E Se Lomamu Tikoga?

Dua na Siga Tabu, ni’u vakarau taura tiko na sakaremede ni oti e vica na macawa ni ilesilesi ni koniferedi ni iteki, au vakasamataka sara e dua na ka talei.

Ni sa tekivu masulaka na bete na madrai, na veivosa au dau rogoca tu e liu sa curuma vakaukauwa mai na noqu vakasama kei na yaloqu. “Ka vakadinadinataka vei kemuni, na Kalou, na Tamai keimami Tawamudu, ni sa lomadra me ra taura na yaca ni Luvemuni, ka dau nanumi koya tikoga ka muria na nona ivakaro sa solia vei ira; me tiko ga kina kei ira na Yalona.”¹ Sa vica vata na gauna eda sa vakadinadinataka vua na Kalou ni sa lomada sara?

Niu vakasamataka na bibi ni veivosa tabu oqori, na vosa lomadra a sega mada ni bau vakauqeti au me vaka oqo. A kuitaki ki na noqu vakasama kei na yaloqu na veika tabu ka kamica ena loloma ka vakavinavinakataki na solibula veisorovaki ni iVakabula kei na Nona ilesilesi bibi ena ituvatuva veivueti nei Tamada baleta noqu vuvale kei au. Oti au a rogoca ka vakila na vosa veisobuti ni kena masulaki na wai: “Me ra vakadinadinataka kina vei kemuni … ni ra na dau nanumi koya tiko ga.”² Au a kila vinaka sara ena gauna o ya, na maroroi ni ivakaro e dodonu me vinaka cake mai na loma vinaka.

Na votai ena sakaramede e sega ni cakacaka vakalotu vakawaleni me tukuna tiko ni da sa vakadonuya. Sa dua na veivakananumi kaukauwa ni dina ni Veisorovaki tawamudu ni iVakabula ka gadrevi meda daunanumi Koya tiko ga ka maroroya na Nona ivakaro. Na vakanamata vakatabakidua vua na iVakabula sa ka bibi ka itukutuku usutu ni rua na ivolanikalou cavuti wasoma ena Lotu—na masu ni sakaramede. Ni kilai vinaka na dina sa solia yalololoma mai na Tamada Vakalomalagi vei keda yadua maivei Luvena Duabau Ga e dodonu me uqeta na noda sasaga bibi me lomada tiko me idolei.

Sa tara kaukauwa tiko beka na noda yavu vakayalo vei Jisu Karisito?

Ke sa vovodea se vakawaleni tiko na noda yavu vakayalo, eda na rawa ni gole meda yavutaka na lomada me laurai na kena yaga vakailavo se dua na dredre eda na sotava yadua. Kevaka meda qai ciqoma na itukuutku ni Lotu e oka taumada tu kina na lawatu makawa se cala vakapolitiki vakatamata, vakatatabu cala ni tamata, kei na vakayagataki ni gauna, sa qai kena itinitini ni lomada sa tawayaga talega. Meda kakua ni namaka ni ivakavuvuli ni lomada me dau gu tiko vakadodonu kei ira sa dau veiuqeti ena itukutuku raraba se dau ni TikTok. Na ivakavuvuli ni tamata e dau sega ni lako vata kei na dina vakalou.

Na Lotu sa vanua ni soqoni vata vei ira na tamata ivalavala ca era lomana na Kalou ka sa lomadra mera muria Na Turaga o Jisu Karisito. Na lomadra oqo sa teivaki tu ena kila ni o Jisu Karisito, na Luve ni Kalou sa bula tiko. Na dina vakalou oqo ena rawa ni kilai ga ena kaukauwa ni Yalo Tabu. Koya gona, ni sa lomada sa na umanaki sara ki na levu ni gauna eda sa dinata meda tiko ena veivanua tabu sa veiuqeti tiko kina na Yalo Tabu.

Ena vinaka sara vei keda meda vakayagataka vakalevu na noda gauna ena veivosaki yaga ena kena veitalanoataki na veika eda leqataka tiko kei na Tamada Vakalomalagi dau loloma ka vakalailaitaki mai na gauna ena kena vakasaqarai na veika era nanuma na tamata. E rawa talega nida digia me veisautaki na noda itukutuku mai na talevoni veikauyaki ni veisiga me vosa i Karisito mai na ivolanikalou vakatabui kei na nodra vosa na Nona parofita bula.

Na noda vakabibitaka na rokovi ni Siga ni Vakacecegu, sauma vakadodonu na ikatini, tiko na ivolatara ni valetabu e bula tiko, gole ki valetabu, ka rokova na veiyalayalati tabu ni valetabu sa ivakadinadina kaukauwa ni sa lomada ka vakadeitaki ni noda yalayala. Sa lomada beka meda gugumatua sara vakalevu ka sega ni sasaga vakawaleni tu ga me vaqaqacotaki na noda vakabauti Jisu Karisito?

Sa lomani keda vakauasivi na Tamada Vakalomalagi, ia na loloma oqo e lako mai ena nanamaki levu. Sa namaka o Koya me sa lomada sara meda biuta na iVakabula me usutu ni noda bula. Na iVakabula sa noda ivakaraitaki uasivi ki na lomada meda soli keda vua na Tamada ena veika kecega. Sai Koya na “sala, kei na vu ni dina, kei na vu ni bula.”³ Ea Lomana dina me sorovaka na noda ivalavala ca. Sa vakamamadataka noda icolacola, vakayalia na noda rere, vaqaqacotaki keda, ka kauta mai na vakacegu kei na kila ki yaloda ena gauna ni lomaocaoca kei na rarawa.

Ia na vakabauti Jisu Karisito sa noda digidigi. “Kevaka mada ga [meda] gadreva [meda] vakabauta”⁴ na Nona vosa, eda sa tekivutaka kina se tuvanaka vou na noda ilakolako ni vakabauta. Na Nona vosa, kei na teivaki ki yaloda me vaka na sorenikau ka susugi vakavinaka, ena vakawakana ka tubu na noda vakabauta me vakadeitaki ka yaco me ivakavuvuli ni cakacaka kei na kaukauwa. Na iVola i Momani sa noda ivurevure kaukauwa duadua me tubu kina ka vakalesui mai na vakabauta. Na gagadre ni lomada sa gacagaca ni vakabauta.

Na bula oqo, ni tuvai vakalou, e sega ni rawarawa ena so na gauna ka dau veiuabaleti. Ia, “[oi keda] [meda] sa rawata na marau”!⁵ Na vakanamata vua na iVakabula kei na noda veiyalayalati tabu e kauta mai na marau tawamudu! Na inaki ni bula oqo o ya meda na vakadinadinataka na lomada. “Na itavi levu ena bula [kei na isau ni bula vakatisaipeli, sa ikoya me vulici na loma ni Turaga ka cakava sara.”⁶ Na bula dina vakatisaipeli e mua ki na taucoko ni reki. Sa lomada beka meda volia na isau ni noda bula vakatisaipeli?

Na salatu ni veiyalayalati e sega ni ituvatuva rawarawa; sa cakacaka ni tubu vakayalo kei na vakatitobutaki ni dina vua na Turaga o Jisu Karisito. Na usutu ni inaki ni ivakaro yadua, ivakavuvuli, veiyalayalati, kei na cakacaka vakalotu o ya me tarai cake na vakabauta kei na nuitaki Jisu Karisito. Ni da guta meda usututaka na noda bula vei Karisito, sa dodonu me vakaivakarau—sega ni vakailavaki, vakaituvaki se vakawaleni. Sa sega ni rawa meda vakacagicagi mada se mai na noda dui gauna ni lomada meda “tu ka vakadinadinataka na Kalou ena veigauna kecega kei na veika kecega, kei na veivanua kecega.”⁷ Na bula vakatisaipeli e sega ni ka wale, baleta na veitokani ni Yalo Tabu e sega ni saumi rawa.

E dina na Turaga a vakasamataka tiko na noda siga nikua ni vakavulica tiko na vosa vakatautauvata ni tini na goneyalewa. Dua vei iratou na lima era vuku a kaya o Koya: era “sa taura na Yalo Tabu me nodra idusidusi, ka ra qai sega ni rawai,”⁸ ia na nodratou cina na lialia “sa boko” ni sa oti na waiwai.⁹ E rairai nona vosa o Nifai e vakamacalataki ira vinaka na a yalodina tu e liu ni Lotu: “Ko ira tale eso ena vakacegui ira, ka veidabuitaki ira ena sautu vakavuravura, ka ra na kaya kina: Sa vinaka ko Saioni.”¹⁰

Na sautu vakavuravura oya na vakasaqara kei na nuitaka tiko na veika vakavuravura ka sega ni o Karisito—dua tale kena tukuni, na rai tiko ena vakadodorai vakayago sega ena vakadodorai vakayalo. Na Yalo Tabu sa dau solia vei keda na gumatua meda raica na “veika me vaka na kena ituvaki dina, kei na… ituvaki dina ni veika ena qai yaco mai.”¹¹ Ena “kaukauwa ni Yalo Tabu [eda na rawa ni] kila kina na dina ni veika kecega”¹² ka sega ni lawakitaki. Eda sa biuti Karisito me uto ni noda bula ka yalataka ni sa lomada meda talairawarawa ki na Nona ivakaro, sega ni baleta ni da sa mataboko ia ni da sa rawa ni rai.¹³

Vakacava o iratou na marama lialia? Na cava e sega ni lomadratou kina me kau tiko e dua na tavaya ni waiwai vakayalo? E ratou a nanamaki cala beka? Eratou rairai a vakawelewele beka baleta ni na vakaosooso se tawayaga? Se cava na vuna, eratou a lawakitaki baleta na ilesilesi bibi i Karisito. Oqo sa ilawaki tudei i Setani, kei na vuna sa boko kina na nodratou cina ni ivakadinadina ni sa sega na waiwai vakayalo. Na vosa vakatautauvata sa vakaibalebale tiko kina noda gauna. E vuqa era sa biuta na iVakabula kei na nodra veiyalayalati ni bera ni ra qai biuta na Nona Lotu.

Eda bula tiko ena gauna ni veika duatani era a tukuna tiko mai na parofita makawa, na siga ena ravuravu kina o Setani “e lomadra na luve ni tamata, ka vakayavalati ira mera cudruva na ka vinaka.”¹⁴ E vuqa sara vei keda, sa bula tiko ena ilova na onolaini kei vuravura sa luvuci tu ena marau kei na itukutuku cala sega na ivakadinadina vakalou ka vakabauta na Karisito.

Na veiuqeti kaukauwa vakayalo ena bula ni dua na gonelailai sa ivakaraitaki dodonu ni itubutubu kei na budra tukadra na gone era maroroya ena yalodina na nodra dui veiyalayalati tabu. O ira na itubutubu sa nakita mera vakavulica na luvedra mera vakabauta na Turaga o Jisu Karisito mera na “kila kina na ivurevure me ra rai kina me bokoci kina na nodra ivalavala ca”¹⁵ Na maroroi tu vakawelewele ka vakaveitalia na veiyalayalati ena mua ki na vakawelewele vakayalo. Na vakacacani vakayalo oqo sa dau vakavuqa vei ira na luveda kei na makubuda. Era sa lomadra tiko na itubutubu kei na budra tukadra na gone.

A vakarota o Peresitedi Russell M. Nelson, “Ia ena veisiga ka lako mai, ena sega ni rawa na bula tiko vakayalo ke sega na cakacaka veituberi, veidusimaki, ka veivakacegui ni Yalo Tabu.”¹⁶ Oqo na ivakaro matata ka sega ni cala meda vakavinakataka na noda cina ka vakalevutaka na noda waiwai vakayalo maroroi. Sa lomada tiko beka ga meda muri ira na parofita bula? Na cava na ivakatagedegede ni waiwai vakayalo ena nomu cina tabucagi? Na veisau cava ena nomu bula vakataki iko me rawa ni o vakila na veivakayarayarataki ni Yalo Tabu e veigauna?

Nikua, me vaka ena gauna i Jisu, era na lesu tale eso, e sega ni lomadra mera ciqoma na isau ni bula vakatisaipeli. Me vaka ni sa vosa vakacacataki ka vakalewai tikoga na Lotu ni iVakabula kei ira sa muri Koya, ena gadrevi noda bula vakatisaipeli me lomada sara me vakatudonutaki ka vaqaqacotaki na noda suitu vakayalo ka sega ni muri ira.¹⁷

Kevaka sa tara vakaukauwa na noda yavu vakayalo vei Jisu Karisito, eda na sega ni bale ka sega ni dodonu meda rere

“Raica, sa gadreva na Turaga na yalo kei na vakasama sa vakarau tu; ia ko ira sa vakarau tu ka talairawarawa era na kania na veta ni vuata ena vanua ko Saioni ena veisiga mai muri.”¹⁸

Me da sa qai lomada tikoga. Ena yaca tabu ni Turaga ko Jisu Karisito, emeni.