Ñañemoĩporãmba Ipype

Ñande Ru Yvagagua ha ñande Salvador, Jesucristo, ipokatu ñandesalva ha ñanemoambue hag̃ua. Ha’ekuéra ikatu ñanepytyvõ ñag̃uahẽ hag̃ua jaiko Ha’ekuéraicha.

Ojapo mbovymi ary, peteĩva umi ore niéto imitãva, Aarón, oñepyrũ hasy. Ikane’õ, imoretón hetaiterei ha ndojekuaái hese hesãiha. Prueba medikakuéra rire, oñediagnostika chupe anemia aplásica grave, peteĩ mba’asy upe imédula ósea nome’ẽveihápe umi glóbulo pytã, glóbulo morotĩ ha plakéta. Tratamiénto ha ñemonguera’ỹre gueteri, huguy ndaikatúi ojekoagula porã ni okombati umi infección; uvei umi je’a, lesiõ térã mba’asy’imígui ikatu oiko pya’e peteĩ amenása hekovépe g̃uarã.

Ára ohasávape, Aarón orresivi meme umi plakéta ha tuguy transfusiõ ani hag̃ua ohasa vai. Medikokuéra omyesakã pe ñemonguera año oĩva pe mba’asýpe g̃uarã ha’eha peteĩ médula ósea trasplante, ha posibilida iporãvéva osẽporãmba hag̃ua ha’eha toguereko peteĩ hermano idonánteramo. Peteĩva iñermanokuéra apytépe ha’éramo upe donánte iporãvéva, upe trasplante ikatu osalva hekove. Irundyvéva iñermanokuéra imitãvéva chigui ojevalua, ha peteĩ, Maxwell, ojehechákuri ha’eha peteĩ donánte iporãvéva.

Uvei peteĩ donánte oho porãitévare, peteĩ médula ósea trasplante oreko gueteri peteĩ riesgo vai komplikasiõrã. Upe proceso oikotevẽ umi Aarón selulaite imédula ósea hasývape toñehundi peteĩ kimioterapia kombinasiõ ha rradiasiõ rupive ojapyhy mboyve umi sélula madre iñermano Maxwell médula ósea-gui. Upéi, Aarón sistema inmunológico oĩvaíre, oikotevẽ opyta ha’eño hospital-pe heta semana aja ha upéi hógapema, heta mése aja protokólo, rrestrisiõ ha medicamento especial reheve.

Oñeha’arõva trasplante-gui niko Aarón rete nombotovemo’ãiha upe donánte selulakuéra ha umi Maxwell sélula omoheñoitaha mbeguekatu umi glóbulo pytã ha morotĩ ha umi plakéta oñeikotevẽva Aarón retépe. Peteĩ donánte trasplante osẽ porãva ogueru peteĩ ñemoambue fisiológico añetete. Ñemoindyirã, peteĩ médiko omyesakã Aarón ojapóramo peteĩ mba’evai ha oheja huguy pe escena del crimen-pe, policía ikatutaha ojagarra iñermano Maxwell-pe. Kóva ou Aarón ruguy oútagui umi sélula oñetrasplantava’ekue Maxwell-gui ha oguerekotaha Maxwell ADN, ha upeichataha hekove rembyre.

Aarón salvasiõ iñermáno ruguýre ogueru heta jepy’amongeta Jesucristo ruguy expiatóriore ha umi oguerúvare Iñexpiasiõ ñandepype. Añemombytese ko árape upe ñemoambue opytáva ha omoingovévape oikóva ñapermitívo Ñandejára ojapo milagro ñandepype.¹

Aarón ndaipokatúi ijehegui ipu’aka hag̃ua mba’asýre. Hete ndaikatúi ojapo umi sélula tuguy rehegua oñeikotevẽva omantene hag̃ua hekove. Noimportái ojapóva personalmente, ndaikatúi omonguera imédula ósea. Aarón ndaikatuiháicha oñemonguera ijupe año, ñande avei ndaikatúi jajesalva ñande añorei. Noimportái mba’eichaitépa ñandekapasida, ñanderekombo’e, ñanearandu térã ñanembarete, ndaikatúi ñañemopotĩ ñande pekadokuéragui, ñamoambue ñande rete peteĩ estado inmortal-pe, térã jaje’exalta ñandejupe. Ikatúnte Salvador Jesucristo ha Iñexpiasiõ ijapyra’ỹva rupive. “Ndaipóri ambue tape ni ambue téra yvága guýpe yvypóra ikatu rupi ojesalva Tupã rréinope.”² Pe Huguy expiatorio ha’e pe ñanemopotĩva ha ñanesantifikáva³

Aarón ndaikatuirõ jepe oñemonguera ijupe, upe transplante oiko porã hag̃ua ha’e oĩva’erã dispuesto ojapóvo umi médico ojeruréva chupe, jepe umi mba’e hasy ha ijetu’úva. Ndaikatúiramo jepe jajesalva ñandejupe, ñañesometévo Ñandejára oipotávape ha ñañongatu ñane konveniokuéra, pe tape ojepe’a ñane rredensiõrã.⁴ Upe Aarón ruguy sélula ADN ñemoambue proceso-ichaite, ikatu ñamoambue ñane korasõ,⁵ jareko Ha’anga ñande rovápe,⁶ ha ha’e mitã pyahu Cristo-pe.⁷

Alma omomandu’a umi Zarahemla-guápe, generación ohasáva oñekonvertiva’ekuére. Oñe’ẽvo itúvare, Alma omyesakã pe “ojeroviaháicha, ojejapo peteĩ tuicha ñemoambue ikorasõme.”⁸ Upéi oporandu, “Peñandu piko ko tuicha ñemoambue pene korasõme?”⁹ Ndaha’éi tekovekuéra umi omoambuéva ikorasõ. Ñandejára upe ojapóva ñemoambue añetete. Alma omyesakã porãite upéva. Ha’e he’i, “Péina ápe, ha’e omoambuékuri ikorasõkuéra.”¹⁰ Ha’ekuéra “oñemomirĩkuri ha omoĩ hikuái ijerovia pe Tupã añetegua ha oikovéva rehe … [ha] ijeroviareko hikuái ipahaite peve … [ha] ojesalva hikuái.”¹¹ Tekovekuéra oñemoĩ oipe’a hag̃uáicha ikorasõ ha omomba’apo ijerovia, ha upéi Ñandejára omoambue ikorasõ. Ha mba’eichaitépa tuicha upe ñemoambue! Epensa tekove ñemoambue oĩva ko’ã mokõi kuimba’épe hérava Alma iñambue mboyve ha uperire ikorasõkuéra.¹²

Ñande Tupã ra’y ha rajykuéra orekóva peteĩ destíno iporãmbajepéva. Ikatu ñañemoambue jajogua hag̃ua Chupe ha jareko “peteĩ vy’a plenitu.”¹³ Satana, ambueháicha, oipota ñane miserable ha’éicha.¹⁴ Jareko kapasida jaiporavo hag̃ua avápepa jasegi.¹⁵ Jasegívo Satanáme, ñame’ẽ chupe taipu’aka.¹⁶ Jasegívo Tupãme, Ha’e ome’ẽ ñandéve tañandepu’aka.

Salvador ombo’e “ñañemoĩ porãmbava’erãha.”¹⁷ Kóva ikatu ñanemoñandu’i. Ahecha porã che insuficiencia personal ha ñembyasy reheve ahechakuaa distancia oĩva che ha pe ñeimeporãmba mbytépe. Ikatu jareko peteĩ tendénsia ñapensávo ñaimeporãmbava’erãha, ha katu upéva ndaikatúi. Opa mundogua kuatiañe’ẽ autoayuda rehegua he’íva jesegi ndohupytykamo’ãi. Peteĩ tapénte oĩ ha peteĩ téra ikatuha rupi ñañemoĩporãmba. Ñande “ñañemoĩporãmba Jesús rupive, pe konvénio pyahu mediador, ojapóva ko expiasiõ iporãmbáva huguyete oñeñohẽ rire.”¹⁸ Ñande ñeimeporãmba ikatúnte ojehupyty Tupã grásia rupive.

Peñeimahina piko mba’eichaitépa omokane’õva’erãmo’ã ore niéto Aarón mitãitépe g̃uarã oikuaárõ ha’ete ohechakuaa ha ojapova’erãha opa umi procedimiento médiko oguerúva upe trasplante? Nañaimo’ãiva’erã jajapova’erãha upe Salvador-nte ikatúva ojapo pe milagroso proceso ñande perfección reheguápe.

Ojapopávo ijehai, Moroni ombo’e, “Héẽ, peju Cristo-pe, ha penderekoporãmbaite ipype … ha ndapejapóivo mba’eve ivaíva, ha pehayhúramo Tupãme opa pene ánga, apytu’ũ ha mbarete reheve, upéicharamo iporãntema igrásia peẽme g̃uarã, igrásia rupi penderekoporãmbaitéramo Cristo-pe.”¹⁹ Mba’eichagua añetegua ñanembopy’aguapy ha imbaretévapa! Igrásia iporã chéve g̃uarã. Igrásia iporã peẽme g̃uarã. Igrásia iporã opavavépe g̃uarã, umi oĩva “mba’apo ha kárga reheve.”²⁰

Umi Aarón tratamiento medikoguáicha, akóinte oĩ upe resultado jeikuaa’ỹ. Péina upéicha, Aarón oikotevẽkuri peteĩ trasplante mokõiha upe peteĩha nosẽporãire. Po’arã niko, peteĩ korasõ ñemoambue espiritual, nañañeporanduiva’erã oikótapa. Jaikovéramo oipotaháicha, “jajeroviapávo upe ipoderósova oporosalva hag̃ua méritore,”²¹, oĩ peteĩ 100 por ciento garantía ñañemopotĩvo Salvador ruguýre ha sapy’ánte ñañemoĩporãmbávo Ipype. Ha’e ningo “peteĩ Tupã añetegua, ha [ndaikatúi] ijapu.”²²

Ndaipóri dúda ko ñemoambue proceso orahaha tiempo ha ndopamo’ãiha ko tekove opa rire peve, ha katu pe promésa isegúro. Umi Tupã ñekumpli ha’etéramo hi’aretaha, ja’aceptánte jahávo umi promésa jaikuaávo oikotaha.²³

Pe ñemoambue milagroso Aarón resãime ogueru tuicha vy’a ore familia-pe Peñeimahinamína pe vy’a tuichaite yvágape oikóva ñemoambue mbarete oiko jave ñane ángape.

Ñande Ru Yvagagua ha ñande Salvador, Jesucristo, ñanderayhu ha igrásiape oñekuave’ẽ hikuái ñanemoambue ha ñanemoĩporãmba hag̃ua. Ha’ekuéra ojapose upéva. Ifundamental Hembiapo ha Iglóriape g̃uarã.²⁴ Atestifika Ha’ekuéra ipokatuha ojapo hag̃ua kóva ñañemoag̃uivo Hesekuéra jerovia reheve. Jesucristo rérape, Amén.