Na Susugi kei na Wasei ni Nomu iVakadinadina

Na veisau ni bula e dau yaco mai vakavuqa ka sega ni namaki, ena gauna mada ga eda a se gone kina. Ni vakatarai au meu wasea edua na italanoa baleti Kevin ena vuli torocake, ka digitaki me laki tiko ena dua nodra soqo na iliuliu ni gonevuli ena dua tale na yasa ni vanua, me vaka e talanoataka o koya.

“A yaco mai na noqu gauna ena laini, ka kerea mai na vunivola ni volayaca na yacaqu. E a raica na nona lisi ka kaya, ‘Oi o iko na cauravou mai Uta.’

“‘E kena ibalebale ni o au duadua ga?’ Au a taroga.

“‘Io, o iko duadua ga.’ E a solia vei au na itokaniyaca ka volai toka e ruku ni yacaqu na ‘Uta’. Niu vakabira tiko, au vakila ni vaka au sa vakatakilakilataki.

“Au a vodo ki na rumu ni ikabakaba livaliva ni otela kei na lima tale na gonevuli ka vaka itokaniyaca me vaka na noqu. ‘E, o iko mai Uta. O iko o Momani?’ a taroga edua na gonevuli.

“Au vakila ni sega ni dodonu meu tiko e kea kei ira na iliuliu gonevuli mai na veiyasana tale eso ni matanitu. ‘Io, au a sauma yani vakamalua.

“‘Oi kemuni o ni vakabauti Josefa Simici, ka a kaya ni raici ira na agilosi. O vakabauta dina oya se sega?’

“Au a sega ni kila na ka meu tukuna. Era a wadravi au kece tu mai na gonevuli ena loma ni rumu ni ikabakaba livaliva. Au se qai yaco ga mai, era sa nanuma kece niu duatani. Au a ririko vakalailai ia au a qai kaya,‘Au kila ni o Josefa Simici e a parofita ni Kalou.’

“E a lako beka maivei o ya? Au a taroga lo. Au sega ni kila ni a tiko vei au. Ia au a vakila na vosa ni ra dina.

“‘Io, e tukuni ni o kemuni edua ilawalawa vakabauta vakatani,’ e a kaya.

“E kea sa mai dua tu yani na veigaluvi ni tadola mai na katuba ni rumu ni ikabakaba livaliva. Ni keimami taura mai na neimami kato, o koya e a taubale sobu ga yani ena olo ka dredre.

‘Qai dua na domo mai dakuqu a taroga, ‘E, e sega beka ni tiko edua tale na nodra i Vola tabu na Momani?’

“‘O sega. Se baci dua tale. Au a vuki ka raici Christopher, edua tale na gonevuli ka tiko ena ikabakaba livaliva vata kei au.

“‘E vakatokai na iVola i Momani,’ au a kaya, ena noqu sega ni via tomana na veivosaki. Au a tomika cake na noqu kato ka tekivu taubale sobu ena olo.

“‘Oqori beka na ivola a vakadewataka o Josefa Simici?’ e a taroga.

‘Io, sai koya,’ au a sauma. Au a taubale tikoga, meu levea na veivakamaduataki.

“‘O kila beka na vanua au rawa ni kunea kina edua?’

“E a votu mai vakasauri vei au edua na ivolanikalou au a vulica ena semineri. ‘Niu sa sega ni maduataka na itukutuku vinaka kei Jisu Karisito.’¹ Niu vakasamataka oqo, au a madua niu a vakamaduataki.

“E a sega ni yali vei au na ivolanikalou oya ena vo ni macawa. Au a sauma na levu ni taro au rawa ni sauma me baleta na Lotu, kau kunea kina e levu noqu itokani.

“Au kunea niu a cibitaka na noqu lotu.

“Au a solia vei Christopher edua na iVola i Momani. E a qai vola mai vei au, ni a sureti rau na kaulotu ki nona vale.

“Au a vulica meu kua ni madua ni wasea na noqu ivakadinadina.”²

Au sa vakauqeti ena yalodoudou nei Kevin me wasea nona ivakadinadina. Edua na yalodoudou ka tomani e veisiga mai vei ira na lewe ni Lotu yalodina e vuravura taucoko. Niu wasea na noqu vakanananu, au sureti iko mo vakananuma na va na taro oqo:

1. Au kila vakamatata beka se cava na ivakadinadina?

2. Au kila beka na sala meu wasea kina noqu ivakadinadina?

3. Na cava so na ivakatatao ni noqu wasea na noqu ivakadinadina?

4. Meu na maroroya vakacava na noqu ivakadinadina?

Na nomu ivakadinadina edua na iyau talei, ka dau vakilai me vaka edua na katakata vakayalo. Na veika e vakilai oqo era dau yaco mai vakamalua ka vakatokai me domo lailai, malumu.³ Sai koya na nomu vakabauta se kila na dina, ka soli mai me ivakadinadina vakayalo ena veivakayarayarataki ni Yalo Tabu. Na rawati ni ivakadinadina oqo ena veisautaka na ka o tukuna kei na nomu ivalavala. Na veika bibi me baleta na nomu ivakadinadina, e vakadeitaka na Yalo Tabu, e oka kina na:

• Na Kalou e Tamamu Vakalomalagi; ka o sa Luvena. O Koya e lomani iko.

• O Jisu Karisito e bula. O Koya e Luve ni Kalou bula ka nomu iVakabula ka Dauniveivueti.

• O Josefa Simici edua na parofita ni Kalou ka kacivi me vakalesuya mai na Lotu i Jisu Karisito.

• Na Lotu i Jisu Karisito ni Yalododonu Edaidai e Lotu ni Kalou ka vakalesui mai ki vuravura.

• Na Lotu vakalesui mai i Jisu Karisito e liutaki mai vua e dua na parofita bula nikua.

O wasea nomu ivakadinadina ni o wasea na veika o vakila vakayalo vei ira na tani. Ni o dua na lewe ni Lotu, na madigi mo wasea nomu ivakadinadina ena vosa e yaco ena gauna ni soqoni vakadonui ni Lotu se ena ivakarau ni veitalanoa yadudua, kei na matavuvale, itokani, kei ira talega na tani.

E dua tale na sala mo wasea nomu ivakadinadina sai koya ena ivakarau ni bula dodonu. Na nomu ivakadinadinataki Jisu Karisito e sega walega ni veika o kaya—e veika kece baleti iko.

E veigauna kece o cavuta kina nomu ivakadinadina ka vakaraitaka ena nomu ivalavala na nomu yalayala mo muri Jisu Karisito, o sa sureti ira tiko na tani me ra “lako mai vei Karisito.”⁴

O ira na lewe ni Lotu kece era tu me ivakadinadina ni Kalou ena veigauna kecega, ena veika kecega, kei na veivanua kecega.⁵ Na madigi me vakayacori oqo ena initaneti ena vakayagataki ni nomu itukutuku veivakauqeti, se wasea na itukutuku e veilaveti era vakarautaka na tani, e tawayalani. Eda soli ivakadinadina ni da loloma, veiwasei, ka veisureti ena initaneti. Na veika o vakaraitaka ena tweeter, na itukutuku o vakauta, kei na veika o vakabira ena volamata ena cecere, ka vakatabui cake mai na kena inaki, ni o vakayagataka na sala ni vakau itukutuku raraba me vakaraitaka na sala sa veisautaka na nomu bula na kosipeli i Jisu Karisito.

Na ivakatatao ni nomu wasea nomu ivakadinadina ena rawa ni oka kina na sega ni kila na ka mo tukuna. E a wasea o Matthew Cowley, e dua na iApositolo taumada na veika a sotava ni biubiu ena dua na ilakolako vakaulotu ki Niu Siladi me yabaki lima ni sa yabaki 17:

“Au na sega sara ni guilecava na masu nei tamaqu ena siga au a biubiu kina. Au se bera niu rogoca e dua na veivakalougatataki totoka ena noqu bula taucoko. Qai tarava nona iotioti ni vosa vei au ena siteseni ni sitima ni vanua, ‘Noqu tagane, o na lako yani ena kaulotu … ka so na gauna o na kacivi kina, o na nauma ni o sa vakarau vinaka tu, ia ni o tucake, ena lala vakadua na nomu vakasama.’ Sa yaco vakavica vei au na veika oqori.

“Au a kaya,‘Na cava mo cakava ni lala nomu vakasama?’

“E a kaya, ‘Mo tucake ena lomakatakata ni yalomu, ka vakadinadinataka ni o Josefa Simici e a parofita ni Kalou bula, ena qai tovure mai na veivakanananu ki na nomu vakasama kei na vosa ki gusumu … kei na lomadra yadua na vakarorogo.’ Me vaka ni dau lala tu ga noqu vakasama, ena gauna ni noqu … kaulotu … , e a solia kina vei au na madigi meu wasea na ivakadinadina ni ka cecere duadua a yaco ena itukutuku kei vuravura ena taudaku ni nona mate ena kauveilatai na iVakavuvuli. Tovolea ena so na gauna, gonetagane kei na goneyalewa. Ke sega ni dua tale na ka o rawa ni kaya, vakadinadinataka ni o Josefa Simici, a parofita ni Kalou, ena qai tovure ki na nomu vakasama na itukutuku makawa kece ni Lotu.”⁶

O Peresitedi Dallin H. Oaks a wasea vakakina, “Ni ivakadinadina eso era na rawati vakavinaka kevaka me ra wasea yani ka sega ni laki masulaki tale tiko me ra yaco mai.”⁷ Na Yalotabu e dau vakadinadina vua ka vosa vakakina vei koya ka vakarorogo.

E dua tale na itatao, me vaka e vakabibitaki ena italanoa nei Kevin, sai koya na rere. Me vaka e vola o Paula vei Timoci:

“Ni sa sega ni solia mai vei keda na Kalou na yalo ni rere; a yalo ni kaukauwa ga, kei na yalololoma. …

“O koya mo qai kakua ni maduataka na kena itukutuku ni noda Turaga.”⁸

Na rere e sega ni lako mai vua na Turaga ia mai vua na meca. Ni tiko na vakabauta, me vaka a tiko vei Kevin, ena rawa kina vei iko mo rawa na veika e vakilai oqo ka wasea kina ena yalo galala na lomamu.

Au vakabauta ni ivakadinadina e tiki yaga ni noda bula, ia, me rawa ni da maroroya ka vakatorocaketaka, o Alama a vakavulica ni dodonu meda qarava vinaka mada na [noda ivakadinadina].⁹ Ni da cakava vakakina, “ena ti na wakana, ka tubu cake ka vua.”¹⁰ Ke sega oqo “sa na raqosa sara.”¹¹

O ira yadua na lewe ni Mataveiliutaki Taumada lomani era sa vakarautaka vei keda na idusidusi ni kena maroroi edua na ivakadinadina.

O Peresitedi Henry B. Eyring e vakavulica ena loloma ni “kanamagiti mai na vosa ni Kalou, na masu ena yalodina, kei na talairawarawa ki na ivakaro ni Turaga e dodonu me ra bulataki vakatautauvata ka tomani tiko me tubu ka vuavuai vinaka kina na nomu ivakadinadina.”¹²

O Peresitedi Dallin H. Oaks e vakananumi keda ni ke da via maroroya tiko na noda ivakadinadina, “e dodonu me da vakaivotavota ena sakaramede e veimacawa.(raica na V&V 59:9) me da kilikili kaya na yalayala talei me na ‘dau tiko ga kina kei [keda] na Yalona’ (V&V 20:17).”¹³

Ka se qai veivakasalataki wale tikoga qo ena yalololoma o Peresitedi Russell M. Nelson:

“Vakania [nomu ivakadinadina] ena dina. …

“…Susugi iko ena nodra vosa na parofita ni gauna makawa kei na gauna oqo. Kerea vua na Turaga me vakavulici iko mo rogoci Koya vakavinaka cake. Vakayagataka e levu na gauna e valetabu kei na cakacaka ni tuvakawa.

“… Cakava nomu ivakadinadina me ka bibi duadua vei iko.”¹⁴

Taciqu kei na ganequ lomani, au yalataka ke o na kila vakavinaka sara se cava na ivakadinadina, ni o wasea, o na rawa ni vorata na veivakataotaki ni lomalomarua kei na rere, ka na rawa kina vei iko mo susuga ka maroroya na iyau talei oqo, na nomu ivakadinadina.

Eda kalougata ni tiko na ivakaraitaki tawa wili rawa nodra na parofita makawa kei na gauna oqo ka ra tukuna ena doudou na nodra ivakadinadina.

Ni oti na nona mate na Karisito, e a tucake o Pita ka vakadinadinataka:

“Mo ni kila kecega, … ni sa yacai Jisu Karisito na kai Nasareci, ko koya kemuni a vakota ki na kauveilatai, ko koya sa vakatura cake tale na Kalou mai na mate, … sa tu kina ko koya oqo e matamuni. …

“… Ni sa sega sara na yaca e ruku i lomalagi sa soli kivei ira na tamata, me da bula rawa kina.”¹⁵

Ni oti nona vunautaka na vakabauta o Alama, e a tukuna vakaukauwa o Amuleki: “Au na qai vakadinadinataka vakataki au vei kemuni na dina ni veika oqo. Raica, au kaya vei kemuni, niu kila ni na lako yani vei ira na luve ni tamata na Karisito, … ia ena qai sorovaka ko koya na ivalavala ca ni vuravura; ni sa tukuna na Turaga na Kalou.”¹⁶

Ni oti na nodrau raica o Josefa Simici kei Sidini Rikitoni na raivotu lagilagi ni iVakabula sa tucaketale, rau a vakadinadinataka:

“Ia oqo ni sa oti na ivakadinadina kece sara e tukuni me baleti koya, sai koya oqo na ivakadinadina, na kena iotioti me yacova edaidai, me keirau tukuna me baleti koya: Ni bula dina tiko!

“Ni keirau a raici koya, ni sa tiko ena liga imatau ni Kalou; keirau sa rogoca tale ga na domo sa tukuna ni sai koya na Le Duabau ga nei Tamana.”¹⁷

Kemuni na taciqu kei na ganequ, au sureti kemuni mo ni qara na madigi mo ni wasea nomuni ivakadinadina ena vosa kei na ivalavala. Edua na madigi vakaoqori a yaco mai vei au wale tikoga oqo, ni oti e dua na sota kei na turaga ni koro ni dua na koroturaga ena Ceva kei Amerika, e nona valenibose kei ira na vakaitutu lelevu ni matanitu. Ni mai cava ena dua na veimaliwai vinaka, au a nanuma ena lomalomarua ni dodonu meu wasea noqu ivakadinadina. Niu muria na veiuqeti, au a cavuta edua na ivakadinadina ni o Jisu Karisito na Luve ni Kalou bula ka iVakabula kei vuravura. E a veisau ena gauna oya na veika kece. Na yalo e loma ni rumu e a sega ni cakitaki rawa. E vaka era a tarai kece. “Na Dauveivakacegui … sa dau tukuni Tamada kei na Luvena.”¹⁸ Au vakavinavinakataka noqu yalodoudou meu wasea na noqu ivakadinadina.

Ni yaco mai e dua na gauna vakaoqo, taura ka ciqoma. O na vakila na veivakatakatai ni Dauniveivakacegui e lomamu ni o cakava.

Au solia na noqu ivakadinadina ka vakadinadinataka vei kemuni, ni Kalou e Tamada Vakalomalagi, o Jisu Karisito e bula, kei Na Lotu i Jisu Karisito ni Yalododonu Edaidai e Lotu ni Kalou e vuravura ni kua ka liutaki mai vua na noda parofita lomani, o Peresitedi Russell M. Nelson. Ena yacai Jisu Karisito, emeni.