iVakarau ni Bula Vakatisaipeli

Na mataka oqo e rua na luvei keirau kei na tolu na makubui keirau ena Vualiku kei Amerika vakakina rauta ni veimama kei vuravura era a raica na ramase ni siga ni cabe malua tu na tokalau. E tolu tale na luvei keirau kei na vitu na makubui keirau e Aferika kei na veimama ni vuravura tale kadua a raica na butobuto ni siro malua sobu mai ka tabogo na siga ena ra.

Na ivakarau matau oqo me baleta na siga kei na bogi esa ivakananumi ni veika dina e lewa tu na noda bula eda sega ni veisautaka rawa. Nida doka ka vakayacora sara na veika dina tawamudu oqo, eda sotava na vakacegu kei na loma vinaka e lomada. Nida sega ni vakayacora, eda na veilecayaki, ka sega ni yaco rawa na veika eda namaka.

Na siga kei na bogi sa dua na ivakaraitaki ni ivakarau e solia na Kalou vei ira kece era bula e vuravura, me baleta na veika era sa tu dina kina. E sa ivakadinadina tu ni noda bula vakatamata ka sega ni rawa nida veitalanoataka me vaka na noda gagadre ka lako tani mai kina. Au vakananuma tu oqo ena veigauna kece au vuka kina mai Aferika meu tiko ena koniferedi raraba, ena vakalesui lesu na noqu kaloko me10 na aua dua na siga.

Na gauna eda kauwaitaka kina, eda raica ni solia vei keda na Tamada Vakalomalagi na ivakadinadina veiganiti eso meda lewa kina na noda bula me rawa nida kilai Koya ka rawata na veivakalougatataki ni vakacegu kei na reki.

Mai vua na Parofita o Josefa Simici, sa vakadeitaka na Yalo ni Turaga, “Raica au na solia tale ga vei kemudou na ivakarau ni ka kecega mo dou kakua kina ni vakacalai; ni sa veilakoyaki voli ko Setani ena vanua, ka sa lako yani me temaki ira na veimatanitu.”¹

A lutu o Korio na meca i Karisito ena ivadi vakaoya, ena tawavakabauti ni Kalou kei na nona lako mai na Karisito. A vakadinadinataka vua na parofita o Alama, “Na veika kece sa vakaraitaka ni dua na Kalou; io, na vuravura, kei na veika kece sa tu kina, io, na kena toso, io, kei ira na vei vuravura kece ka veitosoyaki ena kedra itutu era vakadinadinataka ni dua na Dauniveibuli Cecere.”²

Ni cikeva tu o Korio me raica e dua na ivakadinadina ni bera ni qai vakabauta, a cakava o Alama me galu o koya. Ena vuku ni nona leqa, a vakatusa kina o Korio ni vakacalai koya na tevoro.

E sega ni gadreva meda vakacalai. Na cakamana ni bula yalomatua sa tu saraga oqo e matada. Nida dikeva na veika vakamareqeti ni lomalagi era serauni tu ena kalokalo kei na vuravura tawawiliki rawa sa vakauqeti na bula ni yalo vakabauta me cauraka, “Noqu Kalou, sa cecere o kemuni!”³

Io, sa bula na Kalou na Tamada Vakalomalagi, ka sa vakatakilai Koya vei keda ena veigauna kece ena vuqa na sala.

Kevaka meda vakacaucautaka, vakabauta, ka tomana tiko ga na noda lomana na Kalou, sa gadrevi na lomada me ciqoma na Yalo ni dina. A vakatavulica o Alama na vakabauta e liutaka na yalomalumalumu.⁴ A kuria o Momani ni sega ni rawa vua e dua ka sega ni “yalomalua ka yalomalumalumu” me vakabauta ka nuitaka me ciqoma tu na Yalo ni Kalou.⁵ A cauraka o Penijamini na Tui ke dua e vakabibitaka na lagilagi kei vuravura esa “meca ni Kalou.”⁶

Ni papitaisotaki tu me vakataucokotaki kina na bula dodonu dina ga ni sa dodonu vakaoti tu o Koya, a vakaraitaka o Jisu Karisito na yalomalumalumu vua na Kalou e iwalewale taumada ni Nona bula vakatisaipeli.⁷

Sa gadrevi vei ira na tisaipeli vou taucoko me yalomalumalumu tu vua na Kalou ena cakacaka vakalotu ni papitaiso. Ia, “ko ira kece ga sa vakamalumalumutaki ira vua na Kalou, ka gadreva me papitaiso, ka lako mai ena yalo raramusumusu kei na yalo bibivoro … mera na ciqomi ki na nona lotu ena papitaiso.”⁸

Na yalomalumalumu sa vakaduavatataka na loma ni tisaipeli kina veivutuni kei na talairawarawa. Sa qai rawa kina Yalo ni Kalou me vakavotuya na dina kina lomana, ka na raica na icurucuru.⁹

Na yalokaukauwa e vakavuna na kena sega ni vakataucokotaki na parofisai i Paula na Apositolo ena veigauna oqo:

“Nira na daulomani iraga vakataki ira, kocokoco, dautukutukuniira, dokadoka, dauveivakacacani, talaidredre vei ira na nodra qase, sega na yalo ni vakavinavinaka, sega na yalosavasava,

“Era na caca veiwekani, era na dauyalayala ka lasu tale, era na dauveibeitaki vakailasu, era na dausega ni rawa na yalodra, era na daucudrucudru, era na daucati ira na tamata vinaka.”¹⁰

Na veisureti ni Turaga meda vuli mai Vua sa veisureti ni vuki tani mai na ivadi ni veika vakavuravura ka yaco me vakataki Koya—yalovinaka ka yalomalua, yalomalumalumu. Sa rawa nida taura na Nona icolacola ka vakila ni sa mamada—ni sega ni colacola na bula vakatisaipeli ia sa ka ni reki, me vaka esa vakatavulici keda kina vakavinaka sara o Peresitedi Nelson.

Na vulici Karisito kei na Nona sala sa muataki keda meda kilai Koya ka lomani Koya.

Sa vakaraitaka o Koya ena vuku ni yalomalumalumu sa rawa vakaidina kina meda kila ka lomana na Kalou na Tamada ena lomada taucoko ka lomani ira na tani me vakataki keda, ka sega ni vo e dua na ka. Na Nona ilesilesi e vuravura, ka biuta ruarua kina o Koya na Lomana kei na Yagona ena icabocabo ni soro, esa ivakarau ni kena vakayacori na ivakavuvuli eso oqo e yavutaki tu kina na Nona kosipeli. Na ivakavuvuli ruarua esa irairai e taudaku ka sa baleta na ivakarau ni noda veimaliwai kei ira na tani, sega ni kena qarai na rawaka vakaikeda se lagilagi.

Na ka e vakasakiti kina oya ni gauna eda vakanamata kina na lomana na Kalou kei ira na tani, sa rawa nida dikeva na keda yaga vaka luve ni Kalou ena vakacegu kei na reki taucoko e vakavuna na ka oqo.

Sa yaco meda duavata kei na Kalou kei na tamata kecega ena loloma kei na veiqaravi. Sa rawa nida qai ciqoma na vakadinadina ni Yalo Tabu ni loloma taucoko oya, na vuanikau e tukuna o Liai ni sa “kamikamica sara, ka sa uasivi cake mai na vuanikau kecega au sa tovolea oti.”¹¹

Na isala vakatui a ciqoma o Karisito ena soli kei na cakacakataki ni Nona sasaga taucoko me tuva kina na ivakarau ni lomani Tamana kei keda oya me ciqoma na kaukauwa taucoko, io na ka kecega sa tiko vei Tamada, oya na bula vakacerecerei.¹²

E tekivu ivale na madigi ni bucina e lomada na loloma tawayalani ni Kalou kei na tani ena ivalavala tabu ni semati tu kei Tamada e veisiga ena masu vakaikeda ka vakavuvale ena yaca ni Luvena Duabau Ga, vulici Rau vata tu ena wiliki ni volanikalou vakaikeda ka vakavuvale, vakatabui vata ni siga ni Vakacecegu, kei na tauri ni volatara ni valetabu, ka vakayagataki vata wasoma nida rawata tu.

Ena noda dui tubu ena kilaka kei na lomana na Tamada kei na Luvena, sa tubu na noda vakavinavinaka kei na veilomani vakai keda. Na noda sasaga ni lomani ka qaravi ira na tani ena taudaku ni tikotiko sa vakalevutaki sara.

Na ka eda kitaka e vale sa idewadewa dina ni bula vakatisaipeli maqosa ka rekitaki. Na veivakalougatataki kamikamica duadua ni kosipeli vakalesuimai au sa marautaka tu kei na watiqu, o Gladys, ena neirau itikotiko esa vu mai na vulici ni nona kilai ka dokai na Kalou e vale kei na wasei ni Nona loloma kina neirau kawa.

Na bucini e vale ni lomana na Kalou kei na veiqaravi vakaikeda kei na nodra qaravi na tani e taudaku ni vale ena tubu tu kina na ivakarau ni loloma uasivi.

Sa matata oqo kina ivakarau ni veiqaravi vakatabui ena matanitu ni Kalou esa tuvai tu vei keda mai vei ira na parofita kei na apositolo bula ni Turaga. Eda sa duavata kei ira.

Sa qai rawa nida rai, curumi ira, vua na Turaga “ena vakasama keca,” me rawa nida “kakua ni vakatitiqa” ka “kakua ni rere.”¹³

Vakataki ira na parofita kei na apositolo bula ni Turaga, sa rawa nida lako ena “vakasinaiti ni lomada ena loloma uasivi vei ira na tamata kecega, kei … ira sa veitokani ena vakabauta, [ena] vakaiukuukutaki ni [noda] vakanananu ena ivalavala savasava; … [ka na] vakaukauwataki na [noda] vakabauta ena mata ni Kalou; ka na [drodrova] sobu [na yaloda] na ivunau vakabete … me vaka na tegu sa lutu mai lomalagi.”

Mai vei ira na parofita kei na apositolo bula ni Turaga, sa rawa nida lewena na iwirini ni valavala dodonu ni vakabauta e vaqaqacotaki ena veiqaravi vakatabui ka “[sa noda] itokani tudei [kina] na Yalo Tabu, [na noda] titoko [sa] titoko tudei sara ni yalododonu kei na dina; ia [na noda] lewa [sa] lewa e tawavakaiyalayala, ia ena yalo galala e [sa drodrovi keda] tu me sega ni mudu ka sega ni mudu.”¹⁴ Sai koya oqo na yalayala ni tuvatuva ni Tamada. Ena yaca i Jisu Karisito, emeni.