iSolisoli ni Veivakayaloqaqataki

Kemuni na taciqu kei na ganequ lomani, au vakavinavinaka niu maliwai kemuni ena koniferedi raraba oqo ni Lotu i Jisu Karisito ni Yalododonu Edaidai. Keitou sa vakila na nomuni vakabauta kei na loloma ena vanua cavaga ni tiko kina. Eda sa vakabulabulataki ena veivakavuvuli momona, vakadinadina qaqa, kei na ivakatagi totoka.

Au vakayaloqaqataki kemuni mo ni tomana tikoga na sasaga mo ni rawa ni lesu tale vua na Tamada Vakalomalagi kei Jisu Karisito. Se vanua cava ga o tiko kina ena salatu ni veiyalayalati, o na raica e dua na sasaga dredre mai na veivakatovolei vakayago ni bula oqo se na veisaqasaqa nei Setani.

Me vaka a tukuna vei au o tinaqu niu vosakudrukudrutaka na dredre ni dua na ka, “Oi, Hal, esa dredre vakaidina. Sa dodonu me vakakina. Sa veivakatovolei tu na bula.”

E rawa ni kaya vakamalua oya o koya, ena matadredredre, baleta ni kila e rua na ka. Veitalia na dredre, na ka bibi duadua me na yaco ki vale ka tiko vata kei na Tamana Vakalomalagi. Ka kila tu o koya ni rawa ni vakayacora ena vakabauti ni nona iVakabula.

A vakila o koya ni sa voleka tu vua o Koya. Ena gauna sa vakila kina o koya ni sa vakarau mate, a veitalanoa kei au o koya me baleta na iVakabula ni davo tu ena nona rumu ni moce. A tiko e dua na katuba ki na rumu kadua volekata na nona idavodavo. A matadredredre o koya ka raica na katuba ni tukuna malua tu na nona sa vakarau raici Koya. Au se nanuma tikoga na noqu raica toka na katuba ka vakasamataka na rumu e tiko e dakuna.

Sa tiko oqo o koya ena vuravura ni yalo. Sa rawa vua me vakanamata tu ki nai cocovi e vinakata ena veiyabaki ni nona veivakatovolei vakayago.

Na isolisoli ni veivakayaloqaqataki a biuta tu mai vei keitou sa vakamacalataki vinaka ena Moronai 7, na nona veivakayaloqaqataki ko Momani kivei Moroni na luvena kei ira na nona tamata. Na isolisoli ni veivakayaloqaqataki ki na nona kawa me vakataki tinaqu ki na nona matavuvale. A solia o Momani na isolisoli o ya ni veivakayaloqaqataki kivei ira kece ka tu vei ira na yalodei me ra rawata, mai na nodra veivakatovolei kece sara ena bula oqo, kina bula tawamudu.

A vakamacalataka o Momani ena matai ni tikina ni Moronai 7 ena vakadinadinataki i Jisu Karisito, ira na agilosi, kei na Yalo i Karisito, ka vakatarai keda meda kila na vinaka mai na ca ka rawa ni digitaka tu na dodonu.

E biuti Jisu Karisito me liu, me vakataki ira kece era qaqa ena nodra veivakayaloqaqataki o ira era sasaga tiko ki cake ena salatu ki na nodra itikotiko vakalomalagi:

“Raica sa sega na tamata sa vakabulai rawa, me vaka na vosa i Karisito, kevaka era sa vakabauta na yacana; ia, kevaka sa mudu na veika oqo, sa na mudu tale ga kina na vakabauta; ka sa vakaloloma sara na ituvaki ni tamata, ni ra na vaka ni se sega ni yaco e dua na veisereki.

“Ia raica, oi kemudou na wekaqu lomani, au sa vakadeitaka ni sa tu vei kemudou na veika vinaka cake, ni’u sa vakadeitaka ni dou sa vakabauti Karisito ena vuku ni nomudou yalomalua; ni kevaka dou sa sega ni vakabauti koya, sa sega ni kilikili mo dou okati ena kedra maliwa na lewe ni nona lotu.”¹

A raica o Momani na yalomalua me vakadinadina ni kaukauwa ni nodra vakabauta. A raica o koya ni ra sa vakanuinui tu kivua na iVakabula. A vakayaloqaqataki ira ni taura matua na vakabauta oya . A tomana ni vakayaloqaqataki ira o Momani ena nodra vukei ni raica ni na taracake na sasaga kei na nuidei na nodra vakabauta kei na yalomalua ena rawati ni nodra bula dredre:

“Oi kemudou na wekaqu lomani, au na vosa tale vei kemudou me baleta na inuinui. Dou na rawata vakaevei na vakabauta, kevaka sa sega vei kemudou na inuinui?

“Ia na cava na ka dou vakanuinui kina? Raica au sa kaya vei kemudou ni dou na rawata na inuinui ena vuku ni veisorovaki i Karisito kei na kaukauwa ni nona tucake tale mai na mate, [mo dou] vakaturi cake kina ki na bula tawamudu, ia dou sa rawata oqo ena vuku ni nomudou vakabauti koya me vaka na vosa ni yalayala.

“O koya gona, kevaka e dua sa tu vua na vakabauta sa tu tale ga vua na inuinui; ni kevaka sa sega na vakabauta sa sega tale ga ni rawa ni dua na inuinui.

“Ka raica, au sa kaya tale vei kemudou ni na sega ni rawa ni tu vua na vakabauta kei na inuinui, kevaka sa sega vua na yalomalua, kei na yalo malumalumu.²

Sa qai vakauqeti ira o Momani ni vakadinadinataka ni ra sa tutaka tiko ni ciqoma na isolisoli ni kena vakatawani na lomadra ena loloma uasivi i Karisito. E vakabula vata ena vukudra na veitaratara ni vakabauti Jisu Karisito, yalomalua, yalomalumalumu, na Yalo Tabu, kei na inuinui tudei ni kena ciqomi na bula tawamudu. Sa vakauqeti ira o koya vakaoqo:

“Ni sa sega sara e vakadonuya na Kalou, o koya ga sa yalomalua ka yalo lokomi; ia ko koya sa yalomalua ka yalo lokomi, ka vakatusa ena kaukauwa ni Yalo Tabu ni sa Karisito ko Jisu, sa tu vua na loloma uasivi; ni kevaka sa sega vua na loloma uasivi sa ka wale ga ko koya; o koya sa dodonu kina me tu vua na loloma uasivi.”³

Ni talevilesu, au sa raica oqo na sala a vaqaqacotaki, tuberi, tokoni, ka veisautaki tinaqu kina na isolisoli ni loloma uasivi oya—na loloma savavuka i Karisito, ena sasagataki ni nona ilakolako ki vale.

“Sa dau vosota vakadede na loloma, sa yalovinaka, sa sega ni vuvu, sa sega ni viavialevu, sa sega ni qara na ka me nona ga, sa sega ni cudrucudru, sa sega ni dauloma ca, sa sega ni rekitaka na ca, ia sa rekitaka ga na dina, sa ubia na ka kecega, sa vakabauta na ka kecega, sa vakanuinuitaka na ka kecega, sa vosota na ka kecega.

“O koya oqo, oi kemudou na wekaqu lomani, kevaka sa sega vei kemudou na loloma uasivi, dou sa ka wale ga, ni sa sega ni mudu na loloma uasivi. O koya mo dou kubeta matua kina na loloma uasivi, ni sa ka cecere duadua sara vei ira kecega, ni na mudu mai na ka kecega—

“Ia na loloma uasivi sa i koya na loloma taucoko i Karisito, ka sa ia tikoga ka sega ni mudu; ka na vinaka vei koya sa kunei ni sa tu vua ena siga mai muri.

“O koya oqo oi kemudou na wekaqu lomani, mo dou masuta na Tamada ena yalomudou taucoko, me vakasinaiti kemudou ena loloma oqo, ka sa solia vei ira era sa muria na Luvena, ko Jisu Karisito ena yalodina; mo dou yaco kina mo dou luve ni Kalou; ia ni sa rairai mai ko koya eda na tautauvata kaya, ni da na raica na matana dina; me da rawata na inuinui oqo, ka vakasavasavataki me vaka sa savasava ko koya.”⁴

Au vakavinavinakataka na veivakauqeti ni vakaraitaki kei na vakavuvuli i Momani. Au sa vakalougatataki tu vakakina ena isolisoli i tinaqu. Era sa vaqaqacotaki au na parofita mai vei Atama ki na gauna oqo, ena ivakavuvuli kei na ivakaraitaki.

Ena veidokai vei ira au sa kila vinaka tu kei na nodra matavuvale, sa lomaqu meu kakua ni vakatakila na dredre eso era sotakaya se tukuna ena matana levu na nodra isolisoli levu. Ia na ka au sa raica esa vakauqeti au ka veisautaki au vakalevu cake.

Ena ririko ni kena talaucaki na nona bula vuni, au na kuria e dua na tukutuku lekaleka i watiqu. Au cakava tu ena qaqarauni. Sa dua na tamata vuni o koya ka sega ni qara se taleitaka na veivakacaucautaki.

Sa 60 na yabaki na neirau bula vakawati. E sa baleta na ka e sotavi au sa qai kila tu kina na ibalebale ni veivosa ni ivolanikalou oqo: vakabauta, inuinui, yalomalua, vosota, sega ni qara na ka me noda, rekitaka na dina, sega ni vakasama ca, kai lutua, na loloma uasivi.⁵ Au talaucaka mai na veika au sotava oya, me rawa niu vakadinadinataka ni rawa ni tugana taucoko na tamata na veivakavuvuli totoka oya ki na nodra bula e veisiga ni ra lako curuma na veiraravui ni bula.

Milioni vei kemuni na vakarorogo sa kilai ira na tamata vakaoqo. Vuqa vei kemuni sa tamata vakaoqo. Eda sa gadreva taucoko na ivakaraitaki veivakauqeti vakaoqo kei na veitokani dauloloma.

Ena gauna o dabe vata kina e dua mo ganedra dauveiqaravi se tacidra dauveiqaravi; o sa matataka na Turaga. Vakasamataka na ka ena kitaka se kaya. Ena sureti ira o Koya mera lako mai ki Vua. Ena vakauqeti ira o Koya. Ena siqema ka vakacaucautaka na itekitekivu ni veisau sa gadrevi mera na cakava. Ka na ivakaraitaki vinaka sara o Koya mera vakatatamuria.

E sega ni rawa ni dua e cakava taucoko oqori, ia ena nomu vakarorogo ki na koniferedi oqo, e rawa ni o kila ni o sa muria tiko na sala. Sa kila vakamatata na iVakabula na dredre o sotava tu. Sa kila o Koya na nomu sasaga levu mo tubu ena vakabauta, inuinui, kei na loloma.

Na ivakaro kei na veiyalayalati e solia vei iko o Koya e sega ni vakatovolei me lewai iko kina. Era sa isolisoli me laveti iko ki na ciqomi ni solisoli taucoko ni Kalou kei na lesu i vale kivua na Tamada Vakalomalagi kei na Turaga, ka rau lomani iko.

Sa sauma o Jisu Karisito na noda ivalavala ca. Sa rawa ni da ciqoma na veivakalougatataki oya ni bula tawamudu ke da na vakabauti Koya tu meda veivutuni ka vakataka e dua na gone, savavuka ka vakarau ni ciqoma tu na isolisoli levu duadua taucoko ni Kalou.

Sa noqu masu ni ko na vakadonuya na Nona veisureti ka dolea talega vei ira tale eso na luvena na Tamada Vakalomalagi.

Au sa masulaki ira na noda daukaulotu e vuravura taucoko. Me ra vakauqeti me ra vakauqeti na tamata yadua me ra vinakata ka vakabauta ni veisureti mai vei Jisu Karisito mai vei ira na Nona italai era sa taura na Yacana.

Au vakadinadinataka ni bula o Koya ka liutaka tu na Nona Lotu. Au sa Nona ivakadinadina. Sa parofita bula ni Kalou o Peresitedi Russell M. Nelson e vuravura taucoko. Au kila ni dina oya. Ena yaca tabu i Jisu Karisito, emeni.