Vakamalumalumutaka na Vuravura ka Kunea na Vakacegu

Kemuni na taciqu kei na ganequ lomani, au marau meu kidavaki kemuni ena mataka lagilagi ni Siga ni Vakacecegu oqo. Au dau vakananumi kemuni tu ga. Au kurabui ena sala ko ni dau yavala kina vakatotolo ni o ni raici ira na vakaleqai tu. Au tu ka qoroqoro ena vakabauta kei na ivakadinadina ko ni dau vakaraitaka e veigauna. Au tagicaka na momosi ni lomamuni, na vakanuinuikara, kei na nomuni lomaleqa. Au lomani kemuni. Au vakadeitaka vei kemuni, ni o Tamada Vakalomalagi kei na Luvena Lomani, o Jisu Karisito, e Rau lomani kemuni. Erau kila vakamatailalai na veika o sotava tiko, na nomu caka vinaka, nomu gagadre, kei na nomu masu ni kere veivuke. Au dau masuta wasoma, mo ni vakila na Nodrau loloma vei kemuni.

Na vakilai ni Nodrau loloma e bibi, me vaka ni da valuti tiko e veisiga ena so na itukutuku veivakarusai. Ena so na siga o dau diva beka mo dara nomui sulu ni moce, davo ena vakacegu, ka kerea edua me qai vakayadrati iko ni sa oti na veivakasosataki e yaco tiko.

Ia, taciqu kei na ganequ lomani, e vuqa sara na veika talei era tu mai liu. Ena veisiga ka lako mai, eda na raica na vei ivakaraitaki cecere duadua ni kaukauwa ni iVakabula ka se bera ni raica vakadua ko vuravura. Ena maliwa ni gauna oqo kei na Nona lesutale mai “ena kaukauwa kei na lagilagi cecere,”¹ ena vakatikora o Koya vei ira na yalodina na ivotavota e tawa wili rawa, na veivakalougatataki, kei na cakamana.

Ia, eda sa bula donuya tiko edua na gauna vereverea duadua ena itukutuku makawa kei vuravura. Na vereverea kei na veibolebole eso e vakavuna me ra vakila e levu na tamata me ra rawai ka vakaocai. Ia, vakasamataka mada e dua na ka sotavi walega qo ka rawa ni kilai vakamatata kina na sala edaru na kune vakacegu kina.

Donuya na dolavi raraba ni Valetabu e Washinton D.C., e a vakadinadinataka edua na lewe ni komiti ni dolavi raraba ni vale edua na veivosaki momona ni a tomani ira tiko e vica na dauvolaitukutuku rogolevu e loma ni valetabu. Eratou a mani curu cala mai kina edua matavuvale gone ena ilakolako ni vola itukutuku oqo. E a vakataroga tiko edua na dauvolaitukutuku na “ilakolako” ni dua na petereni ni valatebu ni toso curuma tiko na vei rumu eso ni valetabu. E a via kila o koya se ilakolako ena valetabu e vakatakarakarataka na nona lako curuma edua na tamata na ilakolako ni bula.

E a rogoca sara na veitalanoa edua na gonetagane lailai ena matavuvale. Ni ratou curu yani ki na rumu ni edaumeni na sarasara tiko, e a dusia sara na gonetagane na icabocabo ni soro, na vanua era dau tekiduru kina na tamata me veiyalayalati kei na Kalou, ka kaya, “O, sa totoka dina o ya. Oqo edua na vanua me ra vakacegu kina na tamata ena nodra ilakolako e valetabu.”

Au sega ni vakabauta ni a kila na gonetagane oya na bibi ni ka a tukuna. E rairai a sega ni kila o koya na kedrau isema veiwekani na caka veiyalayalati kei na Kalou e valetabu kei na yalayala veivakurabuitaki ni iVakabula mo:

“Dou lako mai vei au, koi kemudou vakaaduaga sa oca, ka colata na icolacola bibi, ia kau na vakacegui kemudou.

“Vakataqara vei kemudou na noqu ivua, ka vuli vei au; … ka dou na kunea kina na vakacegu ni yalomudou.

“Ni sa rawarawa na noqu ivua, ka mamada na noqu icolacola.”²

Taciqu kei na ganequ lomani, au rarawa ena vukudra era sa biuta na Lotu baleta era vakila ni nodra mai lewena e gadrevi kina vei ira e vuqa na ka. Era se bera ni raica rawa ni kena caka ka maroroi na veiyalayalati e vakarawarawataka cake na bula! Na tamata yadua e caka veiyalayalati ena tobu ni papitaiso kei na valetabu—ka maroroi ira—e vakalevutaka na nona rawa ni rawata mai na kaukauwa i Jisu Karisito. Yalovinaka vakasamataka vakatitobu na dina totoka oya!

Na kaukauwa vakalomalagi e isau ni maroroi veiyalayalati vata kei na Kalou—na kaukauwa me vaqaqacotaki keda meda tusaqata vakavinaka cake na veivakatovolei, veitemaki, kei na rarawa ni lomada. Na kaukauwa oqo e vakarawarawataka noda sala. O ira era bulataka na lawa cecere i Karisito era rawa ni rawata na kaukauwa e cecere cake. O koya gona, edua na mataqali vakacegu vakasakiti e dau nodra na maroroi veiyalayalati, ka soli vei ira ena vuku ni nodra veiwekani ena veiyalayalati kei na Kalou.

Ni bera nona soli Koya na iVakabula ki na rarawa e Kecisemani kei Kalivari e a vakaraitaka o Koya vei ira Nona i Apositolo, ni “Dou na kunea e vuravura na rarawa: ia mo dou vakacegu; au sa vakamalumalumutaki vuravura.”³ E muri e mai vakamasuti keda yadudua meda cakava vakakina ena Nona tukuna, “Au sa vakarota mo dou rawaivuravura.”⁴

Kemuni na taciqu kei na ganequ lomani, na noqu itukutuku vei kemuni nikua sai koya oqo, ena vuku ni sa vakamalumalumutaka oti na vuravura lutu oqo na Turaga ko Jisu Karisito, baleta nona sorovaki keda vakayadudua, o iko talega o rawa ni vakamalumalumutaka na vuravura ka sinai tu ena ivalavala ca, ka dau veivakaocai.

Baleta ni sa vueti keda vakayadudua na iVakabula mai na malumalumu, caka cala, kei na ivalavala ca ena nona veisorovaki tawayalani, ka baleta ni a vakila o Koya na vei mosi kece, lomaleqa kei na icolacola bibi o sa sotava oti.⁵ ni o veivutuni vakaidina ka qara na Nona veivuke, o na rawa ni rawa na bolebole ena vuravura veilecayaki oqo.

E rawa ni o rawa na ivalavala ca ka dau vakaoca na yaloda kei na lomada, ka oka kina na dokadoka, viavialevu, cudrucudru, tawasavasava, veicati, kocokoco, vuvu kei na rere. Dina ni tu na veivagoleitani kei na vakatanitaki ni dina ka wavoliti keda tu, o na rawa ni kunea na vakacegu dina—oya na veivakacegui kei na sautu—e loma sara ga ni nomu leqa e dau veivakacudrui.

Na dina bibi oqo e uqeta cake e tolu na taro taumada:

iMatai, na cava na ibalebale ni vakamalumalumutaka na vuravura?

iKarua, eda cakava vakacava?

Kei na ikatolu, e vakalougatataka vakacava na noda bula na noda vakamalumalumutaki vuravura?

Na cava na ibalebale ni vakamalumalumutaka na vuravura? E kena ibalebale me vakamalumalumutaki na veitemaki ni galeleta vakalevu na veika ni vuravura oqo mai na veika ni Kalou. E kena ibalebale na vakararavi vakalevu cake ki na ivunau i Karisito mai na vakararavi ki na vuku ni tamata. E kena ibalebale me rekitaki na dina, vunauci na veivakacalai ka yaco mo “dau muri Karisito ena yalomalumalumu.”⁶ E kena ibalebale mo tarovi iko mai na dua na ka ena vakaseva tani na Yalo. E kena ibalebale meda lomasoli me “biuta tani” na ivalavala ca eda dau taleitaka.⁷

Na vakamalumalumutaki ni vuravura e sega ni kena ibalebale ni da sa uasivi sara ena bula oqo, se era na yali vakasauri na nomu leqa kece—baleta ni na sega ni vakakina.Ka sega talega ni kena ibalebale ni o na sega ni caka cala tiko. Ia na vakamalumalutaki vuravura e kena ibalebale ni na rawa ni vakalevutaki nomu rawa ni vorata na ivalavala ca. O na vakila na yalomalumalumu e lomamu ni tubu cake nomu vakabauti Jisu Karisito.⁸ Na vakamalumalumutaki vuravura e kena ibalebale na tubu ni nomu lomana na Kalou kei na Luvena lomani, mai na nomu lomana edua tale na tamata se dua tale na ka.

Eda na vakamalumalumutaka vakaevei na vuravura? E vakatavulica vei keda o Tui Penijamini na kena sala. E a vakatavulica “ni sa meca ni Kalou na tamata vakavuravura” ka na vaka tu kina me sega ni mudu ka “vakavo ke sa talairawarawa ki na veivakayarayarataki ni Yalo Tabu, ka biuta tani na tamata vakavuravura ka yaco me yalododonu ena vuku ni veisorovaki i Karisito na Turaga.”⁹ E veigauna yadua o vaqara ka muria kina na veiuqeti ni Yalo, ena veigauna yadua o cakava kina edua na ka vinaka—se na veika e sega ni dau cakava na “tamata vakavuravura”, o sa vakamalumalumutaki vuravura tiko kina.

Na vakamalumalumutaki vuravura e sega ni dua na ka me na yaco ena loma ni dua se rua ga na siga. Ena yaco ena loma ni dua na gauna ni bula taucoko ni da katona vakawasoma na ivakavuvuli i Karisito. Eda vakatorocaketaka na vakabauti Jisu ena veivutuni e veisiga ka maroroya na veiyalayalati ena solia vei keda na kaukauwa. Eda tikoga ena salatu ni veiyalayalati ka vakalougatataki ena kaukauwa vakayalo, ivakatakila yadua, vakabauta e vakalevutaki, kei na nodra veiqaravi na agilosi. Na bulataki ni ivunau i Karisito e rawa ni vakavurea edua na kaukauwa levu, ni ivakarau ni bula qaqa, ka bulia na igu vakayalo ena noda bula.¹⁰

Ni da sasaga me bulataka na vei lawa cecere eso i Jisu Karisito, ena tekivu me veisau na lomada kei na noda ivakarau sara ga ni bula. Na iVakabula ena laveti keda cake mai na idre ni vuravura lutu oqo, ena nona vakalougatataki keda ena loloma e cecere cake, yalomalumalumu, lomasoli, yalololoma, bula vakaivakarau, sautu kei na vakacegu.

O na nanuma ni oqo e vaka e cakacaka levu vakayalo mai na vakacegu. Ia oqo na dina levu: Ni vakatututaka ko vuravura ni kaukauwa, iyau, na rogo kei na gagadre ni itovo vakayago ena kauta mai na marau, e sega sara! Era sega ni rawata! Na ka ga era vakavurea mai sai koya edua na isosomi tawayaga ni “ituvaki ni bula kalougata ka mamarau” e nodra o ira “era sa muria na ivakaro ni Kalou.”¹¹

Na ka dina sai koya ni sa ka ni oca cake na vaqara na marau ena vanua o na sega vakadua ni kunea kina! Ia ke o vauci iko vei Jisu Karisito ka cakava na cakacaka vakayalo e gadrevi me vakamalumalumutaki kina na vuravura, o Koya duadua ga e tiko vua na kaukauwa me laveti iko tani mai na idre ni vuravura oqo.

Sa na vakalougatataka vakacava na noda bula na vakamalumalumutaki ni vuravura? E matata na kena isau: Noda cakava edua na veiyalayalati ni veiwekani vata kei na Kalou, ena vauci keda vei Koya ena sala ena rawarawa kina na veika keceme baleta na bula. Yalovinaka ni kua ni nanumi au cala: Au sega ni tukuna tiko ni caka veiyalayalati e vakarawarawatakana bula. Ia mo namaka na veisaqasaqa, baleta na meca e sega ni vinakata mo na kunea na kaukauwa i Jisu Karisito. Ia ni o vauci iko vua na iVakabula e kena ibalebale ni o na rawata Nonakaukauwa kei na kaukauwa ni Nona veivueti.

iVakatakilakila

Peresitedi Ezra Taft Benson

Au via vakadeitaka edua na ivakavuvuli bibi nei Peresitedi Ezra Taft Benson: “O ira na tagane kei na yalewa ka ra solia na nodra bula vua na Kalou, era na kunea ni o Koya ena rawa ni cakava e levu sara na ka ki na nodra bula, mai na nodra sasaga ga vakai ira. O Koya ena vakatitobutaka na nodra reki, vakarabailevutaka na nodra rai, vakabula na nodra vakasama, … vueta cake na yalodra, vakalevutaka na nodra kalougata, vakavuqataka na nodra madigi, vakacegui ira, solia mai eso na nodra itokani, ka sovaraka vei ira na vakacegu.”¹²

Na ivotavota tawa vakatauvatani rawa oqo e muri ira era vaqara na veitokoni nei lomalagi me vukei ira me vakamalumalumutaka na vuravura oqo. Me rawati oqo, au vakatetea vei ira na lewe ni Lotu taucoko na kerekere vata au a solia vei ira na noda itabagone qase cake ena vula o Me sa oti. Au a uqeti ira ena gauna oya—kau masuti kemuni oqo—moni karona na nomuni ivakadinadina kei Jisu Karisito kei na Nona kosipeli. Cakacakataka. Susuga me na tubu kina. Vakania ena dina. Kua ni vakaduka ena nodra vuku lasu na tagane kei na yalewa tawa vakabauta. Ni o tomana tiko mo vaqaqacotaka na nomu ivakadinadina kei Jisu Karisito me ka bibi duadua vei iko, o na qai sarava na cakamana ena yaco ki na nomu bula.¹³

Noqu vakamamasu vei kemuni ena mataka ni kua sai koya mo ni kunea na vakacegu mai na veika kaukauwa, veilecayaki, kei na rarawa ni vuravura oqo ena kena vakamalumalumutaki na vuravura oqo ena nomuni veiyalayalati vata kei na Kalou. Vakatara vei Koya me kila ena nomuni masu kei na ivalavala ni sa lomamu dina mo vakamalumalumutaka na vuravura. Kerei Koya me vakararamataka nomu vakasama ka vakauta mai na veivuke o gadreva. E veisiga yadua, vola na veivakanananu e yaco mai vei iko ni o masu, ka qai cakacakataki ira ena nomu igu. Dau tiko vakalevu e valetabu ka vaqara mo kila vakavinaka na sala e vakavulici iko kina na valetabu mo rawa kina na veibolebole ena vuravura lutu oqo.¹⁴

Me vaka au sa tukuna oti mai liu, na vasokumuni nei Isireli e sai koya na cakacaka bibi duadua ka yaco tiko e vuravura nikua. E dua na tiki bibi ni vakasokumuni oqo sai koya na nodra vakarautaki edua na matatamata era na rawata, tu vakarau, ka kilikili me ciqoma na Turaga ena Nona lesutale mai; edua na matatamata era sa digitaki Jisu Karisito oti mai na vuravura lutu oqo; edua na matatamata era marautaka na nodra digidigi me bulataka na vei lawa cecere tabu eso i Jisu Karisito.

Au Kerei kemuni vakabibi na taciqu kei na ganequ lomani mo ni yaco mo ni matatamata dau cakadodonu oqo. Vakamareqeta ka rokova na nomuni veiyalayalati mai na vei yalayala tale eso. Ni o vakatara na Kalou me gumatua ena nomu bula, au yalataka vei iko na sautu e levu cake, na lomadei, na reki kei na io, na vakacegu.

Ena kaukauwa vakai apositolo tabu ka vakatikori vei au, au vakalougatataki kemuni ena nomuni sasaga me vakamalumalumutaka na vuravura oqo. Au vakalougatataki kemuni moni vakalevutaka nomuni vakabauti Jisu Karisito ka vulica vaka vinaka cake na sala me vakayagataki kina Nona kaukauwa. Au vakalougatataki kemuni moni rawa ni kila na dina mai na cala. Au vakalougatataki kemuni moni kauwaitaka vakalevu cake na veika ni Kalou mai na veika ni vuravura. Au vakalougatataki kemuni moni raica nodra gagadre na tu wavoliti iko ka vakaukauwataki ira o lomana. Baleta ni a vakamalumalumutaka o Jisu Karisito na vuravura oqo, o na rawata talega. Au sa vakadinadinataka ena yaca tabu i Jisu Karisito, emeni.