na [noqu] vakabauta na Karisito,”¹⁷ se vakaraitaka na kila ni o Jisu Karisito sa ivurevure kaukauwa ga ni noqu talairawarawa

Ena sasaga qaqaco me rai yani ka vakasaqarai Jisu Karisito ena noqu vakasama kei na ivalavala kece, sa rarama sara na mataqu, ka matata noqu kila nio Jisu Karisito sa kacivi au tiko meu “lako yani” Vua.¹⁸ Mai na noqu bula vakatisaipeli itabagone, au nanuma kina na noqu a sureti mai vei rau na daukaulotu meu tomani rau ena vakavulici ni kosipeli kina dua na ilawalawa goneyalewa keitou taba vata. Dua na yakavi, niu tiko ena vale ni dua vei ira na goneyalewa oqo, ni ra taroga vakamalua na “vuna au vakabauta kina” a muloca na yaloqu, ka rawa kina meu vakadinadinataka vei ira ena kila titobu na rai ni Turaga baleta na veiuqeti vakayalo ni noqu bula vakatisaiplei, ka sa vakavoutaka na noqu ivakadinadina ni toso i liu.

Au kila kina, vakakina nikua, ni noda iVakabula, o Jisu Karisito, e dusimaka noda kalawa ivalenilotu ena veimacawa meda votai ena Nona sakaramede, kina vale ni Turaga meda cakava noda veiyalayalati Vua, kina ivolanikalou kei na nodra ivakavuvuli na parofita meda vulica na Nona vosa. E dusimaka na gusuda meda vakadinadinataki Koya, na ligada meda veilaveti ka veiqaravi me vaka Nona veilaveti kei na veiqaravi, na matada meda raici vuravura kei na tamata yadua me vakataki Koya—“ena kedra ituvaki dina, kei … na ituvaki ena qai yaco mai.”¹⁹ Nida vakatara me dusimaki keda ena veika kece, eda na ciqoma na ivakadinadina ni “veika kece sa vakaraitaka ni dua na Kalou,”²⁰ baleta ni vanua ga eda vakasaqarai Koya kina eda na kunei Koya²¹—ena veisiga vakayadua. Au vakadinadinataka oqo ena yaca tabu i Jisu Karisito, emeni.