Taracake na Bula ni Tataqomaki mai na Vunica

E na veiyabaki sa oti yani mai na ivatavata ni vosa e na Vale ni Koniferedi oqo, e da dau mai ciqoma kina na ivakasala vakasakiti, na veivakauqeti, na ivakavuvuli, kei na ivakatakila. E na vuqa na gauna, o ira na vosa e ra vakatauvatana na nodra kilaka vakavuli kei na cakacaka me ra vakavulica kina vakamatata ka vakaukauwa na ivakavuvuli ni kosipeli i Jisu Karisito.

E na sala oqo, me ivakaraitaki, e da sa mai vulica kina na waqavuka kei na vuka, oya ni dua na veisau lailai sara e rawa ni na muataki keda ki na dua na vanua yawa sara mai na noda inakinaki taumada.¹ Na sala vata talega oqo, e da vulica kina na kena vakatauvatani na cakacaka ni uto ni yagoda ki na veisau kaukauwa e dau gadreva na utoda vakayalo me da sauma kina na nona veisureti na Turaga me da muri Koya.²

Nikua, e na yalo malumalumu au na via vakuria e dua na veivakatauvatani e vakauqeti mai na noqu vanua ni vakavakarau vakacakacaka. Au na vosa tiko e na vuravura vaka ijinia ni veivakatorocaketaki. Mai na noqu tekivu vuli e na univesiti, au dau tatadrataka tu na siga au na vakacavara kina na veika e gadrevi me‘u na rawa ni taura kina na kalasi koya me na vakavulici au e na droinitaki ni vei vale lelevu kei na vatuka e nanumi ni na “vorata na uneune.”

Sa tadu mai na siga me‘u sa na vakaitavi kina e na imatai ni kalasi e na ulutaga oqo. iMatai ni vosa mai vua na parofesa e va oqo: “O ni sa maqusa dina mo ni tekivuna na kalasi ni droinitaki ni vatuka koya na vorata na uneune,” keimami sa deguvacu sara na lewelevu. Tomana sara o parofesa, “vosota sara me‘u na vakaraitaka ni e sega ni rawa oqo, e sega ni rawa ni‘u vakavulici iko mo droinitaka e dua na vale levu koya na sega, se ‘vorata’, se saqata e dua na uneune. E sega ni vakaibalebale baleta na uneune e na yaco ga, kevaka e da taleitaka se sega.”

Vakuria tale o koya, “Na veika e rawa ni‘u na vakavulica sa ikoya na nomu na droinitaka e dua na vatuka koya e na vorata na uneune, oya na vatuka koya e rawa ni vorata na revurevu ni uneune, me na tudei tiko na kena yavu ka na sega ni levu sara na kena veivakacacani, me na rawa ni tomana tiko ga kina na inakinaki ni kena a tara.”

E soqona vata na ijinia na matanivika me na vakarautaka na kena raba kei na balavu, na ivakatagedegede, kei na ituvaki ni yavu, kolomu, idoka, vatavata simede, kei na so tale na gacagaca ni vatuka koya e droinitaki mai. Na kedra macala e na qai vakadewataki me iyavu droini kei na veika vakamatailalai vakamatai, koya me na vakamuria vakamatailalai sara na matai me na rawa ni vakamatana ka rawati kina na isutu ni kena droinitaki kei na kena taraicake.

E dina ga ni sa mai oti yani e sivia e 40 na yabaki mai na siga au a tiko kina e na imatai ni kalasi ni ijinia ni tataqomaki mai na uneune, au se nanuma tikoga na gauna au a sa qai mai kila kina vakatitobu, ka vakamaucokona na kena bibi me bula tiko na ivakavuvuli oqo e na vatuka au na droinitaka e na noqu bula vakacakacaka mai muri. E sega walega ni oya, ia e bibi duadua—ni na tudei tu vakadua e na taraicake tiko ni noqu bula kei na nodra o ira au na rawa ni veivakauqeti ki na nodra bula.

E da kalougata ni rawa ni da vakararavi ki na noda kila me baleta na yavu ni vakabauta e a tauyavu taka na Tamada Vakalomalagi, me da kila na kosipeli vakalesui mai i Jisu Karisito, kei na noda vakararavi ki na veidusimaki e vakatakilai mai vei ira na parofita bula! O ira taucoko oya e oka kina na droinitaki ni “yavu” kei na “gacagaca matailalai” vakalou ka vakavulica na sala ni kena taraicake na bula marau—na bula ka na taqomaki keda mai na ivalavala ca, taqomaki keda mai na veitemaki, taqomaki keda mai vei Setani, o koya e sasaga sara tiko vakaukauwa me vakacala na noda inakinaki tawamudu kei na Tamada Vakalomalagi ka vaka kina o ira na noda vuvale lomani.

Na iVakabula vakai Koya, e na itekivu ni nona veiqaravi, e a “dau veretaki koya na tevoro.”³ Ia e a vueti vakasakiti cake mai o Jisu mai na veivakatovolei oya. E vakacava beka na kena vinaka vua kevaka me vorati Setani se me saqata na veitemaki? Na vu ni nona lamata rawa mai e na qaqa o Jisu mai na gauna ni veibolei dredre oya sa ikoya na Nona vakavakarau vakayalo, ka vakatarai Koya me tiko e na dua na ituvaki ka na taqomaki koya mai na veitemaki ni Vunica.

Na veika cava e so e a vukea na iVakabula me vakarautaki Koya ki na veigauna bibi vaka oya?

iMatai, a lolo o Koya me 40 na siga kei na 40 na bogi, na lolo ka a rairai sala vata tu kei na masumasu vakawasoma. E dina, ni malumalumu tu vakayago, ia e kaukau tu na Yalona. Dina ga, ni da kalougata ni sega ni kerei me balavu tu va oya na noda lolo—ia e na loma ni 24 na aua ka vakadua e na loma ni vula—na lolo e kauta mai vei keda na kaukauwa vakayalo ka vakarautaki keda me da tataqomaki mai na vei bolebole eso ni bula.

Kena ikarua, e na vuku ni veitemaki e a sotava na iVakabula, e da raica ni dau sauma lesu o Koya vei Setani mai na ivolanikalou, cavuqaqataki ira, ka vakayagata e na kena gauna donu.

E na nona temaki Koya o Setani me vukica na vatu me madrai me rawa ni oti kina na Nona viakana mai na Nona lolo dede voli, a sa vosa na Turaga ka kaya vua, “Sa volai, e na sega ni bula na tamata e na madrai duaduaga, sa bula ga e na vosa kecega sa lako mai na gusu ni Kalou.”⁴ Oti oya, e na nona tiko na Turaga e na ulu ni valetabu, a saga na tevoro me temaki Koya me vakaraitaka na Nona kaukauwa, a qai sauma na Turaga e na nona vakatulewa ka kaya: “Sa volai talega mo kakua ni vakatovolei Jiova na nomu Kalou.”⁵ Na ikatolu ni nona veitemaki o Setani, a sauma lesu ko Jisu ka kaya, “ni sa volai, mo vakarokoroko vei Jiova na nomu Kalou, ia mo qaravi koya duadua ga”⁶

E na gauna e yaco kina e dua na uneune e dau biuta tu mai na kena revurevu e na ivatuka saraga e a droinitaki ka taraicake e na ivakarau vakasakiti—na revurevu me vaka na kakaca ni lalaga, na lutu ni yaya ni vale, se na dela ni vale, na vakacacani ni katubaleka, kei na so tale. Ia na ivatuka droinitaki vakamatau kei na kena tarai vakavinaka e na vakayacora na kena inaki sa ikoya me taqomaki ira e ra tiko e loma, ka na vica wale ga na ka e na vakavinakataki, me na vakalesui tale na kenai ituvaki ki na kena itutu taumada.

E na vakasama vata oya, na veibolei ni vunica e na rawa ni vakatara na “kakaca” se e so na vakacaca e na noda bula, se mani vakacava na noda sasagataka na taraicake ni noda bula me vakataka na ivakarau vakasakiti vakalou. O ira na “kakaca” oqo e rawa ni vakaraitaki ira mai vakayalo me vaka na rarawa, na yalo bibivoro ni sa vakayacori e so na cala kei na noda sega ni rawa ni cakava vakataucoko na ka, se na yalo ni sega ni da vinaka sara me vaka e da vinakata.

Ia na veika e veiganiti sa ikoya ni da muria na droini ni yavu vakalou kei na gacagaca lalai kece sara, oya na, kosipeli i Jisu Karisito, e da na tucake tiko ga. Na ivatuka ni noda bula e sa sega ni vakarusai e na vuku ni nona sasaga na vunica se na dredre ni ituvaki e da sotava tiko; ia, mai na noda sa tu vakarau me da mua ki liu.

Na marau e yalataki e na ivolanikalou me noda i nakinaki ni bula⁷ e sega ni kena ibalebale ni na sega na dredre se rarawa, ni na sega na “kakaca” ka na vu mai na veitemaki, se mai na dredre, se mai na noda ibolebole ni bula vaka-vuravura.

Na marau oqo e vakavuna kina me duatani na nona raica na bula o Nifai , “Kau sa raica e vuqa na ka rarawa e na noqu bula, ia, sa lomani au vakalevu sara na Turaga e na noqu bula taucoko”⁸ E na veisiga! E na siga ni nona vakararawataki o Nifai e na nodratou lecaika na tuakana ka sega ni wiliki koya, e na gauna madaga e ratou ravuti koya kina e na loma ni waqa, e na gauna madaga e a mate kina na tamana, o Liai, e na gauna madaga e rau sa mecaki ira kina na nona tamata o Lemani kei Lemueli. E na gauna dredre madaga oya, e vakila tu ga o Nifai ni kauwaitaki koya vakalevu na Turaga.

E rawa ni da tiko vakacegu ni da kila ni na sega ni vakatara na Turaga me da temaki vakasivia mai na veika e da rawa ni da taqomaki keda kina. E sureti keda o Alama me da “vakatawa ka masu tikoga; me kakua ni rawai kemudou na vere; ia ena tuberi kemudou na Yalo Tabu mo dou yalomalumalumu, yalomalua, talairawarawa ka yalovosota, io mo dou sinai ena loloma kei na vosota vakadede.”⁹

Sa rawa ni vakamuri oqo e na vei bolebole eso ni bula. E vakananuma vei keda o Amoni na vosa ni Turaga: “Ni lako … ka mo ni vosota vakadede na veika rarawa e na yaco vei kemuni, kau na solia vei kemudou na qaqa.”¹⁰

E dau vakarautaka tu ga vei keda na Turaga na idrodro ni da sotava na dredre, veitemaki, bolebole eda sega ni da kila rawa, na malumalu vakayago kei na vakasama, kei na mate madaga. E sa tukuna o Koya, “Ia oqo, au sa kaya vakaidina vei kemudou, na ka au sa vakarota vua e dua au sa vakarota vei kemudou kece, dou reki ka marau na gonelalai; niu sa tiko ena kemudou maliwa, kau sa sega ni biuti kemudou.”¹¹ E na sega ni vakawaleni keda o Koya.

Sa noqu masu me da na tomana tikoga na taraicake ni bula e na sala ni yavu kei na gacagaca matailalai ni droini vakalou e vakarautaka na Tamada ka na rawati mai vua na noda iVakabula, o Jisu Karisito. O koya gona, me baleta na loloma cecere e lako mai e na vuku ni veisorovaki ni iVakabula, e da na qaqa e na kena taraicake na bula ni tataqomaki mai na ivalavalaca, tataqomaki mai na veitemaki, ka vakaukauwataki me da na vosota kina na rarawa ni vei gauna dredre e na noda bula. Me kena ikuri ga, e da na tiko e na dua na ituvaki me da na rawata kina na veivakalougatataki e yalataki mai na loloma nei Tamada kei na noda iVakabula. E na yacai Jisu Karisito, emeni.