Laveti Cake ena Kauvelatai

Vica na yabaki sa oti, ni oti e dua na veiwasei ni vuli torocake ena itukutuku makawa ni lotu e Amerika, a tarogi au e dua na gonevuli, “Na cava era sega ni vakayagataka kina na kauvelatai na Yalododonu Edaidai me vaka o ira tale na Lotu va Karisito me ivakatakilakila ni nodra vakabauta?

Dina ni veitaro vakaoqo baleta na kauveilatai e dau tarogi vakawasoma me baleta na noda dinati Karisito, au sauma sara vakatotolo vua ni Na Lotu i Jisu Karisito ni Yalododonu Edaidai e raica ni na veisorovaki nei Jisu Karisito e isutu, na yavu bibi, na ivunai cecere, ka ivakaraitaki cecere duadua ni loloma vakalou ena nona yavu ni veivakabulai na Kalou vei ira na Luvena. ¹ Au vakamacalataka na loloma cecere ni veivakabulai e kauta mai na veika a yaco oya me tiki bibi ka isolisoli raraba ki na matavuvale kece sara ni kawatamata mai vei Atama kei Ivi ki na ivakataotioti kei vuravura.² Au cavuta nona vosa na Parofita o Josefa Simici, koya e kaya, “Na veika kece e salavata kei na noda lotu era tokona walega” na Veisorovaki i Jisu Karisito.³

Oti au qai wilika vei koya na veika a vola o Nifai ena 600 na yabaki ni bera ni sucu ko Jisu: “Ka… sa kaya vei au na agilosi … , ka kaya: Rai yani! Kau sa rai yani ka raica na Lami ni Kalou, … ni sa laveti cake ko Koya ena kauvelatai ka vakamatei ena vuku ni ivalavala ca ni vuravura. ”⁴

Na noqu qacoya na “veiwasei, veisureti, kei na loloma” au sa tomana tiko ga, kina na wiliwili! Vei ira na Nifaiti ena Vuravura Vou tukuna Karisito sa Tucaketale, “Ka sa talai au mai ko Tamaqu me’u na mai laveti cake ena kauveilatai ; … meu na kauti ira mai kina na tamata kecega kivei au, , … ena inaki oqo au sa laveti cake kina. ”⁵

Au se qai vakarau meu cavuti Paula na Apositolo, au sa raica ni vaka sa sega ni vakarorogo na noqu itokani. Raica totolo na nona kaloko e ligana qai liaca beka ni dodonu me tiko tale e dua na vanua, me lako rawa ga, totolo sara nona yali ki na nona inakinaki tubukoso. Mani oti ekea na neirau veitalanoa.

Ena mataka oqo, sa oti beka e 50 na yabaki, au nanuma meu vakaotia na ivakamacala oya—kevaka madaga o ni tekivu raica yadudua na nomuni kaloko. Na noqu sasaga meu vakamacalataka na vuna eda sega ni vakayagataka na ivakatakilakila ni kauveilatai, au via vakamatatataka na noda rokova ka dokai ira na tamata vakabauta kei na bula yalodina o ira era vakayagataka.

E dua na vuna eda sega ni vakabibitaka soti na kauveilatai me ivakatakilakila a sucu mai na waka ni ivolatabu. Baleta na veivakamatei ena kauveilatai a dua na mataqali ivakarau ni mate veivakararawataki ena Matanitu vaka Roma, e vuqa na nona ilawalawa taumada o Jisu a digia mera kakua ni volaitukutukutaka na veivakararawataki oya. Na ibalebale ni nona mate na Karisito e tiki bibi duadua ni nodra vakabauta, io ena loma ni 300 na yabaki era dau segata me ra tukuna na kedra ivakatakilakila vakosipeli ena veisala tale eso.⁶

Sa yacova na ikava kei na ikalima ni senituri, sa qai buli vou mai na kauveilatai me ivakatakarakara raraba ni Lotu Vakarisito, ia na noda e sega ni “Lotu Vakarisito raraba.” Eda sega ni Katolika se Parotesiteni, ia eda lotu vakalesui na Lotu, vakalesui ni Veiyalayalati Vou. O koya gona, keimami lesu tale ki na ivakatekivu kei na lewa ni dodonu ni se bera na gauna ni matabose, na ivakarau ni vakabauta vakalotu, kei na ivakatakilakila.⁷ Na vakasama oqo, na yali ni vakatakilakila koya a qai lako tiko ga mai muri sa ivakadinadina ni Lotu i Jisu Karisito ni Yalododonu Edaidai e tekitekivu dina ni veika va Karisito a vakalesui mai.

E dua tale na vuna ni da sega ni vakatakilakila taka na kauveilatai oya na kena vakabibitaki na taucoko ni cakamana ni lesilesi i Karisito—Nona Tucaketale veivakurabui vakatalega kina na Nona solibula me mate vakararawataki. Ni vakamatatataki na sema oya, au raica e rua na droini⁸ ka lili tiko ena rumu tabu ni bose vakamacawa ni Mataveiliutaki Taumada kei na Kuoramu le Tinikarua ena vei siga Lotulevu ena valetabu e Salt Lake City. Na droini oqo e ivakananumi tudei vei keimami na isau a saumi kei na Nona veivakadrukai ka qaqa kina o Koya e liutaki keimami na Nona italai.

iVakatakilakila

Na Mate ena Kauveilatai, mai vei Harry Anderson

iVakatakilakila

Na Tucaketale, mai vei Harry Anderson

E dua na ivakaraitaki raraba ni tiki-rua ni nona qaqa na Karisito sa ikoya na vakayagataki ni droini nei Thorvaldsen ni nona tucake tale lagilagi na Karisito mai na ibulubulu ka vakaraitaka tu na mavoa ni nona a vakamatei.⁹

iVakatakilakila

iToka ni Lotu

Kena iotioti, eda vakananuma ni a vakatavulica o Peresitedi Gordon B. Hinckley, “Nodra bula na noda tamata sa dodonu me …ivakatakilakila ni noda [vakabauta] ”¹⁰ Na veika oqo—vakabibi na kena e muri—e kauta mai vakavoleka vei au na tikini ivolanikalou bibi duadua ki na kauveilatai. E sega ni tukuni kina na ukuuku lili se vatu talei, se na dela ni valenilotu se ivakatakilakila tabaki. Ia e vakamacalataki kina na vatu-dina tudei kei na suitu kaukauwa ni buladodonu vei ira na Lotu va Karisito me ra kauta mai ki na kaci nei Jisu vei ira kece na Nona itisaipeli. Ena vei vanua kei na tabayabaki, e tukuna o Koya vei keda kece, “Kevaka e na tagane [se yalewa] sa muri au, me kakua ni muria na lomana, ia me colata na nona kauveilatai, ka muri au.”¹¹

E tukuni tiko ike na kauveilatai eda colata ka sega ni okoya e da daramaka. Me da sa tisaipeli i Jisu Karisito eso na gauna eda na colata na icolacola—na nomu se na nona e dua tale—ka lako ena vanua e gadrevi kina na solibula kei na rarawa e sega ni tarovi rawa. E dua na Lotu va Karisito dina e sega ni rawa ni muria na iVakavuvuli walega ki na veika e vaka io kina. Sega. Eda muri Koya e veivanua kece, oka kina, kevaka e gadrevi ena vanua e sinai kina na tagi kei na caka cala, na vanua eso na gauna eda na duri duadua tu kina.

Au kila eso ena loma ni Lotu kei na taudaku, era muri Karisito tiko ena yalodina. Au kila eso na gauna e bikai tu ena mate vakayago, kau kilai ira na itubutubu era veiqaravi vei ira. Au raica ni ra cakacaka tu me yacova ni ra sa oca, ka vakasaqara na kaukauwa, tataqomaki, kei na gauna marautaki e dau lako mai vei Koya. Au kila e vuqa na itabagone qasevake era gadreva tu, ka dodonu me dua na watidra lomani, vakawati vinaka, ka sinai na nodra vale na gone. Na gagadre e vakalou, ia na toso tiko ni veiyabaki e sebera tikoga ni yaco na veika vinaka oqo. Au kila o ira era valuta tu na mate ni vakasama na kena veimataqali, era kerea tu na veivuke ena masumasu ni ra na raica na vanua sautu me dei na nodra bula ni vakasama. Au kila o ira era raviti ena bula dravudravua ia e sega ni yali vei ira na nuinui, ka era kerea ga na madigi me vakavinakataki na nodra bula o ira era lomana kei ira e tu wavoliti ira. Au kila o ira era bolei tu ena veika me baleta o cei o ira, nodra yagonisucu, kei na vinavinakati vakayalewa kei na tagane. Au tagici ira, kau tagi vatakei ira, niu kila tu na bibi kei na irevurevu ni nodra vakatulewa.

Oqo e vica ga na ituvaki ni veivakatovolei eda lakocuruma, na ivakananumi tabu ni tiko na isau ni tisaipeli dina. A kaya na Tui o Tevita vei Arauna, o koya ka via solia me sega ni sauma na bulumakau kei na buka ni vakacabo i soro, “E segai; kau na volia vakaidina vei iko e na kenai voli: ia kau na sega ni vakacabora vei Jiova na noqu Kalou nai soro kama sa rawa walega”¹² Sa vakakina, me da kaya kece.

Ni da colata na noda kauveilatai ka muri Koya, ena ka ni rarawa kevaka na icolacola ni noda ibolebole e sega ni vukei keda me da veinanumi ka raica na nodra icolacola tale eso. E dua dina na itukutuku kaukauwa ni Nona mate oya na dodoki tu na ligana na iVakabula ka qai vakoti vakaoya, vakaraitaka tu vakamatata ni vei tagane, yalewa, gone kei na vuvale e vuravuara e sega walega ni ra lako mai vakaitaukei ia era sureti kina Ligana dauveivueti cecere.¹³

Me vaka e muria na nona Tucake Tale na Nona Mate Vakararawa, e vakaoya talega na sovaraki ni veivakalougatataki ena kena veimataqali vei ira era tu vakarau, me vaka e tukuna o Jekope ena Vola i Momani, “vakabauti Karisito, ka nanuma na nona mate, ka colata na nona kauveilatai.” Eso na gauna ena lako totolo mai na veivakalougatataki ka eso na gauna ena bera mai, ia na itinitini talei ni gaunisala dredre ka mosimosi oqo¹⁴ oya na Nona iyalayala na iVakavuvuli vakatakikoya ni ra na lako mai. Me rawati na sautu oqo, sa noqu masu ni da na muri Koya—ena gugumatua, sega ni guce se dro, sega ni datuvutaka edua na itavi, sega ni guana ena bibi kina na noda kauveilatai ka sega ni gauna me buto kina na sala. Au vakavinavinakataka vakatitobu na nomu kaukauwa, yalodina, kei na nomu loloma. Au vakadinadinataka vakaiapositolo na siga nikua baleti Koya ka “laveti cake ”¹⁵ kei na veivakalougatataki tawamudu ka solia o Koya vei ira era sa “laveti cake” kei Koya, na Turaga o Jisu Karisito, emeni.