Sa Matou Faia Lenei Mea mo Oe

Ua silia teisi ma le tausaga talu ai, sa ma asiasi atu ai ma lo’u toalua i Navu. A o ma savavali e ui atu i le Fanuatanu o Paionia Anamua e tau saili le tuugamau o se tasi o o ma tuaa, o Saina Baker Huntington, sa ootia lo’u loto i le toafilemu ma le pāū atoa ai ma le agaga sa ou lagonaina. Sa ou savalivali solo i laau ma faitau igoa i luga o maa o tuugamau, o le toatele lava o tamaiti ma aiga. Sa ou tagi a o liliu atu lo’u loto i o’u augatamā, o le toatele lava sa auai i le Ekalesia ma o mai ai i Navu. Sa ou tuufesili i lo’u mafaufau: Aisea na tuua ai o latou fale lelei ma aiga? Aisea na latou pagatia ai i sauaga, o ma’i, ma le oti? Aisea na latou ositaulagaina ai a latou mea uma na i ai, ina ia o mai ai i lenei nofoaga ma fausia ai se malumalu? Sa tau leai so latou malutaga, ae sa latou fauina se malumalu! Aisea na latou faia ai? Ma ina ua lata ina mae’a le malumalu, na mafai faapefea ona latou tuua? A o ou nofonofo ma mafaufau loloto i lenei vaaiga, sa malosi le oo mai o le tali i lo’u mafaufau ma lo’u loto: “Sa matou faia lenei mea mo oe.”

O na upu, “Sa matou faia lenei mea mo oe,” na faamanatu mai ai ia te a’u, o o tatou augatuaa, faatasi ai ma le toatele o isi Au Paia faamaoni, sa latou ositaulagaina mea uma ona o a latou molimau ma le faatuatua ia Iesu Keriso. Sa latou iloa ua toefuataiina mai le talalelei i le lalolagi, ma sa taitaiina i latou e se perofeta a le Atua. Sa latou iloaina e moni le Tusi a Mamona, ma sa malamalama i lana savali ma le molimau. Sa latou iloa o le toefuataiga mai o ki o le perisitua, o le a mafai ai ona faamauina faatasi aiga mo le faavavau e ala i sauniga paia o le perisitua, ia e na o le malumalu e maua ai. Sa latou iloa o galuega faalemalumalu sa, o le ki i le faaolataga ma le faaeaga o le aiga o le tagata. Sa latou iloa le taua o lenei galuega, ma sa latou naunau e ofoina atu a latou mea uma sa i ai ina ia mafai ai ona saunia se fale e finagalo ai le Alii ina ia mafai ai ona faataunuu lenei galuega paia. Sa latou ositaulagaina mea uma ina ia mafai ai e augatupulaga ua mavae ma le lumanai ona maua o latou faamanuiaga e faavavau o le malumalu.

A o le’i malaga mai i Navu, sa tele se osigataulaga a le Au Paia ina ia fausia ai le uluai malumalu o lenei tisipenisione i Katelani, Ohaio. O iina sa faaali ifo ai le Alii lava Ia ia Iosefa Samita ma Oliva Kaotui. Sa faaali ifo ai foi isi avefeau faalelagi iina. O le tasi o i latou nei o Elia le perofeta sa toefuataiina mai, e ala i le Perofeta o Iosefa Samita, ki o le toefuataiga mai o le perisitua ma le “galuega tele e ao ona faia i malumalu o le Alii.”¹ Sa tupu lenei mea e tusa ai ma le folafolaga o loo tusia i le Mataupu Faavae ma Feagaiga lea na fetalai mai ai le Alii:

“Faauta, ou te faaali atu ia te outou le Perisitua, e Elia le perofeta… .

“Ma o le a totoina e ia i loto o fanau o folafolaga na faia i tamā, ma o loto foi o fanau o le a liliu i o latou tamā.

“Ana le faapea, e matua faatafunaina lava le lalolagi atoa i lona afio mai.”²

Sa malamalama uluai Au Paia i le uiga o lenei mau, ma i lena taeao matagofie i le fanuatanu tuai o Navu, na ou malamalama ai foi.

E mafai faapefea ona toto i loto o fanau folafolaga sa faia i tamā? E mafai faapefea ona liliu atu loto o fanau i o latou tamā? Na pau le mea e mafai ai, pe a tatou malamalama lea i lo tatou faasinomaga ma matafaioi i lenei galuega ma tumau le agavaa ma sauniuni e ulu atu i le malumalu ma faia galuega mo isi ua maliliu.

Na saunoa Polika Iaga, “E i ai sa tatou galuega e fai lea e tutusa le taua o lona faatinoga e pei foi o le galuega a le Faaola i lona faatinoga… . Ua tofia nei i tatou e fai la tatou vaega; lea e tatau ona avea ma galuega aupito silisili e mafai ona faia e le tagata i luga o le fogaeleele.”³

I le faaaliga e uiga i le faaolaina o e ua maliliu lea na tuuina atu ia Peresitene Iosefa F. Samita, sa ia vaai ai i le toatele o aloalii ma perofeta maoae, o ē sa i ai i le lalolagi a o le’i afio mai le Faaola. Sa ia vaai ai foi ia Perofeta Iosefa Samita, o Ailama Samita lona tamā, ma “isi agaga filifilia o ē sa faapolopolo e o mai i le atoaga o taimi ina ia galulue i le faataatiaina o faavae o le galuega tele i aso e gata ai.” ⁴ O ai isi agaga filifilia na? Sa i ai lo tatou augatupulaga faatasi ma taitai “sili ma le mamalu”, sa saunia ai i le lalolagi o agaga ina ia i ai i le lalolagi i le taimi lenei! O loo ta’u mai i tusitusiga paia, “E oo lava foi i le taimi a o le’i fananau mai i latou, sa aoaoina i latou, faapea foi ma le toatele o isi tagata, i a latou uluai lesona i le lalolagi o agaga ma sa saunia e o mai i le aso tatau a le Alii e galulue i lona tovine mo le faaolataga o agaga o tagata.” ⁵ O le galuega sa saunia ma faapolopolo ai i tatou e faataunuu e aofia ai “le fausiaina o malumalu ma le faataunuuina o sauniga iina mo le faaolataga o ē ua maliliu.”⁶

Sa mua’i vaaia foi e Polika Iaga le taimi lenei o loo tatou ola ai. Fai mai a ia, “Ina ia faataunuuina lenei galuega, e le tatau ona na o le tasi o le malumalu, ae ia faitau afe, ma le fiasefulu afe o alii ma tamaitai e o atu i nei malumalu ma faia galuega mo tagata sa soifua ai i le mamao o le a faaali atu i ai e le Alii.”⁷

A o ou laitiiti, sa aoaoina a’u e Matini le tamā o lo’u tina, o aso e gata ai, o le a soo le lalolagi i malumalu. I le taimi na faamatala mai ai e lo’u tamamatua lenei mea ia te au, sa faigata ona ou talitonu i ai. Ae sa ou ola a’e ma lenei malamalama ma le lagona i lo’u loto. Talu ai nei, sa ou matamata ai i le Fesootaiga Faavaomalo a le Ekalesia i lalo o “malumalu,” ma sa faigofie ona ou vaaia ai malumalu, o loo faasino mai i togitogi mumu, ua amata ona salalau i le lalolagi atoa.⁸

Na saunoa lo tatou perofeta pele o Peresitene Gordon B. Hinckley, “Ua tatou naunau … e avatu malumalu i tagata ina ia latou maua ai avanoa uma mo faamanuiaga taua e maua mai i le tapuai i le malumalu.”⁹ Ua silafia e lo tatou perofeta e faigata ona faia galuega faalemalumalu pe afai tatou te le latalata i se malumalu. O o tatou aso nei, ma o galuega faalemalumalu sa o le galuega lea sa saunia i tatou e fai. O se galuega mo augatupulaga uma, aemaise e aofia ai foi ma le autalavou o le Ekalesia.

Ina ia mafai ona faataunuu lenei galuega tele, e tatau ona tatou agavaa. E leitioa ona siosiomia i tatou i itu uma i mea ua mamanu e faalotovaivaia, faasalavei, pe faaleagavaaina ai i tatou. E ao lava ona tumau lo tatou tulimata’i atu, ma e tatau ona tatou manatua, o le malumalu o le mafuaaga lea mo mea uma tatou te faia i le Ekalesia.

O polokalama a le autalavou e pei o le Alualu i Luma o le Tagata Lava Ia ma le Tiute i le Atua, e uuna’ia ai le autalavou ina ia agavaa e o atu i le malumalu. Ua mamanuina nei polokalama ina ia fesoasoani ai i le autalavou e faia ma tausia ni ta’utinoga, ona saunia ai lea o i latou e osia ma tausia feagaiga. Latou te uuna’ia foi le autalavou e auai i le tusia o tusi talaaga, o talafaasolopito o aiga, ma le faia o papatisoga mo o latou augatuaa. O le tamaitusi o le Mo Le Malosi o le Autalavou, o loo aoao mai ai aoaoga faavae ma mataupu, afai e malamalama ma ola ai, o le a fesoasoani i le autalavou e o atu ai i le malumalu. O nei polokalama o ni meafaigaluega mamana e ao ona faaaoga e le autalavou, o matua ma taitai. E fesoasoani ai i le autalavou e sauniuni ina ia agavaa e ulu atu i le malumalu. Ma e le tau faatali a tatou talavou mo se misiona po o se faaipoipoga ona faatoa asiasi atu lea i le malumalu. E mafai ona i ai o latou aafiaga faalemalumalu e amata i le ta’i 12 tausaga e fai ai papatisoga ma faamauga, ma e mafai ona faaauau nei aafiaga i le taimi atoa o lo latou talavou seia oo ina matutua. E maoae faamanuiaga o le a “liligi ifo i luga” o i latou e faaeeina i totonu o malumalu, ma o se vaega o nei faamanuiaga o le a maua e o tatou talavou, pe afai latou te ola agavaa e auai atu i le maota o le Alii.¹⁰

I totonu o le Malumalu o Sate Leki, o le vaipapatiso o se nofoaga faagaeetia e i ai i taeao o Aso Toonai! Sa ou i ai iina i se tasi taeao po, e papatiso ai mo nisi o o’u augatuaa. A o ou nofonofo i luga o le nofoa e faatalitali ai i le itu e fai ai papatisoga, sa ou matauina se tamaitai talavou i lo’u itu tauagavale o loo faitau lona faamanuiaga faapeteriaka. O le teineitiiti i lo’u itu taumatau sa faitau ana tusitusiga paia. Sa ou fesili atu i ai pe na o atu ma nisi. Sa tali mai, “E leai, ma te o mai ma la’u uo i Aso Toonai uma. E atili ai ona lelei lo’u vaiaso.” O nei tamaitai talavou, faatasi ai ma le tele o isi alii ma tamaitai talavou, ua latou iloa se mealilo maoae—o le malumalu e le gata ina faamanuiaina ai o tatou aiga ma olaga o o tatou augatuaa, ae faapena foi i o tatou lava olaga. Ua folafola mai ia i tatou, o i latou e faaeeina i totonu o malumalu o le a o atu mai lea fale paia “o faaauupegaina i lou mana, ina ia i ai fo’i lou suafa ia te i latou, ma si’omia i latou i lou mamalu, ae leoleoina e au agelu.”¹¹ O faamanuiaga maoae nei ma folafolaga. O ai se talavou e le manao e sauniuni mo le mauaina o nei faamanuiaga, ina ia ola saogalemu ai i lenei lalolagi ua faatupula’ia ai le amioleaga?

Ina ua saunoa Peresitene Faust i alii talavou i le sauniga perisitua ia Oketopa talu ai, sa ia tuuina atu se lu’i ia i latou ina ia taulamua, ma avea ma se vaega o le galuega faalemalumalu sa ma talafaasolopito o aiga. Sa ia saunoa, “Ou te faamalosiau atu ia te outou … ia amata ona tatalaina le malamalama po o ai moni lava oe e ala i le aoao atili e uiga i ou augatuaa… . Ua matua faigofie lava ona e maua le anoanoai o faamaumauga o talafaasolopito faaleaiga e faaaoga ai le Initoneti i lau lava komepiuta i le fale, po o se ofisa autu o talafaasolopito o aiga e lata ane… . O galuega faalemalumalu e taua … aua ‘a aunoa ma i tatou; e le mafai ona faaatoatoaina i latou; e le mafai foi ona faaatoatoaina i latou e aunoa ma i tatou’”¹²

Ua saunia le autalavou “ona o aso faapenei.”¹³ E popoto ma atamamai i latou. Ua lava lo latou tomai i komepiuta ma le Initoneti. O i latou o se punaoa sili e le o faaaogaina mo le lelei o le lalolagi! Sa faapolopoloina i latou mo nei aso e gata ai, ma o loo i ai sa latou galuega tele e ao ona fai. Ma e le gata ina i ai sa latou galuega tele e fai iina, ae o le a avea foi le malumalu ma sulufaiga mo i latou, o le a puipuia ai i latou mai uunaiga ma faatosinaga o le lalolagi.

A o ou mafaufau i upu a Peresitene Faust, sa mafai ona ou vaai faalemafaufau i se autau o tupulaga amiotonu ua saunia ma agavaa e ulu atu i le malumalu. Ua mafai ona ou vaai atu i aiga o faamauina faatasi mo le faavavau. Ua mafai ona ou vaai atu i tupulaga o ē ua malamalama i le uiga o le avea ma “faaola … i le mauga o Siona.”¹⁴ Ua mafai ona ou vaai atu i tupulaga ua liliu atu o latou loto i o latou tamā.¹⁵ Ma ua mafai ona ou vaai faalemafaufau i tupulaga o tutupu a’e i se ala o le a latou o mai ai mai malumalu ua faatumulia i le malosi e tetee atu ai i uunaiga o le lalolagi.¹⁶ Ua mafai ona ou vaai atu i se augatupulaga o talavou o le a “tumau … i mea paia, ma lē liliuese.” ¹⁷

O Saina Baker Huntington, faatasi ai ma le toatele naua o isi Au Paia faamaoni, sa latou ositaulagaina mea uma ina ia mafai ai ona tatou maua faamanuiaga o le talalelei toefuataiina. Ou te tatalo ina ia mafai ona tatou malamalama i la tatou matafaioi i lenei galuega tele, ma tumau ai le agavaa e ulu atu i Ona maota paia. Ou te iloa afai tatou te faia lenei mea, o le a oo mai le aso fiafia pe a tatou feiloai ma o tatou toe feiloai ma o tatou tuaa, ma mafai ona tatou fai atu ia te i latou, “Na matou faia lenei mea mo outou.” I le suafa o Iesu Keriso, amene.