Ikatu jajapo Hese rupive umi hasyvéva

Salvador iministério aja yvy ári, omaña peteĩ kuimba’e ohecha’ỹvare. Umi Jesús discípulo oporandu : “Maestro, mávapa opekára’e, kóva térã ituvakuéra, ha’e onase hag̃ua ohecha’ỹre?”

Salvador ombohovái mbaretéva, mborayhúpe ha hi‘añetéva ohechauka porã ñandéve Ha‘e oikuaaha ñande ñorairõkuéra: “Ni kóva ndopekái, ni ituvakuéra, sino umi Tupã rembiapo oñemanifesta hag̃ua hese.”¹

Oĩrõ jepeve umi desafío ikatúva ou ñe‘ẽrendu’ỹ ojeipotávagui, jaikuaa heta umi tekovegua desafío ouha ambue mba‘ére. Taha‘e ha‘éva umi ñande desafío fuénte, ikatu peteĩ oportunidad de oro jakakuaa hag̃ua.

Ore familia ndojelibrái umi tekove adversidad-gui. Akakuaávo, ahecharamo umi familia hetáva. Umíchagua familia chepy‘ara‘ã, imbaretevéva ajuhu jave tupao che mitãrusúpe, che tio che syguigua rupive, Sarfo, ha hembirekóndi Takoradi, Ghana-pe.

Hannah ha che romendávo, roipota ore bendición patriarcal oñekumpli, upe he‘íva rojehovasataha heta mitã reheve. Ha katu, ore mitã mbohapyha onase mboyve, médikamente hesakã Hannah ndaikatumo‘ãiha oreko ambue mitãra‘y. Vy‘arã niko, Kenneth onasérõ jepeve peteĩ situasiõ oamenasávape hekove, chupe ha isýpe g̃uarã, og̃uahẽ tesãi ha tekove reheve ha isy ojerrekupera. Ikatúkuri oñepyrũ opartisipapaite ore rekove familiar-pe, oikehápe Tupaópe jeho, umi familia ñembo‘e ára ha ára, Escritura-kuéra estudio, noche de hogar ha umi activida vy‘arã hesãivape.

Romohendáramo jepe ore expectativa peteĩ familia hetáre, rovy‘a rojapo haguére umi mba‘e oñembo‘éva “Familia: Peteĩ Proklamasiõ Múndope g̃uarã” umi mbohapy ore mitã rohayhuetévandi. Umi ñehekombo‘e apo ome’ẽ hetave significado che fe okakuaávape.

He’iháicha upe proklamasiõ: “Kuimba’e ha kuña ñemenda oñeikotevẽte Iplan eterno-pe g̃uarã. Mitãnguéra heñoiva’erã upe ñemenda joajúgui ha oñemongakuaava’erã túva ha sy iñe’ẽrendúva ikonvénio matrimonial-re opa jeroviareko reheve.”² Rojapokuévo ko’ã principio, rojehovasa.

Upevére, peteĩ semána pahápe che servicio aja estáka presidente ramo, rohasa prueba imbaretevéva ikatúva ohasa tuvakuéra. Ore familia ojevy peteĩ Tupao actividad-gui ha oñembyaty okaru hag̃ua. Upéi ore mbohapy mitãkuimba‘e osẽ oñembosarái ore róga ypýpe.

Che rembireko oñandu jey jey ha’etévaicha mba’e oĩvaíva. Ojerure chéve tahechami umi mitã rojohéi aja tembipuru. Añandu oĩ porãha hikuái ikatúre rohendu chupekuéra oñemosiõnáramo hikuái iñembosaráire.

Ikatúvo ipahápe mokõivéva roho rohecha ore mitãnguéra, ore ñemondyirã rojuhu Kenneth michĩetéva 18 mésente orekóva, ñemomyi’ỹme peteĩ y balde-pe, iñermanokuéra ohecha’ỹre chupe. Rogueraha urgencia-pe hospital-pe, ha katu opa ñeha’ã oñemoingove hag̃ua ndoikói.

Ropyta vaiete ikatu’ỹre roguereko oportunida romongakuaávo ore mitã porãite tekove yvy ári aja. Roikuaáramo jepe Kenneth ha’etaha apyra’ỹme ore familia-gua, añeñandu aporandu Tupãme mba’érepa oheja ojehu ko tragedia ajapóvokuri opa ikatúva ambotuicha hag̃ua che llamamiénto. Aju ramókuri che rógape aha rire akumpli peteĩ ajapova’erãndi aministrávo umi sántope. Mba’ére Tupã ndaikatúi ohecha che servicio ha osalva ore mitã ha ore familia-pe ko tragedia-gui? Apensavévo upévare, che py’arove ahávo.

Che rembireko araka’eve ndachekulpái nambohovái haguére umi oñandúva, ha katu aikuaa peteĩ mbo’epy omoambuéva che rekove ha ajapo mokõi regla araka’eve ojeheja’ỹva’erã:

Regla 1: Pehendu ha peñatende umi pene rembireko oñandúvare.

Regla 2: Napeiméiramo segúro oimeraẽ mba’ére, pehecha jey pe regla número 1.

Upe experiencia hasyetereíramo jepe ha rohasa’asýntevo rohóvo, ore kárga ipohyietéva ipahápe ivevyive.³ Che rembireko ha che roñehekombo’e umi mbo’epy ha’éva ore pérdida rehegua rupive. Roñeñandu rojoaju ha roñeñapytĩha umi témplo konvéniore; roikuaa ikatu rojerure Kenneth-re oremba’éicha múndo oútavape onasére konvénio ryepýpe. Avei rohupyty upe experiencia roikotevẽva roministra hag̃ua ambuekuérape ha roempatisa hag̃ua umi hasývare chupekuérape. Atestifika upe guive ore py’aro oguehague romomba’apóvo rohóvo ore fe Ñandejárare. Ore experiencia ipohýi gueteri, ha katu roikuaa Apóstol Pablo ndive “opa mba’e ikatu ajapo Cristo-ndi upe [ñanemombaretéva]” ñamañávo Hese.⁴

Presidente Russell M. Nelson ombo’e, “Ñamombytéramo ñande rekove Tupã plan de salvacion-re … ha Jesucristo ha iñevanhéliore, ikatu ñañandu vy’apavẽ, opa mba’e oikórõ térã oiko’ỹramo ñande rekovépe.” He’i avei, “Pe vy’apavẽ ou Chugui ha Hese rupive.”⁵

Ikatu ñañandu ñaime porãha ha ñanerenyhẽ py’aguapýgui umi ñande ára jahasa’asývape. Pe mborayhu ñañandúva Salvador ha Iñexpiasiõre oiko chugui peteĩ recurso mbarete ñandéve g̃uarã umi ára jahasa’asývo. “Opaite mba‘e ijoja’ỹva ñande rekovépe [ha hasýva] ikatu ñamonguera Jesucristo Expiasiõ rupive.”⁶ Ha’e omandákuri, “Múndope peguerekóta jehasa’asy; ha katu pejerovia; Che aganákuri múndope.”⁷ Ha’e ikatu ñanepytyvõ ña’aguanta hag̃ua oimeháichagua mba’e hasýva, mba’asy ha prueba ñambohováiva ko tekove yvy ariguápe.

Jajuhu heta historia bíblica umi líder tuicha ha ijoheipyréva rehegua Jeremías-cha, Job, José Smith ha Nefi, ndojesalvaiva’ekue umi ñorairõ ha umi desafío yvy ariguágui. Ha’ekuéra umi mortal oikuaáva ohenduva’erãha Ñandejárape uvei umi ohasa’asy jave.⁸

Umi ára vaiete aja Liberty cárcel-pe, José Smith oñembo’e’asy: “Oh Tupã, Moõ reime? Moõ oime pabellón omo’ãva nde renda ñemimby?”⁹ Ñandejára ombo’e José-pe ogueropu’aka porã hag̃ua”¹⁰ ha opromete ojapóramo, opa ko’ã mba’e ome’ẽtaha chupe experiencia ha ha’etaha iñeime porãrã .¹¹

Apensávo umi che experiencia-re, ahechakuaa aikuaaha heta umi che mbo’epy iporãvéva umi che rekove ára hasyvehápe, umi moménto chepe’ávape che ñeimeporãgui. Umi jehasa’asy ambohovaiva’ekue che mitãme, añehekombo’évo Tupaógui Seminario rupive, konvérso ramóicha ha misionero de tiempo completo-ramo, ha umi ambohovaiva’ekue che ñehekombo’épe, añeha’ãvo ambotuicha che llamamiento-kuéra ha amongakuaávo peteĩ familia, chembosako’íkuri ára oútavape g̃uarã. Ambohovái porãvévo fe reheve Ñandejárare umi circunstancia hasyvéva, akakuaave che discipulado-pe.

Umi mba’e hasýva ñande rekovépe nañanemondyiva’erã jaikévo upe tape po’i ha ipy’ỹvape.¹² Jesucristo oikuaa “ñe’ẽrendu ohasa’asy haguére.”¹³ Jasegívo jahávo Chupe, umi ñane moménto hasývape, ikatu jakakuaa tañag̃uahẽ hag̃ua Ha’éicha.

Peteĩ umi konvénio jajapóva témplope Ñandejárandi ha’e jaiko upe sacrificio léipe. Pe sacrificio akóinte oĩkuri Jesucristo evanhéliope. Ha’e peteĩ ñeromandu’a upe Jesucristo sacrificio expiatorio tuichaitévagui opa umi oikova’ekue térã oikótavape g̃uarã yvy ári.

Imágen – Ta’anga

Elder Morrison misionero-kuéra

Aikuaa Ñandejára akóinte omyengoviaha umi ñane potapy ijojáva. Penemandu’ápa umi heta mitã oñeprometeva’ekue chéve che bendición patriarcal-pe? Upe jehovasapy oñekumpli hína. Che rembireko ha che roservi heta misionerokuérandi, oúva 25 tetãgui, Misión Ghana Cape Coast-pe. Ojehayhuete oréve g̃uarã ha’eramoguáicha ore mitãnguéra añete.

Atestifika jakakuaaha ñande discipulado-pe ñamomba’apóvo fe Ñandejárare umi ñande ára hasyyvévape. Jajapóramo, poriahuverekópe Ha’e ñañemombaretéta ha ñanepytyvõta jagueraha ñande kárga. Jesucristo rérape, Amén.