Marau ka Tawamudu

Kemuni na iTokani lomani, taciqu, kei na ganequ, o bau nanuma beka na nomu a vakabauta, se vinakata mo vakabauta na bula marau ka tawamudu?

Sa qai yaco mai na bula. Eda “tubu cake.” E vereverea mai na veimaliwai. E kosakosa, osooso, veibiliraki, veivakaisini ka veilawakitaki na vuravura oqo. Ia eda vakabauta se da via vakabauta ena “gagadre kaukauwa ni lomada,”¹ ni tiko dina na marau ka tawamudu ena dua na vanua, se ena sala cava ga, ka na rawa ni taukeni.

Na “marau ka tawamudu” e sega ni vaka na nodra itukuni na gonelalai. E dina, na reki dina ka tudei kei na bula tawamudu kei ira eda lomana, sa tiki yaga ni ituvatuva ni bula marau ni Kalou. Na Nona sala ka vakarautaki ena yalo loloma e rawa ni vakarautaka na noda ilakolako ki na tawamudu me marautaki ka tawayalani.

E tu e vuqa na ka me da marautaka ka da vakavinavinaka kina. Ia, e sega ni dua vei keda, se dua na matavuvale e taucoko sara. Na noda veiwekani e okati kina na loloma, veiyaloni, kei na ivakarau vakayadua ia vakavuqa talega e tiko na veicati, mavoa, ka so na gauna na mosi e bibi sara.

“Ni sa qai mate kecega ena vukui Atama, ena vakabulai kece talega ena vukui Karisito.”² Na bula vei Jisu Karisito e okati kina na tawamate rawa—oya na nona isolisoli me da tucaketale vakayago. Ni da bula ena vakabauta kei na talairawarawa, na bula vei Karisito e rawa talega ni tiko kina na bula tawamudu ka vuabale ena reki vata kei na Kalou kei ira eda lomana.

Ena sala vakurabui eso, na parofita ni Turaga sa tosoi keda vakavoleka tiko ki vua na noda iVakabula, ka vakakina ena vei cakacaka vakalotu tabu ni valetabu kei na veiyalayalati sa kau vakavoleka mai vei keda ena vuqa na vanua. E tiko na madigi bibi kei na isolisoli me da kunea na kila-ka vou vakayalo, na loloma, na veivutuni kei na veivosoti vakai keda kei na noda matavuvale, ena bula oqo kei na tawamudu.

Ena veivakadonui, au na wasea e rua na ka vakayalo tabu, matalia ka sotavi vakadodonu ka tukuni mai vei ira na itokani, me baleta nona semata o Jisu Karisito na matavuvale, ni vakabula mai na veileti ka sotavi tiko mai ena vica vata na itabatamata.³ “Tawayalani ka tawamudu,”⁴ kaukauwa mai nai vesu ni mate,”⁵ na Veisorovaki i Jisu Karisito e rawa ni vukei keda me yaco na vakacegu kina noda gauna sa oti kei na inuinui ki na noda veimataka.

Ni rau mai lewena Na Lotu i Jisu Karisito ni Yalododonu Edaidai o noqu itokani kei watina, e rau a vulica ena reki ni veiwekani vaka matavuvale e sega ni gadrevi me na “tawasea ko mate.” Ena vale ni Turaga, na matavuvale e rawa me semati tawamudu (vauci).

Ia o noqu itokani e a sega ni via vauci vei tamana. “O koya e a sega ni dau vinaka vei tinaqu. “E a sega ni tama vinaka vei ira na luvena,” a kaya o koya. “O tamaqu me na wawa mada. E sega ni tu vei au e dua na gagadre me‘u cakava na nona cakacaka ni valetabu ka vauci vua me tawamudu.”

Me dua na yabaki, e a lolo, masu, ka vosa vakalevu vua na Turaga me baleti tamana. Oti, sa qai yaco me sa vakarau. Sa mai vakacavari na cakacaka ni valetabu nei tamana. E muri, a kaya, “Ni‘u a moce toka e a basika mai vei au o tamaqu ena tadra, ka vakaisulu vulavula kece tu. A sa veisau o koya. E kaya o koya, ‘Raici au mai. Au sa savai. Vinaka vakalevu na nomu vakayacora na cakacaka me baleti au ena valetabu.’” A kuria o tamana, “Duri ka lesu tale ki valetabu; o ganemu esa wawa tiko me papitaiso,”

E kaya na noqu itokani, “O ira noqu na qase e liu kei ira era sa mate era sa wawa tiko ena nanamaki me vakayacori na nodra cakacaka.”

“Ia vei au,” e kaya, “na valetabu e vanua ni veivakabulai, vuli, ka vakadinadinataki kina na bibi ni Veisorovaki i Jisu Karisito.”

iKarua ni veika sotavi. E dua tale na itokani e a vakadikeva vagumatua sara na ituvatuva ni kawa ni nona matavuvale. E vinakata me kila na tukana ena yasana vei tamana.

Ena dua na mataka caca, a kaya na noqu itokani ni a vakila e dua na yalobula tagane e loma ni rumu. E vinakata na tagane oya me kunei ka kilai mai na nona matavuvale. E rarawataka na tamata oya e dua na cala ka sa veivutunitaka. Na tagane oya e a vukei noqu itokani me kila ni noqu itokani e sega ni sema vakadra kei koya na tamata ka a nanuma taumada ni tukana. “Kena ibalebale,” a kaya noqu itokani, “Au a kunei tukaqu ka kila ni o koya e sega ni tamata ka tukuni tiko ena ivolatukutuku ni matavuvale ni tukai keitou.”

Ni mai matata na veiwekani ni nona matavuvale, a kaya o noqu itokani, “Au vakila na galala, kei na vakacegu. E ka bibi me kilai se o cei o ira na noqu matavuvale dina.” A kaya o noqu itokani, “Na tabanikau veve e sega ni kena ibalebale ni ca na vunikau. Na ituvaki o lako mai kina ivuravura oqo e sega soti ni bibi mai na tubu e mai rawati ena gauna eda biubiu kina.”

Na ivolanikalou savasava kei na veika tabu e sotavi vaka tamata yadua ni veivakabulai kei na veivakacegui , ka okati kina o ira na bula tiko ena vuravura ni yalo, e vakabibitaka e lima na ivakavuvuli vakaivunau.

iMatai: Ena uto ni ituvatuva ni veivueti kei na marau ni Kalou, e yalataka o Jisu Karisito, ena Nona Veisorovaki, me cokotavata na yaloda kei na yagoda, “me sega tale ni veitawasei, io me da rawata na marau sa vuabale.”⁶

iKarua: Veisorovaki—vei-soro-vaki i Karisito—e yaco nida cakacakataka na vakabauta ka vuataka na vua e kilikili kei na veivutuni.⁷ Me vaka ena bula vakayago sa vakina ena bula vakayalo. Na cakacaka vakalotu eso ni valetabu era sega ni veisautaki keda se o ira na tiko ena vuravura ni yalo. Ia o ira na cakacaka vakalotu vakalou oqo e rawati kina na veiyalayalati kei na Turaga ka na vakasavasavataki keda, ka na rawa ni kauta mai na veiyaloni kei Koya ka vakai keda talega.

Ena vuabale na noda marau nida vakila na loloma soli wale kei na veivosoti i Jisu Karisito vei keda. Me kena ikuri, nida vakaraitaka vakai keda na mana ni Nona loloma soliwale kei na veivosoti, na loloma eda ciqoma kei na kena eda solia ena rawa ni vukea me yaco na veika tawadodonu ni bula me dodonu.⁸

iKatolu: Na Kalou e kilai keda ka lomani keda kece vakataucoko. “Na Kalou ena sega ni vakalialiai,”⁹ se me rawa ni vakaisini. Ena loloma uasivi e taucoko kei na lewa dodonu, e ovici ira na yalomalumalumu kei ira na veivutuni dina ena ligana dauveitaqomaki.

Na Parofita o Josefa Simici e a raici tacina o Alvin ena dua na raivotu ena valetabu e Katiladi, ni sa vakabulai tu ena matanitu vakasilesitieli. E kurabuitaka na Parofita o Josefa Simici, baleta o Alvin a mate ni bera ni ciqoma na cacaka vakalotu ni veivakabulai ni papitaiso.¹⁰ E veivakacegui na Nona vakamacalataka na Turaga na vuna: Na Turaga “ena lewai [keda] na tamata kecega me vaka na [noda] cakacaka, me vaka [na] gagadre ni lomada.”¹¹ Na noda bula ena vakatakila mai na noda cakacaka kei na gagadre.

Eda vakavinavinaka, nida kila ni ra na vueti o ira na bula kei na “mate era sa veivutuni, kevaka era sa talairawarawa ki na cakacaka vakalotu sa vakayacori ena vale ni Kalou”¹² kei na Veisorovaki i Karisito. Ena vuravura ni yalo, o ira mada ga na mate ena nodra ivalavala ca kei na talaidredre e tiko na madigi mera veivutuni.¹³

Ena kena veibasai, o ira era sa nakita mera digitaka na veika ca, ka lokuyarataka na veivutuni, se era sa bucina oti se kila na sala me voroki kina na ivakaro me ra qai veivutuni era na lewai mai vua na Kalou ka “nanuma vinaka na [nodra] cala kece.”¹⁴ Ena sega ni rawa mo nakita mo ivalavala ca ena Vakarauwai, ka namaka na veivosoti ena vakaivotavota ena sakaramede ena Sigatabu. Vei ira na daukaulotu se so tale era kaya ni muri ni Yalo e kena ibalebale me kua ni muri na ivakatagedegede ni kaulotu se ivakaro, yalovinaka nanuma ni muri ni vakatagedegede ni kaulotu kei na ivakaro e sureta na Yalo. E sega ni dodonu vua e dua na tamata me lokuyarataka na nona veivutuni. Na veivakalougatataki ni veivutuni e yaco mai ni da tekivu me da veivutuni.

iKava: Na Turaga e solia vei keda na madigi vakalou me da yaco me da vakataki Koya ni da vakayacora na cakacaka vakalotu veivakabulai veisosomitaki ni valetabu era gadreva na tani ka ra sega ni rawa ni cakava vakai ira. Ena yaco meda taucoko ka uasivi cake¹⁵ nida yaco me i “vakabula … ena Ulunivanua ko Saioni.”¹⁶ Nida qaravi ira na tani, na Yalo Tabu ni Yalayala ena rawa ni vakadonuya na cakacaka tabu ka vakasavasavataki rau ruarua o koya e solia kei koya e ciqoma. Oi rau ruarua na solia kei na ciqoma e rawa ni rau cakava ka vakatitobutaka na veiyalayalati veivakavoui, ia ni toso na gauna e rau na ciqomi na veivakalougatataki ka yalataki vei Eparaama, Aisake, kei Jekope.

iOtioti, ikalima: Me vaka e vakavulica na Lawa Koula¹⁷ na veivakasavasavataki vakatautauvata ena veivutuni kei na veivosoti, e sureti keda yadua meda solia vei ira na tani na veika e yaga ka da gadreva vakai keda.

Ena so na gauna na noda lomasoli meda vosota e dua tale e rawa kina vei rau ka vakina vei keda me da vakabauta ni da rawa ni veivutuni ka vosoti. Ena so na gauna na lomasoli me veivutuni kei na rawa ni veivosoti e yaco mai ena gauna duidui. Na noda iVakabula e noda Dautataro kei na Kalou, ia e vukei keda talega o Koya meda kila se o cei o keda ka ke da lako vei Koya ena vaqaqacotaki na noda veiwekani kei ira na tani. Vakauasivi ke bibi tu na mavoa kei na mosi, na vakavinakataki ni noda veiwekani kei na vakabulai ni lomada ena dredre, ena sega beka ni rawa vei keda meda cakava taudua. Ia o lomalagi e rawa ni solia vei keda na kaukauwa kei na yalomatua ka uasivi mai na noda vakai keda, meda kila na gauna meda tautauri kina kei na gauna meda laiva kina.

Eda na sega soti ni galili nida kila eda sega ni tiko duadua. E matata vinaka tu vua na noda iVakabula.¹⁸ Ena nona veivuke na noda iVakabula, ena rawa ni da cabora na noda viavialevu, noda mavoa, kei na noda ivalavala ca vua na Kalou. Ia eda na vakila ena gauna eda tekivu kina, nida na yaco meda na vakataucokotaki cake nida vakararavitaka Vua mena vakataucokotaka na noda veiwekani.

Na Turaga, o koya e raica ka kila na veika taucoko, ena vosoti ira ga e via vosota, ia koi kemudou (sa sega ni taucoko) sa gadrevi mo dou vosoti ira na tamata kecega. Nida lako mai vua na noda iVakabula, ena lailai na noda nanumi keda ga vakaikeda. Eda na vakalelewa vakalailai ka veivosoti vakalevu cake. Na nuitaki ni Nona cakacaka dodonu, loloma cecere, kei na loloma soliwale¹⁹ e rawa ni vagalalataki keda mai na veileti, cudru, veivakalolomataki, tawa kauwaitaki, lewa tawadodonu, kei na bolebole vakayago kei na vakasama e salavata mai kei na yago vakalewe ena vuravura vakayago. Na marau ka tawamudu e sega ni kena ibalebale ni veiwekani yadua ena marau ka tawamudu. Ia na dua na udolu na yabaki ena vesu kina o Setani²⁰ ena rawa ni solia vei keda na gauna gadrevi kei na sala veivakidacalataki eso meda loloma, kila vinaka, ka veivakameautaki, nida vakavakarau kina tawamudu.

Eda na raica kina na ivakarau ni veimaliwai vakalomalagi ena keda maliwa.²¹ Na cakacaka kei na lagilagi ni Kalou e okati tiko kina me yaco na marau ka tawamudu.²² Na bula tawamudu kei na vakacerecerei sa ikoya meda kila na Kalou kei Jisu Karisito, o koya gona, na vanua e Rau tiko kina eda na tiko talega kina ena kaukauwa vakalou.²³

Kemuni na taciqu kei na ganequ lomani, na Kalou na Tamada Vakalomalagi kei na Luvena Lomani e Rau bula tiko. E Rau vakarautaka tu na vakacegu, reki, kei na bula kina veimataqali kei na duivosavosa, ka vakakina vei keda yadua. Na parofita ni Turaga e liutaka tiko na sala. E tomani tiko na ivakatakila ni gauna oqo. Meda qai toro voleka vua na noda iVakabula ena vale tabu, ka me qai tosoi keda voleka vua na Kalou ka vakakina vei keda vakai keda, ni sa duavata na lomada ena yalo loloma vei Karisito, ena dina, kei na loloma uasivi ena noda vei itabatamata kece—ena bula oqo kei na tawamudu, me da marau kina ka tawamudu. Ena vukui Jisu Karisito, ena rawa, ena vukui Jisu Karisito, e dina. Au sa vakadinadinataka oqo ena Yacana tabu, o Jisu Karisito, emeni.