Umi mboriahu ha oiko’asývape ñeipytyvõ

Che hermano ha hermana-kuéra, Presidente Russell M. Nelson jahayhuetévape oñe’ẽta ñandéve uperireve ko sesiõme. Ha’e ojerure chéve añe’ẽraẽ hag̃ua.

Che téma ko árape oñe’ẽ Jesucristo Tupao Santokuéra Ára Pahapegua ha imiembrokuéra ome’ẽva ha ojapóvare umi imboriahu ha oiko’asývape. Avei añe’ẽta donasiõ peichaguáre oúva ambue tekovekuéra marangatúgui. Umi oikotevẽvape ñeme’ẽ ha’e peteĩ principio opa religión abrahámica-pe ha avei ambuekuérape.

Ojapo mése, Jesucristo Tupao Santokuéra Ára Pahapegua omomarandu ñepyrũ moõite pevépa ohupyty ñande rembiapo umanitário opa múndore.¹ Ñande gasto 2021-gua umi oikotevẽvape g̃uarã 188 tetãme pe múndo jerére ojupíkuri $906 millones-pe, haimete mil millones de dólares. Avei, ñane miembro-kuéra oikuave’ẽ 6 millones rasa tembiapo óra mba’apo voluntáriope upéichagua káusape.

Umi cifra ha’e, añetehápe, peteĩ informe oĩmba’ỹva umi ñame’ẽ ha ñaipytyvõvagui. Ndoikéi umi servicios personales ñane miembro-kuéra ome’ẽ peteĩteĩva oñoministrávo umi puésto oñehenoihápe ha upe servicio voluntario ome’ẽva miembro miembro-pe. Ha ore informe 2021-pe nde’íri ñane miembro-kuéra ojapóva peteĩteĩ umi ojeipapakuaa’ỹva organisasiõ karitatíva rupive noĩriva conectadas formalmente ñande Tupaóre. Añepyrũ ko’ãvare.

1831-pe, haimete mokõi áño pe Tupao rrestaurádo oñeorganisa rire, Ñandejára ome’ẽ ko rrevelasiõ ojeguia hag̃ua imiembrokuérape ha, aimo’ã, opavave Ita’yrakuérape opa mundopýre:

“Péina ápe, naiporãigui che amanda opa mba’épe; pe oje’évape opa mba’e, ha’e peteĩ tembiguái iñate’ỹ ha iñarandu’ỹva. …

“Añetehápe, che ha’e, tekovekuéra oñekonsagrapaiteva’erã peteĩ káusape, ha ojapova’erã heta mba’e ijehegui ha ojapova’erã heta hustísia;

“Pe pu’aka oĩgui ipypekuéra, ha pévape ha’e hikuái ahénte ijupe g̃uarã. Ha tekovekuéra ojapóramo pe iporãva, mba’evéicharõ ndopytamo’ãi ijopoi’ỹre.”²

38 áño rasa Apóstol ramo ha 30 rasa mba’apo profesional-pe, ahecha heta ñeha’ã ipy’aporãva umi organisasiõ ha tekovekuéragui ko rrevelasiõ ohenóiva “peteĩ káusa porã” ha “oja[póvo] heta hustísia.” Oĩ hetaiterei umi ehémplo peichagua servicio umanitáriogui opa múndore, amo gotyove ñane frontera-gui ha amo gotyove ñane conocimiento común-gui. Ahechávo kóva, apensa rréi Benjamín-re, Mormón Kuatiañe’ẽmegua profeta, isermón-pe oikéva ko añetegua ijapyra’ỹva: “peime jave pende rapicha pytyvõme, peimehánte pende Tupã pytyvõme.”³

Jesucristo Tupao Santokuéra Ára Pahapegua, ha miembro-kuéra ramo, ñambo’e ha ñamba’apo servísio umanitário ha bienestar-re ñande rapichápe. Ehémplore, ña’ajuna káda ára peteĩha mes ryepýpe ha ñakontrivui jepeve umi ojoguáva pe tembi’u ndoje’úivape oñepytyvõ hag̃ua oikotevẽvape umi ñane kongregasiõme. Tupao avei ojapo umi ñeme’ẽmby tuichaitéva servísio umanitário ha ambueichaguáva opa mundopýre.

Opaichavérõ ñande Tupao ojapo directamente, hetave párte Tupã ra’ykuéra servicio humanitário opa mundopýre ojapóva hikuái tekovekuéra ha umi organisasiõ ndorekóivandi peteĩ conexión formal ñande Tupaóndi. Ohechaháicha peteĩva ñande Apóstol-kuéra: “Tupã ojevale peteĩ hetave távare ojapo hag̃ua hembiapo tuichaite. … Ipyeterei, oporomokane’õiterei opa távape g̃uarã”.⁴ Tupao rrestaurádo miembro-kuéra ramo, ñaimeveva’erã consciente ha ñamomba’eve ambuekuéra servicio.

Jesucristo Tupao oñekompromete oservívo umi oikotevẽvape, ha avei oñekompromete okooperávo ambuekuéra ndive upe ñeha’ãme. Ramoite rojapo peteĩ donasiõ tuichaite Programa Mundial de Alimentos-pe Naciones Unidas-pe. Heta dékada ore rembiapo umanitáriope, mokõi organisasiõ ojedestaka irũnguéra clave-ramo: projecto-kuéra agencia Cruz Roja ha Media Luna Roja ndive hetaite tetãme ome’ẽva Tupã ra’ykuérape alívio porã umi desastre natural ha ñorairõ aja. Upéicha avei, jaguereko peteĩ asistencia historial puku Catholic Relief Services ndive. Ko’ã organisasiõ orembo’e heta umi jesokorre mundial-chaguágui.

Avei roguereko umi pytyvõ iporãva ambue organisasiõnguéra ndive, oikehápe Muslim Aid, Water for People ha IsraAID, ja’e sa’imívonte. Káda organisasiõ umanitária oguereko jepe hi’área espesialisasiõ rehegua, rokomparti pe objetivo común ro’aliviávo umi Tupã ra’ykuéra jehasa’asy. Opa umíva ha’e Tupã rembiapo párte Ita’yrakuérape g̃uarã.

Pe rrevelasiõ ko’ag̃agua ombo’e ñande Salvador, Jesucristo, ha’eha “pe tesape añetegua ohesapéva opa tekove oúva ko múndope.”⁵ Upéva rupi, opavave Tupã Ra’y ojehesape oservi hag̃ua Chupe ha ojupe ikuaapy ha ija’bilida he’iháicha.

Mormón Kuatiañe’ẽ ombo’e “opa mbaʼe oporohenóiva ha oporomokyreʼỹva ojejapo hag̃ua iporãva, ha ojehayhu hag̃ua Tupãme, ha oñeipytyvõ hag̃ua chupe, ou Tupãgui.”⁶

Okontinua:

“Ha péina ápe, opa yvypórape oñemeʼẽ Cristo Espíritu, omoambue hag̃ua iporãva ivaívagui; upévare, che ahechauka peẽme mbaʼéichapa pehusgavaʼerã; opa mbaʼe oporohenóiva ojejapo hag̃ua iporãva, ha oporomokyreʼỹva ojeguerovia hag̃ua Cristo-pe, oñembou Cristo puʼaka ha don rupive. …

“Ha ko’ág̃a, che joyke’ykuéra, … peikuaámavo tesape ikatuha rupi pehusga, tesape ha’éva Cristo resape.”⁷

Ko’ã ha’e ehemplokuéra Tupã ra’ykuéra oipytyvõva ambue Tupã ra’ykuérape, umi mba’e tekotevẽtévape oñemongaru, oñeipohãno ha oñembo’e hag̃ua:

Ojapo die áño, Kandharis-kuéra, peteĩ ména ha tembireko sij Emiratos Árabes Unidos-pe, ojapo personalmente peteĩ ñeha’ã ojehecharamóva omongaru hag̃ua umi iñembyahýivape. Pe templo Guru Nanak Darbar Sikh rupive, ko’ág̃a ojeservi hína hikuái 30,000 rasa tembi’u vehetariáno opa fin de semana jave oimeraẽva oikévape hokẽ rupive, ojehecha’ỹre irreligiõ térã irrása. Dr. Kandhari omyesakã, “Roguerovia peteĩteĩ ha’eha peteĩnte, ñande ha’e peteĩ Tupã ra’ykuéra, ha ñaime ko’ápe jaservi hag̃ua umanidápe.”⁸

Pe ñeipohãno ñeme’ẽ ha tãi rehegua umi oikotevẽvape ha’e ambue ehémplo. Chicago-pe, aikuaa peteĩ médiko sirio-estadounidense cuidados intensivos-gua, Dr. Zaher Sahloul. Ha’e peteĩva umi fundador MedGlobal-pegua, o’organisáva umi profesional médico-pe ome’ẽ hag̃ua itiémpo, habilidades, kuaapy ha liderazgo voluntario oporoipytyvõ hag̃ua crisis-pe, pe Siria guerra-peguáicha, Dr. Sahloul oarriesgahague hekove ome’ẽvo atención médica umi civil-pe. MedGlobal ha organisasiõnguéra peichagua (oikehápe heta umi profesional Santokuéra Ára Pahapeguáva) ohechauka Tupã omongu’eha hína fe-pegua profesional-kuérape ome’ẽ hag̃ua umi imboriahúvape alívio oikotevẽva opa mundopýre.⁹

Heta Tupã Ra’y intere’ỹva oikehápe umi mbo’ehaogua ñeha’ã, avei opa mundopýre. Peteĩ ehémplo porã, jaikuaáva umi ñane ñeha’ã umanitário rupi, ha’e peteĩ kuimba’e rembiapo ojekuaáva karai Gabriel ramo, ojerrefuhiava’ekue heta conflicto-gui hetave jey. Ramoite ohecha cientos de miles mitã rrefuhiádova África Oriental-pe oikotevẽha pytyvõ omantene hag̃ua oikovévo umi esperanza ha imentekuéra activa. Ombyaty ambue mbo’eharakuérape upe rrefuhiadogua población-gui umi ohenóivape “yvyra mbo’ehaokuéra”, mitãnguéra oñembyatyhápe omog̃uahẽ hag̃ua mbo’epykuéra peteĩ yvyrarakã kuarahy’ã guýpe. Noha’arõi ambuekuéra o’organiza térã odirihi, sino olidera ha’ete umi ñeha’ã ome’ẽva’ekue oportunida oaprende hag̃ua miles umi mitã escuela primaria-gua umi ipohyietéva áño desplazamiento aja.

Upéicha avei, ko’ã mbohapy ehémplo nde’iséi opa mba’e oje’eva’ekue térã ojejapova’ekue umi organisasiõ térã kuimba’ekuéra oĩporãmbaha térã Tupã mba’eha añete. Ko’ã ehemplokuéra ohechauka Tupã oinspiraha heta organisasiõ ha tekovépe ojapo hag̃ua heta mba’e iporãva. Avei ohechauka hetave ñandekuéra ohechakuaava’erãha mba’e porã ambuekuéra ojapóva ha oapoja, jarekopýpe tiémpo ha médio jajapo hag̃ua.

Ko’ãva ha’e umi servicio ehémplo Tupao oapojáva ha ñane miembro-kuéra ha ambue tekovekuéra marangatu ha organisasiõnguéra avei oapoja tiémpo ha pirapire umi donación individual reheve:

Añepyrũ libertad religiosa-re. Ojeapojávo kóva, jaservi umi ñande interés tee, ha avei ambue religión-kuéra interés. Ombo’e haguéicha ñande presidente ypykue, José Smith, “Rorreklama derécho roadorávo Tupã Ipu’akapávape ore conciencia he’iháicha, ha rome’ẽ avei opa kuimba’épe upe privilegio: toadora mba’éicha, moõ ha oipotáva.”¹⁰

Ambue ehemplokuéra umi Tupao rrestaurádo asisténsia umanitária ha ambueichaguáva avei ojeapojáva voluntariamente ñane miembro-kuérare ha’e umi ñane mbo’ehao ojeikuaaitéva, colegio ha universida ha umi ojeikuaa’ivéva ha katu ko’ág̃a ojepublikáva tuicha donasiõramo umi ohasa’asýva aliviorã destrucción ha desplazamiento-kuéra desastres naturales rupi umi tornádo ha yvyryrýire.

Ambue actividades benéficas ñane miembro-kuéra oapojáva umi idonasiõ ha iñeha’ã voluntarios-pe hetaiterei ja’e hag̃uáicha, ha katu ja’emívonte ko’ã mba’e ohechaukátama ivarieda ha importancia: racismo ñekombati ha ambue prejuicio-kuéra; ojehekávo mba’éichapa oñepreveni ha oñemongueráta mba’asykuéra, umi ikapasida’ỹvape ñeipytyvõ, umi organización de música jeapoja, ha entorno moral ha físico ñeimeporãve opavavépe g̃uarã.

Opa Jesucristo Tupao Santokuéra Ára Pahapegua ñeha’ã umanitário oheka osegi peteĩ tavaygua ijojáva ehémplo oñemombe’uháicha Mormón Kuatiañe’ẽme: “Ha péicha, iñakãrapu’ãme ndohejareíri hikuái avave ijopívova, térã iñembyahýiva, térã ijy’uhéiva, térã hasýva, … ha ha’ekuéra … ipojera opavavéndi, itujáva térã imitãva, ojejokuáva térã isãsóva, kuña térã kuimba’e, ha’éva tupaogua térã umi tupao’ỹva ndive.”¹¹

Atestifika Jesucristo-gui, pe hesape ha Espíritu oguiáva opa Tupã ra’ykuérape oipytyvõ hag̃ua umi imboriahúva ha oiko’asývape opa múndore. Jesucristo rérape, Amén.