Ua Feagai i Tatou ma se Mala Matautia

O’u uso pele e, o se mea lelei tele le faatasi ai ma outou i lenei sauniga sili ona toatele o le perisitua. Ou te matea o le faatasiga sili lava lenei ona toatele o le perisitua ua faapotopoto ai. E matuai eseese lava ma le faatasiga lea na faamatalaina e Wilford Woodruff ina ua faapotopoto uma le perisitua i le lalolagi atoa i se potu se tasi i Katelani, Ohaio, e mauaina faatonuga mai le Perofeta o Iosefa.

Ua tatou faalogo i ni fautuaga lelei tele i lenei afiafi, ma e ou te faailoa atu ia te outou le matuai lelei lava.

A o o’u tuuina atu ni o’u manatu faaiu ou te tau matamuli foi e talanoa atu i se autu sa ou tautala foi i ai muamua. Ou te tautala atu ai i le agaga o upu a Alema: “O lo’u mitamita lenei, atonu e avea a’u ma tufuga aao o le Atua i le taitaiina mai o se agaga i le salamo” (Alema 29:9).

O le agaga lena lea ou te fia tautala atu ai i lenei afiafi. O le mea o le a ou tautala atu ai e le fou. Sa ou talanoa atu ai muamua. O le lomiga o le Ensign ma le Liahona o Setema o loo momoli atu ai foi se tautalaga sa ou faia i ni tausaga ua mavae i le autu lava lea e tasi. O lea foi sa saunoa i ai Uso Oaks i le po nei.

E ui o le mataupu o le a ou tautala atu ai sa avea ma faafitauli i na taimi, ae ua avea ma se faafitauli ua sili ona matuia i le taimi nei. Ua faateteleina le leaga. E pei o se afa fulifao, ua faatafunaina ai tagata taitoatasi ma aiga, ua faaleagaina atoa ai le mea sa atoatoa ma matagofie. Ou te tautala i tusi ma ata mataga i soo se ituaiga.

Ua ou faia ona o tusi na oo mai ia te a’u mai ni ava ua lofituina i le faanoanoa.

E tatau ona ou faitauina atu ni vaega o se tasi tusi na mauaina i nai aso e le’i mamao atu. Ua ou faia i le maliega a le na tusia. Ua ou aveeseina soo se mea e ono iloa ai i latou o loo aafia. Ua ou faia ni nai suiga ina ia manino ma sosolo lelei ai le gagana.

O le a ou faitauina:

“Lau Susuga Peresitene Hinckley,

“E le’i mamao atu talu ona maliu lo’u toalua mo le 35 tausaga… . Na feiloai o ia ma lo matou epikopo lelei i se vave sa ia mafaia ina ua mavae lona taotoga mulimuli. Ona ia sau lea ia te a’u i le afiafi lava lena ma ta’u mai ia te a’u sa ma’ivalea o ia i tusi ma ata mataga. Na ia manao ina ia ou faamagalo ia te ia [a o le’i oti]. Na ia toe faapea mai ua lē lava ola ai i ni olaga se lua. [Sa galue o ia i le tele o tofiga taua] o le Ekalesia a o ia iloaina foi i lena lava taimi, o loo puleaina o ia e le ‘isi ona matai.’

“Sa ou matua ofo, tiga, lagona le faalataina ma le ’olegia. Sa le mafai ona ou folafola atu ia te ia le faamagaloga i lena taimi ae sa talosagaina sina taimi… . Sa mafai ona ou iloiloina lo’u olaga faaipoipo [ma le auala] na titina ai e ponokarafi … le ma ulugalii i le popofou o le ma faaipoipoga. Sa na o ni nai masina talu ona ma faaipoipo ae sau ma aumai i le fale se mekasini o ata mataga [ponokarafi]. Na ou lokaina o ia i fafo o le taavale, aua sa tiga lo’u loto ma ou ita… .

“O le tele o tausaga i le ma ulugalii … e inaina ai lava o ia i mea e manao i ai. E le’i lava foi lo’u lelei mo ia… . Sa ou lagonaina le faatoilaloina i lena taimi ma oo ai i se tulaga o le matuai faanoanoa… . Ua ou iloa nei sa faatusatusa ai se ‘tupu tamaitai o tusi ma ata mataga’… .

“Na ma o atu i se tasi taimi i le ofisa faapitoa mo ni fautuaga ma … sa amata ona osofai a’u e lo’u toalua i ana faitioga ma le inoino ia te au …

“Na le mafai ona ou toe oso i totonu o le taavale faatasi ma ia ina ua uma lena mea, ae sa ou savalivali solo i le taulaga … mo ni itula, ma mafaufau i le pule i le ola. [Sa ou manatu,] aisea ou te saga ola ai pea pe afai o le lagona lea o la’u ‘soa e faavavau’ ia te a’u?

“Sa ou ola pea, ae sa ou faamauina se talipupuni e puipuia ai a’u lava. Sa ou ola mo nisi mafuaaga e ese mai i lo’u toalua, ma sa ou maua le olioli i la’u fanau, i galuega faatino ma mea na mafai e a’u lava ia ona faataunuu… .

“Ina ua mavae ona ta’uta’u mai lona sese ae ua lata ina oti ma [ua uma lena o se taimi] sa ou va’iliina lo’u olaga, sa ou fai atu ia te ia, ‘E te leiloa lau mea ua fai?’ … sa ou ta’u atu ia te ia sa ou aumaia se loto e mama atoatoa i totonu o le ma ulugalii, ma tausia ia mama i le taimi o le na mafutaga, ma faamoemoe ia tausia pea ia mama e faavavau. Aisea na le mafai ai ona ia faia le mea lava lea e tasi mo a’u? Na pau lava le mea sa ou manao i ai o le lagonaina lea o le faatauaina ma le tausia i ni nai upu ma ni faiga lelei … nai lo le fai e pei o se pologa… .

“O lea ua tuua nei a’u ma le faavauvau e le gata i lona alu ese atu, ae faapea foi mo se mafutaga semanu e mafai [ona manaia, ae sa le mafai]… .

“Faamolemole ia lapatai atu i tuagane (ma uso). O ponokarafi po o tusi ma ata mataga, e le o se mea e faaosofia ai ni lagona faamalieloto pe faamalie ai foi mata pe a matamata i ai. [Ae] o loo i ai ni aafiaga o le faataumaoiina o loto ma agaga i le mea e gata ai, e faatamaia ai mafutaga ia e tatau ona paia, e faatiga ai le loto o i latou o e sili ona tatau ona e alofa i ai.”

Ona ia sainia lea o le tusi.

Oka se tala ina a matuai faanoanoa ma matautia. Ua ou aveeseina nisi o vaega o faamatalaga auiliili, ae ua lava mea na ou faitauina atu e mafai ai ona outou pueina mai ai ona lagona loloto. Ae faapefea lana tane? Na maliu o ia i se oti tiga mai le kanesa, o ana toe upu o se ta’uta’u atu lea o se olaga na tumu i le agasala.

Ma o le agasala, o le matamata lea i tusi ma ata mataga. E amioga faatiapolo. E matuai le ogatasi lava ma le agaga o le talalelei, faatasi ma le molimau a le tagata lava ia i mea a le Atua, faapea ma le olaga o se tasi ua faauuina i le perisitua paia.

E le na o le pau lea o le tusi ua ou mauaina. Ua lava tusi ua maua ua faatalitonu ai a’u, o se faafitauli matuia lea tatou te feagai. E mafua mai le tele o punaoa ma ua faailoa mai lava o ia i auala eseese. Ua matua faateleina nei e ala i le Initoneti. O lena Initoneti ua le na o tagata matutua o faaaogaina, ae e faapea foi tupulaga talavou.

Ua fautuaina a’u faapea o tusi ma ata mataga ua avea ma se pisinisi ua $57 piliona i le lalolagi atoa. E sefululua piliona o lenei aofaiga o loo maua i totonu o le Iunaite Setete e ala i “tagata faatuputupu leaga” (tagai MFF 89:4) o e o loo saili ‘oa mai tagata o e faigofie ona faaseseina. Ua lipotia mai faapea e tele atu tupe maua mai tusi ma ata mataga i totonu o le Iunaite Setete nai lo tupe maua pe a “tuufaatasi vaega o loo umia au lakapi, peisipolo ma le pasiketipolo po o tupe maua tuufaatasi a kamupani o le ABC, CBS, ma le NBC.” (“Internet Pornography Statistics: 2003”, Internet, http://www.healthymind.com/5-port-stats.html).

E faoa ai le taimi faigaluega faapea ma taleni a tagata faigaluega. “E 10% o alii ua tautino mai le matamata i ata mataga i le taimi o galuega. E 13% o tamaitai [latou te faia foi]… . 20% o tagata matutua ua fai ma amioga masani le matamata i feusuaiga i le Initoneti” (“Internet Pornography Statistics: 2003”). O le latou tautinoga lena, ae o le mea moni lava ia e mafai ona maualuga atu fuainumera.

O le Vaega Tuufaatasi mo le Puipuia o Fanau ma Aiga ua faapea mai “E tusa ma le 40 miliona tagata i totonu o le Iunaite Setete o loo aafia i feusuaiga i luga o le Initoneti… .

“E toatasi le tamaitiiti mai le toalima e i le va o le 10–17 tausaga [ua] mauaina se talosaga mo fesootaiga o feusuaiga i luga o le Initoneti… .

“O le tolu miliona o tagata na faaaogaina le tuatusi mo tagata matutua ia Setema 2000 o le 17 tausaga po o lalo ifo… .

“O feusuaiga o le autu numera 1 lea o loo sailia i luga o le Initoneti” (NCPCE Online, “Current Statistics,” Internet, http://www.nationalcoalition.org/stat.html).

E mafai ona ou faaauau pea, ae o outou, ua outou iloa foi le matuia o le faafitauli. Ua lava le faapea atu o i latou uma o loo aafia ai ua avea ma e manunua. Ua faaaogaina fanau ma ua matuai faaleagaina lava o latou olaga. O mafaufau o talavou ua faaleagaina i manatu sese. O le faaauau pea ona matamata i ai e taitai atu ai i le fai ma masani lea e toetoe lava a le mafai ona momotu. O alii, o le toatele lava, ua latou iloaina e le mafai ona tuua. O o latou malosiaga ma mea e fiafia i ai ua alu uma i a latou sailiga o lenei mea mataga ma le inosia e leai se aoga.

O le alofaga lava e faapea ua faigata ona aloese mai ai, ma ua faigofie ona maua ma ua leai se mea e solaese mai ai.

Faapea o se afa ua agi malosi ma ua ūū le matagi ma faataali’oli’o solo le kiona ia te oe. Ua e iloa e le mafai ona e taofia. Ae e mafai ona fai lelei ou ofu ma saili se malutaga ma o le a leai lava sou aafiaga i le afa.

E faapena foi, e ui lava ua lofia le Initoneti i mea leaga, ae le faapea e tatau ona e matamata i ai. E mafai ona e mapu atu i le malutaga o le talalelei ma ona aoaoga o le mama ma le ola atoatoa.

Ou te iloa o lea ou te talanoa manino ma tuusao atu. Ua ou faia ona o le Initoneti lea ua mafai ai ona faalauteleina atu tusi ma ata mataga, ma o DVD ma vitio o loo faapea foi ona maua. O loo i luga o fata o televise ma mekasini. E tau atu ai i ni gaoioiga e faatafuna ai le tauaogaina o le tagata ia. E tau atu ai i fesootaiga le mama, e masani ona oo atu ai i faamai, ma gaoioiga faatautala faasolitulafono.

Uso e, e mafai ona sili atu mea tatou te faia nai lo lenei. Ina ua aoao atu le Faaola i le motu o tagata, na Ia fetalai, “Amuia e loto mama, aua latou te iloa atu le Atua” (Mataio 5:8).

Pe mafai ea e se tasi ona moomoo i se isi faamanuiaga e sili atu nai lo lenei? O le ala sili ona lelei o le amiosolia, o le lotopulea, o le olaga atoatoa o le auala lena mo alii, i e talavou ma e matutua, o e ua umia le perisitua a le Atua. I alii talavou ou te tuuina atu i ai le fesili lenei, “Pe mafai ona outou mafaufau ia Ioane le Papatiso, o le na toefuataiina mai le perisitua o loo outou umia, o aafia i ni faiga faapenei?” O outou alii matutua, “Pe mafai ona outou mafaufau ia Peteru, Iakopo, ma Ioane, o Aposetolo a lo tatou Alii, o faia ni mea faapea?”

E leai, e mautinoa e leai. O lenei uso e, ua oo mai le taimi mo soo se tasi o i tatou o loo aafia ai ina ia tosoeseina mai o ia lava mai lenei faiga mataga, ia tulai a’e i luga mai lenei mea leaga, ia “vaai atu i le Atua ma ola ai” (Alema 37:47). E le tatau ona tatou matamata i mekasini e faaoso ai tuinanauga. E le tatau ona tatou faitauina ni tusi e tumu i mea mataga. E le tatau ona tatou matamata i televise e matuai maualalo lava faatulagaga. E le tatau ona tatou faaune maia ni tifaga e faaalia mai ai ni mea eleelea. E le tatau ona tatou nonofo i le komepiuta ma taaalo ai i ata ma tusi mataga o loo maua i le Initoneti.

Ou te toe fai atu, e sili atu mea tatou te mafaia nai lo lenei. E tatau ona sili atu mea tatou te faia nai lo lenei. O i tatou o alii o i ai le perisitua. O se meaalofa sili lenei ona paia ma ofoofogia, e sili atu lona tau nai lo mea le aoga o le lalolagi. Ae o le a leai se aoga o lena perisitua mo soo se tasi o loo aafia i le faiga o le sailia o mea e i ai tusi ma ata mataga.

Afai e i ai soo se tasi o loo faalogo mai i lo’u leo o loo faia, ona e ole atu lea i le Alii mai le taele o lou agaga ina ia aveeseina e Ia mai ia te oe le mea ua fai ma au masani lea ua faapologaina ai oe. Ma ia e maua le lototele e saili ai le taitaiga alofa a lau epikopo, afai e talafeagai ai, o le fautuaga a ni tagata atamamai manatu popole.

Soo se tasi lava o loo piimau i lenei uiga leaga, ia tootuli i ona tulivae na o ia i lona afeafe ma aioi atu i le Alii mo le fesoasoani ina ia faasaolotoina i latou mai lenei mea leaga. A leai, o le a faaauau pea lenei pisipisia mataga i le olaga atoa ma e oo atu lava i le faavavau. Na aoao mai Iakopo, le uso o Nifae: “E oo foi pe a uma ona mavae atu tagata uma ai lenei muai oti i le ola, e iu ina le toe oti i latou, … o e amiotonu e amiotonu pea i latou, o e eleelea e eleelea pea i latou” (2 Nifae 9:15–16).

Na vaaia e Peresitene Iosefa F. Samita i lana faaaliga i le asiasiga a le Faaola i agaga o e na maliliu, e faapea “e lei maliu atu o ia i e amioleaga, e lei faalogo foi lona siufofoga e i latou o e amioletonu ma e ua le salamo, o i latou ia na faaleagaina e i latou i latou lava a o i ai i la le tino” (MFF 138:20).

O lenei, o’u uso e, ou te le manao ou te faitio atu. O lo’u natura o le mautinoa lea o mea e oo mai. Ae o mataupu faapea ou te iloa e moni o loo tupu. Afai o loo tatou aafia nei i sea ituaiga amioga, o le taimi lenei e sui ai. Ia avea lenei taimi e faia ai sa tatou faaiuga mausali. Ia tatou suia o tatou olaga ina ia mulimuli i se auala sili atu ona lelei.

Na fetalai le Alii: “Ia teuteuina ou manatu i le mama e le aunoa; ona malosi ai lea o lou faatuatua fai ifo i luma o le Atua; ma toto ifo i lou agaga le mataupu faavae o le perisitua e pei o le sau mai le lagi.

“E avea le Agaga Paia ma au aumea tumau, a o lou tootoo ma tootoo le feliuliua’i o le amiotonu ma le upumoni; o lou malo foi o le a faia ma malo faavavau, e aunoa foi ma faiga faamalosi o le a tafe ia te oe e faavavau faavavau lava” (MFF 121:45–46).

E mafai faapefea ona toe momoo se tagata mo nisi mea? O nei faamanuiaga paia ua folafolaina mai ia i latou o e savavali i ala o le loto mama i luma o le Alii, ma luma o tagata uma.

E maeu le matagofie o ala o lo tatou Alii. E maeu le mamalu o Ana folafolaga. Afai e faaosoosoina i tatou, e mafai ona tatou suia manatu faatiapolo i Ona manatu ma Ana aoaoga. Na Ia fetalai: “Ma afai tou te manatu tasi i lo’u mamalu, o lea faatumuina outou tino atoatoa i le malamalama, o le a leai foi se pouliuli ia te outou; o le tino foi ua faatumuina i le malamalama e malamalama i mea uma.

“O lea, ia outou faapaiaina ai outou lava ina ia tasi o outou mafaufau i le Atua, ma o le a oo mai foi aso tou te vaai ai ia te ia; aua o le a ia aveese le ufimata i ona fofoga ia te outou …” (MFF 88:67–68).

O outou tiakono ma aoao ma ositaulaga o e o loo faatasi ma i tatou i le afiafi nei, o outou alii talavou lelei o e o loo lufilufia le faamanatuga, ua fetalai mai le Alii ia te outou: “Ia mama outou o e tauave ipu a le Alii” (MFF 133:5).

I perisitua uma lava, o le faamatalaga o le faaaliga o loo manino ma e mautinoa foi: “ … O aia tatau a le Perisitua e faafesootaiina e le mavavaeeseina ma mana o le lagi, e le mafaia foi ona faatonuina pe faaaogaina ia mana o le lagi tau lava o mataupu faavae o le amiotonu” (MFF 121:36).

O lea ua ou iloaina nei, o’u uso e, o le toatele lava o outou e le o afaina i lenei amioga leaga. Ou te faamalie atu mo lo outou taimi ua alu ai. Ae afai o oe o se peresitene o le siteki po o se epikopo, se peresitene o le itu po o le paranesi, atonu e matuai lelei lava ona outou fesoasoani atu ia i latou o loo aafia ai. Ia taitaiina e le Alii lou atamai, taitaiga, musumusuga ma le alofa mo i latou o loo moomia.

Ia te outou uma lava, o e talavou po o e matutua, o e e le o aafia ai, ou te faamalo atu ia te outou ma tuuina atu la’u faamanuiaga ia te outou. E maeu le matagofie o se olaga e mulimulitai i aoaoga o [Lana] talalelei, o Ia o lē e aunoa ma se agasala. O se tagata faapea e savali e aunoa ma se sese i le malamalama o le ola mama ma le malosi.

Ia i ai faamanuiaga o le lagi ia te outou, o o’u uso pele. Ia tatou taufai aapa uma atu i soo se tasi o moomia le fesoasoani, ou te tatalo atu ai, i le suafa paia o Iesu Keriso, amene.