Vakanamata ki na Valetabu

Kemuni na taciqu kei na ganequ, ena lima na soqoni vakasakiti oqo ni koniferedi raraba, eda sa baci mai vakila tale ni sa dolavi na lomalagi! Au masuta ni ko ni sa vola tiko na veika ko ni sa uqeti kina mo ni na talevi ira lesu tale. Erau sa tuvakarau tu na Tamada Vakalomalagi kei na Luvena Daulomani ko Jisu Karisito me rau vukei kemuni. Au vakauqeti kemuni mo ni vakalevutaka na nomuni igu mo ni vaqara na Nodrau veivuke.

Ena dua na gauna wale toka ga qo, a donumaki keirau kei Sister Nelson na madigi me keirau railesuva na ika 4 ni iwasewase vou ni Vidio ni iVola i Momani .¹ Era vakauqeti keirau sara! Meu vakaraitaka mada vei kemuni e dua na iwase lekaleka mai na iyaloyalo ni nona rairai na iVakabula vei ira na Nifai.

E bibi ni digitaka na iVakabula me rairai vei ira na tamata ena valetabu. Oqo na Nona vale. E vakasinaiti tu ena Nona mana. Me kakua ni seyavu mai na loa ni matada na veika sa vakayacora tiko vei keda na Turaga. Sa vakayacora tiko ko Koya me rawarawa ni yacovi yani na valetabu. Sa vakatotolotaka tiko o Koya na noda tara valetabu. Sa vakalevutaka tiko ko Koya na noda rawata me vakasoqoni Isireli. Sa vakarawarawataka tale tikoga ko Koya vei keda yadua me da yaco me da savasava vakayalo. Au yalataka na levu ni gauna ena valetabu ena vakalougatataka nomu bula ena ivakarau e sega tale ni dua na ka e rawata.

Ena gauna oqo sa 168 tiko na noda valetabu vakayagataki ka 53 na valetabu vovou era sa tara tiko, ka 54 tale sa cakacakataki tiko na kedra tara!² E ka marautaki vei au meu kacivaka yani na ituvatuva e tiko me tara na valetabu vou ena veivanua oqo: Busan, Korea; Naga, Philippines; Santiago, Philippines; Eket, Nigeria; Chiclayo, Peru; Buenos Aires City Center, Argentina; Londrina, Brazil; Ribeirão Prêto, Brazil; Huehuetenango, Guatemala; Jacksonville, Florida; Grand Rapids, Michigan; Prosper, Texas; Lone Mountain, Nevada; and Tacoma, Washington.

Sa lalawataki tale tikoga me tara na veivaletabu ena veivanua levu na lewena ka balavu na nodra lakova na valetabu sa tu rawa. O koya, sa ka ni marau kina vei au meu kacivaka e va tale na vanua volekati México City ena tara kina na valetabu vou e Cuernavaca, Pachuca, Toluca, kei Tula.

Kemuni na taciqu kei na ganequ, mo ni vakanamata ki na valetabu ena veisala eso se bera vakadua ni ko ni cakava. Au sa vakalougatataki kemuni mo ni voleka cake yani vua na Kalou kei Jisu Karisito e veisiga yadua. Au lomani kemuni. Me sa tikoga kei kemuni na Kalou me yacova ni da qai sota tale, sa noqu masu ena yaca tabu i Jisu Karisito, emeni.