Na Caka Vinaka Me Noda iVakarau

Au na vakavinavinakataka tu ga na noqu ilesilesi ena Lotu e dau kauti au meu lai vakaitikotiko ena veimatanitu eso. Keitou raica ena veimatanitu yadua oqo na kena rabailevu ka totoka sara na kena tamata ena nodra dui itovo kei na ivakarau.

Sa tu na noda itovo kei na ivakarau ni bula ni tamata yadua, noda vuvale, se mai na itikotiko raraba eda tiko kina, eda nuitaka meda maroroya na kena e salavata kei na ivakavuvuli ni kosipeli. Na qaqacotaki ni itovo kei na ivakarau ni bula sa ka bibi ena noda sasaga meda tiko ena salatu ni veiyalayalati, kei na kena veivakataotaki, meda biuta tani.

Na itovo sai koya na vakayacori se na sala bulataki vakawasoma ni dua na tamata, itovo, se ivakarau ni bula. Vakawasoma, na veika eda vakasamataka ka cakava vakawasoma eda raica ni sa “noda ivakarau.”

Kerea meu vakamacalataka mada: o Patricia na watiqu lomani, e taleitaka na gunu bu ka dau kania na lewena. Ena neirau matai ni siko i Puebla, Mexico, keirau gole sara kina dua na vanua me voli na bu. Ni sa gunuva oti na bu, a kerei iratou o watiqu me ta na niu me kania na lewena. Ni sa kau mai, e sa damudamu tu. Ratou a vakamirika kina na boro! Bu kamica ka vakaboro! A duatani vei keirau oqo. E muri keirau qai kila ni duatani ga o keirau, ni keirau sega ni dau kana niu me vakaboro. E Mexico, e sega ni ka vou, sa kena ivakarau tu.

Dua tale na gauna, keirau a kana tiko mai Brazil kei na vica na itokani, ka soli sara mai na pea. Ni vakarau keirau vakamasimataka, ratou a kaya mai na itokani, “Na cava drau cakava? Keitou sa vakasukataka oti tu na pea!” Na pea vakasuka! E veicalati vei keirau qo. Ia keirau a qai kila e muri ni o keirau ga, ni keirau sega ni dau kana pea me vakasuka. Ia mai Brazil, e kena ivakarau tu me vakasuka na pea.

Na veika sa kena ivakarau ena rairai veicalati vei ira eso, e vakatau kina nodra itovo kei na ivakarau ni bula.

Na itovo kei na ivakarau ni bula cava sa matau kina noda bula?

A kaya o Peresitedi Nelson: “Nikua eda sa dau rogoca wasoma baleta ‘e dua na ivakarau vou.’ Kevaka o vinakata dina e dua na ivakarau tudei vou, Au sureti kemuni mo ni vagoleya na yalomuni, vakasama, kei na lomamuni vua na Tamada Vakalomalagi kei na Luvena o Jisu Karisito. Oqori me sa nomu ivakarau tudei vou” (“E Dua na iVakarau Tudei Vou,” Liaona, Nove. 2020, 118).

Eda sa sureti kece kina. Veitalia keda dravudravua se vutuniyau, vuli se tawavuli, qase se gone, tauvimate se bula vinaka. Sa sureti keda kece ena “ivakarau” ni noda bula me sa veivuke meda tiko ena salatu ni veiyalayalati.

E sega na matanitu sa tu kina na taucoko ni veika vinaka se taleitaki. Okoya oqo, me vaka e vakavulica o Paula kei na parofita o Josefa Simici:

“A ka kecega e vinaka, na ka e totoka, se rogorogo vinaka, se daudokai se vakaturaga, keimami sa gadreva na veika oqori” (Yavu ni Vakabauta 1:13

“Se na ka e daudokai, dou nanuma na veika oqo” (Filipai 4:8

Me kilai tiko ni oqo na vakamamasu, sega walega ni vakasama.

Au gadrevi keda kece meda taura e dua na gauna meda vakasamataka na noda itovo kei na sala sa uqeti tiko kina na noda vuvale.

Ena maliwa ni itovo totoka e dodonu me sa nodra ivakarau na lewe ni Lotu oya na va na ka oqo:

1. Na vulici ni ivolanikalou ni tamata yadua kei na vuvale. Mo saumaki vua na Turaga o Jisu Karisito, sa ilesilesi ni tamata yadua me vulica na kosipeli. Sa nodra ilesilesi na itubutubu mera vakavulica na kosipeli vei ira na luvedra (raica na Vunau kei na Veiyalayalati 68:25; 93:40

2. Masu ni tamata yadua kei na vakavuvale. Sa vakaroti keda na iVakabula meda dau masu e veigauna (raica na Vunau kei na Veiyalayalati 19:38). Nida masu eda sa veivosaki kina vakatamata yadua kei na Tamada Vakalomalagi ena yaca ni Luvena o Jisu Karisito.

3. Mo tiko ena soqoni ni sakaramede ena veimacawa (raica na 3 Nifai 18:1–12Moronai 6:5–6 Eda cakava meda vakananumi Jisu Karisito nida votai ena sakaramede. Ena cakacaka vakalotu oqo, era vakavouia na lewe ni Lotu na nodra veiyalayalati nira taura na yaca ni iVakabula, ka dau nanumi Koya, ka muria na Nona vunau (raica na Vunau kei na Veiyalayalati 20:77, 79

4. E oka kina na vakaitavi ena cakacaka ni valetabu kei na tuvakawa. Na cakacaka oqo ena duavata ka vauci kina na matavuvale kina bula tawamudu (raica na Vunau kei na Veiyalayalati 128:15).

Na cava eda vakila nida rogoca na veika e va oqo? Era sa tiki beka ni noda ivakarau ni bula?

E vuqa na itovo tale eso mera sa ivakarau ni noda bula eda sa susuga tiko, ka me qaqa ga na Kalou ena noda bula.

Eda na vakadeitaka vakacava na veika me noda ivakarau ni bula ena noda vuvale? Ena ivolanikalou, eda raica kina e dua na ivakaraitaki cecere; ena Mosaia 5:15 e kaya: “Au gadreva kina mo ni tudei sara ka kakua ni yavalati rawa, mo ni ia tikoga na cakacaka vinaka.”

Au taleitaka na vosa oqori, baleta nida kila ni veika kece sa noda ivakarau ni bula oya na kena eda cakava tikoga ka cakava tale. Kevaka eda sa tudei ka tawa yavalati rawa ena caka vinaka, na noda itovo sa yaco me salavata kei na ivakavuvuli ni kosipeli, ena vukea meda tiko ga ena salatu ni veiyalayalati.

A vakasalataka talega o Peresitedi Nelson: “Ciqoma na nomu ivakarau vou ena veivutuni e veisiga. Segata me savasava cake tikoga na nomu vakanananu, vosa, kei na ivalavala. Qarava na tamata Raicamatua na veika tawamudu. Vakalevutaka na nomu veikacivi. Se cava ga na nomu bolebole, taciqu kei na ganequ lomani, bulataka na veisiga yadua mo vakarautaki iko vakavinaka mo sotava na nomu Dauveibuli” (“A New Normal,” 118).

Ia sega tale ga ni veicalati vei watiqu, o Patricia, se o au na kania na niu e vakaboro—na ka dina, ni keirau taleitaka. Ia, na bula vakacerecerei sa ka vakalou sara mai na kena ikanakana; sa dua na ulutaga e sema kina bula tawamudu.

Sa noqu masu ni noda ivakarau ena vakatara meda sotava na ituvaki oya ni “tiko marau tawamudu” sa yalataki vei ira era maroroya na ivakaro ni Kalou (Mosaia 2:41) nida cakava oqo, eda rawa ni kaya kina, “Ka sa yaco ni keimami sa bula ena ivalavala ni bula marau” (2 Nifai 5:27

Au vakadinadinataki ira na turaga le 15 eda sa tokoni ira mera parofita, daurairai, ka daunivakatakila, vata kei Peresitedi Russell M. Nelson. Au vakadinadinataka ni dina na Lotu i Jisu Karisito ni Yalododonu Edaidai. Au vakadinata vakatabakidua ni o Jisu Karisito, na noda iVakabula ka Dauveivueti, ena yaca i Jisu Karisito, emeni.