Ñande majordomía yvy arigua
Atestifika oñeprometeha tuicha jehovasapy umi ohayhúva ha oñangakóvape yvýre, ha kuimba’e ha kuña ipypeguakuérare.
Rovisita aja Francia, tetã ore reñoihague, che ha che rembireko nda’aréi rovy’ákuri roguerahávo sa’i ore nietokuérape ohecha hag̃ua hechapyrãitéva yvotyty opytáva táva’i Giverny-pe. Rovy’a tapére roguerohorývo umi yvoty porãite, umi ypegua lírio kate, ha tesape omimbíva hi’yno’õme.
Ko tenda ojeguerovia’ỹva ha’e peteĩ kuimba’e orekóva pasión creativa oguerúva: pintor guasuete Claude Monet, 40 áño pukukue mborayhúpe omohenda ha oñotỹva’ekue ijyvotyty ojapo hag̃ua chugui henda opinta hag̃ua. Monet oñapymiva’ekue naturalésa porãnguépe; upéi, ipinsel reheve, oikuaauka umi impresiõ oñanduva’ekue kolor ha tesape pinseláda reheve. Áño ohasávo, ha’e ojapo hechapyrãitéva pintúra atyeta, ijyvotyty guietépe oñeispiráva.
Lirios de agua y puente japonés , 1899, Claude Monet rupive
Hermano ha hermana-kuéra, ñande jereregua naturalésa porãite ypýpe jeiko, ikatu ogueru tekovegua jehasa iñispiradovéva ha horyvéva. Umi mba’e ñañandúva omombáy ñande pype sentído pypuku ñande Ru Yvagagua ha Ita’ýra, Jesucristo-re, ojapova’ekue ko yvy ijojaha’ỹva—umi ijyvyty ha hi’ysyry, ka’avo ha mymbakuéra—ha ñande rukuéra peteĩha, Adán ha Eva.1
Pe Creación rembiapo ndaha’éi ijeheguínte opáva. Ha’e Tupã plan-peguaite Ita’yrakuérape g̃uarã. Ipropósito ha’e omoĩ hag̃ua tenda kuimba’e ha kuñanguéra ikatuhápe ojepy’ara’ã, omomba’apo isãso, ovy’a, ha oikuaaha’ã ha okakuaa ohojey hag̃ua hikuái peteĩ ára Ijapohare rendápe, ha ohupyty tekove ijapyra’ỹva.
Ko’ã hechapyrãva apopy oñembosako’ipava’ekue ñane ñeimeporãrã, ha ha’e pe Apohare mborayhu rechaukaha Ita’yrakuérare. Ñandejára he’iva’ekue, “Héẽ, opa mba’e yvýgui heñóiva … ojejapo yvyporakuéra ñeimeporãrã ha oiporu hag̃ua, ombohory hag̃ua tesa ha ombovy’a hag̃ua korasõ”2
Upevére, pe creación don divino ndoúiri tembiaporã ha rresponsavilida’ỹre. Ko’ã tembiaporã oñemyesakã porãve temimo’ã majordomía rupive. Evanhélio ñe’ẽme, pe ñe’ẽ majordomía ome’ẽ peteĩ responsavilida espiritual térã temporal oñeñangareko hag̃ua peteĩ mba’e Tupã mba’évare, ñaimeháre responsable.3
Escritura-kuéra marangatúpe oñembo’eháicha, ñande majordomía yvy ariguápe oĩ ko’ã principio:
Principio peteĩha: Pe yvy tuichakue, opa tekove ipypeguáre, Tupã mba’e.
Pe Creador okonfiákuri ñañangareko yvy arigua mba’ekuérare ha opaichagua tekovére, ha katu Ha’e ojeheja ijupe yvy járaramo. Ha’e he’i, “Che, Ñandejára, amyasãikuri umi yvága ha ajapo pe yvy, che po apopyre; ha opa mba’e ipypegua chemba’e”.4 Opa oĩva yvy ári Tupã mba’e, ha ñande familia, ñande rete físico, ha ñande rekove tee jepeve.5
Principio Mokõiha: Tupã apopykuéra majordómoramo, jareko tembiaporã ñamomorã ha ñañangereko hag̃ua umívare.
Tupã ra’ykuéraramo, jarresiviva’ekue enkárgo ha’e hag̃ua majordómo, oñangarekóva ha oñamáva umi Hi’apoha divínore. Ñandejára he’i Ha’e ojapoha “opa tekove tombohovái, majordómoramo umi jehovasa yvy ariguáre, ajapova’ekue ha amoĩva’ekue che tekovekuérape g̃uarã.”6
Ñande Ru Yvagagua oheja jaiporu umi mba’e yvy arigua ñande jaiporuseháicha. Upevére ndajahechaiva’erã pe sãso jarekóva peteĩ licencia-ramo jaiporu térã ja’u hag̃ua ko mundogua rrikésa, akãguapy’ỹre térã jejoko’ỹre. Ñandejára ome’ẽ ko ñemoñe’ẽ: “Ha ombovy’a Tupãme ome’ẽhague opa ko’ã mba’e yvypórape; pevarã ojejapógui, akãguapýpe ojeporu hag̃ua, ha ndaha’éi ñemboharáipe, ni mbaretépe.”7
Presidente Russell M. Nelson he’íkuri, “Apopy Divíno rupytyháraramo, mba’épa jajapova’erã? Ñañangarekova’erã ko yvýre, ha’ére majordómo iñarandúva hi’ári, ha ñamo’ã umi ñemoñareaty oútavape g̃uarã”.8
Temikotevẽ científico térã polítikoramo jepeve, yvýre ha umi mba’e ñande jerereguáre ñeñangareko ha’e peteĩ responsabilidad sagrada Tupã ome’ẽva’ekue ñandéve, ñanemyenyhẽva’erã ipypykúva ñane rembiaporã andúgui ha umildágui. Ha’e avei mba’eguasu ñande discipulado-pegua. Mba’éicha ñamomorãta ha jahayhúta Túva Yvagagua ha Jesucristo-pe, nañamomorãi ha ndajahayhúiramo umi Ha’e ojapova’ekue?
Oĩ hetaite mba’e ikatúva jajapo—oñondivepa ha ñaneaño—ha’e hag̃ua majordómo imba’eporãva. Jahechakuaávo ñande circunstancia individual, peteĩteĩ ñande jaipurukuaa umi mba’e porãite yvy arigua momba’eguasu ha akãguapy reheve. Ikatu ñaipytyvõ umi komunida ñeha’ã oñeñangareko hag̃ua yvýre. Ikatu jajapyhy peteĩ jeiko ha tekopy omomba’éva umi Tupã apopy, ha ñamohenda, ñamoporã ha taiñispiradove umi tenda ñande jaikoha.9
Ñande majordomíape Tupã creación ári oĩ avei, hu’ãme, jehayhu tembiaporã sagrado, opa yvypórare oñenkompartívandi ko yvy jerrespeta ha ñeñangareko. Ha’ekuéra ningo Tupã ra’y ha rajykuéra, ñande hermano ha hermana, ha ivy’apavẽkuéra ijapyra’ỹva ha’e Creación rembiapo propósito.
Autor Antoine de Saint-Exupéry kóicha omombe’u: Peteĩ ára, oho jave tren-pe, ojejuhu oguapy peteĩ rrefuhiádo aty apytépe. Oguapyetégui hese esperansa’ỹ ohecháva peteĩ mitãmi rováre, ha’e he’i’asy, “mutasiõ rupi peteĩ rrósa pyahu heñóiramo yvotytýpe, opa umi yvotýre oñangarekóvare ovy’a. Omboyke hikuái pe rrósa, oñangareko ha ojesareko hese. Ha katu ndaipóri yvypórare oñangarekóva.”10
Che hermano ha hermana-kuéra, nañandeiva’erãpa umi ñande rapicha kuña ha kuimba’ére oñangarekóva? Ñande piko ndaha’éi ñande joyke’ykuéra rerekua? Jesús omanda ñandéve jahayhu hag̃ua ñande rapichápe ñande jajehayhuháicha.11 Ijurúgui, pe ñe’ẽ tapicha ndaha’éi he’isénteva ojoypýpe ñeime; he’ise korasõ ypýpe ñeime. Omoinge opa ko planeta-guápe—taha’e oikóva ñande ypýpe térã mombyry ambue tetãme, taha’e ha’e mba’éichapa pe hekove, rembiasa térã umi ohasavahína.
Cristo discípulo-háicha, jaguereko tembiaporã añete kane’õ’ỹme ñamba’apo oĩ hag̃ua py’aguapy ha jeikoporã opa tetãnguéra yvy arigua apytépe. Jajapova’erã opa ikatúva ñamo’ã ha ñame’ẽ hag̃ua angapyhy ha py’aguapy ikangývape, oikotevẽvape ha opa umi ohasa’asýva térã ojejopývape. Opa mba’e ári, tuichave mborayhu don ikatúva ñaikuãve’ẽ ñande rapichakuérape ha’e ñakomparti hendivekuéra evanhélio vy’apavẽ ha ñainvita chupekuéra ou hag̃ua I-salvador-pe, umi konvénio marangatu ha ordenánsa rupive.
Principio Mbohapyha: Ñañeinvita japarticipa hag̃ua creacion rembiapópe.
Creación proceso divíno ne’ĩrã gueteri opa. Ára ha ára, Tupã apopykuéra okakuaave, oñemyasãi ha hetave ohóvo. Upe mba’e hechapyrãvéva ningo ñande Ru Yvagagua oipysoha ñandéve invitasiõ jaike hag̃ua Hembiapo creativo-pe.
Jaike Creación rembiapópe ñañemytỹ jave térã jajogapo jave ko múndope—akóinte jahechaukáramo rrespéto umi Tupã apopýre. Ikatu jahechauka ñapytyvõ umi arte rembiapo, arquitectura, purahéi, literatura, ha cultura rupive, omoporãva ñande planéta, omombáyva ñane sentído ha ohesapéva ñande rekove. Avei ñaipytyvõ umi descubrimiento científico ha médico rupive, omo’ãva pe yvy ha tekove ipypegua. Presidente Thomas S. Monson omombyky ko temimo’ã ko’ã ñe’ẽ porãite reheve: “Tupã ohejava’ekue múndo ojapopa’ỹre, yvypóra omba’apo hag̃ua ipype ikatupyry orekóvare … yvypóra oikuaa hag̃ua umi vy’apavẽ ha glória creación rehegua”.12
Jesús talénto parávolape, upe jára ou jeývo ije’óigui, omomorã ha ombojopói umi mokõi siervo ombohetave ha ombotuichave’akuépe italénto. Upeicha’ỹ katu, ha’e ohenói “mba’eve’ỹ” tembiguái omokañy’akuépe yvy guýpe italénto peteĩete ha oipe’a chugui pe ohupytyva’ekue jepeve.13
Kóicha avei, ñane rembiapo tee majordómoramo yvy arigua creación-re ndaha’éi ñañagareko térã ñamo’ãnte umíva. Ñandejára oha’arõ ñamba’apo jesarekópe, ñamýivo I-santo Espíritu rupi, ñamongakuaa, ñamopu’ã ha ñaporãve umi mba’e Ha’e onkargava’ekue ñandéve—ndaha’éi ñane ñeimeporãre añónte ha katu jahovasa hag̃ua ambuekuérape.
Opa mba’e yvypóra ohupytýva apytépe, ndaipóri tembiasa ombojojáva oikóre ñandehegui cocreadorTupãndi, ñame’ẽvo tekove térã ñaipytyvõvo peteĩ mitãme toikuaa, tokakuaa, ha toñakãrapu’ã—taha’e túva ha sy, mbo’ehára ha líder-ramo, térã oimeraẽ ambue hendáicha. Ndaipóri majordomía isagradove, oporombovy’ave, ha katu avei ijetu’uvéva ñamoirũgui ñande Apohárape ñame’ẽvo cuerpo físico Ita’yrakuéra espiritual-pe, ha upéi ñaipytyvõ chupekuéra tohupyty ipotensial divíno.
Cocreación rehegua rresponsabilida ha’e peteĩ ñemomandu’a tapia isagradoha opa tekovekuéra rekove ha hete, ha’eha hikuái Tupã mba’ete voi, ha Ha’e ojapoha ñandehegui ñangarekohára, jarrespeta, ñamo’ã ha ñañangareko hag̃ua hesekuéra. Tupã rembiapoukapykuéra, oisãmbyhýva procreación pu’akakuéra ha umi familia ijapyra’ỹva ñemoĩ, ñandegia ko majordomía marangatúpe, tekotevẽtereíva I-plan-pe.
Che hermano ha hermana-kuéra, jahechakuaava’erã opa mba’e ha’eha espiritual Ñandejárape g̃uarã—jepeve umi mba’e itemporal-véva ñande rekovépe. Atestifika oñeprometeha tuicha jehovasapy umi ohayhúva ha oñangakóvape yvýre, ha kuimba’e ha kuña ipypeguakuérare. Peiméramo jeroviarekópe ko majordomía sagrádape, ha peñongatu umi pene konvénio ijapyra’ỹva, pekakuaáta Tupã ha Ita’ýra Jesucristo jeikuaápe, ha peñanduvéta Imborayhu ha Iñinfluensia pende rekovépe. Opa ko’ã mba’e penembosako’íta peiko hag̃ua Hendivekuéra ha tapehupytyve poder creativo14 vida oútavape.
Ko vida terrenal pahápe, upe Mbo’ehára ojeruréta ñandéve ñarrendi hag̃ua kuénta ñande sagrada majordomíagui, ha mba’éicha ñañangarekóra’e umi mba’e Ha’e ojapova’ekuére. Ajerure tañahendu upéramo umi ñe’ẽ mborayhúpe he’i mbeguéva ñane korasõme: “Iporãite, nde ningo tembiguái imba’eporã ha ijeroviarekóva: ndejeroviarekói mbovymígui mba’e ári; romoĩta sãmbyhyhára heta mba’e ári: eike nde jára vy’ápe.”15 Jesucristo rérape, Amén.