Cakacaka Vata kei na Turaga

Ena loma ni imatai ni vica na vula ni neirau vakamau, e a vakaraitaka o noqu daulomani nona gagadre me vulica na ivakatagi. Ena noqu vinakata meu vakayalovinakataki koya, au a nanuma meu cakava edua na ka me vakidacalataki koya kina na noqu daulomani. Au a gole ki na dua na sitoa ni volitaki iyaya ni vakatagi ka volia edua na piano me i loloma. Au a biuta ena marau na risiti ni volivoli ki na dua na kisi lailai ka tiko na kena bou totoka ka solia vua, ka namaka ni na dolei mai ena yalo marau kei na vakavinavinaka kivua na watina lomani dauveikauwaitaki.

Ni dolava o koya na kisi lailai oya ka raica na kena ivakatawa, e a raici au mai ena mataloloma ka kaya, “O noqu daulomani,o sa talei dina! Ia meu tarogi iko mada ena dua na taro: oqo e iloloma se soli vaka dinau?” Ni oti neirau veivakasalataki vata baleta na ka sega ni namaki oqo, keirau a lewa me vakasuka na veivoli. Keirau a bula tiko ena ilavovakarau ni gonevuli, ka dau vakakina vei ira e levu na vakawati vou gone. Na veika sotavi oqo a vukei au meu kila na bibi ni ivakavuvuli ni cakacaka vata vakataucoko na isema ni vakawati kei na kena bulataki ena rawa ni vukei watiqu kei au me duavata ka yalovata ena vakasama.¹

Na kosipeli vakalesuimai i Jisu Karisito e kacivaka na ivakavuvuli ni cakacaka vata vakataucoko ena kedrau maliwa na yalewa kei na tagane, ruarua ena bula vakayago kei na tawamudu. E dina ga ni rau dui taukena yadua na ivakarau ni tovo duidui kei na itavi lesi vakalou, na yalewa kei na tagane erau vakaitavi vakatautauvata ena ilesilesi yaga ena ituvatuva ni marau ni Kalou baleti ira na luvena.² Oqo ea matata mai nai vakatekivu ni a tukuna na Turaga “ni sa sega ni vinaka me tiko duadua ga na tamata; ia o [Koya ena] bulia e dua na dauveivuke e yaga vua.”³

Ena ituvatuva ni Turaga, na “dauveivuke yaga” e sai koya e dua na itokani ka rau na salavata kei Atama ka cakacaka vata vakataucoko.⁴ Ia na ka dina , ni o Ivi e a dua na veivakalougatataki vakalomalagi ki na bula nei Atama. Ena vuku ni nona ituvaki vakalou kei na itovo vakayalo, e a uqeti Atama me cakacaka vata kei koya me rawati kina na ituvatuva ni marau ni Kalou ki na kawatamata.⁵

Meda raica mada e rua na ivakavuvuli taumada ka na vaqaqacotaka na cakacaka vata ena kedrau maliwa na tagane kei na yalewa. Na imatai sai koya nira “Sa tautauvata na tamata kecega vua na Kalou.”⁶ Me vaka na ivunau ni kosipeli, na kedrau duidui na yalewa kei na tagane e sega ni ulabaleta na yalayala tawamudu sa vakarautaka tu na Kalou vei ira na luvena tagane kei na yalewa. E sega ni dua e uasivi cake na nona rawa ni taukena na lagilagi vakasilesitieli mai vua tale edua ena tawamudu.⁷ Na iVakabula vakataki Koya e sureti keda kece, na luve ni Kalou, meda lako mai vua ka vakaivotavota ena Nona vinaka ka sa sega ni bureitaka edua na ka vua e dua sa lako mai vua.”⁸ O koya gona, ena vuku ni ka oqo, eda kunei nida sa tautauvata e Matana.

Nira kila ka bulataka na veiwatini na ivakavuvuli oqo, era na sega ni biuti ira kina ena itutu vakaperesitedi se ivukevuke ni peresitedi ni matavuvale. E sega na cecere se lolovira ena veiwekani vakaveiwatini, ka sega talega na taubale tiko e liu se e dakui kena ikarua. Erau salavata tiko, ka tautauvata, na luvena vakalou na Kalou. Erau duavata ena vakanananu, gagadre, kei na inaki vata kei Tamada Vakalomalagi kei Jisu Karisito,⁹ ena kena liutaki ka tuberi vata na matavuvale.

Ena cakacaka vata ni duavata na, “loloma e sega ni ka e taukeni ia e cakacakataki … ka tiki ni veibuli-vata ka noda ilesilesi vakatamata.”¹⁰ Ni rau vakaitavi vata dina, o tagane kei watina erau sema vata ena duabau ena ‘vakatulewa tawavakaiyalayala’ ka ‘ena yalo galagala’ ena drodrovi rau kina kei na nodrau kawa na bula vakayalo ‘me sega ni mudu ka sega ni mudu.’”¹¹

Na ikarua ni ivakavuvuli sai koya na Lawa Koula, ka vakatavulica na iVakabula ena iVunau mai na Ulunivanua: “Ia me vaka dou sa vinakata mera kitaka vei kemudou na tamata, dou kitaka vakatalega kina vei ira.”¹² Nai vakavuvuli oqo e vakaraitaka edua na ivakarau ni bula ni veiwasei, veisolisoli, duavata veirogorogoci ka yavutaki ena ikarua ni ivakaro levu, “Mo lomana na kai nomu me vaka ko sa lomani iko.”¹³ E veisemati vinaka kei na ivakarau ni bula tale eso Vakarisito me vaka na vosota vakadede, ivalavala malua, yalomalua, kei na yalovinaka.

Me matata cake na bulataki ni ivakavuvuli oqo, eda rawa ni rai ki na tabu kei na tawamudu ni ivau ka yavutaka na Kalou ena kedrau maliwa na noda itubutubu taumada, o Atama kei Ivi. Erau na lewedua ga,¹⁴ ka buli kina edua na ituvaki ni duavata ka vakatara me rau salavata ena veidokai, vakavinavinaka, kei na veilomani, guilecavi rau ka qara na tiko vinaka vakairau ena ilakolako ki na tawamudu.

Na ivakarau ni bula vata oya sai koya eda sasagataka tiko ena dua na vakawati e duavata ni kua. Ena veivauci ni valetabu, erau curuma kina na yalewa kei na tagane na ivakarau tabu ni vakamau ena veiyalayalati vou ka tawayalani. Ena ivakarau oqo ni matabete, e soli kina vei rau na veivakalougatataki tawamudu kei na kaukauwa vakalou me dusimaka kina na veika ni matavuvale nirau bulataka tiko na veiyalayalati erau sa cakava. Mai na tiki ni gauna oya, erau toso kiliu ena veirogorogoci ka cakacaka vata vakataucoko kei na Turaga, vakauasivi ena veika me baleta na nodrau itavi yadua ka lesi vakalou ni veisusu kei na vakatulewa ena nodrau matavuvale.¹⁵ Na veisusu kei na vakatulewa erau itavi veiwekani ka veiuturi, ka kena ibalebale ni o ira na tama kei na tina “era gadrevi mera veivukei vakairau ni rau sa tautauvata”¹⁶ ka wasea vakatautauvata na veiliutaki ena nodrau itikotiko.

“Na veisusu e kena ibalebale me vakania, vakatavulica, ka tokona” na lewe ni matavuvale ka yaco oqo ena nodra vukei mera “vulica na dina ni kosipeli ka vakatorocaketaka na vakabauti Tamada Vakalomalagi kei Jisu Karisito” ena draki ni veilomani. Na vakatulewa e kena ibalebale me “vukea na muataki lesu ni lewe ni matavuvale me laki tiko ena iserau ni Kalou. Sa vakayacori oqo ena veiqaravi kei na veivakavulici ena ivalavala malua, na yalomalua, kei na loloma uasivi” E okati talega kina “na liutaki ni lewe ni matavuvale ena masumasu wasoma, vulici ni kosipeli, kei na so tale na ivakarau ni sokalou. Era na cakacaka ena duavata na itubutubu,” nira muria na ivakaraitaki i Jisu Karisito, “me vakayacori kina o irau na [rua] na itavi [cecere] oqo.”¹⁷

E bibi me kilai ni veiliutaki ena matavuvale e vakamuria na ituvatuva vaka peteriaki, ka duidui ena so na tikina mai na veiliutaki ni matabete ena lotu.¹⁸ Na ituvatuva vakapeteriaki e gadrevi kina vei ira na veiwatini o tagane kei na yalewa me saumi taro vakadodonu vua na Kalou ena vakayacori ni nodrau itavi tabu ena matavuvale. E gadrevi kina na veitauriliga vata, na lomasoli me vakayacori na vei ivakavuvuli ni cakadodonu kei na saumi taro ka vakarautaka na madigi ni tubu eloma ni dua na draki ni veilomani kei na veivukei.¹⁹ Na vei itavi vakatabakidua oqo era sega ni tukuna tiko me dua e vakatulewataka tale edua ka sega sara ga ni vakadonuya na veivakalolomataki cava ga se na vakayagataki vakatawadodonu ni lewa.

Na ka erau sotava o Atama kei Ivi, nirau sa biubiu mai na were o Iteni, e iyaloyalo totoka ni vakasama ni veirogorogoci ena kedrau maliwa edua na tama kei na tina ena susugi kei na vakatulewataki ni dua na matavuvale. Me vaka e vakavulici ena ivola i Mosese, erau a cakacaka vata me teivaka na qele mai na buno ni yadredrau me rawa ni rau vakarautaka na veika me tiko vinaka kina vakayago na nodrau matavuvale;²⁰ erau a kauta mai na gone ki vuravura;²¹ erau a kaciva vata na yaca ni Turaga ka rogoca na Domona “ni sa vosa vei rau mai na Were ko Iteni”;²² erau a ciqoma na ivakaro ka solia vei rau na Turaga ka saga vata me rau talairawarawa kina.²³ Ka rau “vakatakila na [veika] kece vei ira na luvedrau tagane kei na luvedrau yalewa”²⁴ ka “rau ia tikoga na masu vua na Kalou” me vaka na nodrau gagadre.²⁵

Kemuni na taciqu kei na ganequ lomani, na veisusu kei na vakatulewa era madigi, ka sega ni nona vakatabakidua ga edua. Edua e na rawa ni vakaitavitaki ena dua na ka ia ena sega beka ni na cakava taudua o koya. Nira kila rawa na itubutubu dauloloma na itavi lelevu e rua oqo, erau na saga vata me taqomaki ka karona na nodra tiko vinaka na luvedrau vakayago ka vakayalo. Erau vukei ira talega me sotava na vei leqa vakayalo eso ni noda siga ena nodra vakabulabulataki ena vosa vinaka ni Turaga me vaka e sa vakatakilai vei ira na Nona parofita.

Dina ga ni o tagane kei watina erau veitokoni vakai rau ena nodrau itavi lesi vakalou, “e rawa ga ni ra qai moici na veitavi yadudua oqo ni dua e vakamavoataki, mate se sotavi na veituvaki tale eso.”²⁶ Ena so na gauna ena dua vei rau ena nona itavi me na taura ena duavata ga na gauna nai lesilesi ruarua oqo, me dua na gauna lekaleka se me tudei.

Au se qai sota wale tikoga oqo kei na dua na sisita kei na baraca ka rau dui bula tiko ena ituvaki vata oqo. Baleta ni rau itubutubu dua tiko, ena loma ni matavuvale ka rau qarava ka cakacaka vata tiko kina kei na Turaga, erau digitaka me solia na nodrau bula ki na nodra karoni vakayalo ka vakayago na luvedrau. Erau sega ni guilecava na nodrau veiyalayalati ni valetabu vata kei na Turaga kei na Nona yalayala tawamudu dina ni tiko na veisere. Oi rau ruarua erau a qara na veivuke ni Turaga ena veika kece ni rau tomana tiko na sasaga me vosota na nodrau bolebole ka tikoga ena salatu ni veiyalayalati. Erau nuitaka ni Turaga ena sotava na nodrau gagadre sega walega ena bula oqo, ia ena tawamudu talega. Oi rau ruarua erau susugi rau na luvedrau ni rau veivakavulici ena ivalavalamalua, yalomalua, kei na loloma savasava dina ga ni rau sotava tiko na bula dredre. Mai na ka au kila, oi rau na itubutubu dua oqo erau sega ni beitaka na Turaga ena vuku ni nodrau leqa. Ia, erau vakanamata ki liu ena taucoko ni vakanuinui kei na nuitaka na veivakalougatataki sa vakarautaka tu na Turaga baleti rau.²⁷

Taciqu kei na ganequ, sa vakaraitaka e dua na vakarau taucoko ni yalovata kei na duavata ni vakavuvuli kei na Tamada mai Lomalagi. A masu ko Koya ena vukudra na Nona itisaipeli, ka kaya, “Me ra duabau kecega; me vaka kedaru sa duabau, Tamaqu, me ra duabaukei kedaru: me vakadinata ko vuravura ni Kemuni sa talai au mai. ”²⁸

Taciqu kei na ganequ, au vakadinadinataka vei kemuni nida cakacaka vata—turaga kei na marama—ka duavata vakaidina, eda na marautaka na duavata a vakavulica na iVakabula nida vakayacora na noda itavi lesi vakalou ena veiwekani ni noda bula vakawati. Au yalataka vei kemuni, ena yaca i Karisito ni na semati na lomada “ena duavata kei na veilomani vakai keda.”²⁹ eda na reki vakalevu cake eda noda i lakolako ki na bulatawamudu, kei na noda igu ni veiqaravi vakai keda ena tubu sara vakalevu.³⁰ Au vakadinadinataka na vei dina eso oqo ena yaca tabu i Jisu Karisito, emeni.